GÉNESIS 1:1 - Biblia Guarani Tumpa Iñee

¹ Iyɨpɨ ete pe Tumpa oyapo ara jare ɨvɨ.

GÉNESIS 1:1 ပူးပေါင်းရင်းမြစ်များ

2 REYES 19:15

Javoi oyerure yandeYa pe, jei körai: “CheYa, Israel iTumpa, araɨgua reta querubín iä ipäu pe reiko vae, ndeño ko jae opaete mborookuaía reta ɨvɨ pegua iTumpa, nde reyapo ara jare ɨvɨ.

1 CRÓNICAS 16:26

Opaete tëta itumpa reta, tumpa-raangaño ko, ërei yandeYa ko jae ara reta iyapoa.

2 CRÓNICAS 2:11

Jayave Hiram mburuvicha guasu Tiro pegua omboyevɨ tupapire rupi Salomón pe: “NdeYa Tumpa oaɨu imbae vae Israel iñemuña reta ramo neñono juvicha guasurä.”

NEHEMÍAS 9:6

Jare Esdras jei: “Nde ko jae oreYa Tumpa, mbaetɨ ye kia. Nde reyapo ara, jare ara ɨvate yae vae, jare opaete yasɨtata reta; nde reyapo ɨvɨ, jare opaete pɨpegua reta, ɨguasu reta, jare opaete pɨpegua reta. Nde ko remee tekove opaete vae pe. Jáeramo, ndemboete ara ipo reta.

JOB 26:13

Iɨvɨtu pe ara otupei, jae oyuka mboi ñɨma iñäkua yae vae.

JOB 38:4

¿Ketɨ pa nde reiko che ayapo ɨvɨ yave? ¡Eikuaauka cheve renoi yave arakuaa katu!

JOB 9:8

Jaeño pe etei ko oyapo ara reta; jare güɨnoi mbaepuere ɨguasu re.

SALMOS 102:25

Iyɨpɨ ete pe nde ko reyapo ɨvɨ, jare ara jae ko nderembiapo.

SALMOS 104:24

CheYa Tumpa, ¡opa rapeä ko roipapa nderembiapo reta! Opaete jókuae reta reyapo ndearakuaa katu reve; ¡ɨvɨ tɨnɨe oï nderembiapo reta pe!

SALMOS 104:30

Ërei rembou tekove yave, oyeapo ye, jökorai rembopɨau ye ɨvɨ iárambo.

SALMOS 115:15

¡YandeYa ara jare ɨvɨ iyapoa, tiporerekua peré!

SALMOS 121:2

Yemborɨ outa cheve, cheYa güi, ara jare ɨvɨ iyapoa güi.

SALMOS 124:8

YandeYa re ko oï yandeyemborɨ; ara jare ɨvɨ iyapoa.”

SALMOS 134:3

¡Sión güi yandeYa tiporerekua nderé, ara jare ɨvɨ iyapoa!

SALMOS 136:5

Arakuaa katu rupi ara reta oyapo vae, echa iporoparareko jekuae avei vae ko.

SALMOS 146:6

jae ko oyapo ara jare ɨvɨ, ɨguasu jare opaete pɨpe yogüɨreko vae. Jae mbaetɨ oipoepɨ jeigüe.

SALMOS 33:6

YandeYa oyapo ara reta iñee peño, ipɨ̈túe peño oyapo opaete ara ipo reta.

SALMOS 33:9

Echa jae jei vae, opaete oyeapo; omee mborookuai vae, jökorai oiko.

SALMOS 8:3

Aecha yave ara, ndepo pe reyapogüe, yasɨ jare yasɨtata reta reñono jese vae,

SALMOS 8:4

jae: “¿Mbae pa ko kuimbae, reyemongeta vaerä jese? ¿Mbae pa ko kuimbae reyemoambeko vaerä jese?”

SALMOS 90:2

Arakae, ndei ɨvɨtɨ reta oyeapo mbove güive voi ma, ndei kuae ɨvɨ oyeapo güive voi ma, arakae güive jare arakae regua jekuaekuae avei rupi, nde ko Tumpa.

SALMOS 96:5

Echa opaete tëta reta itumpa-raanga reta, mbae iäño ko, ërei yandeYa ko oyapo ara reta.

ÉXODO 20:11

Echa ova ara pe ko, che peYa ayapo ara jare ɨvɨ, ɨguasu, jare opaete mbae reta oime pɨpe vae, jare aputuu chiúa ara pe; jáeramo cheporerekua ara mbutuu pegua re jare añono tee.

ÉXODO 31:18

Opa ma Tumpa imiari Moisés ndive ɨvɨtɨ Sinaí re yave, omee chupe mókoi ita yemomaendúa pegua, jókuae mókoi ita ipe vae, Tumpa ipoäka pe etei mborookuai reta oikuatía jese vae.

