Deuteronômio 7:7 - Tupàn zeꞌeg

⁷ Tupàn Tuweharupi Wiko Ma'e peamutar katu a'e. — Heta tetea'u amo teko wanuwi wà, ni'i kwaw penexak mehe. Azeharomoete amogwer teko paw heta tetea'u wera'u pewi wà.

Deuteronômio 7:7 ပူးပေါင်းရင်းမြစ်များ

1 Crônicas 16:19

Naheta tete kwaw teko Tupàn hemiruze'eg a'e 'ar mehe wà. Wiko amo ae ywy rehe har zàwenugar a'e ywy imume'u pyrer rehe wà.

Salmos 105:12

Tupàn hemiaihu naheta tete kwaw a'e 'ar mehe wà. Wiko amo ae ywy rehe arer romo ywy imume'u pyrer rehe wixe mehe wà.

Salmos 115:1

Tuwe teko umume'u xo nekatu haw zo wà nehe, o Tupàn Tuweharupi Wiko Ma'e. Tuwe numume'u kwaw urekatu haw wà nehe, Ta'e erepuruamutar katu ne xe, ta'e neretyryk kwaw puruwi ne xe.

Salmos 44:3

Nupyhyk kwaw a'e ywy utakihe pupe wà. Nuweityk kwaw a'e ywy rehe har ukàgaw rupi wà. Weityk nepuner haw rupi wà, nekàgaw rupi wà. Nereko haw ihyape katu haw rupi weityk wà. Nezewe erexak kar neremiaihu wamutar katu haw ne, neremiaihu wanupe ne.

Isaías 51:2

Pema'enukwaw peipy Àmàrààw rehe nehe. Pema'enukwaw hemireko Xar rehe nehe no. Izuapyapyr romo peiko. Aenoz Àmàrààw imuwà ihe. Ta'yr 'ym ma'e romo hekon a'e. Nezewe rehe we amono heze'egatu hehe. Amono izuapyapyr tetea'u izupe wà.

Isaías 63:9

A'e rupi upyro wanemipuraraw paw wi a'e wà. A'e ae wiko wapyro har romo a'e. Numur kar kwaw weko haw pe har wapyro àràm romo wà. Numur kar kwaw amo wyzài wemiruze'eg. A'e ae uzapo. Uzamutar katu a'e wà. Upuhareko wà no. A'e rupi upyro wà. Tuweharupi nehe, kwarahy nànàn nehe, upyhyk waneraha pà wà.

Ezequiel 20:5

Ihe wazar Tuweharupi Wiko Ma'e ihe, amume'u ko ma'e newe ihe. Emume'u a'e ma'e paw wanupe nehe. Aexaexak Izaew izuapyapyr heremiaihu romo wamuigo kar pà amo 'ar mehe ihe wà. A'e 'ar mehe amume'u heremiapo ràm wanupe. Ezit ywy rehe waneko mehe aexak kar herekuwe haw wanupe. — Aiko Tupàn Tuweharupi Wiko Ma'e romo ihe, pezar romo ihe, a'e wanupe.

Ezequiel 36:22

A'e rupi emume'u ko heze'eg Izaew wanupe nehe kury. — Pezar Tuweharupi Wiko Ma'e umume'u ko ze'eg iko peme a'e kury. — Azapo putar ma'e ihe nehe. Nan kwaw peamutar katu haw rehe azapo putar nehe, Izaew wà. Azapo putar a'e ma'e ta'e azamutar katu herer ikatuahy ma'e ihe nehe. Pemuaiw herer peneko haw nànàn.

Mateus 7:14

Uken pixika'i ma'e a'e, nuzawy kwaw pe zawaiw katu ma'e a'e. Naheta tete kwaw teko hupi wixe ma'e a'e wà. Ta'e zawaiw katu pe pixika'i ma'e hexakaw wanupe a'e xe. Nezewegatete teko tetea'u oho putar tatahu pe a'e wà nehe, ta'e zawaiw katu Tupàn ze'eg rehe wazeruzar haw wanupe a'e xe.

Lucas 12:32

Uze'eg wi teko wanupe. — Pekyze zo ma'e wi nehe, heremiruze'eg wà. Ta'e penu ywate har ipurumur wer ukàgaw rehe peme a'e xe.

Romanos 11:6

Nuexaexak kwaw a'e teko wanemiapo kwer rehe a'e wà. Upuhareko a'e wà, a'e rupi wexaexak wà. Aze mo wexaexak a'e teko wanemiapo kwer rehe wà, a'e mehe mo nuexaexak iwer mo upurupuhareko haw rehe wà.

Romanos 9:18

Tupàn upuhareko teko a'e wà, wemimutar rupi a'e wà. Aze na'ipurupuhareko wer kwaw amo wanehe nehe, nupuhareko kwaw wà nehe. — Amupytu'u kar putar a'e awa herehe izeruzar ire ihe nehe, aze i'i amo pe nehe, a'e mehe umupytu'u kar putar izeruzar ire nehe.

Romanos 9:21

Ywy'a iapo har uma'ereko ywy rehe wemimutar rupi a'e. Upyhyk ywy. Aze ipurapo wer pitài ywy'a rehe nehe, uzapo pitài ywy'a nehe. Aze ipurapo wer mokoz ywy'a rehe nehe, uzapo putar mokoz ywy'a nehe. Uzapo amo ywy'a hekuzar katu ma'e. Uzapo amo ae ywy'a hekuzar 'ym ma'e. Wemimutar rupi tuwe uzapo ywy'a.

Deuteronômio 1:10

Tupàn Tuweharupi Wiko Ma'e Zanezar pemueta tetea'u kar a'e. Kutàri peneta haw nuzawy kwaw zahytata ywak rehe har waneta haw kury.

Deuteronômio 10:22

Zaneipy Ezit kutyr waho mehe xo 70 teko zo heta wà. Ko 'ar rehe peneta haw nuzawy kwaw zahytata ywak rehe har waneta haw. Ta'e Tupàn Tuweharupi Wiko Ma'e Zanezar umur uze'egatu penehe a'e xe.

Deuteronômio 14:2

Ta'e peiko teko Tupàn Tuweharupi Wiko Ma'e Zanezar hemixamixak kwer romo xe. Nuexak kwaw amogwer teko ywy rehe har wà. Xo pe zo penexanexak a'e.

Deuteronômio 4:37

Tupàn uzamutar zaneipy wà. A'e rupi penexanexak a'e. Upuner haw uhua'u ma'e pupe pepyro Ezit ywy wi a'e.

1 João 3:1

Tupàn zaneamutar katu haw uhua'u a'e, a'e rupi — Tupàn purumuzàmuzàg wà, i'i teko zanewe wà. Zaneamutar katu tuwe a'e. Zaiko tuwe ipurumuzàmuzàg ài. A'e rupi iàmàtyry'ymar ywy rehe har nukwaw kwaw zanereko haw a'e wà, ta'e nukwaw kwaw Tupàn heko haw a'e wà xe.

1 João 4:10

Puramutar haw nezewe a'e. Nan kwaw zane. Xiamutar Tupàn zane. Tupàn a'e ae zaneamutar a'e. Umur kar wa'yr ko ywy rehe a'e. Nezewe inuromo zanereko mehe Tupàn umunàn zanekatu 'ygwer a'e kury.