47 Kuae toyapo opaete Israel iñemuña reta.
Nemiari opaete Israel iñemuña reta pe körai: ‘Kuae yasɨ, payandepo araa pe, metei ñavo toipɨɨ metei vecha kuimbae taɨrusu vae, metei tëtara metei o pe yogüɨreko vae ñavo metei vecha kuimbae taɨrusu vae.
Jare toñapɨti reta ara catorce oväe regua kuae yasɨ re, jare jókuae kaaru opaete vae Israel iñemuña reta toyuka.
Ërei mbaetɨ oyapo Pascua vae, yepe tëi mbaetɨ ikɨa ani ketɨ ojo; jókuae nunga toyemombo ete kavi jëtara reta ipɨte güi. Mbaetɨ omee mbota yandeYa pe oñemeeta tëi vae jeko pegua, toiporara iyoa re.
Jare ketɨgua yogüɨreko pepɨte pe vae, oyapo yave Pascua yandeYa pe, toyapo mborookuai Pascua regua jei rami etei. Metei mborookuaiño toiko opaete pegua, ketɨgua pe ani kuae ɨvɨ pegua pe.”
