JEREMÍAS 8:19 - Biblia Guarani Tumpa Iñee

¹⁹ Mase, cherëtaɨgua reta jäse oyeendu opaete kuae ɨvɨ pe körai: “¿Mbaetɨ ma ra oï yandeYa Sión pe? ¿Mbaetɨ ma ra Juvicha guasu oï joko pe?” Jare yandeYa Jei: “¿Maera pa chemboarasɨuka tumpa-raangarä peñopa kavi peyapo vae rupi, jókuae tumpa-raanga mbaetɨ mbaerä osirive vae jare peikuaambae vae rupi?”

JEREMÍAS 8:19 ပူးပေါင်းရင်းမြစ်များ

SALMOS 135:21

¡Sión güive toyemboeteuka yandeYa, jae oiko Jerusalén pe vae! ¡Aleluya!

SALMOS 137:1

Ɨ̈aka Babilonia pegua jembeɨ pe roguapɨ yepi, jare royaeo yepi oremaendúa yave Sión re.

SALMOS 146:10

Sión, neTumpa oporookuaita jekuae avei rupi, yandeYa oporookuaita jekuae avei rupi. ¡Aleluya!

SALMOS 149:2

Israel iñemuña reta, peyerovia peApoa re; Sión pegua reta, peyerovia peRuvicha guasu re.

SALMOS 31:6

Aröɨro tumpa-raanga imboetea reta, ërei che ndereño ayeko.

ISAÍAS 1:4

¡Paravete, iyoa vae reta, tëta tɨnɨe ikavimbae pe vae, ipɨapochɨ vae reta iñemuña, jare jeko opa oikomeguagüe reta! Oyembosɨrɨ reta yandeYa güi, omboarasɨuka reta Iyoambae Israel pegua, oyerova reta ye chugüi.

ISAÍAS 12:6

Pesapúkai jare petairari peyerovia güi, pe Sión pegua reta, echa Tumpa, Iyoambae Israel pegua tuicha yae vae, oime oï pepɨte pe.”

ISAÍAS 13:5

Matɨ güi yogüeru reta, matɨ ɨvɨ iyapɨ kotɨ güi, yandeYa güeru iyarasɨ pegua jembiporu reta, opa vaerä omboai ɨvɨ.

ISAÍAS 33:22

Echa yandeYa ko jae oporojäa vae yandevegua, jae ko omee yandeve mborookuai vae, jae ko yandeRuvicha guasu, jae etei ko yandereepɨta.

ISAÍAS 39:3

Jayave ñeemombeúa Isaías ojo mburuvicha guasu Ezequías pɨri, jare oparandu chupe: —¿Ketɨ güi pa yogüeru jókuae kuimbae reta, jare mbae pa jei reta ndeve? Ezequías jei: —Matɨ güi ko yogüeru reta; Babilonia kotɨ güi.

ISAÍAS 52:1

Epüa Sión, eñemomɨ̈rata, Jerusalén, tëta guasu oñeñono tee vae, eyemonde nderemimonde ipöragüe pe, echa ngaraa ye ma ou ndekotɨ itumpa-raanga pota vae reta, ani ikɨa Tumpa jesa róvai vae reta.

JEREMÍAS 10:15

jaanga retaño ko. YandeYa iporojäa iara pe, opaeteita ko oyemboai reta.

JEREMÍAS 14:19

CheYa, ¿remombo ete pa ko Judá? ¿Reröɨro pa tëta guasu Sión? ¿Maera pa ko orembopere, rokuerambae vaerä? Roäro tëi mbɨakatu, ërei mbaetɨ mbae ikavigüe ou oreve. Roäro tëi rokuera vaerä, jaeño jeiete kɨɨye ou oreve.

JEREMÍAS 14:9

¿Maera pa reï metei kuimbae ipɨakañɨiño omae ngatu vae rami, metei ñeraro regua jëia vae mbaetɨ oporoepɨ rami? Ërei, nde cheYa reï ore ndive, opaete vae oikuaa ndembae vae reta ko ore; ¡agüɨye orereeya!

JEREMÍAS 2:5

YandeYa jei körai: “¿Mbae ikavimbae pa oväe cheré peñemuñagüe reta, chereeya reta vaerä? Omboete reta tumpa-raanga reta, jókuae rupi jae reta etei oyembosiriveä.

