Isaías 24:1 - Tupàn zeꞌeg

¹ Peme'egatu nehe. Tupàn Tuweharupi Wiko Ma'e umuaiw putar ywy nehe. Uzapo putar ywy ywyxiguhu romo nehe. Umuaiw putar ywy nehe. Umuhàmuhàz putar hehe har wà nehe no.

Isaías 24:1 ပူးပေါင်းရင်းမြစ်များ

2 Reis 21:13

Azepyk putar Zeruzarez rehe nehe. Kwehe mehe azepyk tawhu Xamari rehe. Azepyk Izaew wanuwihawete Akaw rehe no. Azepyk Akaw izuapyapyr wanehe no. Nezewegatete azepyk putar Zuta ywy rehe har wanehe ihe nehe. Amuhem kar putar teko paw Zeruzarez wi ihe wà nehe. Nuzawy kwaw kawaw imukatu pyrer imuwak pyrer nehe.

Neemias 1:8

Nema'enukwaw neze'eg awer Moizez pe neremimume'u kwer rehe nehe. — Pe Izaew pe, aze hereityk pe nehe, apumuhàmuhàz putar amo ywy rehe har wainuinuromo ihe nehe, ere Izaew wanupe Moizez pe imume'u kar pà.

Salmos 146:9

Tupàn Tuweharupi Wiko Ma'e uzekaiw amo ae ywy rehe arer zaneywy rehe wiko ma'e wanehe. Upytywà kuzà imen umàno ma'e kwer wà. Upytywà kwarer a'e wà, kuzàtài a'e wà no, aze wanu umàno wanuwi wà, aze wahy umàno wanuwi wà. Aze ikatu 'ym ma'e umume'u wemiapo ràm wà, Tupàn nuzapo kar kwaw wanupe a'e.

Isaías 13:13

Ihe Tupàn Tuweharupi Wiko Ma'e Ikàg Wera'u Ma'e aexak kar putar hekwahy haw hepuruzukaiw paw amo 'ar mehe nehe. A'e 'ar mehe amuryryryryz kar putar ywak ihe nehe. Amunyryk kar ywy henaw wi nehe no.

Isaías 13:5

Zauxiapekwer ur waiko Per ywy wi wà. Muitea'u waiwy. Ywy ahykaw wi wanur waiko wà. Wikwahy mehe Tupàn Tuweharupi Wiko Ma'e umumaw kar putar Mawiron a'e zauxiapekwer wanupe upaw rupi wà nehe.

Isaías 2:19

Tupàn Tuweharupi Wiko Ma'e izexak kar mehe ywy rehe har ukyze putar izuwi azeharomoete wà nehe. Uzàwehem putar oho itakwar pupe wà nehe. Wezyw putar ywykwar ohoete ma'e pupe wà nehe no, Tupàn ikwahy haw wi uhem pà wà nehe. Utyryk putar Tupàn Tuweharupi Wiko Ma'e tuwihawete romo heko haw ikàg ma'e wi wà nehe.

Isaías 24:19

Ywy uryryryryz putar oxoroxorok pà nehe. Uzepei'ài'àg putar upaw rupi nehe.

Isaías 24:20

Ywy uzemupy'àpy'àm putar uka'u ma'e ài nehe. Uzemutuhug xe kutyr nehe, pemutyr nehe no, 'amutyr nehe no. Nuzawy kwaw tàpuzràn ywytuaiw henataromo har nehe. Ikatu 'ygwer ywy hemiraha ipuhuz katu a'e. A'e rupi ywy nuzawy kwaw awa u'ar ma'e kwer nehe. Nupu'àm wi kwaw nehe.

Isaías 27:10

Tawhu pàrirogawaiha pupe imim pyrer, uzeapo teko heta 'ymaw romo kury. Ni amo nuiko kwaw a'e pe wà kury. Nuzawy kwaw ywyxiguhu. Uzeapo tapi'ak wamai'u haw romo. Ma'ea'yr u'u ka'api'i a'e pe upytu'u pà wà.

