ԴԱՏԱՒՈՐՔ 7:14 - Գրաբար Աստվածաշունչ (1895)

¹⁴ Պատասխանի ետ ընկերն նորա եւ ասէ. Ոչ է այն՝ եթէ ոչ սուրն Գեդէոնի որդւոյ Յովասու առն Իսրայելացւոյ. մատնեաց Տէր ի ձեռս նորա զՄադիամ եւ զամենայն բանակս։

ԴԱՏԱՒՈՐՔ 7:14 ပူးပေါင်းရင်းမြစ်များ

ԳԻՐՔ ՅԵՍՈՒԱՅ ՈՐԴՒՈՅ ՆԱՒԵԱՅ 2:9

եւ ասէ ցնոսա. Գիտեմ զի ետ ձեզ Տէր զերկիրս. քանզի անկաւ ահ ձեր ի վերայ մեր, եւ զի հաշեցան ամենեքեան որ բնակեալ էին յերկրիս յայսմիկ յերեսաց ձերոց.

ԳԻՐՔ ՅՈԲԱՅ 1:10

ո՞չ դու ամրացուցեր զարտաքին նորա եւ զներքին տան նորա, եւ որ ինչ միանգամ արտաքոյ շուրջ զնովաւ է. զգործս ձեռաց նորա օրհնեցեր, եւ զանասուն նորա բազմացուցեր ի վերայ երկրի։

ԳԻՐՔ ՅԵՍՈՒԱՅ ՈՐԴՒՈՅ ՆԱՒԵԱՅ 5:1

Եւ եղեւ իբրեւ լուան ամենայն թագաւորք Ամովրհացւոց, որ էին յայնկոյս Յորդանանու առ ծովեզերբն, եւ թագաւորքն Փիւնիկեցւոց՝՝ որ առ ծովեզերբն, եթէ ցամաքեցոյց Տէր Աստուած զՅորդանան գետ առաջի որդւոցն Իսրայելի յանցանելն նոցա, հաշեցան սիրտք նոցա եւ զարհուրեցան՝՝, եւ ոչ գոյր ի նոսա իմաստութիւն եւ ոչ մի՝՝ յերեսաց որդւոցն Իսրայելի։

ԳԻՐՔ ՅԵՍՈՒԱՅ ՈՐԴՒՈՅ ՆԱՒԵԱՅ 2:24

եւ ասեն ցՅեսու թէ մատնեաց Տէր Աստուած ի ձեռս մեր զամենայն երկիրն, եւ զարհուրեցան ամենայն բնակիչք երկրին ի մէնջ։

ԹԻՒՔ 23:20

Ահա՝ յօրհնել առեալ եմ. օրհնեցից եւ ոչ դարձուցից։

ԹԻՒՔ 23:5

Եւ արկ Աստուած բան ի բերան Բաղաամու եւ ասէ. Դարձիր առ Բաղակ, եւ այսպէս խօսեսցիս։

ԹԻՒՔ 22:38

Եւ ասէ Բաղաամ ցԲաղակ. Ահաւասիկ եկի առ քեզ. արդ կարո՞ղ իցեմ խօսել բան ինչ, բայց եթէ զոր արկանիցէ Աստուած ի բերան իմ զայն խօսեցայց։

ԴԱՏԱՒՈՐՔ 7:13

Եւ եմուտ Գեդէոն, եւ ահա այր պատմէր ընկերի իւրում երազ. Տեսի, ասէ, երազ, եւ ահա նկանակ գարեղէն հոլովեալ ի բանակս Մադիամու, եւ եկն մինչեւ ի խորանն Մադիամու, եւ եհար զնա եւ կործանեաց, եւ անկաւ խորանն վերուստ ի վայր։

ԴԱՏԱՒՈՐՔ 7:15

Եւ եղեւ իբրեւ լուաւ Գեդէոն զպատմութիւն երազոյն եւ զմեկնութիւն նորա, երկիր եպագ Տեառն, եւ դարձաւ անդրէն ի բանակն Իսրայելի, եւ ասէ. Արիք, զի մատնեաց Տէր զբանակն Մադիամու ի ձեռս մեր։

ԴԱՏԱՒՈՐՔ 3:28

Եւ ասէ ցնոսա. Իջէք զկնի իմ, զի մատնեաց Տէր Աստուած մեր՝՝ զթշնամիս մեր զՄովաբացիս ի ձեռս մեր։ Եւ իջին զկնի նորա, եւ կալան նախ զանցս Յորդանանու ի Մովաբայ, եւ ոչ թողին մարդոյ անցանել։

ԹԱԳԱՒՈՐՈՒԹԵԱՆՑ ԱՌԱՋԻՆ 14:12

Եւ պատասխանի ետուն արք կրճացն եւ ասեն ցՅովնաթան եւ ցկապարճակիրն. Ելէք առ մեզ եւ ծանուսցուք ձեզ բանս։ Եւ ասէ Յովնաթան ցկապարճակիրն իւր. Եկ զկնի իմ, զի մատնեաց զնոսա Տէր ի ձեռս Իսրայելի։