7 Cè tòcò d́è̆ gudu Jezŭ d́ō, Ca b́atapla hwă Ze ne, Cò d́ò, “D́ŏ thĭ klè nu adèkhòwè tò ò ńò dèbwèbwè hwĕ ŭsubò̄ cè kî lo,” Cò d́ò lōwa do.
Klĭbwè tòcò d́òscĭge cè, “Bija dî jî̄b́ègè acab́ô̆ ajo dèbwè jî̄b́è nu dèbwè̆ hnî̆ńò,” cò d́ò̆sa lōwa do.
Jezŭ b́atapla hwă ane, Za da tcahtî be bija dèbwè̆ ńò ḿî htĕ amihmu dèbwè lò d́ō, Cè d́è̆ lōwa, “Amihmu, cè tòcò ò d́òlè̄? Bija di cirrathĭgè nè dèbwè̆ ńò ā?” Cò d́ò lōwa do.
Mèhwă Zo zogōla kî hwe d́ò̆ haphĭhmuklè̆ tapla be.
D́òi thèjô̆bò̄ dèjî̄b́è amònigu kî acwid́ahtoni bija nu. Thĭ mò thîhè̆ akò d́òscĭge bija dè ab́è cadè̄ cadè̄ nu.
D́ŏ Zu cukhò adèhtwè dòkhò̆ abu Cô pôgloi sè thăthôdèmè̆, d́ŏ Zò hòbu nu d́asĕ athô̆ ò gīkhò̆ tèb́è phlòhtagè kî Zu mūkă gè̄hta acab́ô̆ Lumuhtihta nu.
D́asĕ aphrò̆hta Zò hòbŭ ò tèb́è, htè Zè gè̄ mènomèbèikò̆ htĭge tòcò nu. Zu kū ŭicaikò̆ lōwa kî thab́ăhnèhtò htaĺa, kî Za gā jāhtakò̆ thobiscihtĭ d́ŏ bija scila i thobiscihtĭ abò bu, d́ŏ Kib́ĭcè Amèzadè lŏcăcè adèthèhtèsô abu nu.
Mègōnu d́ō, hèhtaphlòḿĭbò̄ d́ŏ thĭ dèkhòwè aklè̆ nu. Dî ḿî ńò d́ō, je gē lehtî plaplă thĭ kî jo kō d́o gā phjakò̆ cè tòcò kî d́asĕ aò d́ŏ jò hòbu tèb́è nu.