Daniel 9:5 - Tupàn zeꞌeg

⁵ Uruzapo ikatu 'ym ma'e tetea'u ure. Uruzapo ikatu 'ymaw tetea'u no. Uruzapo iaiw haw neàmàtyry'ym pà. Urupytu'u neze'eg heruzar ire no. Nureruzar kwaw neremiapo kar no haw.

Daniel 9:5 ပူးပေါင်းရင်းမြစ်များ

2 Reis 18:12

A'e ma'e uzeapo a'e wà, ta'e Izaew nuweruzar kwaw uzar Tupàn Tuweharupi Wiko Ma'e a'e wà xe. Uhaw ze'eg uzeupe Tupàn hemiapo katu kwer wà. Uhaw Tupàn ze'eg Moizez pe imono pyrer paw wà. Tupàn Tuweharupi Wiko Ma'e hemiruze'eg hekon Moizez. Na'izekaiw wer kwaw ize'eg rehe wà. Na'ipureruzar wer kwaw hehe wà no.

2 Reis 21:15

Azapo putar a'e ma'e heremiaihu wanupe ihe nehe, ta'e uzapo ma'e heremimutar 'ym a'e wà xe. Wanemiapo kwer iro ihewe. Hemuikwahy kar wà. Waipy Ezit ywy wi wahemaw henataromo te kutàri hemuikwahy kar wà waiko tuweharupi wà, i'i Tupàn teko wanupe.

Esdras 9:6

— O Tupàn, hemaranugar tuwe ihe. A'e rupi naupir kwaw heàkàg nerenataromo ihe. Ureremiapo kwer ikatu 'ygwer iaiha wera'u ureàkàg wi. Uhem ywak rehe.

Salmos 106:6

Uruzapo ikatu 'ym ma'e ureipy wazàwe ure. Na'urekatu kwaw. Ureaiw ure.

Salmos 119:102

Napytu'u kwaw neremiapo putar haw heruzar ire, Ta'e hemu'e pe ne xe.

Salmos 119:176

Ata e aha teko àràpuhàràn hawitu ma'e ukàzym ma'e kwer ài. O Tupàn Tuweharupi Wiko Ma'e, aiko neremiruze'eg romo ihe. Ezur hepiaromo nehe, ta'e naheharaz kwaw neremiapo kar wi ihe xe.

Salmos 18:21

Tuweharupi aruzar Tupàn Tuweharupi Wiko Ma'e ze'eg ihe. Napytu'u pixik kwaw heruzar ire.

Isaías 53:6

Zane paw zaiko àràpuhàràn hawitu ma'e ukàzym ma'e kwer ài zane. Zane pitàitàigatu zaha zaiko zanerape rupi zane. Tupàn Tuweharupi Wiko Ma'e uzepyk wemiruze'eg rehe. Upuraraw kar ma'erahy izupe zanekatu 'ymaw hekuzaromo. Nupuraraw kar kwaw a'e ma'erahy zanewe a'e.

Isaías 59:13

Nuruiko kwaw nerehe uzeruzar katu ma'e romo. Urupytu'u neze'eg heruzar ire. Urutyryk newi, urezar. Uruze'eg ikatu 'ym ma'e iapo haw rehe. Uruze'eg neze'eg heruzar 'ymaw rehe no. Urumume'u amogwer wanupe ureremu'em àwàm.

Isaías 64:4

Teko nuexak pixik kwaw amo tupàn wà. Nuenu pixik kwaw amo tupàn rehe ze'egaw wà. Xo ne zo nerexak a'e wà. Xo ne rehe ze'egaw zo wenu wà. Ni amo tupàn nuexak kar kwaw ikatu ma'e weruzar har wanupe ne ài wà.

Jeremias 14:20

O Tupàn Tuweharupi Wiko Ma'e, urumume'u ureremiapo kwer ikatu 'ym ma'e newe ure kury, ureipy wanemiapo kwer ure no. Azeharomoete uruzapo ikatu 'ygwer neruwa rupi ure.

Jeremias 14:7

Hemiaihu uze'eg wà kury. — O Tupàn Tuweharupi Wiko Ma'e. Ureremiapo kwer ikatu 'ym ma'e umume'u urekatu 'ymaw. Urenoz urepytywà àwàm newe. Ta'e eremume'u urepytywà àwàm urewe kwehe mehe ne xe. Urutyryk tetea'u newi ure. Uruzapo ikatu 'ym ma'e tetea'u nerenataromo no.

Jeremias 3:25

Uruzemuigo kar putar ikàg 'ym ma'e romo nehe. Uretynehem putar maranugar haw pupe nehe no. Kwehe mehe Tupàn Tuweharupi Wiko Ma'e upyro ureipy Ezit wi wà. A'e 'ar henataromo a'e wà, ure no, uruzapo ikatu 'ym ma'e henataromo ure. Nureruzar kwaw ize'eg ure.

Jeremias 30:14

Peamutar arer paw heharaz pewi wà. Nuzeruzar kwaw penehe wà. Apuàmàtyry'ym ihe, ta'e peiko heàmàtyry'ymar wazàwe pe xe. Penehe hezepykaw tàtàahy a'e, ta'e heta tetea'u penemiapo kwer ikatu 'ym ma'e xe. Pekatu 'ymaw uhua'u a'e no.

