Gênesis 1:2 - Tupàn zeꞌeg

² Nuzapo kwaw Tupàn ywy ikatuahy ma'e romo a'e 'ar rehe a'e rihi. Naheta kwaw wikuwe ma'e a'e 'ar mehe ywy rehe a'e rihi. Xo yryhu ohoete ma'e zo heta. Ipytunahy haw upyk yryhu a'e. Tupàn Hekwe wiko 'y 'aromo a'e.

Gênesis 1:2 ပူးပေါင်းရင်းမြစ်များ

Jó 26:14

Tupàn upuner ma'e tetea'u iapo haw rehe, wyzài ikàg ma'e iapo haw rehe. Xo màràn zo amume'u kwez xe peme. Mo upuner ipuner haw uhua'u haw ikwaw paw rehe wà.

Jó 26:7

Tupàn upupirar ywak ma'e heta 'ymaw i'aromo. Umupyta kar ywy ma'e heta 'ymaw i'aromo no.

Jó 38:9

Ihe apyk yryhu ywàkun pupe ihe. Azuwàzuwàn ipytunaw pupe no.

Jó 41:32

Wata mehe wezar tatainy zàwenugar oho uwaikwer rupi. Nuzawy kwaw yryhu i'awxig ma'e.

Salmos 104:30

Aze eremupytuhem kar ne wà, uzexak kar wà. Nezewe mehe eremono ma'e wikuwe ma'e ipyahu ma'e ywy rehe ne wà.

Salmos 104:6

Teko upyk ma'e zewàwànaw pupe wà. Nezewegatete erepyk ywy yryhu pupe. 'Y upyta ywytyruhu 'aromo.

Salmos 136:6

Tupàn umuapyk ywy 'y typya'u ma'e i'aromo a'e. Ipuruamutar katu haw nupaw pixik kwaw nehe.

Salmos 148:7

Pemume'u Tupàn Tuweharupi Wiko Ma'e ikatu haw nehe, ywy rehe har paw wà. Pemume'u Tupàn Tuweharupi Wiko Ma'e ikatu haw nehe, miar yryhu pe har uhua'u ma'e wà, yryhu ohoete haw no.

Salmos 33:6

Uze'eg Tupàn Tuweharupi Wiko Ma'e ywak iapo pà a'e. Umume'u wemimutar kwarahy iapo pà, zahy iapo pà no, zahytata iapo pà no.

Provérbios 8:24

Azexak kar yryhu izexak kar 'ym mehe we. Naheta kwaw ytyzuzàmaw a'e 'ar mehe rihi.

Isaías 31:5

Wiràmiri uwewe oho iko waity 'aromo hehe uzekaiw pà. Nezewegatete ihe Tupàn Tuweharupi Wiko Ma'e azekaiw putar Zeruzarez tawhu rehe nehe. Apyro putar tawhu heàmàtyry'ymar wanuwi nehe. Apyro putar heremiaihu ihe wà nehe no, i'i Tupàn.

Isaías 45:18

Tupàn Tuweharupi Wiko Ma'e ywak iapo arer a'e, wiko Tupàn romo a'e. Xo pitài Tupàn heta. Uzapo ywy. Omono hexakaw ikwaw paw izupe no. Umuapyk henaw rehe no. Nuzapo kwaw ma'e heta 'ymaw romo. Uzapo uzehe wiko ma'e wanereko har romo. Uze'eg Tupàn Tuweharupi Wiko Ma'e nezewe. — Aiko Tupàn Tuweharupi Wiko Ma'e romo ihe. Naheta kwaw amo tupàn ihewi.

Jeremias 4:23

Na'e ame'e kury. Naheta kwaw ma'e iapo katu haw ywy rehe. Naheta kwaw wikuwe ma'e wà no. Naheta kwaw tatainy ywak rehe.

Naum 2:10

Zauxiapekwer umumaw Nin wà. Teko paw uhem oho izuwi wà. Naheta kwaw teko a'e pe wà kury. Wapy'a tynehem wakyze haw pupe wà. Wapenàràg uryryryryz waiko wà. Wanuwa xigatu wakyze haw wi wà. Wakàgaw uhem wanuwi upaw rupi.

2 Coríntios 4:6

— Tatainy uhyape katu putar pyhaw nehe, i'i Tupàn purupe a'e. A'e ae umuhyape katu kar watainy zanepy'a pe a'e, ikatuahy ma'e iapo haw rehe zanemu'e pà a'e. A'e rupi xixak a'e tatainy zàwenugar zane kury. A'e rupi xikwaw Tupàn ikàgaw zane, xikwaw ipuràg eteahy haw zane no. Xikwaw Zaneruwihawete rehe ze'egaw, a'e rupi xikwaw Tupàn ikàgaw ipuràg eteahy haw no, ta'e ikàgaw ipuràg eteahy haw a'e xe, Zaneruwihawete rehe tuz a'e xe. A'e rupi za'e izupe, — Tupàn ikàgaw ipuràg eteahy haw uhyape katu Zaneruwihawete huwa rehe a'e, za'e izupe.

Deuteronômio 32:11

Wiràhu umu'e umemyr wawewe haw rehe a'e wà. Upupirar upepo umemyr wapyhyk pà wa'ar mehe. Nezewegatete Tupàn Tuweharupi Wiko Ma'e uzekaiw wemiaihu wanehe.