Isaías 12:1 - Tupàn zeꞌeg

¹ A'e 'ar mehe teko paw uzegar putar nezewe wà nehe. — Amume'u nekatu haw, O Tupàn Tuweharupi Wiko Ma'e. Kwehe mehe erekwahy ihewe. Nekwahy haw upaw kury. Ko 'ar rehe hemurywete kar iko ne.

Isaías 12:1 ပူးပေါင်းရင်းမြစ်များ

Neemias 8:10

Peho peneko haw pe zegar hawhu iapo pà nehe. Aze naheta kwaw ma'e zegar haw rehe har amo pe nehe, pemono penemi'u ràm ikurer izupe nehe. Pemono win ikurer izupe nehe no. Ko 'ar uzemonokatu Tupàn Zanezar pe. A'e rupi pezemumikahy zo nehe. Penurywete haw Tupàn Tuweharupi Wiko Ma'e hemimur ràm pemukàg kar putar a'e nehe, i'i wanupe wà.

Jó 11:16

Nanema'enukwaw kwaw ma'erahy neremipuraraw rehe nehe. Nuzawy kwaw 'y kwe rupi uwyryk ma'e kwer nehe. Zanereharaz izuwi.

Jó 13:16

Aze ru'u hekyze 'ymaw hepyro putar nehe. Ta'e ni amo teko ikatu 'ym ma'e noho kwaw Tupàn henataromo wà xe.

Salmos 30:5

Neremumaw kwaw 'ar tetea'u nekwahy pà ne. Nekatu haw nupytu'u pixik kwaw. Amo upuner pytun gatu imumaw paw rehe uzai'o pà ma'e rehe a'e wà. Iku'em mehe ur wi hurywete haw.

Salmos 71:21

Hemuigo kar putar ikàg wera'u ma'e romo. Teko tetea'u ukwaw putar heremiapo kwer wà nehe. Tuweharupi hemurywete kar putar pe nehe.

Salmos 85:4

Uremuigo kar wi pe temi'u hereko har romo ma'e hereko har romo nehe, o Tupàn urepyro har. Epytu'u neremiaihu wanehe nekwahy re nehe.

Salmos 86:17

O Tupàn Tuweharupi Wiko Ma'e, ezapo ma'e ihewe nekatu haw hexak kar pà ihewe nehe. Nezewe mehe herehe iakatuwawahy 'ym ma'e wexak putar hepytywà arer romo nereko haw wà nehe, wexak putar hemurywete kar arer romo nereko haw wà nehe no. Hexak mehe imaranugar putar wà nehe.

Salmos 9:1

O Tupàn Tuweharupi Wiko Ma'e, amume'u putar nekatu haw hepy'a pupe azeharomoete nehe. Amume'u putar ma'e ikatuahy ma'e neremiapo kwer paw ihe wà nehe no.

Isaías 10:25

Nan kwehe tete apytu'u putar penehe hezepyk ire nehe. Hekwahy haw rupi amumaw putar Axir ihe wà nehe.

Isaías 10:4

Zauxiapekwer peneraha putar wemipyhyk kwer romo wà nehe. Pezuka putar zeàmàtyry'ymawhu pe wà nehe. Nezewe rehe we nahakuir kwaw Tupàn ikwahy haw. Upir wiwi opo penehe uzepyk pà.

Isaías 11:16

Kwehe mehe heta Izaew wanape ràm Ezit ywy wi wahem mehe. Nezewegatete heta putar wanape ràm ikatu ma'e Axir ywy wi wahem mehe nehe no. Heremiaihu wikuwe ma'e wata putar a'e pe rupi wà nehe.

Isaías 14:3

Teko Izaew wà, uhem putar amo 'ar nehe. A'e 'ar mehe Tupàn Tuweharupi Wiko Ma'e pepyro putar uma'ereko e ma'e romo peneko haw wi nehe. Pepyro putar ma'erahy penemipuraraw wi nehe. Pezar pemuma'erekoahy kar penereko wà. Tupàn pepyro putar wanuwi nehe.

Isaías 2:11

Ur putar amo 'ar nehe. A'e 'ar mehe Tupàn umuigo kar putar wiko wera'u ma'e wà nehe, ikàg 'ym ma'e romo wà nehe. Ukàgaw imume'u har wiko putar ikàg 'ym ma'e romo wà nehe. A'e 'ar mehe teko umume'u putar Tupàn Tuweharupi Wiko Ma'e ikatu haw wà nehe. Numume'u kwaw amo wakatu haw wà nehe.

Isaías 25:1

O Tupàn Tuweharupi Wiko Ma'e, ereiko hezar romo. Urumuwete katu ihe. Amume'u putar nerer ikatu haw nehe, ta'e erezapo ikatuahy ma'e tetea'u ne xe. Erezapo tuwe ma'e neremimume'u kwer rupi katete ne. Kwehe mehe eremume'u neremiapo ràm purupe. Erezapo a'e ma'e iko tuweharupi neze'eg awer rupi katete.

