Gênesis 27:29 - Tupàn zeꞌeg

²⁹ Tuwe ereiko teko tetea'u wazar romo nehe, waneruze'egar romo nehe, tuwe teko tetea'u nemuwete katu wà nehe. Tuwe erezapo kar ma'e neànàm wanupe nehe. Tuwe amogwer nehy izuapyapyr nemuwete katu wà nehe. Aze amo omono uze'egaiw nerehe wà nehe, tuwe iaiw ma'e uzeapo wanupe nehe. Aze amo omono uze'egatu nerehe wà nehe, tuwe ikatu ma'e uzeapo wanupe nehe, i'i Izak wa'yr Zako pe kury.

Gênesis 27:29 ပူးပေါင်းရင်းမြစ်များ

Gênesis 12:3

— Aze eremono neze'egatu amo teko wanehe nehe, amume'u putar heze'egatu a'e teko wanupe ihe nehe no. Aze eremono neze'egaiw amo teko wanehe nehe, amono putar heze'egaiw a'e teko wanehe ihe nehe no. Teko paw waneko haw ikatu wera'u putar nehe, ta'e amono heze'egatu nerehe ihe nehe xe, i'i izupe.

Gênesis 25:33

— Emume'uahy neze'eg ihewe kury, i'i tywyr izupe. Umume'uahy uze'eg izupe. A'e rupi Zako wiko Izak heimaw wazar ràm romo a'e kury. Wiko Zako ta'yr ipy zàwenugar romo, ta'yr ipy hekuzaromo kury.

Gênesis 27:30

Umumaw Izak uze'egatu imono haw a'e kury. Ta'yr Zako uhem oho a'e wi. A'e 'ar mehe we uhem Ezau wà a'e pe kury, uzemi'i kar ire kury.

Gênesis 27:37

Uwazar ize'eg izupe. — Amuigo kar Zako kwez nezar romo ihe. Amuigo kar iànàm paw hemiruze'eg romo ihe wà no. Amume'u temi'u tetea'u ipyhyk àwàm kwez izupe ihe no. Amume'u win tetea'u ipyhyk àwàm kwez izupe ihe no. A'e rupi, hera'yr, napuner kwaw ni pitài ma'e iapo haw rehe newe ihe kury, i'i Ezau pe.

Gênesis 27:40

Takihepuku pupe puruzuka ma'e romo ereiko putar nehe. Nerywyr pe uma'ereko ma'e romo ereiko putar nehe. Amo 'ar mehe nereko haw iro putar newe nehe. A'e mehe erehem putar izuwi nehe, izupe uma'ereko ma'e romo nereko re nepytu'u pà nehe, i'i izupe.

Gênesis 37:10

U pe wyky'yr wanupe umume'u oho. Henu mehe tu uze'egahy izupe. — Ma'in nepuahu awer. Nehy a'e, neryky'yr a'e wà no, ihe ihe no, aipo ure paw uruzemumew putar nerenataromo ure nehe, ureruwa wamuhyk pà ywy rehe nerenataromo ure nehe, i'i izupe.

Gênesis 37:7

Hepuahu pe zaiko ko pe zane, arozràn ipo'o pyrer imono'og pà iàpixipixi pà zane. Na'arewahy hema'e arozràn imono'og pyrer iàpixi pyrer upu'àm a'e kury. Amogwer iàpixi pyrer a'e wà, pema'e a'e wà, uzemumew hema'e henataromo a'e wà, i'i izupe wà.

Gênesis 9:27

Tuwe Tupàn umuigo kar Zape ywy tetea'u izar romo a'e nehe. Tuwe Zape izuapyapyr wiko Xem heko haw pe wà nehe. Tuwe Kànàà wiko Zape pe uma'ereko e ma'e romo a'e nehe, i'i Noe a'e 'ar mehe.