PROVERBIOS 16:4

Opaete mbaembae yandeYa oyapo, jökoraiño mai ou vaerä, iyoa vae ave oyapo, tembiporara iara peguarä.

PROVERBIOS 3:19

Arakuaa reve kavi yandeYa oñono ɨvɨ jenda pe, jare arakuaa katu reve kavi oyapo ara;

ECLESIASTÉS 12:1

Nemaendúa ndeApoa re, ndetaɨrusu ramboeve, ndei ara reta yavai yae vae oväe ndeve mbove, ndei rere mbove: “Mbaetɨ chemboyerovia aikogüe vae.”

ISAÍAS 37:16

“CheYa Imbaepuere yae ete vae, Israel iTumpa, araɨgua reta querubín iä ipäu pe oiko vae, ndeño ko jae opaete mburuvicha guasu reta ɨvɨ pegua juvicha guasu; nde ko reyapo ara jare ɨvɨ.

ISAÍAS 40:21

¿Mbaetɨ pa peikuaa? ¿Mbaetɨi pa peendu? ¿Mbaetɨi pa kia omombeu peve? ¿Mbaetɨ pa kia pemboe jese arakae güive?

ISAÍAS 40:26

Perovaɨva pemae ara kotɨ: ¿Kia pa oyapo opaete jókuae mbaembae reta? Jae ko oipapa jare oñono jenda pe kavi kavi, ombojee metei ñavo, ngaraa metei ave oata. Jökorai ko imbaepuere yae jare ipɨ̈rata yae.

ISAÍAS 40:28

¿Mbaetɨ pa reikuaa, mbaetɨ pa reendu yandeYa jae ko Tumpa oiko avei vae, jae ko oyapo opaete ɨvɨ vae? Mbaetɨ ko ipɨtu, mbaetɨi vi ikangɨ, jare iyarakuaa katu mbaetɨ kia ipuere omboyovake.

ISAÍAS 42:5

Körai jei yandeYa Tumpa, ara Iyapoa, jae oyapo ara; jae oyapo ɨvɨ jare mbaembae oñemuña pɨpe vae; jae omee ɨvɨ ipo reta pe ipɨ̈túe vaerä, jare tekove, ɨvɨ iárambo yogüɨreko vae reta pe vae:

ISAÍAS 44:24

Körai jei yandeYa, ndeReepɨ vae, ndei rea mbove voi ma ndeapo vae: “Che peYa, jae ko opaete mbaembae iyapoa, che ko ayapo ara jare ɨvɨ, mbaetɨ kia chemborɨ reve.

ISAÍAS 45:18

Echa yandeYa, ara iyapoa, Tumpa, ɨvɨ oyapo vae, omopöra kavi jare oñono kavi jenda pe vae, mbaetɨ oyapoiño, oyapo ko oime vaerä pɨpe mbaembae; jae jei körai: “Che ko jae peYa, mbaetɨ yé oime ïru.

ISAÍAS 51:13

Peakañɨ peYa peApoa güi, ara jare ɨvɨ iyapoa güi, ara ñavo pekaaru aru pekɨɨye oporombopɨatɨtɨ vae reta güi, oyemongeta pemokañɨtei vaerä yave. Ërei, ¿jama pa jókuae oporombopɨatɨtɨ vae reta iyarasɨ?

ISAÍAS 51:16

Ndeyuru pe añono cheñee reta, roñovatu chepo iä pe, che, ara iyapoa, jare ɨvɨ amboguapɨ iguapɨka re vae jare Sión pe jae vae: ‘Chembae vae ko nde.’ ”

ISAÍAS 65:17

“Echa ko che ayapota ara ipɨau jare ɨvɨ ipɨau; tenondegua re ngaraa ye ma kia imaendúa jese.

JEREMÍAS 10:12

YandeYa imbaepuere pe oyapo ɨvɨ; oñono kavi ɨvɨ oikuaa kavi reve; oipɨso ara iyarakuaa yae reve.

JEREMÍAS 32:17

‘CheYa Tumpa, nde ndembaepuere pe reyapo ara jare ɨvɨ. Mbaetɨ etei mbae yavai ndeve.

JEREMÍAS 51:15

YandeYa imbaepuere pe oyapo ɨvɨ; oñono kavi ɨvɨ iyarakuaa katu rupi; oipɨso ara iyarakuaa kavi yae rupi.

ZACARÍAS 12:1

YandeYa iñee Israel pe mbae oasata vae regua. YandeYa, ara oipɨso vae jare ɨvɨ oyapo vae, jare tekove oyapo kuimbae iyɨvɨte pe vae, jei:

San Mateo 11:25

Jayave Jesús jei: “Romboete cheRu, nde ko jae ara pegua reta jare ɨvɨ pegua reta iYa. Echa reñomi mbaembae iyarakuaa vae reta güi, ërei reechauka oñemomichi vae reta pe.

