NEHEMÍAS 8:10 - Biblia Guarani Tumpa Iñee

¹⁰ Jaɨkue rupi jei chupe reta: “Pekua, peu soo ikɨra kavi vae jare vino jëe kavi vae, jare pemee vi tokaru mbaetɨ güɨnoi vae reta; echa ara oñeñono tee yandeYa pe vae ko; agüɨye pepɨatɨtɨ, echa yandeYa Tumpa pegua yerovia ñanemomɨ̈rata vae ko.”

NEHEMÍAS 8:10 ပူးပေါင်းရင်းမြစ်များ

1 REYES 8:66

Pɨareve pe omboyupavo opaete vae. Jare jae reta jei ñee kavi mburuvicha guasu pe, jare oyerovia reve opa yogüɨraja jëta kotɨ, Tumpa oyapo ikavi vae jembiokuai David kotɨ vae re, jare Israel tëta imbae vae re.

1 CRÓNICAS 16:27

¡Oime mbaemboete tuicha yae vae jae jóvai! ¡Oime mbaepuere jare yerovia katu jae oïa pe!

NEHEMÍAS 8:11

Jare levita reta omokïrii opaete vae, jei reve: “Pekïrii, echa ara oñeñono tee Tumpa pe vae ko; agüɨye peyaeo.”

NEHEMÍAS 8:12

Jayave opaete vae reta yogüɨraja okaru jare oɨu, oyombopota reta tembíu pe, ovɨa katu jare oyerovia yae reta, echa oikuaa kavi ñee reta omboe reta jese vae.

ESTER 9:19

Jáeramo, Judáɨgua reta yogüɨreko tëta raɨ oñekësembae rupi vae, ara catorce yasɨ Adar pe oyapo reta arete, oyerovia reve jare oyombopota reta mbae pe.

ESTER 9:22

Echa jókuae ara Judáɨgua reta oyepɨ jovaicho reta re, ara jare yasɨ mbɨatɨtɨ pegua oyepoepɨ yerovia katu pe, ara kavi pe; kuae ara oyapo reta okaru vaerä yerovia ndive, oyombopota reve jare omee reve mbae paravete vae reta pe.

SALMOS 149:2

Israel iñemuña reta, peyerovia peApoa re; Sión pegua reta, peyerovia peRuvicha guasu re.

SALMOS 89:17

Echa nde ko jae imbaepuere jare iyemboetea; ndepɨakavi rupi rembotuicha orembaepuere.

PROVERBIOS 17:22

Yerovia katu, moa ikavi vae rami ko yanderete pe, ërei mbɨatɨtɨ, oporomombaerasɨ ko.

ECLESIASTÉS 11:2

Renoigüe emboyao ïru vae pe, oime renoi rupi, echa mbaetɨ reikuaa ikavimbae outa kuae tëtaguasu re vae.

ECLESIASTÉS 2:24

Kuimbae pe ikavi vae, jae ko okaru kavi vae, jare oyerovia iparavɨkɨagüe re vae. Kuae aikuaa vi jae ko Tumpa güi ou vae.

ECLESIASTÉS 3:13

echa Tumpa ko omee yandeve yakaru kavi vaerä, jare yayekou vaerä opaete yandeparavɨkɨagüe re.

ECLESIASTÉS 5:18

Jayave, aecha ikavi yae vae jae ko: Yakaru kavi vae, yayerovia vaerä opaete yandeparavɨkɨagüe güi, kuae ɨvɨ pe yayemoambeko jese vae re, opaete ara Tumpa omee tekove yandeve ramboeve, echa jókuae ko jae yandeparavɨkɨ jekovia.

ECLESIASTÉS 9:7

Jayave, ekaru kavi ndepɨayerovia reve; echa ndeparavɨkɨ omboyerovia ko Tumpa.

CANTARES 5:1

Che ayu cheko raɨ pe, chereindɨ, chemenda ïrurä vae. Aipɨɨ chembae mirra jare ikäti kavi vae, jau ei jenda güi, jau vino jare neche. Pe peyoaɨu vae, peu pepuere rupi.

ISAÍAS 49:5

YandeYa, chesɨ jɨe güive voi ma cheparavo jembiokuairä vae, amboyerova ye vaerä Tumpa kotɨ Jacob, Israel iñemuña reta, echa chererovia katu cheYa, cheTumpa ko jae chepɨ̈rata.

ISAÍAS 61:10

¡Ayerovia yae cheYa re! Chepɨa oyerovia yae cheTumpa re, echa chemboyemonde yereroasayepe pe, temimonde pegua pe rami. ¡Cheöva jupi vae pe, ñeapevaka pe rami! Omendata vae oyemonde rami, kuñatai oñemopöra äka-regua jepɨ vae pe rami.

JOEL 2:23

¡Sión pegua reta, pe reta vi peyerovia katu jare pevɨakatu yandeYa Tumpa re! Echa ombou peve iara pe kavi tenondegua ama; jare ombou ñotai peve tenondegua ama jare taɨkuegua ete, tenonde rupi rami.

ZACARÍAS 14:21

Jare opaete yapepo Jerusalén jare Judá pegua oñeñono teeta yandeYa Imbaepuere yae ete vae peguarä: Yogüeru mbota omee vae reta oiporu vaerä, pɨpe omboyɨ vaerä mɨmba oñererökuaveegüe, jókuae ara mbaetɨta ma omaemee vae yandeYa Imbaepuere yae vae itupao pe.

San Lucas 11:41

Pemee pepɨakatu reve penoigüe paravete vae reta pe. Jókuae rupi ïru vae reta oikuaata ikɨambae ko pepɨa.

2 Corintios 8:2

Kërai oiporara yae reta reve, oyerovia yae reta; jare yepe tëi iparavete yae reta reve, omee reta jeta ipɨakavi yae reve.

Filipenses 3:4

Yepe tëi che oime anoi mbae re ayeko vaerä. Oime yave kia oyemongeta mbae re oyeko vaerä iyé vae, che ko ayapɨraa yé reta:

Apocalipsis 11:10

Jare ɨvɨ pegua reta oyeroviata jókuae mókoi kuimbae jëogüegüe re. Oyapo retata arete jare omondota oyoupe mbota reta. Echa ndei omano mbove, jókuae mókoi ñeemombeúa reta oiporarauka yae ɨvɨ pegua reta pe.

1 SAMUEL 25:8

Eparandu nderembiokuai reta pe, jare jae reta omombeu kavita ndeve. Kuae jeko pegua romoñera reiparareko vaerä kuae kunumi reta amondo vae, emee oreve mbae renoigüe, echa che nderaɨ rami vi ko.”