Isaías 26:19 - Tupàn zeꞌeg

¹⁹ Teko ureinuromo har umàno ma'e kwer uzewyr putar wikuwe wi pà wà nehe. Wanetekwer ukweraw wi putar wà nehe. Umàno ma'e kwer wapyta haw pe har ume'e putar urywete haw rupi uzegar pà wà nehe. Eremur kar zuwiri ywy rehe, nezewegatete umàno ma'e kwer uhem putar ywy wi wikuwe wi pà wà nehe.

Isaías 26:19 ပူးပေါင်းရင်းမြစ်များ

Jó 14:8

Aze hapo izemàner nehe, Aze izypy kwer umàno ywy pupe nehe,

Jó 29:19

Aiko putar ywyra ài ihe nehe, hapo 'y pe uhem ma'e ài nehe. Tuweharupi zuwiri umuàkym ywyra pyhaw. Aiko ywyra zàwe ihe.

Salmos 110:3

Amo 'ar mehe ereàmàtyry'ym putar ne wà nehe, o tuwihawete. A'e 'ar mehe teko neremiruze'eg ur putar newe zauxiapekwer romo wiko pà wà nehe. Zuwiri uzexak kar izi'itahy a'e. Nezewegatete uzemono'og putar kwàkwàmo oho ywytyr newe imonokatu pyrer rehe wà nehe, neàwàxi pà wà nehe.

Salmos 22:15

He'az uxinigahy ywy ku'i kwer ài a'e. Heapeku uzemog hezuru i'aromo. Hereityk pe umàno ma'e kwer ài ywy rehe ne.

Salmos 22:29

Teko amo wanuwi wiko wera'u ma'e paw uzeamumew putar henataromo wà nehe. Teko paw umuwete katu putar wà nehe. Azeharomoete umàno ma'e ràm paw umuwete katu putar wà nehe.

Salmos 71:20

Erepuraraw kar ma'erahy ihewe. Hemuzemumikahy kar pe no. Eremur wi putar nekàgaw ihewe nehe. Hepyro putar pe tywypaw wi nehe.

Salmos 88:11

Aipo uze'eg nepuruamutar katu haw rehe umàno ma'e kwer wapyta haw pe wà. Aipo a'e ma'e imumaw paw pe uze'eg puruwi netyryk 'ymaw rehe wà nehe.

Isaías 18:4

Ta'e Tupàn Tuweharupi Wiko Ma'e uze'eg nezewe ihewe a'e xe. — Hereko haw pe ywak rehe hereko mehe ame'e putar ywy rehe ihe nehe. Kwarahy uhyape katu àmàkyr 'ym mehe a'e. Zuwiri uzexak kar arozràn po'o haw 'ar mehe a'e. Nezewegatete ama'ereko heànoànog 'ym pà ywak rehe ihe, i'i Tupàn.

Isaías 25:8

Tupàn Tuweharupi Wiko Ma'e umumaw putar tuwe màno haw nehe. Nezewe mehe teko numàno kwaw wà nehe. Umuxinig putar teko paw wanehay kwer nehe, uzemumikahy ma'e wamurywete kar pà nehe. Umukàzym kar putar wemiaihu wamaranugar haw nehe. Tupàn Tuweharupi Wiko Ma'e umume'u ko ze'eg kwez kury.

Isaías 51:17

Eme'e, Zeruzarez, eme'e nepu'àm pà nehe. Tupàn Tuweharupi Wiko Ma'e u'u kar wekwahy haw peme win ài a'e. Pei'u ipupe paw rupi. Peka'u i'u re.

Daniel 12:2

Teko umàno ma'e kwer tetea'u wikuwe wi putar wà nehe. Amo wereko putar tuweharupi weko àwàm wà nehe. Amo upuraraw putar ma'erahy tuweharupi Tupàn izepyk àwàm wà nehe no, upuraraw putar tuweharupi iaiw haw wà nehe no.

Oséias 13:14

Aipo apyro putar heremiaihu wamàno àwàm wi wà nehe. Aipo namono kwaw umàno ma'e kwer waneta haw pe ihe wà nehe. O màno haw. Ezur kury. Erur ma'erahy neremipuraraw kar ràm nehe. O umàno ma'e kwer waneta haw. Erur purehe nezepyk àwàm nehe. Napuhareko kwaw ko teko ihe wà nehe.

Oséias 14:5

Aiko putar àmàn ài Izaew wanupe nehe. Hezuz putar ma'eputyr wanehe nehe. Iputyr nuzawy kwaw ma'eputyr iri her ma'e wà nehe. Wanapo ohoete wà, ywyra Irimano ywy rehe har wanapo ohoete haw ài wà.

