Gênesis 49:6 - Tupàn zeꞌeg

⁶ Naiko kwaw wapyr iaiw ma'e iapo àwàm rehe waze'eg mehe ihe nehe. Naiko kwaw wanehe we wazemono'og mehe nehe. Ta'e wehaite haw rupi uzuka awa a'e wà xe. Ta'e uzemaraz tapi'ak wanehe wamupàri kar pà a'e wà xe.

Gênesis 49:6 ပူးပေါင်းရင်းမြစ်များ

Gênesis 34:30

Na'e uze'eg Zako Ximeàw pe Erewi pe kury. — Zawaiw katu putar hereko àwàm ihewe nehe kury, ta'e pezuka a'e teko paw pe wà xe, wama'e paw heraha pà pe wà xe. Kànàà pe har a'e wà nehe, Perize izuapyapyr ywy rehe har a'e wà nehe no, ko ywy rehe har paw a'e wà nehe no, na'iakatuwawahy kwaw herehe a'e wà nehe. Naheta tete kwaw awa zauxiapekwer romo ihewe wà. Aze ko ywy rehe har uzemono'og wà heàmàtyry'ym pà wà nehe, uzuka putar heànàm paw wà nehe, i'i wanupe.

2 Samuel 8:4

Upyhyk Tawi 1.700 zauxiapekwer kawaru ku'az har Ananezer wi wà. Upyhyk 2 miw zauxiapekwer upy rehe wata ma'e izuwi wà no. Umupàri kawaru ywyramawa heruata har wà no. Xo 100 ywyramawa heruata har zo wezar wà, ipàri 'ym romo wà.

1 Crônicas 18:4

Tawi upyro 1.000 ywyramawa zeàmàtyry'ymawhu pe har Ananez wi wà. Upyro 7.000 zauxiapekwer kawaru ku'az har izuwi wà no. Upyro 20.000 zauxiapekwer upy rehe wata ma'e wanehe we izuwi wà no. Upyhyk kawaru tetea'u wà no. Omono'og kawaru 100 ywyramawa imutykar wà. Umupàri amogwer wà.

Salmos 1:1

Hurywete putar Ikatu 'ym ma'e wapureruze'egaw rehe uzekaiw 'ym ma'e a'e wà nehe. Hurywete putar Tupàn iputar 'ymar wazàwe wiko 'ym ma'e a'e wà nehe no. Hurywete putar Tupàn rehe uze'eg urywahyahy ma'e wanehe we oho 'ym ma'e a'e wà nehe no.

Salmos 103:1

O Tupàn Tuweharupi Wiko Ma'e. Tuwe hepy'a umume'u tuwe nekatu haw nehe. Tuwe amume'u Tupàn ikatuahy haw hekàgaw nànàn nehe.

Salmos 139:19

O Tupàn, aze mo eremumaw ikatu 'ym ma'e ne wà, herurywete mo ihe. Aze mo awa ipuruzukaiw ma'e utyryk ihewi wà, herurywete mo ihe.

Salmos 16:9

A'e rupi hepy'a hurywete ihe. Aiko hurywete ma'e romo ihe. Nakyze kwaw ma'e wi.

Salmos 26:9

Hemumaw zo pe amogwer ikatu 'ym ma'e iapo har wainuromo nehe. Erezepyk putar puruzuka ma'e wanehe nehe. Hepyro a'e nezepykaw wi nehe,

Salmos 28:3

Ezepyk zo herehe iaiw ma'e wainuromo nehe, Ikatu 'ym ma'e iapo har wainuromo nehe. — Uruiko nemyrypar romo ure, i'i mua'u ihewe wà. Tynehem wapy'a katu 'ymaw pupe wà.

Salmos 30:12

A'e rupi napytu'u kwaw hezegar ire nehe. Azegar putar newe nekatu haw rehe nehe. O Tuweharupi Wiko Ma'e, ereiko hezar romo. Nekatu haw amume'u putar newe tuweharupi nehe.

Salmos 42:11

Màràzàwe tuwe azemumikahy ihe. Màràzàwe tuwe naherurywete kwaw. Nezewe rehe we àro Tupàn ikatu ma'e hemiapo ràm ihe. Amume'u ikatu haw teko wanupe ihe no. Wiko hepyr har romo hezar romo a'e.

Salmos 42:5

Màràzàwe tuwe azemumikahy kury. Màràzàwe tuwe naherurywete kwaw. Àro Tupàn ihe. Ikatu haw amume'u wiwi putar ihe nehe. Hepyro har romo hekon. Wiko hezar romo.