Isaías 25:9

A'e 'ar mehe teko paw uze'eg putar nezewe wà nehe. — Zanezar romo hekon a'e. Zazeruzar hehe. Zanepyro a'e. Wiko Tupàn Tuweharupi Wiko Ma'e romo. Zazeruzar hehe. Zazegar nehe. Zanerurywete nehe, ta'e zanepyro a'e xe.

Isaías 26:1

A'e 'ar mehe teko Zuta ywy rehe har umuzàg putar ko zegar haw wà nehe: Tawhu zanereko haw ikàg a'e. Tupàn uzekaiw katu tawhu rehe pàrirogaw aiha pupe a'e.

Isaías 35:10

Tupàn Tuweharupi Wiko Ma'e hemipyro kwer uzewyr putar weko haw pe wà nehe. Uzewyr putar Zeruzarez pe uzegar pà wà nehe. Wiko putar a'e pe tuweharupi urywete romo wà nehe. Turywete haw nehe, zemumikahy 'ymaw nehe, wainuinuromo wanuz tuweharupi wà nehe. Naheta kwaw zemumikahy haw a'e pe nehe. Teko nuzai'o kwaw a'e pe wà nehe.

Isaías 49:13

Pezegar nehe, ywak. Penurywete nehe, ywy. Ywytyr wà, penehapukaz penurywete haw rupi nehe, ta'e Tupàn Tuweharupi Wiko Ma'e umurywete kar wemiaihu wà xe. Upuhareko ma'erahy ipuraraw par wà no.

Isaías 51:3

Ihe Tupàn Tuweharupi Wiko Ma'e apuhareko katu putar Zeruzarez tawhu ihe nehe. Apuhareko katu putar tàpuz ipupe har heityk pyrer paw nehe no. Ywy uxinig ma'e kwer a'e pe har azapo putar ma'etymaw romo nehe. Nuzawy kwaw ma'etymaw En ywy rehe heremitygwer a'e nehe. Heta putar turywete haw a'e pe nehe. Hurywete putar a'e pe har wà nehe. Heta putar zegar haw nehe. Umuzàg putar zegar haw hekatu haw imume'u pà wà nehe.

Isaías 54:7

Apuir newi. Namumaw kwaw kwarahy tetea'u muite newi. Ko 'ar rehe urumuzewyr kar putar hezeupe ihe nehe kury, neamutar katu pà ihe nehe kury.

Isaías 54:8

Hekwahy mehe azeàmim newi. Nazexak kar kwaw newe ta'e aikwahy newe ihe xe. Namumaw kwaw kwarahy tetea'u muite newi nehe. Urupuhareko katu putar nehe, ta'e uruamutar katu hepytu'u 'ym pà ihe xe, i'i Tupàn Tuweharupi Wiko Ma'e nepyro har a'e.

Isaías 54:9

Uze'eg Tupàn Tuweharupi Wiko Ma'e nezewe kury. — Àmànuhu ikyr mehe amume'uahy heze'eg Noe pe ihe. — 'Y numim zuapyr wi pixik kwaw ywy a'e nehe, a'e tuwe izupe. Nezewegatete amume'uahy putar ko heze'eg newe ihe kury. — Naikwahy zuapyr wi pixik kwaw newe ihe nehe, a'eahy newe kury. Nazepyk zuapyr wi pixik kwaw nerehe nehe.

Isaías 60:10

Tupàn Tuweharupi Wiko Ma'e uze'eg Zeruzarez pe. — Teko amo ae ywy rehe arer uzapo wi putar nepàrirogaw iaiha ma'e tàtà ma'e a'e wà nehe. Wanuwihawete uma'ereko putar newe wà nehe no. Aikwahy ihe, a'e rupi azepyk nerehe. Nezewe rehe we uruamutar katu ihe. Urupuhareko katu no.

Isaías 61:10

Zanerurywete putar nehe. Ximuzàg putar zegar haw Tupàn ikatu haw imume'u haw nehe, ta'e Tupàn Tuweharupi Wiko Ma'e Zanezar uzapo ikatuahy ma'e a'e xe. Umunehew kar purupyro haw zanewe kamir ài a'e. Umunehew kar zaneàmàtyry'ymar waneitykaw zanewe kamirpuku iànàm ma'e ài no. Zaiko awa hemireko ma'e ràm pàn ipuràg ma'e uwàkàg rehe har imunehew har ài zane. Zaiko kuzà imen ma'e ràm ita hekuzar katu ma'e pupe imupuràg eteahy pyrer ài no.

Isaías 64:5

Eremuawyze ikatu ma'e urywete haw rehe iapo har ne wà. Eremuawyze teko ne wà, aze wiko neremimutar rehe tuweharupi wà. Erekwahy urewe. Nezewe rehe we uruzapo wi wi ikatu 'ym ma'e uruiko. Aze uruata wi nerape kwehe arer rupi nehe, xo a'e mehe zo urepyro putar pe nehe.