Oséias 6:2

Mokoz 'ar pawire ru'u nehe, na'iruz 'ar pawire ru'u nehe, zanemukàg wi putar nehe. Zanemupu'àm putar nehe. Zane xiapo putar hemiapo putar haw tuweharupi nehe no.

Zacarias 8:12

Utym putar ma'eà'yz uiwy rehe katu haw rehe wà nehe, zeàmàtyry'ym 'ymaw rehe wà nehe. Uwà 'yw i'a katu putar wà nehe. Hezuz katu ma'e a'e ywy rehe nehe. Teko opo'o putar temi'u ràm tetea'u wà nehe. Àmàn ukyr putar ywak wi nehe. A'e ma'e paw amono putar heremiaihu umàno 'ym ma'e kwer wikuwe ma'e wanupe nehe.

Mateus 27:52

Tywypaw uzewàpytymawok a'e wà kury. Teko Tupàn hemiruze'eg tetea'u ukweraw wi a'e 'ar mehe a'e wà.

Mateus 27:58

Na'e Zuze oho Pirat huwa rupi kury. Wenoz Zezuz hetekwer umàno ma'e kwer izupe. — Pemono hetekwer umàno ma'e kwer 'aw awa pe nehe ty wà, i'i Pirat zauxiapekwer wanupe. Umur izupe wà.

Atos 24:15

Azeruzar Tupàn rehe ihe, 'aw awa wazàwegatete ihe. Teko ukweraw putar umàno re a'e wà nehe. Ikatu ma'e ukweraw wi putar wà nehe, ikatu 'ym ma'e ukweraw wi putar a'e wà nehe no. Paw rupi katete ukweraw putar amo 'ar mehe wà nehe, a'e wanupe. Aiko 'aw awa wazàwegatete ihe.

1 Coríntios 15:20

Nan kwaw nezewe. Azeharomoete Zaneruwihawete ukweraw umàno re a'e. A'e rupi xikwaw amogwer umàno ma'e kwer wakweraw pàwàm zane no.

Efésios 5:14

Aze zazeruzar Zaneruwihawete rehe nehe, zaiko putar 'aromo wata ma'e ài nehe. A'e rupi Tupàn i'i nezewe a'e, uze'eg imuapyk kar pà pape rehe a'e. Pe uker ma'e pe. Peme'e nehe. Pepu'àm pemàno haw wi pekweraw pà nehe A'e mehe Zaneruwihawete uhyape katu putar penehe a'e nehe.

Deuteronômio 32:2

Tuwe hepurumu'e haw nuzawy kwaw àmàn nehe. Àmàn ywy rehe ukyr katu ma'e nehe. Tuwe heze'eg nuzawy kwaw zuwiri hezuz ma'e rehe uhàz ma'e nehe.

Deuteronômio 33:13

Umume'u ko ma'e Zuze izuapyapyr wanehe. Tuwe Tupàn Tuweharupi Wiko Ma'e omono uze'egatu Zuze waiwy rehe nehe. Tuwe umugyr kar àmàn tetea'u hehe nehe. Tuwe umur 'yzygwar ohoete ma'e tetea'u hehe nehe no.

Deuteronômio 33:28

Teko Izaew wiko katu tuweharupi wà. Wiko zeàmàtyry'ym 'ymaw rehe ywy ikatu ma'e rehe wà. A'e ywy umur arozràn tetea'u wanupe. Umur win tetea'u wanupe no. Zuwiri tetea'u u'ar ywy rehe.

Filipenses 3:10

Hepurukwaw wer xo Zaneruwihawete rehe zo ihe kury. Xo hehe hepureruzar wer no. Ikàg wera'u a'e. A'e rupi ukweraw wi umàno re. Aputar a'e ikàgaw hezeupe. Upuraraw ma'erahy kwer. A'e rupi hepurupuraraw wer ma'erahy kwer rehe izàwe nehe no. Umàno no. Hereko wer izàwe no, hemàno mehe no.

Filipenses 3:21

Umàno re ukweraw mehe hetekwer ipyahu a'e. Numàno pixik kwaw hetekwer ipyahu ma'e nehe. Tur mehe nehe, umupyahu kar putar zaneretekwer nehe no, a'e rupi nazamàno pixik kwaw nehe no. Ta'e ikàg wera'u tuwe a'e xe. Wiko putar ma'e wazar romo teko wanuwihaw romo paw rupi katete nehe.

1 Samuel 2:6

Tupàn Tuweharupi Wiko Ma'e a'e, purumumàno kar ma'e romo hekon a'e. Purumuigo kar ma'e romo hekon a'e no. Umàno ma'e kwer waneta haw pe poromono kar ma'e romo hekon a'e. Umuzewyr kar teko a'e wi a'e no.