Apocalipse 15:7 - Tupàn zeꞌeg

⁷ Na'e amo ma'e a'e wikuwe ma'e wapyr har a'e kury, omono 7 kawaw a'e 7 Tupàn heko haw pe har wanupe a'e kury. Kawaw hekuzar katu wà. Tynehem Tupàn purehe izepykaw pupe wà. (Tupàn wiko putar tuweharupi a'e nehe, awyze har rupi a'e nehe, umàno pixik 'ym pà a'e nehe.)

Apocalipse 15:7 ပူးပေါင်းရင်းမြစ်များ

Salmos 75:8

Tupàn Tuweharupi Wiko Ma'e wereko amo kanekpuku opo pe. Tynehem win zàwenugar pupe a'e. Ikwahy haw pupe tynehem. U'u kar ipor ikatu 'ym ma'e wanupe. Paw rupi i'un wà.

Jeremias 25:15

Tupàn Tuweharupi Wiko Ma'e Izaew wazar uze'eg ihewe. — Nako kanek puku hekwahy haw win zàwenugar pupe tynehem ma'e xe kury. Epyhyk kury. Oromono kar putar teko tetea'u wanupe ihe nehe. E'u kar ipor wanupe paw rupi nehe.

1 Tessalonicenses 1:9

Zezuz rehe uzeruzar ma'e Maxeton ywy rehe har a'e wà, Kere ywy rehe har a'e wà no, umume'u pepyr urereko awer uzeupeupe a'e wà no. — Kwa, Texaron pe har a'e wà, kwehe mehe umuwete katu Tupàn a'ua'u wanagapaw a'e wà, i'i waiko uzeupeupe wà, penehe uze'eg pà wà. — Pawru a'e wà kury, umume'u Tupànete rehe ze'eg puràg wanupe a'e wà kury, i'i waiko uzeupeupe wà. Texaron pe har uzekaiw katu waze'eg rehe wà kury, tupàn a'ua'u wanagapaw waneityk pà wà kury, i'i waiko uzeupeupe wà. — A'e mehe a'e wà kury, umuwete katu Tupàn azeharomoete har a'e wà kury. Umuwete katu Tupàn wikuwe ma'e a'e wà kury, i'i waiko uzeupeupe wà. Numuwete kwaw a'e wikuwe 'ym ma'e a'e wà kury, i'i waiko uzeupeupe wà.

Apocalipse 1:18

— Wikuwe ma'e romo aiko ihe. Amàno ihe, aikuwe ihe kury, i'i ihewe. — Eme'e herehe nehe kury ty, aiko putar tuweharupi nehe, awyze har rupi nehe, i'i ihewe. — Apuner teko wamumàno kar haw rehe ihe wà. Heta hekàgaw màno haw heruze'egaw rehe ihe kury. Heta hekàgaw umàno ma'e kwer wanekwe waneko haw heruze'egaw rehe ihe no, i'i ihewe.

Apocalipse 10:6

Umume'u ma'e Tupàn her rehe a'e. (Tupàn wiko putar tuweharupi nehe, awyze har rupi nehe no. Izypy mehe uzapo ywak a'e. Uzapo ywak rehe har paw rupi a'e wà no. Uzapo ywy no, uzapo ywy rehe har paw rupi wà no. Uzapo yryhu no, uzapo yryhu rehe har paw rupi wà no.) — Na'iàrew kwaw kury, i'i a'e Tupàn heko haw pe har.

Apocalipse 14:10

Tupàn wikwahy putar a'e teko wanehe a'e nehe, i'i oho iko uwewe pà. — Wikwahy tuwe putar wanupe nehe, wanehe uzepyk pà nehe, i'i oho iko uwewe pà. — Omono kar putar a'e teko tatahu pe wà nehe, weko haw pe har ikatuahy ma'e wanuwa rupi wà nehe, Àràpuhàràna'yr zàwenugar huwa rupi wà nehe no, i'i oho iko uwewe pà.

Apocalipse 15:1

Na'e aexak amo ma'e hexak pyr 'ym ywak rehe ihe kury. Purumupytuhegatu kar haw a'e, wexak kar Tupàn ikàgaw a'e. 7 Tupàn heko haw pe har a'e pe wanekon a'e wà, ma'erahy ipuraraw pyràm hereko pà a'e wà. Ta'e Tupàn nezewe upuraraw kar putar ma'erahy kwer a'e nehe xe, a'e 'ar rehe har wanupe a'e nehe xe, iahykaw rehe a'e nehe xe.

Apocalipse 16:2

Na'e Tupàn heko haw pe har ipy uzakook ukawaw por oho 'y rehe a'e kury. Àzàguhu her hereko har a'e wà, hagapaw imuwete katu har a'e wà, ipereperew a'e wà kury. Hahy tuwe waperew wanupe wà.

Apocalipse 17:1

Na'e amo Tupàn heko haw pe har kawaw hereko har uze'eg wà ihewe a'e kury. — Ezur herupi nehe ty, i'i ihewe. — Tupàn uzepyk putar kuzàwyzài rehe a'e nehe, kuzà ikàg ma'e rehe a'e nehe, i'i ihewe. — Erexak putar hehe izepykaw nehe kury, ta'e aexak kar putar newe ihe nehe xe, i'i ihewe. — A'e kuzà a'e, tawhu pe har romo hekon a'e. A'e tawhu yrykaw tetea'u wanuwake tuz a'e, i'i ihewe.

Apocalipse 21:9

Na'e amo Tupàn heko haw pe har a'e, kawaw hereko har a'e, uze'eg wà ihewe a'e kury. — Ezur herupi nehe ty, aexak kar putar Àràpuhàràna'yr zàwenugar hemireko ràm newe ihe nehe, i'i ihewe.

Apocalipse 4:10

Wazegar mehe a'e 24 tuwihaw a'e wà no, uzeamumew tuwihaw henaw rehe har huwa rupi a'e wà no. Umuwete katu a'e tuweharupi wiko ma'e ràm wà no. Omomor wàkàgàpixi haw ywy rehe wà no, tuwihaw henaw henataromo wà no. Na'e uze'eg izupe wà kury, uzegar pà wà kury.

Apocalipse 5:8

A'e 'ar mehe we a'e 4 wikuwe ma'e a'e wà, a'e 24 tuwihaw a'e wà no, uzeamumew ukwaw pà Àràpuhàràna'yr zàwenugar huwa rupi a'e wà kury. Pitàitàigatu wereko uxi'àm opo pe wà. Pitàitàigatu wereko kawaw hekuzar katu ma'e wà no. Tynehem wakawaw yhyk pupe. Tupàn hemiruze'eg uze'eg izupe a'e wà. Waze'eg nuzawy kwaw a'e yhyk izupe a'e.