Isaías 29:16

Pemono ikatu 'ym ma'e ikatu ma'e hekuzaromo. Aipo ywyzuwa ikatu wera'u ima'ema'e har zapepo iapo har wi. Zapepo nuze'eg kwaw nezewe wapo arer pe. — Naheapo kwaw pe ne, ni'i kwaw. — Nerekwaw kwaw ma'e iapo haw, ni'i kwaw ywy'a wapo arer pe.

Isaías 29:2

A'e re Tupàn uzepyk putar a'e tawhu Tupàn pe imonokatu pyrer her ma'e rehe nehe. A'e pe har uzai'o putar wà nehe. Uzemumikahy putar wà nehe no. Tawhu nuzawy kwaw Tupàn henataromo ma'ea'yr hapy haw tuwykwer tetea'u rehe har nehe.

Isaías 30:32

Tupàn Tuweharupi Wiko Ma'e umupu kar putar ma'e imupu pyr nehe. Umupu kar putar wioràwiràn nehe no. Na'e unupànupà putar Axir uwyra pupe nehe. A'e ae uzàmàtyry'ym putar oho wà nehe.

Isaías 32:12

Pekwar pepuxi'a rehe pezemumikahy haw hexak kar pà nehe. Pezai'o nehe, ta'e zauxiapekwer umuaiw ywy ikatu kwer wà xe. Umumaw uwà tyw i'a katu kwer wà no.

Isaías 33:9

A'e ywy rehe har umumaw ywy ikatu haw hereko wà. Iaiw oho iko. Ywyra ywytyr rehe har Irimano ywy rehe har uxinig a'e. Ywyàpyznaw Xarom her ma'e uzeapo ywyxiguhu romo. Màxà ywy rehe Karamew ywytyr rehe ywyra u'ar wanuwer wà.

Isaías 34:10

A'e tata nuwew pixik kwaw nehe. Hàtàxiner nupytu'u pixik kwaw uzeupir ire nehe. Iaiw putar a'e ywy nehe. Nupaw kwaw iaiw paw izuwi nehe. Ni amo noho kwaw a'e pe wà nehe.

Isaías 34:2

Tupàn Tuweharupi Wiko Ma'e wikwahy ywy nànàn a'e. Wikwahy zauxiapekwer ywy nànànar wanupe upaw rupi a'e. Umume'u wazuka àwàm kwez kury. Umume'u wamumaw pàwàm kwez kury.

Isaías 42:15

Amumaw putar ywytyr nehe. Amumaw putar ywytyruhu nehe no. Amuxinig putar ka'a paw wà nehe. Amuxinig putar ywyra paw wà nehe no. Azapo putar yrykawhu ywyxiguhu romo nehe. Amuypaw putar 'yzygwar paw nehe.

Isaías 5:6

Kukwer romo uzeapo putar nehe. Ni amo nomonohok kwaw hàkà ikatu 'ym ma'e wà nehe. Ni amo nuweruwaruwak kwaw ywy wà nehe. Ka'a hezuz putar a'e pe xu rehe we nehe. Aze'eg putar ywàkun pe nehe. — Emugyr kar zo àmàn heko rehe nehe, a'e putar izupe nehe.

Jeremias 4:7

Teko waiwy imumaw har ur iko. Nuzawy kwaw zàwàruhu iriàw uker haw wi uhem ma'e kwer. Umumaw putar teko Zuta ywy rehe har wà nehe. Weityk putar tawhu Zuta ywy rehe har wà nehe. Ni amo nuiko kwaw a'e tawhu wapupe wà nehe.

Jeremias 40:15

Na'e Zoànà umume'u ko ma'e izupe amogwer wanupe imume'u 'ym pà kury. — Tuwe azuka Izimaew nehe. Ni amo nukwaw kwaw izuka arer nezewe mehe wà nehe. Màràzàwe tuwe erezezuka kar izupe. Aze nezuka nehe, Zutew nerehe we uzemono'og ma'e uhàuhàz putar wà nehe. Nezewe mehe iaiw haw u'ar putar teko Zuta ywy rehe upyta ma'e kwer wanehe nehe.

