Apocalipse 10:3 - Tupàn zeꞌeg

³ Uze'eg uhapukaz pà. Ize'eg nuzawy kwaw zawaruhu tetea'u waze'egaw a'e. Ize'eg ire 7 àmànànog uze'eg izupe a'e wà kury, wànoànogahy pà a'e wà kury.

Apocalipse 10:3 ပူးပေါင်းရင်းမြစ်များ

Salmos 29:3

Teko weinu Tuweharupi Wiko Ma'e 'y 'aromo ize'eg mehe wà. Tupàn ikàg ma'e umuànoànog kar àmàn a'e. Teko weinu ize'eg yryhu 'aromo a'e wà.

Provérbios 19:12

Tuwihawete ikwahy haw nuzawy kwaw zàwàruhu iriàw ikororo haw. Ikatu haw nuzawy kwaw zuwiri ka'api'i rehe har.

Isaías 31:4

Tupàn Tuweharupi Wiko Ma'e uze'eg nezewe ihewe. — Zàwàruhu iriàw àràpuhàràn hawitu ma'e ipyhykar a'e, izuka har a'e, nukyze kwaw àràpuhàràn wamono'ogar wanur mehe a'e, wanehapukaz mehe a'e. Aze heta tetea'u wà, aze heiheihemahy wà, nezewe rehe we nuzàn kwaw zàwàruhu a'e awa wanuwi wà. Nezewegatete ihe, Tupàn Tuweharupi Wiko Ma'e Ikàg Wera'u Ma'e ihe no. Nakyze kwaw Xiàw ywytyr rehe heàmàtyry'ymar wakutyr hewezyw mehe nehe no.

Isaías 42:13

Tupàn Tuweharupi Wiko Ma'e uzemuàgà'ym zeàmàtyry'ymawhu pe oho pà. Nuzawy kwaw zauxiapekwer ipuruzukaiwahy ma'e. Uhapukaz wahy haw rupi zauxiapekwer wanerur pà zeàmàtyry'ymawhu pe. Ukàgaw rupi weityk wàmàtyry'ymar wà.

Isaías 5:29

A'e zauxiapekwer okororo zàwàruhu iriàw her ma'e ài wà, zàwàruhu ipuruzukaiw ma'e miar izuka har ài wà. Upuze wemizuka kwer imonokatu àwàm me uzemuakyr pà wà. Ni amo nupuner kwaw hemizuka kwer ipyro haw rehe izuwi wà nehe.

Jeremias 25:30

Ne Zeremi, emume'u ko heze'eg paw teko wanupe nehe. — Tupàn Tuweharupi Wiko Ma'e wànoànog putar 'a pe ywak rehe a'e nehe. Uze'eg putar weko haw pe wiko mehe nehe. Wànoànog putar wemiaihu wakutyr nehe. Teko uhapukaz ma'ywa ikamik mehe wà. Heremiaihu uhapukaz putar nezewe wanehe heànoànog mehe wà nehe no. Teko ywy nànànar paw wenu putar wà nehe.

Ezequiel 10:5

Te teko katu pe har wenu wapepo iànoànogaw wà. Nuzawy kwaw Tupàn upuner wera'u ma'e ize'egaw a'e.

Oséias 11:10

Amo 'ar mehe akororo putar zàwàruhu iriàw ài ihe nehe, heàmàtyry'ymar wakutyr ihe nehe. A'e 'ar mehe teko heremiaihu oho putar heraikweromo wà nehe. Teko heremiruze'eg ur putar kwarahy heixe haw wi uzàn pà wà nehe.

Joel 3:16

Tupàn Tuweharupi Wiko Ma'e uze'eg wahyhaw rupi ywytyr Xiàw pe kury. Ize'egaw nuzawy kwaw àmàn iànoànogaw. Zeruzarez pe har wenu ize'egaw iànoànogaw waiko wà. Ywak ywy uryryryryz wà. Tupàn uzekaiw katu Izaew izuapyapyr wanehe wà, wàmàtyry'ymar wanuwi wapyro pà wà.

Amós 1:2

Nezewe i'i Amoz. Ywytyr Xiàw Zeruzarez pe har pe Tupàn Tuweharupi Wiko Ma'e uze'eg wahyhaw rupi a'e. Ize'eg nuzawy kwaw àmàn iànoànogaw a'e. Ka'api'i ma'ea'yr wamai'u haw uxinig. Ma'e Karamew ywytyr rehe har paw uxinig no, i'i Amoz.

Amós 3:8

Aze zàwàruhu iriàw okororo, mo nukyze kwaw wà. Aze pezar Tupàn Tuweharupi Wiko Ma'e uze'eg, mo numume'u kwaw ize'eg awer teko wanupe.

Apocalipse 14:2

Na'e ainu amo ze'eg ywate har ihe kury. Ize'eg nuzawy kwaw yrypu ànoànogaw a'e. Nuzawy kwaw àmàn ànogaw no. Nuzawy kwaw xi'àm tetea'u ipy pyr no.

Apocalipse 15:1

Na'e aexak amo ma'e hexak pyr 'ym ywak rehe ihe kury. Purumupytuhegatu kar haw a'e, wexak kar Tupàn ikàgaw a'e. 7 Tupàn heko haw pe har a'e pe wanekon a'e wà, ma'erahy ipuraraw pyràm hereko pà a'e wà. Ta'e Tupàn nezewe upuraraw kar putar ma'erahy kwer a'e nehe xe, a'e 'ar rehe har wanupe a'e nehe xe, iahykaw rehe a'e nehe xe.

Apocalipse 15:7

Na'e amo ma'e a'e wikuwe ma'e wapyr har a'e kury, omono 7 kawaw a'e 7 Tupàn heko haw pe har wanupe a'e kury. Kawaw hekuzar katu wà. Tynehem Tupàn purehe izepykaw pupe wà. (Tupàn wiko putar tuweharupi a'e nehe, awyze har rupi a'e nehe, umàno pixik 'ym pà a'e nehe.)

Apocalipse 4:5

Àmàn uweraw tuwihaw henaw rehe. Wànoànog a'e pe no: tatainy uhyape katu a'e pe tuwihaw henaw henataromo wà no. A'e tatainy a'e wà, tekwe Tupàn huwake har romo wanekon a'e wà.

Apocalipse 8:5

Na'e a'e Tupàn heko haw pe har upyhyk yhyk hyru kwer kury. Omono tata a'e pe har kawaw pupe kury, imynehem pà kury. Na'e omomor a'e tata kawaw por ywy rehe heityk pà kury. A'e 'ar mehe wànoànog àmàn ài kury. Uweraweraw no. Ywy uryryryryz no.