1 Reis 22:47

Umumaw kuzà wyzài paw wà. Umumaw kuzà wyzài tupàn a'ua'u wamuwete haw pe uma'ereko ma'e paw wà no. Ta'e tu Az her ma'e numumaw kwaw wikuwe mehe a'e wà xe.

1 Reis 4:21

Ywy tetea'u wanehe har wiko Xàrumàw hemiruze'eg romo wà. Iziwy uzypyrog yrykawhu Ewparat pe. Oho ywy Piri ywy rehe har waneko haw pe. Oho Ezit ywyzaw pe no. A'e ywy rehe har paw omono temetarer Xàrumàw pe wà. Wikuwe mehe weko haw 'ar nànàn Xàrumàw wiko wanuwihawete romo.

1 Crônicas 5:2

Nezewe rehe we Zuta izuapyapyr upuner wera'u amo Zako ta'yr wazuapyapyr wanuwi paw rupi wà. A'e rupi Zuta izuapyapyr wiko Zako ta'yr wazuapyapyr wanuwihaw romo a'e wà.)

Salmos 72:8

Ipureruze'egaw uzypyrog putar pitài yryhu pe nehe. Oho putar inugwer yryhu pe nehe. Uzypyrog putar yrykawhu Ewparat her ma'e pe nehe. Oho putar ywy iahykaw pe nehe no.

Isaías 45:14

Uze'eg Tupàn Tuweharupi Wiko Ma'e wemiaihu Izaew wanupe kury. — Pepyhyk putar Ezit ywy rehe har wanemetarer nehe. Pepyhyk putar Exio ywy rehe har wanemetarer nehe no. Pepyhyk putar Xewa rehe har wanemetarer nehe no. Iaiha katu Xewa rehe har wà. Peityk putar pe wà nehe. Wiko putar peme uma'ereko e ma'e romo wà nehe. Pezàpixipixi putar kyhàhàm tàtà pupe pe wà nehe, wamuata kar pà penaikwerupi pe wà nehe. Wapyk putar upenàràg rehe penenataromo wà nehe. Uze'eg putar peme ikàg 'ym ma'e romo wà nehe. — Tupàn wiko penehe we a'e. Naheta kwaw amo. Xo a'e zo.

Isaías 49:23

Tuwihawete amo ae ywy rehe har uzekaiw katu putar pememyr wanehe a'e wà nehe. Tuwihawete kuzà wiko putar wanehe uzekaiw ma'e romo wà nehe no. Tuwihawete wà, tuwihawete kuzà wà no, uzeamumew putar upenàràg rehe wapyk pà penenataromo wà nehe. Umuhyk putar uwa ywy rehe wà. Uwerew putar ywy imuku'i pyrer pepy wi u'ar ma'e kwer wà nehe no. Nezewe mehe pekwaw putar Tupàn Tuweharupi Wiko Ma'e romo hereko haw nehe. Herehe uzeruzar ma'e nuzemumikahy pixik kwaw wà nehe, i'i Tupàn.

Isaías 49:7

Tupàn Tuweharupi Wiko Ma'e a'e, Izaew wazar Ikatuahy Ma'e a'e, wapyro har a'e, uze'eg wemiruze'eg pe a'e kury. Teko amo ywy rehe har tetea'u na'iakatuwawahy kwaw hemiruze'eg rehe wà. Tuwihawete wanupe uma'ereko e ma'e romo hekon a'e. Tupàn Tuweharupi Wiko Ma'e uze'eg wemiruze'eg pe. — Tuwihawete a'e wà nehe, tuwihawete wana'yr a'e wà nehe no, wexak putar nepuner haw a'e wà nehe. Ur putar nepy huwake wapyk pà upenàràg rehe wà nehe, nemuawate haw hexak kar pà newe wà nehe. Ta'e ihe Tupàn Tuweharupi Wiko Ma'e ihe azapo ma'e heremimume'u kwer rupi katete ihe xe. Ihe Izaew wazar Ikatuahy Ma'e ihe, urexak heremiruze'eg romo nemuigo kar pà ihe, i'i Tupàn.

