Isaías 1:13 - Tupàn zeꞌeg

¹³ Aze perur ma'e ihewe nehe, napurumuawyze kwaw ihe nehe. Yhyk hyàkwegatu ma'e herenataromo penemiapy a'e, iro ihewe a'e. Pepynykawhu zahy pyahu mehe har iroahy ihewe wà. Mynykaw mytu'u haw 'ar mehe har iro ihewe wà. Amogwer mynykaw iro ihewe wà no, ta'e penemiapo kwer ikatu 'ym ma'e umumaw a'e ma'e herenataromo har iapo pyr upaw rupi a'e xe. Amogwer 'ar rehe nahemuwete kwaw pe.

Isaías 1:13 ပူးပေါင်းရင်းမြစ်များ

2 Reis 4:23

Upuranu imen hehe. — Màràzàwe tuwe ereze'eg putar eho izupe kutàri nehe. Ni pytu'u haw 'ar ni zahy pyahu rehe zanemynykaw 'ar kutàri, i'i wemireko pe. — Ikatu nezewe rehe we, i'i umen pe.

1 Crônicas 23:31

mytu'u haw 'ar mehe ma'e imono pyr hapy mehe nehe no, mynykaw zahy pyahu mehe har rehe nehe no, amo mynykaw rehe nehe no. Pemume'u ma'ereko haw iapo har waneta haw pitàitàigatu wà no. Pezekaiw Tupàn Tuweharupi Wiko Ma'e imuwete haw rehe tuweharupi nehe, i'i wanupe wà.

Salmos 78:40

Teko upytu'u tetea'u Tupàn ze'eg heruzar ire ywyxiguhu rehe wà. Umuzemumikahy kar tetea'u Tupàn a'e wà no.

Êxodo 12:16

'Ar ipy mehe pezemono'og hemuwete katu pà nehe. 7 haw 'ar mehe pezemono'og wi hemuwete katu pà nehe no. Pema'ereko zo a'e 7 'ar rehe nehe. Pepuner temi'u iapo haw rehe teko wanupe nehe. Xo a'e zo pepuner iapo haw rehe a'e 'ar mehe nehe. Napepuner kwaw amo ae ma'ereko haw iapo haw rehe nehe.

Provérbios 21:27

Aze ikatu 'ym ma'e uzuka ma'ea'yr Tupàn henataromo wà, a'e teko iro izupe wà. Aze ukatu 'ymaw rupi werur a'e ma'e wà, iro tuwe Tupàn pe wà.

Provérbios 7:14

— Azuka kar ma'ea'yr kwez Tupàn henataromo ihe. Ho'o kwer ipehegwer amonokatu heràpuz me.

Isaías 66:23

Mynykaw zahy ipyahu mehe har nànàn nehe, mytu'u haw 'ar nànàn nehe, teko ywy nànànar ur putar hemuwete katu pà heràpuzuhu pupe wà nehe.

Isaías 66:3

Nezewe rehe we heta we tapi'ak awa ma'ea'yr hapy haw rehe izuka har wà. Uzuka awa wà no. Heta àràpuhàràn hawitu ma'e izuka har wà no. Uzuka zawar wà no. Heta arozràn ihewe imur har wà. Umur tàzàhuràn huwykwer ihewe wà no. Heta yhyk hyàkwegatu ma'e herenataromo imunykar wà no. Amo umuwete ma'e hagapaw wà no. Agwer teko uzapo wemimutar wà. Wanemiapo hemuhuhuk kar har ikatu wanupe.

Lamentações de Jeremias 2:6

Tupàn umumew wàpuzuhu ma'etymaw ài. Teko umuwete katu Tupàn a'e pe wà. Nezewe rehe we umumaw. Zanemueharaz kar mynykaw wi a'e, mytu'u haw 'ar wi a'e no. Wekwahy haw hakuahy mehe weityk tuwihawete wà, weityk xaxeto wà no. Ikàg 'ym ma'e romo wanekon henataromo wà kury.

Ezequiel 20:39

Zanezar Tuweharupi Wiko Ma'e uze'eg kury. — Pe Izaew paw pe, pemuwete wiwi pezar tupàn a'ua'u pe wà nehe kury. Ko ma'e amume'u peme. Amo 'ar mehe hereruzar putar pe nehe. Napemuaiw pixik kwaw herer a'e 'ar mehe nehe. Napemono pixik kwaw ma'e tupàn a'ua'u wanupe a'e 'ar mehe nehe.

