Cânticos dos Cânticos 1:4 - Tupàn zeꞌeg

⁴ Hereraha pe nezeupi nehe 'y. Zaha na'arewahy nehe 'y. Eiko heruwihawete romo nehe. Hereraha pe neker haw pe nehe. O tuwihawete, urerurywete nerehe ure nehe. Uruzegar putar neamutar katu haw rehe nehe, neremiamutar haw rehe nehe. Ikatu wera'u win wi a'e. Neamutar katu teko a'e wà, o tuwihawete.

Cânticos dos Cânticos 1:4 ပူးပေါင်းရင်းမြစ်များ

Salmos 111:4

Tupàn Tuweharupi Wiko Ma'e nazanemueharaz kar kwaw wemiapo kwer ikatuahy ma'e wi a'e. Ikatu a'e. Upurupuhareko katu no.

Salmos 119:32

Na'arewahy aha neremiapo kar heruzar pà ihe. Nezewe mehe eremur putar ma'e ikwaw katu wera'u haw ihewe nehe.

Salmos 119:60

Nàro kwaw amo 'ar ihe. Na'arewahy kutàri azeagaw neremiapo kar heruzar pà ihe.

Salmos 149:2

O teko Izaew izuapyapyr wà, penurywete peapo arer rehe nehe. Penurywete penuwihawete rehe nehe, o teko Zeruzarez pe har wà.

Salmos 42:4

Hereko awer rehe hema'enukwaw mehe hahy hepy'a ihewe. Hema'enukwaw Tupàn Hàpuzuhu pe teko tetea'u wanupi heho awer rehe ihe. Aexak kar ureho àwàm teko wanupe. Uruata oroho ure paw rupi ure. Urerurywete oroho uruzegar pà Tupàn ikatu haw imume'u pà.

Salmos 48:9

Uruiko neràpuzuhu pupe, o Tupàn, Nepuruamutar haw rehe urema'enukwaw pà ure.

Salmos 63:5

Ikatu ma'e ihewe neremimur nuzawy kwaw temi'u hete katu ma'e. Uhyk ihewe. A'e rupi amuzàg nekatu haw rehe zegar haw herurywete haw rupi newe ihe.

Cânticos dos Cânticos 3:4

Wanuwi hehem romo mehe aexak ihe. Àzuwàn heremiamutar katu. Namono kar kwaw. — Eho herupi hehy hàpuz me nehe, a'e izupe. Araha hehy iker haw pe, hemuzexak kar arer iker haw pe.

Cânticos dos Cânticos 4:10

Hemumuràgaw hete katu ihewe, heremireko ràm heremimutar katu. Heamutar katu haw ikatu wera'u win wi a'e. Nekàpuhàg zàwenugar hyàkwegatu wera'u amo kàpuhàg heta ma'e wanuwi.

Isaías 25:8

Tupàn Tuweharupi Wiko Ma'e umumaw putar tuwe màno haw nehe. Nezewe mehe teko numàno kwaw wà nehe. Umuxinig putar teko paw wanehay kwer nehe, uzemumikahy ma'e wamurywete kar pà nehe. Umukàzym kar putar wemiaihu wamaranugar haw nehe. Tupàn Tuweharupi Wiko Ma'e umume'u ko ze'eg kwez kury.

Isaías 45:25

Ihe Tupàn Tuweharupi Wiko Ma'e aityk kar putar waàmàtyry'ymar heremiaihu wanupe ihe wà nehe. Heremiaihu umume'u putar hekatu haw wà nehe.

Isaías 61:3

Emono tuwihawete waàkàg rehe har Xiàw pupe har uzai'o ma'e wanupe nehe, wamurywete kar pà nehe. Nan kwaw purumuzemumikahy kar haw a'e. Purumurywete kar har a'e. Emono kàpuhàg hyàkwegatu ma'e wanehay kwer hekuzaromo nehe. Emono kamir turywete haw pe har uzemumikahy haw pe har hekuzaromo nehe. Uzapo putar ikatu ma'e a'e wà nehe. A'e teko nuzawy kwaw ywyra Tupàn Tuweharupi Wiko Ma'e hemitygwer wà nehe. Wexak kar putar hekàgaw teko paw wanupe wà nehe. Wexak kar putar hepuràg eteahy haw wanupe wà nehe no.

Isaías 63:7

Amume'u putar Tupàn Tuweharupi Wiko Ma'e ipuruamutar katu haw purupe ihe nehe. Uzapo ikatu ma'e tetea'u a'e. A'e rupi amume'u putar ikatu haw izupe nehe, ta'e Tupàn Tuweharupi Wiko Ma'e umur tuwe uze'egatu zanerehe a'e xe. Wexak kar ukatuahy haw wemiaihu wanupe. Ta'e upurupuhareko katu a'e xe. Upuruamutar katu a'e no.

Jeremias 31:3

azexak kar wanupe ihe. Teko Izaew izuapyapyr wà, tuweharupi apuamutar katu ihe. Apuamutar katu putar ihe nehe no. Tuweharupi aexak kar peamutar katu haw peme ihe.

Oséias 11:4

Azamutar katu ihe wà. Apuhareko katu ihe wà. A'e rupi arur hezewake ihe wà. Apyhyk hezywa pupe ihe wà. Teko umuapyk kar kwarer u'uwaromo wà. Nezewegatete azekaiw katu wanehe ihe. Azemumew wanupe wanemi'u imono pà wanupe, i'i Tupàn.