Isaías 60:12

Teko amo ywy rehe har a'e wà nehe, aze nuiko kwaw neremiruze'eg romo wà nehe, amumaw putar a'e teko ihe wà nehe. Aityk putar a'e teko azeharomoete ihe wà nehe.

Isaías 60:14

Amo tuwihaw upuraraw kar ma'erahy newe wà, ikatu 'ym ma'e iapo pà newe wà. Wana'yr ur putar newe wà nehe no. Wapyk putar upenàràg rehe nerenataromo wà nehe. Nerehe uze'eg zemueteahy ma'e kwer paw ur putar newe wà nehe no. Umuhyk putar uwa ywy rehe nerenataromo wà nehe. — Tawhu Tupàn Tuweharupi Wiko Ma'e heko haw, i'i putar newe wà nehe. — Ywytyr Xiàw her ma'e Izaew wazar Ikatuahy Ma'e henaw, i'i putar newe wà nehe no.

Isaías 9:7

Tuwihawete Tawi izuapyr a'e, Tuwihawete romo heko mehe ipuner haw uhua'u wera'u putar oho iko tuweharupi nehe. Naheta kwaw zeàmàtyry'ymawhu tuwihawete romo heko mehe nehe. Upureruze'eg putar ukatu haw rupi nehe. Upureruze'eg putar ukatuahy haw rupi nehe. Nezewe mehe teko wiko putar ikatu ma'e iapo har romo wà nehe. Izypy mehe nehe, tuweharupi nehe no. Tupàn Tuweharupi Wiko Ma'e Ikàg Wera'u Ma'e upuruamutar katu tuwe a'e. A'e rupi uzapo kar putar a'e ma'e paw a'e nehe.

Números 23:8

A'e teko uzuka putar Moaw a'e wà nehe. Napuner kwaw ze'egaiw imono haw rehe wanehe nehe. Tupàn numume'u kwaw Izaew wanehe uzepyk àwàm a'e. A'e rupi namume'u kwaw wanehe izepyk àwàm ihe nehe.

Números 24:18

Weityk putar Izaew waàmàtyry'ymar Enom izuapyapyr wà nehe. Upyhyk putar waiwy wà nehe. Wiko putar waiwy izar romo wà nehe no. Teko Izaew izuapyapyr wexak kar putar ukàgaw wà nehe.

Números 24:9

Izaew nuzawy kwaw zàwàruhu iriàw upuner ma'e wà. Iker mehe ni amo numume'e kar kwaw wà. Aze amo omono ze'egatu Izaew wanehe nehe, Tupàn omono putar ze'egatu a'e ze'egatu imono har rehe nehe no. Aze amo omono ze'egaiw Izaew wanehe nehe. Tupàn omono putar ze'egaiw a'e ze'egaiw imono har rehe nehe no.

Mateus 25:40

Na'e a'e putar wanupe ihe nehe kury. — Azeharomoete ko ma'e amume'u peme ihe. Pezapo agwer ma'e herywyr wanupe, te ikàg 'ym wera'u ma'e wanupe. A'e penemiapo kwer herywyr wanupe arer nuzawy kwaw penemiapo kwer ihewe arer a'e, a'e putar wanupe nehe.

Mateus 25:45

Na'e a'e putar wanupe ihe nehe. — Azeharomoete ko ma'e amume'u putar peme ihe nehe kury. Penekyty'ym agwer ma'e rehe pe, herywyr ikàg 'ym ma'e wanupe pe. Wanupe penekyty'ymaw nuzawy kwaw ihewe penekyty'ymaw, a'e putar wanupe nehe.

Apocalipse 19:16

Heta amo her ukamir rehe imuapyk pyrer a'e no, hetymà rehe a'e no. — Tuwihaw wanuwihaw, i'i a'e her a'e. — Teko wazar wazar, i'i amo her no.