Gênesis 7:11 - Tupàn zeꞌeg

¹¹ A'e 'ar mehe, Noe wereko 600 kwarahy. Umumaw pitài zahy a'e pe wiko pà wà. Umumaw amo 17 'ar kanuhu pupe wata pà wà no. A'e 'ar mehe 'yzygwar yryhu iwy pe har uzewàpytymawok upaw rupi wà. Ywak uzewàpytymawok ukenaw ài no.

Gênesis 7:11 ပူးပေါင်းရင်းမြစ်များ

Gênesis 1:7

Uzeapo ma'e ize'eg rupi katete. Tupàn uzapo 'y imuza'akaw a'e. Amo ipehegwer upyta iwy pe a'e. Amo ipehegwer inugwer upyta i'aromo a'e no.

Gênesis 6:17

Amo 'ar mehe amugyr kar putar àmànuhu ihe nehe, ywy ipyk kar pà izupe ihe nehe. Nezewe mehe azuka putar wikuwe ma'e ywy rehe har upaw rupi katete ihe wà nehe. Wikuwe ma'e ywy rehe har umàno putar upaw rupi katete wà nehe.

Gênesis 7:6

Noe wereko 600 kwarahy a'e 'ar mehe àmànuhu ywy ipyk mehe.

Gênesis 8:14

Mokoz haw zahy rehe 27 haw 'ar mehe ywy ikàg tuwe a'e kury.

Gênesis 8:2

'Yzygwar yryhu wy pe har, uzewàpytym a'e kury. Ywak uzewàpytym uken ài no. Àmànuhu upik oho kury, ukyr ire upytu'u pà kury.

2 Reis 7:19

A'e tuwihaw uwazar nezewe Erizew pe. — Aze mo Tupàn Tuweharupi Wiko Ma'e uwàpytymawok ywak a'e, aze mo weityk arozràn ywy rehe, aze mo weityk xewar ywy rehe, nezewe rehe we mo nupuner iwer mo neze'eg rupi uzeapo haw rehe, i'i izupe. Uwazar Erizew ize'eg izupe. — Nereha pupe erexak putar izeapo mehe nehe. Xo ne zo nere'u kwaw a'e temi'u nehe, i'i izupe.

2 Reis 7:2

Tuwihawete ipytywà har uze'eg Erizew pe. — Aze mo Tupàn Tuweharupi Wiko Ma'e uwàpytymawok ywak a'e, aze mo weityk arozràn ywy rehe, aze mo weityk xewar ywy rehe, nezewe rehe we mo nupuner iwer neze'eg rupi uzeapo haw rehe, i'i izupe. Uwazar Erizew ize'eg izupe. — Nereha pupe erexak putar izeapo mehe nehe. Xo ne zo nere'u kwaw nehe, i'i Erizew izupe.

Jó 12:15

Aze Tupàn umupytu'u kar àmàn ikyr ire, uxinig ywy a'e. Aze umuhem kar 'y, Tynehem ywy 'y pupe.

Jó 28:4

Muite tawhu wi wanekon wà. Ni amo noho kwaw a'e pe wà. Uhàwykàz ywy ita hekuzar katu ma'e hekar pà wà. A'e zutyka'i uma'ereko a'e pe wà. Uzaiko a'e pe uwauwak pà wà, ko rupi wà, kwe rupi wà.

Jó 38:16

Izo. Aipo erexak 'ytyzuzàmaw yryhu imynehemar. Yryhu ohoete a'e. Aipo ereata eho iwy pe.

Jó 38:37

Mo upuner ywàkun wapapar haw rehe. Mo upuner izi'y izakookaw rehe àmàn romo.

Salmos 33:7

Omono'og Tupàn yryhu paw pitài yryhu romo iapo pà. Omonokatu 'y yryhu rehe har imonokatu haw pupe no.

Salmos 74:15

Erewàpytymawok ytyzuzàmaw ne wà. Eremuyryk kar yrykaw ne wà no. Yrykawhu eremuxinig kar ne wà no.

Provérbios 3:20

Ima'ekwaw katu haw umuyryk kar yryhu paw. Umugyr kar àmàn ywàkun wi ywy rehe no.

Isaías 24:18

Uzemi'ikar ma'e wanuwi uhem ma'e kwer u'ar putar ywykwar pupe nehe. Ywykwar wi uhem ma'e kwer uzepyhyk kar putar miar izepyhykaw zàwenugar pupe nehe. Ukyr etea'u putar àmàn nehe. Nuzawy kwaw ypaw wanehe izakookaw nehe. Uryryryryz putar ywy uwy pe har rehe nehe no.

Isaías 24:19

Ywy uryryryryz putar oxoroxorok pà nehe. Uzepei'ài'àg putar upaw rupi nehe.

Jeremias 5:22

Aiko Tupàn Tuweharupi Wiko Ma'e romo ihe. Màràzàwe tuwe napekyze kwaw ihewi. Màràzàwe tuwe naperyryryryz kwaw herenataromo. Ihe amono ywyxiguhu ywyzaw romo yryhu rehe ihe. Nupuner pixik kwaw hahaw paw rehe. Wikwahy yryhu. Nezewe rehe we nupuner kwaw hahaw paw rehe. 'Ykotok tyapu. Nuhem kwaw a'e wi wà.

Jeremias 51:16

Aze Tupàn Tuweharupi Wiko Ma'e omokororo kar, 'y ywak rehe har okororo. Umuzeupir kar ywàkun ywy iahykaw wi. Uzapo àmàn iweraw paw. Umuhem kar ywytu imono ipyta haw wi no.

Ezequiel 26:19

Zanezar Tuweharupi Wiko Ma'e uze'eg kury. — Urumuigo kar putar tawhu teko heta 'ymaw romo ihe nehe, tawhu imumew pyrer zàwenugar romo ihe nehe. Ni amo nuiko kwaw a'e pe wà. Urupyk putar 'y yryhu ohoete ma'e pe har pupe nehe.

Malaquias 3:10

Ihe Tupàn Ikàg Wera'u Ma'e azapo kar ko ma'e teko peme kury. Perur pema'e ihewe imur pyràm paw heràpuzuhu pe imonokatu haw pe nehe. Nezewe mehe uhyk putar temi'u heràpuzuhu pe nehe. Heragaw pe nehe. Pexak putar hekatu haw nehe. Awàpytymawok putar ywak hukenaw nehe. Amur kar putar heze'egatu ikatuahy ma'e penehe ihe nehe.

Mateus 24:38

Kwehe mehe nezewegatete teko waneko awer a'e wà no, àmànuhu ikyr 'ym mehe a'e wà no. Noe umume'u àmànuhu ikyr àwàm teko wanupe a'e. Nuzekaiw kwaw ize'eg rehe a'e wà. Umai'u wi wi waiko wà, kàwiahy i'u pà wà, ize'eg rehe uzeruzar 'ym pà wà. Uzereko waiko wà no. Na'e Noe wixe kanuhu pupe wà, àmànuhu wi uzepyro pà wà. A'e 'ar mehe we teko nupytu'u kwaw agwer ma'e iapo re wà, umai'u re wà, uzereko re wà.

1 Tessalonicenses 5:3

Kuzà ipuru'a ma'e a'e, nukwaw kwaw umemyrahy haw wi uhem àwàm a'e. — Nahepurupuraraw wer kwaw zepe a'e ma'erahy rehe ihe, i'i putar zepe uzeupe nehe. Nan kwaw pa. Upuraraw putar a'e ma'erahy azeharomoete nehe. Nupuner kwaw uhemaw rehe izuwi nehe. Nezewegatete teko a'e wà nehe no. Nukwaw kwaw ma'erahyhu iahykaw rehe har ihemaw 'ar a'e wà no. — Xo ikatuahy ma'e uzeapo iko zanewe kury, naxipuraraw kwaw ma'erahy zaiko zane kury, i'i putar uzeupeupe wà nehe. Na'arewahy a'e 'ar mehe we uhem putar ma'erahyhu iahykaw rehe har a'e nehe. — Nahepurupuraraw wer kwaw zepe ko ma'erahy rehe ihe, i'i putar zepe uzeupe wà nehe, a'e kuzà ài wà nehe. Nan kwaw pa. Upuraraw putar tuwe a'e ma'erahyhu wà nehe. Nupuner kwaw uhemaw rehe izuwi wà nehe.

2 Pedro 3:6

Umumaw ywy rehe har kwehe arer 'y pupe a'e no. Umugyr kar àmànuhu, teko ywy rehe har wazuka pà.