Hechos 11:1 - Biblia Guarani Tumpa Iñee

¹ Jayave temimondo reta jare ïru oporogüɨrovia vae Judea rupi ñogüɨnoi vae reta, oikuaa kërai judiombae vae reta güɨrovia vi Tumpa iñee.

Nuevo Testamento Guaraní Pe

¹ Jayave Jesús jemimondo reta jare iru oporogüɨrovia vae Judea rupi ñogüɨnoi vae reta oicuaa quirai judío mbae vae reta vi güɨrovia Tumpa iñee.

Hechos 11:1 ပူးပေါင်းရင်းမြစ်များ

GÉNESIS 49:10

Judá güi ngaraa kia ipuere opɨ̈ro mbaepuere, ngaraa vi ipo pegua oro pegua vae ave, ou regua Siloh, jókuae ipo pegua oro pegua iya, chupe opaete vae omeeta mbaemboete.

SALMOS 22:27

Imaendúa retata jare yogüeruta yandeYa kotɨ, opaete ɨvɨ pegua reta, opaete tëtara ñavo tëtaguasu reta pegua; ¡ombaemboete retata!

ISAÍAS 11:10

Jare jókuae ara Ɨvɨraɨpɨ rami vae Isaí güi oëta metei jokɨ, jae oñeñonota metei bandera rami opaete vae reta peguarä, opaete vae reta oekata; jare jëta jërakua yaeta.

ISAÍAS 32:15

Ërei yandeYa iEspíritu outa yanderé ɨvate güi, jayave ɨvɨ ipombae, ikavi yeta oñemaetɨ pɨpe vaerä, jare ɨvɨ kavi jeiete yaeta ikavi.

ISAÍAS 42:1

“Mase, ko oï cherembiokuai, che ayangarekota jese vae; cherembiparavo, chepɨa oyerovia jese vae; jese añono cheEspíritu; jae güeruta jupi vae opaete tëtaguasu reta peguarä.

ISAÍAS 42:6

“Che ndeYa ko roenɨi jupi vae peguarä, jare ropokota rogüɨroata; roñovatuta jare ayapota nderupi morogüɨrökuavee päve opaete vae reta peguarä, jare tembipe rami tëtaguasu reta pe.

ISAÍAS 49:6

Jae jei körai: “Mbaetɨta royókuai, remopüa ye Jacob iñemuña reta vaeräño, Israel iñemuña jembɨregüe reta; roñono vi ko tembipe rami opaete tëtaguasu reta peguarä, reraja vaerä yereroasayepe amee vae opaete vae reta pe, ɨvɨ jembeɨ rupi ave.”

ISAÍAS 52:10

YandeYa omboyekuaa imbaepuere, opaete tëtaguasu reta jesa róvai, jare opaete ɨvɨ iyapɨ rupi ave oendu ñaneTumpa iporogüɨroasayepe re vae.

ISAÍAS 60:3

Jare nderembipe kotɨ yogüeruta tëtaguasu reta, mburuvicha guasu reta yogüeruta vi nderembipe kotɨ.

ISAÍAS 62:2

Jayave jeta vae reta oechata ndeporogüɨroasayepe, jare opaete mburuvicha guasu reta oechata ndeyemboetea. Jayave ndembojee pɨauta, tee ipɨau pe, yandeYa etei ndembojeeta.

JEREMÍAS 16:19

CheYa Tumpa, cheñepɨ̈roa jare chemopɨ̈rata vae, cheñepɨ̈roa susere iara pe; ndekotɨ yogüeruta tëtaguasu pegua reta, jare jei retata: “Oreñemuñagüe reta omboresive tumpa-raanga retaño imbaerä, mbaetɨ mbaepuere güɨnoi vae jare osirivembae reta.