JEREMÍAS 27:10

Opaete jókuae jei reta peve vae pembotavɨ ko; che opata ko pogüɨrajauka peɨvɨ güi, opata pomoai moai jare pemanota.

JEREMÍAS 31:6

Echa oväeta ara omaeäro vae reta osapúkai vaerä ɨvɨtɨ Efraín re, jei reve: ‘Peyu, yaja Sión pe, yamboete vaerä yandeYa Tumpa.’ ”

JEREMÍAS 32:30

Iyɨpɨ güive ɨvɨ Israel pegua reta jare ɨvɨ Judá pegua reta oyapo avei ikavimbae cheróvai; chemboarasɨuka reta itumpa-raanga reta, jae reta aeño oyapo iyeupe vae rupi. Che peYa jae kuae.

JEREMÍAS 7:19

¿Cheño ra chemboarasɨuka reta? Mbaetɨ ko, jae reta aeño ko teko oyapo iyeupe oñemomarai vaerä. Che ndeYa jae kuae.

JEREMÍAS 8:20

Oasa maetɨ iara, oasa mbaarɨvo, ërei oreve mbaetɨ mbɨakatu.

JEREMÍAS 9:16

Opata amoai reta, kerupi ïru tëtaguasu reta oikuaambaea rupi, tu reta ave mbaetɨ oikuaa vae rupi; jare amondota ayukauka vaerä kɨsepuku pe opaetei okañɨtei regua.”

EZEQUIEL 48:35

Opaete reve jókuae tëta guasu ikësea güɨnoita dieciocho mil metro. Jare jókuae ara güive tëta guasu jeeta: ‘YandeYa oï kuae pe.’ ”

JOEL 2:32

Jare kia nunga ñavo oyerure yave cheve, oyereroasayepeukata; echa ɨvɨtɨ Sión jae ko Jerusalén, joko pe oimeta yereroasayepe, che jae rami. Jare aiparavogüe jembɨregüe güi oyereroasayepeta aenɨi vae.

ABDÍAS 1:17

Ërei ɨvɨtɨ Sión pe oimeñota jembɨregüe oasayepe vae, yogüɨreko teeta Tumpa peguarä. Jacob iñemuña reta opɨ̈ro yeta iɨvɨ;

MIQUEAS 4:9

Añave ¿maera pa neräse mbatee kuña imembɨrasɨ vae rami? ¿Mbaetɨ pa nderuvicha guasu? ¿Ndemboarakuaa vae reta opa pa omano?

SOFONÍAS 3:15

YandeYa Tumpa ombosɨrɨ ndegüi iporojäa, opa oekɨ omombo ndegüi nderovaicho reta. Echa yandeYa Tumpa ndeRuvicha guasu ko oï nde ndive; ngaraa ye ma reecha ikavimbae.

ZACARÍAS 2:9

Mase, ko chepo añono jese reta, jembiokuai ae reta opɨ̈rota imbaembae reta chugüi.” Jökorai peikuaata yandeYa Imbaepuere yae ete vae ko chembou.

Hechos 14:15

—Kuimbae reta, ¿maera pa peyapo kuae? Ore kuimbae reta pe reta ramiño ko. Romoërakua peve peyerova vaerä kuae ikavimbae peyapo vae güi Tumpa oikove vae kotɨ. Jae ko oyapo ara, ɨvɨ, ɨguasu jare opaete mbaembae pɨpe oime vae.

DEUTERONOMIO 31:17

jókuae ara chearasɨta chupe reta, aeya retata, ayerovata chugüi reta jare oiporara yae jeta mbaembae ikavimbae vae jeko pegua jei retata jókuae ara: ‘¿Mbaetɨ ma ndipo ñaneTumpa oï yande ndive, jáeramo yaiporara kuae mbaembae reta?’

Apocalipsis 2:1

Eikuatía Efeso pegua oporogüɨrovia vae reta iaraɨgua pe: Güɨnoi chiu yasɨtata reta ipo iyakatu pe vae, oguata chiu mechero jenda oro pegua ipɨte rupi vae, jei: