Isaías 17:13 - Tupàn zeꞌeg

¹³ Teko ywy tetea'u rehe har wànoànog waiko yryhu ài wà. Tupàn upyro putar wakàgaw wanuwi nehe. A'e mehe uzàwehem putar izuwi wà nehe. Nuzawy kwaw ka'axinig ma'e ywytyr rehe ywytu hemiraha wà nehe. Nuzawy kwaw ywy imuku'i pyrer ywytu hemimuhàz nehe.

Isaías 17:13 ပူးပေါင်းရင်းမြစ်များ

Jó 21:18

Ma'e 'ar mehe umuhàmuhàz ka'akyr ài wà. Ma'e 'ar mehe ywytu weraha ywyku'i kwer ài a'e. Ma'e 'ar mehe Tupàn weraha ikatu 'ym ma'e nezewe a'e wà.

Jó 38:11

Na'e aze'eg izupe. — Erehem putar te xe nehe. Ehem zo xe wi nehe. 'Ykotok nerehe har upytu'u putar xe nehe, a'e izupe.

Salmos 1:4

Ikatu 'ym ma'e nuiko kwaw wazàwe wà. Nuzawy kwaw arozpirer uxinig ma'e ywytu hemiraha wà.

Salmos 35:5

Tuwe nuzawy kwaw ka'akyr ywytu hemiraha wà nehe, Tupàn Tuweharupi Wiko Ma'e heko haw pe har wakutyr tur mehe wà nehe.

Salmos 65:7

Eremupytu'u kar yryhu ikotok ire ne. Eremumaw ikotok iànoànogaw no. Eremupytu'u kar teko waneiheihem ire ne wà.

Salmos 65:8

Ywy nànànar ukyze newi wà, Neremiapo kwer uhua'u ma'e iapo awer ikwaw mehe wà. Wexak neremiapo kwer ikatuahy ma'e wà. A'e rupi uhapukaz urywete haw rupi ywy nànàn wà.

Salmos 9:5

Eremume'u nerehe uzeruzar 'ym ma'e wanemiapo kwer. Eremumaw teko ikatu 'ym ma'e ne wà. Teko na'ima'enukwaw pixik kwaw a'e teko wanehe wà nehe.

Isaías 14:25

Amumaw putar Axir ihe wà nehe. Ko 'ar rehe Axir wiko heywy Izaew rehe wà. Apyropyrog putar wanehe ywytyruhu herenaw pe ihe wà nehe. Apyro putar heremiaihu Axir wanuwi ihe wà nehe. Axir uzàpixipixi heremiaihu kyhàhàmtàtà pupe wà. Amonohok putar a'e kyhàhàmtàtà nehe, heremiaihu wapyro pà wamuhem kar pà nehe. Aupir putar ma'e ipuhuz katu ma'e wakupe pe har ihe nehe, wanuwi ipyhyk pà ihe nehe.

Isaías 21:15

Ta'e uzàwehem oho waiko zeàmàtyry'ymawhu teko tetea'u wazuka haw wi wà xe. Uzeagaw wàmàtyry'ymar wanuwi uhemaw rehe wà. Wàmàtyry'ymar ipuruzuka wer Nenà izuapyapyr wanehe utakihepuku pupe wà, uwyrapar pupe wà no, u'yw pupe wà no.

Isaías 22:18

Teko omomor iapu'a ma'e wà, nezewegatete Tupàn nemomor putar muite amo ywy uhua'u ma'e pe nehe. A'e pe eremàno putar neywyramawa zeàmàtyry'ymawhu rehe har wanuwake nehe. Ywyramawa nemynehem nerurywete haw pupe wà. Eremàno putar wanuwake nehe, ta'e ereiko purumumaranugar kar har romo nezar pe ne xe, Zuta wanuwihawete pe ne xe, ere izupe nehe, i'i ihewe.

Isaías 27:1

A'e 'ar mehe Tupàn Tuweharupi Wiko Ma'e upyhyk putar utakihepuku nehe. Uhua'u itakihe. Ikàg no. Ipuhuz no. Teko uze'eg àzàguhu Erewiàtà her ma'e rehe wà. Tupàn ukutuk putar a'e àzàguhu a'e nehe. Uwawak àzàguhu a'e. Uzemàzemàn no. Tupàn Tuweharupi Wiko Ma'e uzuka putar mozuhu yryhu pe har a'e nehe.

Isaías 29:5

Na'arewahy tàrityka'i Tupàn Tuweharupi Wiko Ma'e Ikàg Wera'u Ma'e uzàmàtyry'ym putar wàmàtyry'ymar oho a'e wà nehe kury. Ni amo nuàro kwaw tur àwàm wà nehe. Zauxiapekwer amo ae ywy rehe arer romo wanekon wà. Wànoànog putar nehe. Ywy uryryryryz putar nehe no. Wànoànogahy putar nehe. Ur putar ywytuaiw nehe. Àmànuhu ukyr putar nehe no. Tata ma'erapy har ur putar nehe no. Umuigo kar putar wàmàtyry'ymar ywy imuku'iahy pyrer romo wà nehe. Nuzawy kwaw ka'api'i uxinig ma'e kwer ywytu hemiraha kwer wà nehe.

Isaías 30:28

Tupàn Tuweharupi Wiko Ma'e ipurupy haw nuzawy kwaw 'y tyhu haw a'e. Uhem teko wa'az pe. Teko weityk arozràn iapirer wà. Nezewegatete Tupàn Tuweharupi Wiko Ma'e weityk putar teko ikatu 'ym ma'e arozràn iapirer ài a'e wà nehe. Teko omono wamupytu'u kar haw kawaru wazuru pupe wà. Nezewegatete Tupàn omono putar wamupytu'u kar haw zàwenugar teko wazuru pupe nehe no. Nezewe mehe weraha pe ikatu 'ym ma'e rupi wà.

Isaías 34:17

Tupàn Tuweharupi Wiko Ma'e umuza'aza'ak Enom iziwy kwer a'e miar wanupe ipegegwer imonomono pà pitàitàigatu nehe. A'e pe umumaw putar kwarahy tetea'u wiko pà wà nehe. Nupytu'u kwaw a'e pe wiko re wà nehe.

Isaías 40:15

Ywy paw nuzawy kwaw 'y pitài tykyr haw y'a pupe har Tupàn Tuweharupi Wiko Ma'e pe wà. Nuzawy kwaw pitài ywy iku'i kwer puhuz haw hagapaw rehe har izupe. Weraha yrypypo'o muite har opo pe pitài ywyxig imuku'i pyrer ài.

Isaías 40:24

A'e tuwihaw nuzawy kwaw ma'e hezuz romo ma'e kwer wà. Pixika'i wanapo. Aze Tupàn upytuhem wanehe, uxinig wà. Ywytu weraha muite ka'a ruwer uxinig ma'e ài wà.

Isaías 41:11

Aityk putar peàmàtyry'ymar paw rupi ihe wà nehe. Amuigo kar putar ikàg 'ym ma'e romo ihe wà nehe. Peàmàtyry'ymar paw amumaw putar ihe wà nehe. Umàno putar upaw rupi wà nehe.

Isaías 8:7

A'e rupi ihe Tupàn Tuweharupi Wiko Ma'e ihe, arur putar Axir wanuwihawete xe ihe nehe. Arur putar hemiruze'eg zauxiapekwer ikàg ma'e xe ihe wà nehe no. Uzàmàtyry'ym putar 'aw teko wà wà nehe. Wanur haw nuzawy kwaw Ewparat yrykawhu tynehemaw nehe. Tynehem putar 'y yrykaw a'e yrykawhu kutyr uwyryk ma'e paw wa'aromo nehe.

Daniel 2:35

A'e 'ar mehe we itaper a'e, ywyzuwa a'e no, itazu morog a'e no, itaxig parat a'e no, itazu or a'e no, uzeapo ywyku'i romo kury. Kwarahy mehe teko oxooxok arozràn iapirer imuwewe pà izuwi wà. A'e ywyku'i nuzawy kwaw iapirer arozràn wi uzeupir ma'e. Ywytu weraha a'e ywyku'i paw a'e wi. Nupyta kwaw ni pitài a'e pe. Itahu uhua'u wera'u oho iko kury. Uzeapo ywytyruhu uhua'u ma'e romo kury. A'e ywytyruhu upyk ywy paw rupi katete kury.

Oséias 13:3

A'e rupi a'e teko ukàzym putar wà nehe. Ywàkun ywytyr rehe har ukàzym kwarahy ihem mehe a'e. Zuwiri ukàzym ku'em mehe a'e. Ywytu weraha ka'api'i uxinig ma'e a'e. Tàtàxiner uhem oho tàpuz wi a'e. Nezewegatete a'e teko ukàzym putar wà nehe no.

Sofonias 2:2

Ka'api'i uxinig ma'e umumaw pitài 'ar ukaz pà. Pemàno putar nezewe nehe no. Aze napepytu'u kwaw iaiw ma'e iapo re nehe, Tupàn Tuweharupi Wiko Ma'e ikwahy haw u'ar putar penehe nehe, aze napepytu'u kwaw ikatu 'ym ma'e iapo re nehe. Pepytu'u Tupàn Tuweharupi Wiko Ma'e ikwahy haw 'ar ihem 'ym mehe we nehe.