Isaías 1:11 - Tupàn zeꞌeg

¹¹ Nezewe uze'eg Tupàn Tuweharupi Wiko Ma'e. — Naputar kwaw ma'ea'yr tetea'u wazuka haw hemuwete haw romo ihe. Tuweharupi pezuka ma'ea'yr herenataromo pe wà. Uhyk àràpuhàrànete ihewe wà. Uhyk ma'ea'yr ikyra katu ma'e ihewe wà. Uhyk ma'ea'yr hapy pyr ihewe wà. Hehuhuk wer tapi'aka'yr hexak mehe ihe. Naputar kwaw àràpuhàràn hawitu ma'e ihe wà kury. Naputar kwaw àràpuhàrànete ihe wà kury.

Isaías 1:11 ပူးပေါင်းရင်းမြစ်များ

Salmos 40:6

Nereputar kwaw nerenataromo ma'ea'yr izuka pyr ne wà. Nereputar kwaw arozràn newe imur pyr no. Ma'ea'yr nerenataromo hapy pyr nerenoz kwaw ne wà. — Pemur ma'e ihewe penemiapo kwer hekuzaromo nehe, nere kwaw teko wanupe. Eremur hereapyakwar ihewe ne, ma'e henu kar pà ihewe ne.

Salmos 50:8

Naze'egahy kwaw peme ma'ea'yr herenataromo izuka pyrer wanehe ihe nehe, Ma'e ihewe imur pyrer wanehe ihe nehe.

Salmos 51:16

Nereputar kwaw ma'ea'yr heremizuka ràm ne wà. Ma'ea'yr nemuwete katu haw rehe hapy pyr na'ikatu kwaw newe wà.

Provérbios 15:8

Aze ikatu 'ym ma'e uzuka ma'ea'yr Tupàn Tuweharupi Wiko Ma'e henataromo wà, iro Tupàn pe. Aze ikatu ma'e uze'eg izupe wà, hurywete a'e.

Provérbios 21:27

Aze ikatu 'ym ma'e uzuka ma'ea'yr Tupàn henataromo wà, a'e teko iro izupe wà. Aze ukatu 'ymaw rupi werur a'e ma'e wà, iro tuwe Tupàn pe wà.

Provérbios 21:3

Ezapo ikatu ma'e nehe. Erereko katu amogwer wà nehe. Ta'e nezewe iapo haw ikatu wera'u Tupàn pe henataromo ma'ea'yr penemizuka wi a'e.

Isaías 58:2

Azeharomoete hemuwete katu tuweharupi a'e wà. — Urepurukwaw wer neremiapo putar haw rehe ure, i'i ihewe wà. Uze'eg waiko teko ikatu ma'e iapo har ài wà, heze'eg ihaw 'ymar ài wà. — Emur neze'eg ikatu ma'e urewe nehe, i'i ihewe wà. Ipurumuwete wer herehe tuweharupi wà, i'i Tupàn.

Isaías 66:3

Nezewe rehe we heta we tapi'ak awa ma'ea'yr hapy haw rehe izuka har wà. Uzuka awa wà no. Heta àràpuhàràn hawitu ma'e izuka har wà no. Uzuka zawar wà no. Heta arozràn ihewe imur har wà. Umur tàzàhuràn huwykwer ihewe wà no. Heta yhyk hyàkwegatu ma'e herenataromo imunykar wà no. Amo umuwete ma'e hagapaw wà no. Agwer teko uzapo wemimutar wà. Wanemiapo hemuhuhuk kar har ikatu wanupe.

Jeremias 6:20

Werur yhyk zàwenugar hyàkwegatu ma'e Xama parer ihewe wà. Nazekaiw kwaw hehe. Werur ka'a hyàkwegatu ma'e muite arer ihewe wà no. Nazekaiw kwaw hehe. Umur ma'e ihewe wà. Namuawyze kwaw ihe. Uzuka ma'ea'yr herenataromo wà. Nezewe rehe we naherurywete kwaw ihe.

Jeremias 7:21

Amo ihewe imur pyr ukaz paw rupi ma'ea'yr hapy haw rehe wà. Amo ae ma'ea'yr ho'o kwer rehe pepuner i'u haw rehe. Ihe Tupàn Tuweharupi Wiko Ma'e Upuner Wera'u Ma'e Izaew wazar ihe amume'u ko ma'e ihe. Pepuner ma'ea'yr wano'o kwer paw i'u haw rehe. Nazekaiw kwaw penemiapo rehe kury.

Oséias 6:6

— Heamutar katu pe nehe. Aputar heamutar katu haw. Naputar kwaw ihewe imur pyr penemirur. Ikatu ma'ea'yr hapy haw herenataromo har ihewe. Pekatu wera'u putar ihewe nehe, aze peruzar heze'eg nehe.