Sofonias 3:14

Teko Izaew wà. Pezegar Tupàn pe ikatu haw rehe nehe. Penurywete nehe, Zeruzarez pe har wà. Pemume'u Tupàn ikatu haw pepy'a pupe upaw rupi nehe.

Zacarias 9:9

Penurywete nehe, teko Xiàw rehe har wà. Zeruzarez pe har wà, pezegar penurywete haw rehe nehe. Ta'e penuwihawete uhem wà iko kury xe. Ukàgaw rupi tur iko. Weityk wàmàtyry'ymar wà. Nuiko wera'u kwaw a'e. Zumen iku'az ur iko. Zumeta'i zumen imemyr iku'az tur iko.

Mateus 25:10

A'e rupi ma'e kwaw 'ymar oho ime'eg kar pà wà. Waho re awa uhem wà a'e kury. A'e 5 ma'e kwaw par wixe oho mai'u haw pe wà, hemireko ma'e ràm hupi wà. Tàpuz zar uwàpytym uken a'e kury.

Lucas 2:10

Uze'eg Tupàn heko haw pe har wà a'e awa wanupe a'e. — Pekyze zo ihewi nehe ty wà. Azur Tupàn ze'eg puràg imume'u pà peme ihe kury, i'i wanupe. — Teko hurywete putar henu mehe wà nehe.

Lucas 22:19

Na'e upyhyk typy'ak imuwà kury. Uze'eg Tupàn pe ikatu haw rehe. Na'e uzaikaikaw typy'ak ipehegwera'i imono pà wemimu'e wanupe no. — Ko typy'ak a'e, nuzawy kwaw heretekwer peme imur pyràm a'e, i'i wanupe. — Pe'u peho peiko nezewe nehe, pema'enukwaw pà herehe tuweharupi nehe, i'i wanupe.

João 12:32

Aze hemupu'àm ywy wi wà nehe, amunyryk putar teko paw hezeupe ihe wà nehe.

João 6:44

Aze heru numur kwaw a'e teko ihewe a'e wà nehe, aze numuzeruzar kar kwaw herehe a'e wà nehe, a'e teko nupuner kwaw heremiruze'eg romo weko haw rehe a'e wà nehe. Amugweraw wi kar putar a'e herehe uzeruzar ma'e paw rupi katete ihe wà nehe, iahykaw rehe ihe wà nehe.

Efésios 2:6

Zaneruwihawete Zanepyro har rehe zanezemono'og mehe, Tupàn zanemugweraw kar inuromo a'e. A'e rupi zaiko putar pureruze'eg ma'e romo zane nehe, ywate Zezuz ipyr zanereko mehe zane nehe.

Efésios 6:24

Aze amo uzamutar katu Zanezar Zezuz Zaneruwihawete a'e wà nehe, tuwe Tupàn upuhareko katu a'e teko a'e wà nehe, aze a'e teko nupytu'u kwaw iamutar katu re a'e wà nehe. Upaw kwez kury. Pawru.

Filipenses 3:3

Izypy mehe aze awa heko wer Tupàn hemiruze'eg romo a'e, omonohok kar upirera'i a'e. Ko 'ar rehe nan kwaw nezewe kury. Ko 'ar rehe aze ximuwete katu tuwe Tupàn zane nehe, zanepy'a pe zane nehe, a'e mehe zaiko putar hemiruze'eg romo zane nehe. Zaneruwihawete Zezuz umàno zanerekuzaromo. Zanerurywete a'e rupi zane, imàno awer imume'u pà teko wanupe zane. Nazapuner kwaw ma'e iapo haw rehe zanezepyro pà tatahu wi. Nazapuner kwaw nezewe zaneze'egaw rehe. — O, aze amonohok kar hepirera'i ihe nehe, Tupàn hepyro putar tatahu wi a'e nehe, nazapuner kwaw zane'e haw rehe kury.

Filipenses 4:4

Zanezar a'e, tuwe pemurywete kar a'e nehe, tuweharupi a'e nehe. — Penurywete nehe, a'e wiwi peme kury.

Hebreus 12:1

Aze'eg putar peme zanereko haw rehe ihe nehe kury. Heta tetea'u a'e zanerexakar zaneiwyr a'e wà. Uzeruzar tuwe Tupàn rehe wà. Tuwe zazeruzar hehe wazàwegatete nehe no. Aze amo ma'e zanemunyryk kar iko Tupàn wi nehe, xityk a'e ma'e nehe. Aze awa upirapoz oho nehe, aze upyhyk amo nehe, numuhem kar wi kwaw uzewi 'y pupe nehe. Nezewegatete aze teko uzapo ikatu 'ym ma'e tuweharupi wà nehe, zawaiw katu wapytu'u haw wà nehe. Zatyryk agwer ikatu 'ym ma'e wi nehe. Zaiko uzàn ma'e zàwe zane. Aze amo izàn wer nehe, nueraha kwaw ipuhuz katu ma'e uzeupi nehe. Nezewegatete zanepureruzar wer Zezuz rehe zane. A'e rupi, tuwe zapytu'u ikatu 'ym ma'e iapo re nehe. Ikatu 'ym ma'e iapo mehe nazanezeruzar wer kwaw hehe. Uzàn ma'e izàn wer tuwe a'e. Tuwe zanezeruzar wer tuwe Zezuz rehe nehe.

1 Pedro 1:8

Pezamutar katu Zezuz peiko. Napexak pixik kwaw. Pezeruzar hehe no. Napexak kwaw no. A'e rupi penurywete kury. Uhua'u penurywete haw. Napepuner kwaw penurywete haw paw imume'u haw rehe, ta'e penurywete azeharomoete xe.