Isaías 26:16 - Tupàn zeꞌeg

¹⁶ Erezepyk neremiaihu wanehe, o Tupàn Tuweharupi Wiko Ma'e. Ma'erahy ipuraraw mehe uruze'eg newe.

Isaías 26:16 ပူးပေါင်းရင်းမြစ်များ

Salmos 142:2

Aze wyzài ma'e na'ikatu kwaw ihewe, amume'u izupe. Aze amo ikatu 'ym ma'e uzeapo ihewe, amume'u izupe.

Salmos 27:8

— Ezur hemuwete katu pà nehe, ere ihewe. — Aha putar nemuwete katu pà nehe, o Tupàn Tuweharupi Wiko Ma'e, a'e newe.

Salmos 42:4

Hereko awer rehe hema'enukwaw mehe hahy hepy'a ihewe. Hema'enukwaw Tupàn Hàpuzuhu pe teko tetea'u wanupi heho awer rehe ihe. Aexak kar ureho àwàm teko wanupe. Uruata oroho ure paw rupi ure. Urerurywete oroho uruzegar pà Tupàn ikatu haw imume'u pà.

Salmos 50:15

Aze herenoz pe ma'erahy ipuraraw paw 'ar mehe nehe, Apupyro putar ihe nehe. A'e mehe pemume'u putar hekatu haw nehe, i'i Tupàn wemiaihu wanupe.

Salmos 77:3

Tupàn rehe hema'enukwaw mehe azypyrog hekuhem pà ihe. Azypyrog ma'e rehe hema'enukwaw pà. A'e mehe azemumikahy.

Salmos 78:34

Tupàn uzuka amo wà. Na'e amo uzewyr izupe wà. Uzemumikahy wemiapo kwer rehe wà. Uze'eg Tupàn pe wemu'em 'ym pà wà.

Salmos 91:15

Herenoz putar wà nehe. Awazar putar waze'eg wanupe nehe. Aiko putar wanehe we ma'erahy ipuraraw mehe nehe. Apyro putar ihe wà nehe. Amuawate kar putar amogwer teko wanupe ihe wà nehe no.

Isaías 37:3

— Pemume'u ko ze'eg peho Izai pe nehe, i'i wanupe. — Kutàri uzeapo putar 'ar ma'erahy ipuraraw paw a'e nehe. Uzepyk waiko zanerehe wà. Zanemaranugar. Zaiko kuzà imemyrahy ma'e ikàg 'ym ma'e ài. Nupuner kwaw umemyr heitykaw rehe.

Jeremias 2:27

— Ereiko heru romo, aze amo i'i ywyra pehegwer pe wà nehe, — Ereiko hehy romo, aze i'i ita pe wà nehe, paw rupi imaranugar putar wà nehe. A'e ma'e uzeapo putar nehe, ta'e pewak pekupe hexak kar pà ihewe xe. Napewak kwaw penuwa hexak kar pà ihewe. Nezewe rehe we, ma'e zawaiw katu mehe peme nehe, pezur putar ihewe pepyro àwàm henoz tetea'u pà ihewe nehe.

Jeremias 22:23

Peiko ywyràkàxigyw Irimano wi herur pyrer wamyter pe. — Ni amo nuzapo kwaw ikatu 'ym ma'e zanewe wà nehe, peze peiko. Ma'erahy ihem mehe pekuhegatu putar nehe. Peiko putar kuzà umemyrzexak kar ma'e ài nehe. Hahy putar tuwe peme nehe.

Jeremias 29:12

Na'e herenoz putar pe nehe. Peze'eg putar ihewe nehe. Awazar putar peze'eg awer peme nehe.

Lamentações de Jeremias 2:19

Epu'àm tetea'u pyhaw Tupàn pe neze'eg pà nehe. — Hepyro pe nehe, ere izupe nehe. Ezakook nepy'a henataromo nehe. Nera'yr umàno waiko nahu za'akaw pe wà uma'uhez pà wà. Epyro wamàno haw wi ne wà nehe, ere izupe nehe.

Oséias 5:15

Na'e azewyr putar hereko haw pe nehe. Apyta putar a'e pe nehe. — Azeharomoete uruzapo ikatu 'ym ma'e ure, aze i'i ihewe ma'erahy ipuraraw mehe wà nehe, xo a'e mehe zo apytywà putar ihe wà nehe, i'i Tupàn.

Oséias 7:14

Wenoz mua'u ma'e ihewe wà. Ihewe uze'eg mehe uzemomor mua'u ywy rehe wà. Heiheihem tupàn a'ua'u wamuwete har wazàwe wà. Arozràn henoz mehe win henoz mehe uzekixikixi amo ae ywy rehe har wazàwe wà. A'e paw naheputar kwaw uzar romo wà.

Números 21:7

Na'e teko uze'eg oho Moizez pe wà kury. — Ikatu 'ym ma'e uruzapo Tupàn Tuweharupi Wiko Ma'e henataromo ure. Ta'e uruze'eg zemueteahy hehe ure xe. Uruze'eg zemueteahy nerehe ure no. Emuhem kar 'agwer mozaiw teko wamyter wi Tupàn pe ne wà nehe, i'i izupe wà. Na'e Moizez uze'eg Tuweharupi Wiko Ma'e pe teko wanehe kury.

Apocalipse 3:19

Aze azamutar katu teko ihe wà nehe, aze a'e teko uzapo ikatu 'ym ma'e a'e wà nehe, a'e mehe amume'u putar wanemiapo kwer ikatu 'ym ma'e wanupe ihe nehe. — Na'ikatu kwaw penemiapo kwer ihewe pa, a'e putar wanupe nehe. Apuraraw kar putar ma'erahy kwer wanupe ihe nehe no, ikatu 'ym ma'e wanemiapo kwer hekuzaromo ihe nehe no.

Juízes 10:15

Uze'eg wi Izaew Tupàn pe wà. — Azeharomoete uruzapo iaiw ma'e ure. Nezewe rehe we urepyro pe wanuwi kutàri nehe, i'i izupe wà.

1 Samuel 1:15

— Tuwihaw, i'i Àn Eri pe. — Naka'u kwaw ihe. Ni uwà tykwer na'u kwaw ni kàwiahy na'u kwaw ihe. Azemumikahy tuwe ihe. Amume'u ma'erahy heremipuraraw kwez Tupàn Tuweharupi Wiko Ma'e pe ihe.