Jeremias 50:17

Tupàn Tuweharupi Wiko Ma'e uze'eg kury. — Teko Izaew izuapyapyr nuzawy kwaw àràpuhàràn hawitu ma'e wà. Zàwàruhu iriàw oho wanaikweromo wamuhàmuhàz pà wà. Izypy mehe Axir wanuwihawete uzàmàtyry'ym Izaew wà. A'e re Namukononozor Mawiron wanuwihawete uxi'uxi'u wàkàgwer wà.

Jeremias 51:34

Mawiron wanuwihawete upei'ài'àg Zeruzarez a'e. A'e re u'u. Wenuhem teko paw a'e wi wà. Wenuhem ma'e paw no. Nuzawy kwaw 'y y'a wi uzeakook ma'e. Nuzawy kwaw àzàg tawhu i'u arer. Weraha wemimutar paw. Weityk ikurer.

Jeremias 9:16

Amuhàmuhàz putar heremiaihu ywy nànànar wainuinuromo ihe wà nehe. Ni a'e ni waipy nukwaw kwaw a'e teko wà. Amur kar putar zauxiapekwer tetea'u heremiaihu wakutyr ihe wà nehe. Te umumaw kar putar tuwe wà nehe.

Ezequiel 12:20

Heta tetea'u teko tawhu a'e ywy rehe har wapupe ko 'ar rehe wà. Zauxiapekwer umumaw putar a'e tawhu wà nehe. Ywy uzeapo putar ywyxiguhu romo nehe. Nezewe mehe ukwaw putar Tupàn Tuweharupi Wiko Ma'e romo herekuwe haw wà nehe.

Ezequiel 24:11

Tuwe zapepo ipor 'ym ma'e upyta tàtàpyzgwer rehe nehe. Tuwe ipiràg nehe. Nezewe mehe tata umumaw putar hepuxi kwer nehe. Zapepo ikatu putar ru'u herenataromo nehe.

Ezequiel 35:14

Zanezar Tuweharupi Wiko Ma'e uze'eg kury. — Amumaw putar nehe. Ywy nànànar hurywete putar i'ar awer rehe wà nehe.

Ezequiel 5:14

Urumumew kar putar zauxiapekwer wanupe ihe nehe, Zeruzarez. A'e mehe teko neywyr har a'e wà nehe, nerupi oho ma'e kwer a'e wà no, uze'eg urywahyahy putar nepupe wiko ma'e wanehe a'e wà nehe.

Ezequiel 5:2

Iàmàtyry'ymar upaw putar tawhu izywyr umàmàn ire wà nehe. A'e 'ar mehe eho tawhu myter pe nehe. Eapy ne'aw ipehegwer neamutaw ipehegwer rehe we a'e pe nehe. A'e re eata tawhu izywyr nehe. Ekixikixi amo ne'aw ipehegwer takihepuku pupe nehe. Ipehegwer iahykaw rehe har emomor ywate nehe. Ywytu weraha putar nehe. Na'e azàmàtyry'ym tawhu hetakihepuku pupe ihe nehe.

Ezequiel 6:14

Na'e apyho putar hepo ihe nehe. Amumaw putar waiwy ihe nehe. Azypyrog ywyxiguhu kwarahy ihemaw awyze har kutyr har rehe nehe. Aha putar Himina tawhu kwarahy heixe haw awyze har kutyr har rehe har pe nehe no. Amuhem kar putar teko paw a'e ywy wi ihe wà nehe. Napuhareko kwaw wyzài Izaew waneko haw nehe. Nezewe mehe teko paw ukwaw putar Tupàn Tuweharupi Wiko Ma'e romo herekuwe haw a'e wà nehe.