Isaías 65:18

Penurywete nehe. Peiko hurywete ma'e romo tuweharupi heremiapo ràm hexak mehe nehe. Ta'e amynehem putar Zeruzarez tawhu turywete haw pupe ihe nehe xe. Amono putar turywete haw tetea'u ipupe har wanupe nehe no.

Isaías 66:13

Kuzà umurywete kar umemyr izemumikahy mehe, nezewegatete apumurywete kar ihe nehe no. Apumurywete kar Zeruzarez pe nehe no.

Jeremias 30:19

Teko a'e pe wiko ma'e uzegar putar hekatu haw imume'u pà wà nehe. Uhapukaz putar urywete haw rehe wà nehe no. Amueta tetea'u kar putar ihe wà nehe. Areko katu kar putar a'e teko amo teko wanupe ihe wà nehe no.

Jeremias 31:13

Na'e teko upynyk putar wà nehe, hurywete putar wà nehe no: Kuzàwaza kwer wà, kwàkwàmogwer wà, tua'uhez kwer wà. Amurywete kar putar ihe wà nehe. Wazai'o haw azapo putar wanurywete haw romo ihe nehe. Wazemumikahy haw azapo putar wanupe ikatuahy ma'e romo ihe nehe no.

Oséias 11:8

Aipo apuner pewi hepuir haw rehe nehe, Izaew wà. Aipo napupytywà kwaw ihe nehe. Kwehe mehe amumaw Anima tawhu ihe. Aipo apumumaw putar nezewegatete nehe. Kwehe mehe aityk Zemoim tawhu ihe. Aipo apuityk putar nezewegatete nehe. Nan kwaw pa. Napuner kwaw nezewe haw iapo haw rehe nehe. Ta'e apupuhareko katu hepy'a pe ihe xe. Ta'e apuaihu katu ihe xe.

Oséias 6:1

Teko Izaew uze'eg wà kury. — Zazewyr zaha Tupàn Tuweharupi Wiko Ma'e pe upaw rupi zane nehe ty wà. Zanekutuk a'e. Azeharomoete zanemukatu wi putar nehe no. Uzepyk zanerehe. Azeharomoete heharaz putar zaneremiapo kwer wi nehe no.

Zacarias 1:16

Nezewe rehe we azewyr Zeruzarez pe ta'e apurupuhareko katu ihe xe. Ihe Tupàn Ikàg Wera'u Ma'e ihe, amume'u katu ko ma'e uzeapo ma'e ràm ihe kury. Heremiaihu uzapo wi putar Zeruzarez tawhu wà nehe. Uzapo wi putar heràpuzuhu wà nehe no, a'e teko ihe, i'i Tupàn.

Zacarias 14:20

A'e 'ar mehe teko umuapyk putar ko ze'eg te kawaru ipu'yr ipupe har rehe a'e wà nehe. Tupàn Tuweharupi Wiko Ma'e pe imonokatu pyrer, i'i putar wà nehe. Kawaw ma'ea'yr hapy haw henataromo har ikatuahy Tupàn henataromo wà. A'e 'ar mehe wyzài kawaw tàpuzuhu pupe har ikatuahy putar henataromo nezewegatete wà nehe no.

Zacarias 14:9

Tupàn Tuweharupi Wiko Ma'e wiko putar ywy nànàn wanuwihawete romo nehe. Heta putar xo pitài Tupàn zo nehe. A'e wiko putar Tupàn romo nehe. — Tupàn Tuweharupi Wiko Ma'e, i'i putar teko paw izupe wà nehe. Naheta kwaw amo nehe.

Zacarias 8:11

Ihe Tupàn Ikàg Wera'u Ma'e amume'u ko ma'e teko ihe kury. A'e 'ar rehe azapo kar agwer ma'e a'e teko wanupe ihe. Ko 'ar rehe nazapo kar kwaw peme ihe kury.

Zacarias 8:19

— Kwarahy nànàn pezapo pezekwaku haw pemai'u 'ymaw 4 haw zahy rehe, 5 haw zahy rehe no, 7 haw zahy rehe no, 10 haw zahy rehe no. Pepytu'u nehe kury. Ko 'ar henataromo a'e zahy uzeapo putar mynykawhu romo nehe. Zuta hurywete putar a'e 'ar rehe wà nehe. A'e rupi pezamutar katu ze'eg azeharomoete har nehe. Pezamutar katu zeàmàtyry'ym 'ymaw nehe no, i'i wanupe.

Romanos 11:15

Tupàn upuir kwez zutew wanuwi. A'e rupi zutew 'ym wiko Tupàn imyrypar romo wà kury. Aze zutew uzewyr Tupàn pe wà nehe, a'e mehe hurywete putar teko paw rupi a'e wà nehe. Tupàn hurywete putar nehe no. Teko imàno mehe iànàm uzemumikahy a'e wà. Aze ukweraw wi nehe, hurywete wi putar wà nehe no. Nezewegatete zane nehe no. Aze zutew uzewyr Tupàn pe wà nehe, zanerurywete putar zane nehe no.