San Marcos 13:19

Echa jókuae ara reta pe oimeta tembiporara guasu. Mbaetɨi jókuae nunga Tumpa ɨvɨ oyapo güive, añave regua, jare ngaraai oime ye jókuae nunga.

Hechos 14:15

—Kuimbae reta, ¿maera pa peyapo kuae? Ore kuimbae reta pe reta ramiño ko. Romoërakua peve peyerova vaerä kuae ikavimbae peyapo vae güi Tumpa oikove vae kotɨ. Jae ko oyapo ara, ɨvɨ, ɨguasu jare opaete mbaembae pɨpe oime vae.

Hechos 17:24

Jae ko Tumpa oyapo ɨvɨ jare opaete mbaembae oï pɨpe vae. Jae ko ara jare ɨvɨ iYa, ërei mbaetɨ oiko tupao reta yande yayapogüe reta pe.

Hechos 4:24

Jae reta kuae oendu yave, metei rami oyerure Tumpa pe, jei reta: “OreYa Tumpa, nde ko jae ara, ɨvɨ, ɨguasu jare opaete mbaembae oï pɨpe vae iyapoa.

Romanos 11:36

Echa opaete mbaembae ou yandeYa güi. Jae oyapo opaete mbaembae iyeupeguarä. YandeYa toyemboeteuka jekuae avei pegua. Amén.

1 Corintios 8:6

Ërei ngatu yandevegua meteiño ko Tumpa. Jae ko yandeRu. Jae oyapo opaete mbaembae, jare yande yaiko chupeguarä. Jare meteiño yandeYa Jesucristo. Jae oyapo opaete mbaembae, jare omee yandeve tekove.

Efesios 3:9

jare aikuaauka vaerä opaete pe oyekuaambae iyɨpɨ güive Tumpa re vae, jae ko opaete mbaembae iyapoa.

Hebreos 1:10

Jare Tumpa jei vi Taɨ re körai: “CheRu Tumpa, iyɨpɨ ete pe nde ko reyapo ɨvɨ, jare ara jae ko nderembiapo.

Hebreos 1:2

Añave kuae ara reta pe imiari yandeve Taɨ rupi, jae ko ombojee opaete mbaembae iyarä vae, Taɨ rupi vi oyeapo opaete mbaembae.

Hebreos 11:3

Mborogüɨrovia rupi yaikuaa ɨvɨ jare opaete ara re ñogüɨnoi vae oyeapo ko Tumpa iñee rupi; opaete mbaembae oyekuaa vae, oyeapo ko mbaetɨ vae güi.

Hebreos 3:4

Jare opaete o, oime iyapoa. Ërei opaete mbaembae iyapoa, jae ko Tumpa.

2 Pedro 3:5

Jae reta mbaetɨ oipota imaendúa kërai arakae ete Tumpa iñee rupi oyapo ara jare ɨvɨ, jare ɨguasu reta re oï ɨvɨ,

1 Juan 1:1

Roikuatía peve Ñee tekove opambae vae regua. Jae oikoño mai ndei ɨvɨ oyeapo mbove. Jare ore roendu jókuae Ñee. Roecha kavi, romae jese. Royavɨkɨ vi orepo pe etei.

Apocalipsis 10:6

jare jei jekuaekuae avei rupi oiko vae jee re; oyapo ara jare opaete ipo reta vae; ɨvɨ jare opaete ipo reta vae, ɨguasu jare opaete ipo reta vae, jei: “Opa ma ara,

Apocalipsis 14:7

iñeeäta reve jei: “Peipoɨu Tumpa güi jare pemboete, echa iporojäa iora ou ma oväe. Pemboete ara, ɨvɨ, ɨguasu jare ɨesaɨ reta iyapoa.”

Apocalipsis 21:6

Jare jei vi cheve: “Oyeapo ma. Che ko jae Alfa jare Omega, iyɨpɨ ete jare iyapɨ ete. Kia iɨuve vae, che ameeiñota jepɨmbae jou ɨesaɨ tekove pegua güi.”

Apocalipsis 22:13

Che ko jae Alfa jare Omega, iyɨpɨ ete jare iyapɨ ete, tenondegua ete jare taɨkuegua ete.”

Apocalipsis 3:14

Eikuatía Laodicea pegua oporogüɨrovia vae reta iaraɨgua pe: Mase, ko Amén, jupi rupi imiari vae, añetete vae, opaete mbaembae Tumpa oyapo jae rupi vae, jei:

Apocalipsis 4:11

“OreYa, jupi ko oñemee vaerä ndeve yemboetea, mbaemboete jare mbaepuere, echa nde reyapo opaete mbaembae, jare nderemimbota rupi opaete mbaembae oiko jare oyeapo.”