Ezequiel 6:6

Amumew putar tawhu Izaew ywy rehe har paw ihe wà nehe. Amumaw putar tupàn a'ua'u wamuwete haw paw nehe no. Azuhazuhaw putar ma'ea'yr hapy haw paw nehe. Azuhazuhaw putar wazar tupàn a'ua'u ihe wà nehe no. Azuhazuhaw putar yhyk zàwenugar paw nehe no. Wanemiapo kwer paw ukàzym putar nehe.

Ezequiel 7:12

Uhem amo 'ar iko. Na'iàrew kwaw kury. A'e 'ar mehe teko ume'eg e ma'e wà nehe, ume'eg kar e ma'e wà nehe no. Ta'e Tupàn Tuweharupi Wiko Ma'e ikwahy haw u'ar wanehe paw rupi nehe xe, ikàg ma'e wanehe nehe, ikàg 'ym ma'e wanehe nehe no.

Ezequiel 7:14

Upy uxi'àm ma'e'ak kwer iapo pyrer wà. Paw rupi uzemuàgà'ym wà. Nezewe rehe we ni amo noho kwaw zeàmàtyry'ymawhu pe wà nehe. Ta'e Tupàn Tuweharupi Wiko Ma'e ikwahy haw u'ar putar wanehe paw rupi katete nehe xe.

Naum 1:5

Ywytyruhu uryryryryz henataromo wà. Ywytyra'i uzekazeka wà. Izexak kar mehe ywy a'e, hehe har paw a'e wà no, uryryryryz a'e wà no.

Naum 2:10

Zauxiapekwer umumaw Nin wà. Teko paw uhem oho izuwi wà. Naheta kwaw teko a'e pe wà kury. Wapy'a tynehem wakyze haw pupe wà. Wapenàràg uryryryryz waiko wà. Wanuwa xigatu wakyze haw wi wà. Wakàgaw uhem wanuwi upaw rupi.

Lucas 21:24

Zauxiapekwer a'e wà nehe, uzuka putar amo ko ywy rehe har a'e wà nehe, weraha putar amogwer amo ae ywy rehe a'e wà nehe no, wamuhàmuhàz pà a'e wà nehe no. Na'e Tupàn rehe uzeruzar 'ym ma'e wixe putar taw pe a'e wà nehe kury. Upyropyrog putar tàpuzgwer rehe wà nehe, u'ar tàpuz paw nehe.

Atos 17:6

Nuexak kwaw a'e pe wà. A'e rupi weraha Zàxàw tuwihaw wanuwa rupi wà, amo uzeruzar ma'e waneraha pà wà no, wanuwa rupi wà no. -Pawru uzapo ikatu 'ym ma'e oho waiko taw nànàn a'e wà. Ko 'ar rehe uhem zanereko haw pe wà kury.

Deuteronômio 28:64

Tupàn Tuweharupi Wiko Ma'e pemuhàmuhàz putar ywy nànàn nehe. Uzypyrog putar pe pe nehe, te oho 'a pe pemuhàmuhàz pà nehe. A'e ywy rehe peneko mehe pemuwete putar tupàn a'ua'u ywyra iapo pyrer pe wà nehe. Pemuwete putar tupàn a'ua'u ita iapo pyrer pe wà nehe. Ni pe ni peipy napekwaw kwaw a'e tupàn pe wà.

Deuteronômio 32:26

Apuner mo ywy nànàn wamuhàmuhàz haw rehe ihe. Nezewe mehe teko paw heharaz mo wanuwi wà.

Deuteronômio 4:27

Tupàn Tuweharupi Wiko Ma'e pemuhàmuhàz putar ywy nànàn nehe. Xo màràn zo wikuwe putar wà nehe. Peinuromo har tetea'u umàno putar wà nehe.

Tiago 1:1

Ihe Xiak ihe, Tupàn pe uma'ereko ma'e romo aiko ihe. Zezuz Zaneruwihawete Zanezar pe uma'ereko ma'e romo aiko ihe. Amono kar putar ko hepape ihe nehe, Tupàn hemiruze'eg wanupe ihe nehe, ywy nànàn uhàuhàz ma'e kwer nànàn ihe nehe.