Oséias 2:11

Amumaw putar hurywete haw nehe. Amupytu'u kar putar hurywete re ihe nehe. Nuzapo kwaw mynykawhu kwarahy nànànar nehe. Nuzapo kwaw mynykawhu zahy nànànar nehe. Nuzapo kwaw mynykaw mytu'u haw 'ar nànànar nehe. Nuzapo kwaw wyzài mynykaw nehe.

Joel 1:14

Pemono'og teko Tupàn Hàpuzuhu pe pe wà nehe. — Ximumaw amo 'ar zanemai'u 'ym pà nehe, zanekwaku pà nehe, peze wanupe nehe. Pemono'og teko Zuta ywy rehe har paw wanuwihaw pe wà nehe, Tupàn Tuweharupi Wiko Ma'e Zanezar hàpuzuhu pe pe wà nehe. Peze'eg Tupàn pe nehe, pepytywà àwàm henoz pà nehe.

Joel 2:15

Pezupy pexi'àm Xiàw ywytyr rehe nehe. Pemume'u amo 'ar pemai'u 'ym àwàm nehe. Penoz teko wà nehe. Pemono'og teko Tupàn Hàpuzuhu pupe wà nehe.

Levítico 26:31

Amumaw putar tawhu ihe wà nehe. Upyta putar xo heityk pyrer zo nehe. Aityk putar tàpuzuhu tupàn a'ua'u wamuwete haw nehe. Ma'ea'yr izuka mehe herenataromo nehe, namuawyze kwaw nehe.

Malaquias 1:10

Nezewe uze'eg Tupàn Ikàg Wera'u Ma'e xaxeto wanupe kury. — Amo peinuromo har pe ainoz putar ma'e ihe nehe kury. Ewàpytym heràpuzuhu huken nehe. Nezewe mehe napemunyk e kwaw tata hema'e ma'ea'yr hapy haw rehe nehe. Naherurywete kwaw penehe penemiapo rehe ihe. Naputar kwaw ma'ea'yr penemimur ràm nehe.

Números 10:2

— Enupànupà parat mokoz xi'àm ma'ea'yr i'a kwer iapo pyrer zàwenugar iapo pà nehe. Aze neporomono'og wer teko wanehe nehe, ezupy kar a'e xi'àm nehe. Aze nepureraha wer teko waker haw wi ne wà nehe, ezupy kar a'e xi'àm nehe.

Mateus 15:9

Hemuwete katu e waiko wà, Ta'e awa ze'eg rehe upurumu'e oho waiko wà xe. — Ko ze'eg a'e, Tupàn umume'u ihewe a'e, i'i mua'u oho waiko teko wanupe wà.

Lucas 11:42

Pe ze'eg kwehe arer kwaw par pe. Pezemumikahy nehe, ta'e Tupàn uzepyk putar penehe a'e nehe xe. Pemono pema'e kurer Tupàn pe, te temi'u inuromo har no. Napezapo kwaw ikatu ma'e teko wanupe. Napezamutar katu kwaw Tupàn. Ikatu penemi'u kurer imono haw Tupàn pe. Aze pezapo ikatu ma'e purupe nehe, aze pezamutar tuwe Tupàn nehe, pekatu wera'u putar izupe nezewe mehe nehe.

1 Coríntios 11:17

Teko umume'u penemiapo kwer ihewe a'e wà. — Uzapo ikatu 'ym ma'e uzemono'og mehe wà, i'i ihewe a'e wà, penehe uze'eg pà a'e wà. A'e rupi naze'egatu kwaw penehe ihe nehe kury. Amume'u putar penemiapo kwer ikatu 'ym ma'e peme ihe nehe kury.

Efésios 4:30

Pemuzemumikahy kar zo Tupàn Hekwe Puràg nehe. Na'iakatuwawahy kwaw ikatu 'ym ma'e rehe a'e. Aze pezapo ikatu 'ym ma'e nehe, uzemumikahy putar nehe. Ta'e Tupàn umur Wekwe pepy'a pe a'e xe, wemiruze'eg romo peneko haw hexak kar pà purupe a'e xe. Nezewe xikwaw ko ma'e zane. Amo 'ar mehe Tupàn pepyro putar Zurupari wi a'e nehe, pemuigo kar pà uzepyr a'e nehe.

Filipenses 1:15

Amo Zaneruwihawete rehe ze'egaw imume'u har a'e wà, hewyrowyroahy herehe a'e wà. Ipuruzukaiw ihewe wà. Amogwer Tupàn ze'eg imume'u har a'e wà, umume'u katu ize'eg waiko a'e wà. Nupuràmàtyry'ym kwaw imume'u mehe wà.