Isaías 25:5 - Tupàn zeꞌeg

⁵ Nuzawy kwaw haku haw ywyxiguhu rehe har. Eremupytu'u kar amo ae ywy rehe har waànoànog ire ne wà, ureàmàtyry'ym mehe ne wà. Ywàkun umuakuir ywy a'e, 'ar haku mehe a'e, nezewegatete awa amo ae ywy rehe har ipuruzukaiwahy ma'e ihapukaz wer wàmàtyry'ymar waneityk mehe. Eremupytu'u kar wanehapukaz re ne wà.

Isaías 25:5 ပူးပေါင်းရင်းမြစ်များ

Salmos 105:39

Tupàn umupu'àm amo ywàkun wemiaihu wa'aromo. Pyhaw tata upu'àm ma'e wexak kar waho àwàm wanupe no.

Isaías 13:11

Tupàn Tuweharupi Wiko Ma'e uze'eg nezewe. — Azepyk putar ywy nànànar wanehe wakatu 'ymaw hekuzaromo nehe. Azepyk putar teko iaiw ma'e wanehe wanemiapo kwer ikatu 'ym ma'e hekuzaromo nehe. Amo teko wiko wera'u amogwer wanuwi wà. Amupytu'u kar putar nezewe waze'eg ire ihe wà nehe. — Aiko wera'u amogwer wanuwi ihe, ni'i wi kwaw wà nehe. Apyro teko ipuruzukaiw ma'e wakàgaw wanuwi ihe.

Isaías 14:19

Xo ne zo teko nanetym kwaw a'e wà. Ereiko kwarer izexak kar mehe umàno ma'e kwer ài. Teko uhuuhuk nerexak mehe wà: weityk neretekwer katu pe wà. A'e re upyropyrog hehe wà. Zauxiapekwer wanetekwer zeàmàtyry'ymawhu pe umàno ma'e kwer tetea'u upyk neretekwer wà. A'e zauxiapekwer uzetym oho ywykwar pupe ita tetea'u heta haw pupe wà.

Isaías 18:4

Ta'e Tupàn Tuweharupi Wiko Ma'e uze'eg nezewe ihewe a'e xe. — Hereko haw pe ywak rehe hereko mehe ame'e putar ywy rehe ihe nehe. Kwarahy uhyape katu àmàkyr 'ym mehe a'e. Zuwiri uzexak kar arozràn po'o haw 'ar mehe a'e. Nezewegatete ama'ereko heànoànog 'ym pà ywak rehe ihe, i'i Tupàn.

Isaías 25:6

Xiàw ywytyr rehe Tupàn Tuweharupi Wiko Ma'e uzapo putar mai'u hawhu ywy nànànar wanupe nehe. Werur putar temi'u ikatu wera'u ma'e a'e pe nehe. Werur putar win ikatu wera'u ma'e a'e pe nehe no.

Isaías 49:10

Na'ima'uhez kwaw wà nehe. Na'iziwez kwaw wà nehe. Kwarahy haku haw nuhem kwaw wanehe nehe. Ywytu haku ma'e ywyxiguhu wi ur ma'e kwer nupuraraw kar kwaw ma'erahy wanupe nehe, ta'e apuhareko katu ihe wà xe. Aexak kar putar waho àwàm wanupe nehe. Araha putar ytyzuzàmaw pe wà nehe.

Ezequiel 38:9

A'e a'e, hemiruze'eg a'e wà no, teko amo ywy rehe har tetea'u hehe we har a'e wà no, ur putar ikutyr àmànuhu ywytuaiw inuromo har ài wà nehe. Upyk putar ywy ywàkun ài wà nehe no.