Jeremias 44:3

A'e ma'e uzeapo ta'e teko a'e tawhu pe wiko ma'e uzapo ikatu 'ym ma'e wà xe. Hemuikwahy kar a'e wà. Uzuka ma'ea'yr amo tupàn wanenataromo wà. Wekar amo tupàn oho wà. A'e 'ym mehe ni a'e wà, ni peà, ni peipy wà, napemuwete kwaw a'e tupàn pe wà.

Lamentações de Jeremias 1:18

Tupàn Tuweharupi Wiko Ma'e ikatu a'e. Uzepyk urerehe. Ta'e nureruzar kwaw ize'eg ure xe. Pezeapyaka katu nehe, teko paw wà. Pexak urerahy haw nehe. Zauxiapekwer weraha Tupàn hemiaihu muitea'u xe wi wà: kwàkwàmo wà, kuzàwaza wà no.

Lamentações de Jeremias 1:20

O Tupàn Tuweharupi Wiko Ma'e exak ma'erahy ureremipuraraw nehe. Uruzemumikahy tuwe. Urezemumikahy haw hahy urepy'a pe. Ta'e urema'enukwaw neze'eg heruzar 'ym awer rehe ure xe. Teko uzuka amo teko nahu rupi wà. Te tàpuz pupe uzuka wà, i'i Zeruzarez pe har wà.

Lamentações de Jeremias 3:42

— O Tupàn, uruzapo ikatu 'ym ma'e ure. Urupytu'u nereruzar ire. A'e rupi nanereharaz kwaw ureremiapo kwer wi.

Ezequiel 5:6

Nezewe rehe we Zeruzarez upytu'u heze'eg heruzar ire wà. Iaiw wera'u amo ywy rehe har wanuwi wà. Upytu'u wera'u hereruzar ire teko uiwyr har wanuwi wà no. Zeruzarez pe har weityk heremiapo kar haw wà. Na'ipureruzar wer kwaw heze'eg rehe wà.

Ezequiel 6:9

Zauxiapekwer weraha putar a'e teko weko haw pe wemipyhyk kwer romo wà nehe. A'e pe wiko mehe ima'enukwaw putar herehe wà nehe. — Azeharomoete uzepyk zanerehe a'e, i'i putar ihewe wà nehe. — Zanemumaranugar kar a'e, i'i putar ihewe wà nehe no. Ta'e wapy'a uzeruzar 'ym ma'e hereityk a'e wà xe. Nahemuwete kwaw wà. Umuwete katu tupàn a'ua'u wà. Na'iakatuwawahy kwaw uzehe a'e wà nehe, ta'e iaiw a'e wà xe. Uzapo purumuhuhuk kar ma'e wà.

Daniel 9:11

Teko Izaew paw uzuhaw neze'eg wà. Nuweruzar kwaw neremiapo kar haw wà. Uruzapo ikatu 'ym ma'e nerenataromo. A'e rupi eremu'ar kar ze'egaiw urerehe, iaiw haw imu'ar kar pà urerehe no. Kwehe mehe Moizez neremiruze'eg umuapyk a'e iaiw haw pape rehe.

Daniel 9:15

O Tupàn urezar, erexak kar nepuner haw uhua'u ma'e neremiaihu Ezit ywy wi wapyro mehe ne. Te ko 'ar rehe teko tetea'u uze'eg a'e neremiapo kwer rehe wà. Nezewe rehe we uruzapo ikatu 'ym ma'e ure.

Daniel 9:9

Nezewe rehe we urepuhareko katu pe ne. Nepurumunàn wer ureremiapo kwer rehe wyzài 'ar mehe. Aze uruàmàtyry'ym ure, nezewe rehe we eremunàn ureremiapo kwer.

Oséias 1:2

Tupàn Izaew wanupe uze'eg mehe, Ozez pe izypy mehe arer rehe uze'eg mehe, uze'eg nezewe izupe. — Exaexak amo kuzàwyzài tàpuzuhu tupàn a'ua'u imuwete haw pe har neremireko ràm romo nehe. Ereko neremireko romo nehe. Nera'yr a'e kuzà hehe we àràm wiko putar kuzàwyzài imemyr romo a'e wà nehe. Ta'e teko Izaew nuzawy kwaw kuzàwyzài ihewe a'e wà xe. Izaew nuiko kwaw heremireko ikatu ma'e zàwe wà. Izaew upuir ihewi wà.

Malaquias 3:7

Peiko peipy wazàwe. Pepytu'u heze'eg heruzar ire. Napezeruzar kwaw herehe. Pezewyr ihewe nehe. Ihe azewyr putar peme ihe nehe no. Na'e pepuranu herehe kury. — Ma'e uruzapo putar newe urezemuzewyr kar pà nehe, peze ihewe.

Hebreus 3:12

Herywyr wà. Peme'egatu nehe, ikatu 'ym ma'e wi petyryk pà nehe. Tuwe ni amo pepyr har nuwereko kwaw ikatu 'ymaw upy'a pe wà nehe. Tuwe ni amo nuiko wi kwaw uzeruzar 'ym ma'e romo wà nehe. Tuwe nupuir kwaw Tupàn wikuwe ma'e wi wà nehe.