Isaías 2:21 - Tupàn zeꞌeg

²¹ Tupàn Tuweharupi Wiko Ma'e izexak kar mehe ywy rehe har ukyze putar izuwi azeharomoete wà nehe. Uzàwehem putar oho itakwar pe wà nehe. Wixe putar itahu huawyr pupe wà nehe, Tupàn ikwahy haw wi uzeàmim pà wà nehe. Utyryk putar Tupàn Tuweharupi Wiko Ma'e wi wà nehe, ta'e tuwihawete ikàg ma'e romo hekon a'e xe.

Isaías 2:21 ပူးပေါင်းရင်းမြစ်များ

2 Samuel 22:46

Ukyze ihewi wà. Wakàgaw uhem wanuwi. Uhem weko haw tawhu tàtà wi wà.

Jó 30:6

Upyta yrykaw typawer pe wà. Wiko itakwaruhu pupe wà, ita inuromo wà.

Jó 9:6

Tupàn umur kar ywy iryryryryz haw. Ywy uryryryryz a'e mehe. Weityk ywy izyta no.

Êxodo 33:22

Hekàgahy haw hepuràg eteahy haw ukwaw putar neruwake nehe. Ikwaw mehe nehe, oromonokatu putar itawokaw pupe nehe. Urupyk putar hepo pupe nehe, hekwaw mehe nehe.

Cânticos dos Cânticos 2:14

Ereiko pykahu itawokaw pupe uzemim ma'e ài. Exak kar neruwa ihewe nehe. Tuwe uruenu neze'eg mehe ihe nehe. Ta'e neze'eg hete katu a'e xe. Neruwa ipuràg eteahy a'e no.

Isaías 2:10

Pekar putar pezeàmim àwàm itakwaruhu pupe nehe. Pehàwykàz ywykwar pezeàmimaw romo nehe, Tupàn ikwahy haw wi pehem pà nehe, petyryk putar Tupàn Tuweharupi Wiko Ma'e ipuner haw tuwihawete romo heko haw wi nehe.

Isaías 2:19

Tupàn Tuweharupi Wiko Ma'e izexak kar mehe ywy rehe har ukyze putar izuwi azeharomoete wà nehe. Uzàwehem putar oho itakwar pupe wà nehe. Wezyw putar ywykwar ohoete ma'e pupe wà nehe no, Tupàn ikwahy haw wi uhem pà wà nehe. Utyryk putar Tupàn Tuweharupi Wiko Ma'e tuwihawete romo heko haw ikàg ma'e wi wà nehe.

Isaías 24:18

Uzemi'ikar ma'e wanuwi uhem ma'e kwer u'ar putar ywykwar pupe nehe. Ywykwar wi uhem ma'e kwer uzepyhyk kar putar miar izepyhykaw zàwenugar pupe nehe. Ukyr etea'u putar àmàn nehe. Nuzawy kwaw ypaw wanehe izakookaw nehe. Uryryryryz putar ywy uwy pe har rehe nehe no.

Isaías 33:10

Tupàn Tuweharupi Wiko Ma'e uze'eg teko ywy nànànar wanupe. — Azapo putar ma'e ihe nehe kury. Aexak kar putar hekàgaw nehe. Aexak kar putar hehua'u haw nehe.

Isaías 7:19

Hàiru uzemono'ono'og ma'e weko àwàm hekar har ài ur putar wà nehe. Upytu'u putar ywyàpyznaw ohoete wera'u ma'e rehe wà nehe. Upytu'u putar itahu huawyr pupe wà nehe no. Wapyk putar xu myter pe wà nehe. Upyta putar tapi'ak wai'u haw nànàn wà nehe no.

Jeremias 16:16

Uze'eg wi Tupàn Tuweharupi Wiko Ma'e kury. — Amur kar putar pira pyhykar zàwenugar tetea'u ihe wà nehe. Upyhyk putar 'aw teko pira ài wà nehe. A'e re amur kar putar uzemi'ikar ma'e zàwenugar tetea'u ihe wà nehe no. Wekar putar 'aw teko miar ài ywytyruhu nànàn ywytyr nànàn wà nehe, te itakwar pupe wà nehe, wazuka pà wà nehe. Ihe Tupàn Tuweharupi Wiko Ma'e aiko ko ma'e imume'u har romo ihe.

Oséias 10:8

Ukauka putar ma'ea'yr hapy haw Awem ywytyr apyr har wà nehe. Teko umuwete tupàn a'ua'u a'e pe wà. Ka'a upyk putar ipehegwer nehe. Xu hezuz putar hen awer i'aromo nehe. Teko uze'eg putar nezewe ywytyruhu wanupe wà nehe. — Urepyk pe nehe, i'i putar wanupe wà nehe. — Uremim pe nehe, i'i putar ywytyr wanupe wà nehe.