OSEAS 2:23

Añonota cheyeupe chembae reta jókuae ɨvɨ pe chembaeräño; anoita mboroparareko Lo-ruhama re; jaeta Lo-ammi pe: ‘Nde ko jae tëta chembae’, jare jae jeita: ‘¡CheTumpa ko nde!’ ”

MIQUEAS 5:7

Jacob iñemuña güi jembɨregüe reta yogüɨrekota ïru tëta guasu reta rupi; yandeYa ombou ɨsápɨi rami; ñana re ama oa rami, kuae reta mbaetɨ oäro kuimbae reta jemimbota.

SOFONÍAS 2:11

YandeYa ngaraa ipïri jese reta. Opata omboai tumpa-raanga reta jókuae ɨvɨ pegua, jare opaete vae tëtaguasu omboeteta, ɨguasu ipäu pegua reta ave.

SOFONÍAS 3:9

Jókuae ara, che ameeta opaete vae pe iñee kavi vaerä, jökorai opaete vae chereenɨi vaerä jare oyeokuai vaerä cheve ipɨa-kɨ̈reɨ ngatu reve.

ZACARÍAS 2:11

Oñemoïruta jeta tëtaguasu reta yandeYa re jókuae ara, jare jeita: “Toyogüɨreko chembaerä, che aikota jae reta ipɨte pe.” Jökorai peikuaata yandeYa imbaepuere yae ete vae ko chembou.

MALAQUÍAS 1:11

Opaete tëtaguasu ñavo rupi chemboete, jare oipota rupi kuae ɨvɨ pe oapɨ reta ikäti kavi vae incienso cheree re jare omee reta mbota ikavi vae cheve, echa cheree jërakua opaete tëtaguasu reta rupi.

San Mateo 2:1

Jesús oa tëta Belén ɨvɨ Judea pegua pe, Herodes oiko yave mburuvicha guasurä. Jayave yogüeru oväe Jerusalén pe kuimbae reta yasɨtata re oyemboe vae reta kuaraɨ oëa kotɨ güi.

San Mateo 8:11

Che jae peve, jeta vae yogüeruta kuaraɨ oëa kotɨ güi jare kuaraɨ oikea kotɨ güi jare oguapɨ retata Abraham, Isaac jare Jacob ndive araɨgua mborookuaía pe.

San Marcos 16:5

Jare oike reta yave tɨvɨa pe, oecha metei kunumi oguapɨ oï jae reta iyakatu kotɨ. Jemimonde puku jare tïi; jare okɨɨye reta.

San Lucas 2:32

Jae ko tembipe ramita judiombae vae reta pe. Jare ndembae vae Israel pegua reta iyemboetearä.”

Hechos 1:15

Jare jókuae ara reta rupi Pedro imiari oporogüɨrovia vae reta ciento veinte rupi oyemboatɨ ñogüɨnoi vae pe, jei:

Hechos 11:29

Jayave metei ñavo oporogüɨrovia vae reta, oime güɨnoi rupi oyemongeta omondo reta vaerä omborɨ oporogüɨrovia vae reta Judea rupi ñogüɨnoi vae reta.

Hechos 14:27

Jare yogüeru oväe yave, Pablo jare Bernabé omboatɨ oporogüɨrovia vae reta, jare imiari chupe reta opaete Tumpa oyapo mbae tuichagüe jae reta ndive vae, jare kërai Tumpa omee judiombae vae reta pe oporogüɨrovia vaerä.

Hechos 15:3

Jayave oporogüɨrovia vae reta omondo ma yave, jae reta oasa Fenicia jare Samaria rupi omoërakua reve joko pegua reta pe kërai judiombae vae reta oyerova Tumpa kotɨ. Jare omboyerovia yae oporogüɨrovia vae reta.

Hechos 28:15

Jare orerërakua oporogüɨrovia vae Roma pegua reta pe, jare amogüe jae reta yogüeru orerövaiti tëta Foro Apio pe, jare ïru vae reta yogüeru orerövaiti tëta Tres Tabernas pe. Pablo oecha yave kuae reta, omee yasoropai Tumpa pe, jare oñemoäta ngatu.