Salmos 43:5

Màràzàwe tuwe azemumikahy ihe. Màràzàwe tuwe naherurywete kwaw. Nezewe rehe we àro putar Tupàn ikatu ma'e hemiapo ràm ihe nehe. Amume'u putar ikatu haw teko wanupe ihe nehe no. Wiko hepyro har romo hezar romo a'e.

Salmos 5:10

Emume'u wanehe nezepyk àwàm nehe, o Tupàn. Ezepyk wanehe nehe. Ipurapo wer ikatu 'ym ma'e rehe amo wanupe wà. Tuwe wanemimutar weraha iaiw paw pe wà nehe. Emuhem kar nereko haw wi ne wà nehe, Ta'e uzawy tetea'u neze'eg a'e wà xe. Na'ipureruzar wer kwaw nerehe wà.

Salmos 57:8

Eme'e nehe, hepy'a. Eme'e nehe, hewioràwiràn. Epu'àm nehe, hewioràw zàwenugar. Amume'e kar putar kwarahy ihe nehe.

Salmos 64:2

Ikatu 'ym ma'e umume'u hezuka àwàm uzeupeupe wà. Hepyro pe wanuwi nehe. Awa iaiw ma'e uzemono'og ikatu 'ym ma'e iapo àwàm rehe wà. Ezekaiw katu herehe wanuwi hemunyryk kar pà nehe.

Provérbios 1:11

Nezewe uze'eg putar ru'u newe nehe. — Ezur ty, xiuka amo zane wà nehe ty, i'i putar newe wà nehe. — Zazemurywete kar teko ikatu ma'e wàmàtyry'ym pà nehe.

Provérbios 12:5

Imunar 'ym ma'e wereko teko paw wemu'em 'ym pà a'e wà. Ikatu 'ym ma'e hemu'em amogwer wanupe tuweharupi wà.

Jeremias 15:17

Naiko e kwaw hepuka pà. Naiko e kwaw teko wainuinuromo. Eremur ma'ereko haw ipuhuz katu ma'e ihewe. A'e rupi naheta kwaw hemyrypar ihewe wà. Azemumikahy hekwahy pà.

Jeremias 4:19

Hahy ihewe. Napuner kwaw agwer ma'erahy ipuraraw haw rehe. Uhua'u. A, hepy'a. Hepy'a unununukahy iko. Napuner kwaw heze'eg 'ymaw rehe. Ta'e ainu xi'àm ma'e'ak kwer iapo pyrer ihe xe. Aenu zauxiapekwer zeàmàtyry'ymawhu pe oho ma'e wanehapukaz mehe ihe wà.

Lucas 12:19

Na'e a'e putar hezeupe nehe. — Kwa, ma'e paw ikatuahy ihewe kury, a'e putar hezeupe nehe, i'i uzeupe. — Uhyk tuwe ma'e ihewe kury. Kwehe naputar kwaw amo ma'e ihe nehe. Apytu'u putar hema'ereko re nehe. Amai'u putar nehe, win i'u pà nehe no, ikatuahy putar hereko àwàm ihewe nehe, i'i uzeupe.

2 Coríntios 6:14

Ximuzuwake kawaru amo kawaru rehe zane, ywyramawa heraha kar pà wanupe zane. Aze kawaru ipy iho wer ko rupi nehe, aze kawaru inugwer iho wer kwe rupi nehe, màràzàwe nezewe mehe nehe kury. Nezewegatete aze neremireko wer nehe, ereko zo uzeruzar 'ym ma'e nehe, neremireko romo nehe. Aze nemen wer nehe, ereko zo uzeruzar 'ym ma'e nehe, nemen romo nehe. Ta'e nepurapo wer putar zepe ikatu ma'e rehe nehe xe, neremireko ipurapo wer putar zepe ikatu 'ym ma'e rehe a'e nehe no. Nemen a'e rupi katete nehe no. Ikatu ma'e nupuner kwaw weko haw rehe ikatu 'ym ma'e wapyr wà. Tatainy rehe har nupuner kwaw ipytunaw rehe har wapyr weko haw rehe wà.

Deuteronômio 27:24

— Aze amo uzuka amo Izaew ikwaw kar 'ym pà nehe, Tupàn omono putar uze'egaiw a'e teko rehe a'e nehe. — Azeharomoete, i'i putar teko wanupe wà no.

Josué 11:9

Weruzar Zuzue Tupàn ze'eg. Umupàri kar kawaru wà. Umunyk kar tata ywyramawa wanehe.

Juízes 5:21

Yrykaw Kizom tynehem 'y pupe a'e. Weraha Izaew waàmàtyry'ymar wazuka pà a'e wà. Yrykawhu kwehe arer a'e, Kizom her ma'e a'e. Ata putar nehe, Ata putar hekàgaw rupi nehe.