Oséias 8:13

Uzuka ma'ea'yr herenataromo wà. Uzuhez ma'ea'yr herenataromo izuka pyrer wano'o kwer wà. Ihe Tupàn Tuweharupi Wiko Ma'e ihe, naherurywete kwaw wanehe ihe. Hema'enukwaw putar wanemiapo kwer rehe ihe nehe. Azepyk putar wanehe nehe. Amuzewyr kar wi putar Ezit ywy rehe ihe wà nehe.

Amós 4:5

Pemono typy'ak Tupàn ikatu haw hexak kar haw izupe nehe. A'e re pehem a'e wi penemiapo kwer imume'u pà teko wanupe nehe. — Oromono e ma'e kwez Tupàn pe ure kury. Ni amo nuerur kar kwaw a'e ma'e urewe wà, peze wanupe nehe. Ikatuahy agwer ma'e iapo haw peme.

Amós 5:21

Tupàn Tuweharupi Wiko Ma'e uze'eg iko wemiaihu wanupe kury. — Pepynykawhu iroahy ihewe wà. Pezemono'ono'ogaw pepuka 'ymaw iroahy ihewe wà no.

Amós 5:22

Naputar kwaw ma'ea'yr iapy pyrer herenataromo. Naputar kwaw arozràn penemimur. Pemur ma'ea'yr ikyra katu ma'e ihewe zanezeàmàtyry'ym 'ymaw rehe har no. Naputar kwaw ihe wà.

Miquéias 6:7

Aipo Tupàn Tuweharupi Wiko Ma'e hurywete putar nehe, aze azuka àràpuhàràn hawitu ma'e tetea'u henataromo wà nehe. Aipo hurywete putar uri kawer 'y yrykawhu pupe har zàwenugar rehe nehe, aze amono izupe nehe. Aipo azuka putar hera'yripy heremiapo kwer ikatu 'ym ma'e hekuzaromo nehe, iaiw ma'e hekuzaromo nehe, henataromo nehe.

Ageu 2:14

Na'e i'i Azew wanupe kury. — Nezewe i'i Tupàn Tuweharupi Wiko Ma'e. — Uzeapo nezewegatete haw ko teko wanupe. Teko ko ywy rehe har wiko ikatu 'ym ma'e romo herenataromo wà. Wanemiapo kwer paw na'ikatu kwaw. Ma'ea'yr herenataromo izuka pyr paw na'ikatu kwaw herenataromo wà no, i'i Tupàn.

Zacarias 7:5

— Eze'eg nezewe teko wanupe nehe, xaxeto wanupe nehe no. — Pemumaw 70 kwarahy pezai'o pà pezekwaku pà 5 haw zahy rehe 7 haw zahy rehe no. Napezapo kwaw a'e ma'e hemuwete katu haw rehe.

Malaquias 1:10

Nezewe uze'eg Tupàn Ikàg Wera'u Ma'e xaxeto wanupe kury. — Amo peinuromo har pe ainoz putar ma'e ihe nehe kury. Ewàpytym heràpuzuhu huken nehe. Nezewe mehe napemunyk e kwaw tata hema'e ma'ea'yr hapy haw rehe nehe. Naherurywete kwaw penehe penemiapo rehe ihe. Naputar kwaw ma'ea'yr penemimur ràm nehe.

Mateus 22:4

Na'e tuwihaw omono kar amo wemiruze'eg a'e wà no, henoz pyrer wanupe zereko haw imume'u kar pà no. — Uhem mai'u haw 'ar kury, i'i wanupe wà. — Zanezar uzuka kar tapi'ak kwez kury. Tapi'aka'yr ikyra katu ma'e uzuka kar kwez no. Uzapo kar paw temi'u a'e kury. Pezur tuwe zereko haw pe nehe ty wà, i'i wanupe wà.

Mateus 9:13

— Pekwaw ko Tupàn ze'eg kwehe arer pape rehe imuapyk pyrer pe. Nezewe i'i a'e ze'eg. Aze pemur àràpuhàràn izuka pyràm ihewe nehe, pekatu ihewe nehe. Aze pepuhareko teko pe wà nehe, pekatu wera'u ihewe nehe, i'i ze'eg kwehe arer. — Peruzar tuwe ko ze'eg peho peiko nehe ty wà, i'i wanupe — Nazur kwaw xe teko ikatuahy ma'e wanenoz pà ihe, heremiruze'eg romo wamuigo kar pà ihe. Ikatu 'ym ma'e iapo har ainoz putar hezeupe ihe wà nehe, heremiruze'eg romo wamuigo kar pà ihe wà nehe, i'i wanupe.

1 Samuel 15:22

Uwazar Xamuew ize'eg izupe a'e no. — Ma'enugar Tupàn Tuweharupi Wiko Ma'e uputar a'e. Aipo uze'eg heruzar haw uputar. Aipo ma'ea'yr hapy haw uputar. Ize'eg heruzar haw ikatu wera'u àràpuhàràn ikatu wera'u ma'e henataromo wazuka haw wi izupe.