ԵԶՐ 6:14 - Գրաբար Աստվածաշունչ (1895)

¹⁴ Եւ ծերքն Հրէից եւ Ղեւտացիքն շինէին՝՝, ի ժամանակս մարգարէութեանն Անգեայ եւ Զաքարեայ որդւոյ Ադդովայ. եւ շինեցին եւ հաստատեցին ըստ հրամանին Տեառն Աստուծոյ Իսրայելի. եւ որպէս հրամայեցին Կիւրոս թագաւոր եւ Դարեհ, եւ ի ժամանակս Արտաշիսի թագաւորին Պարսից։

ԵԶՐ 6:14 ပူးပေါင်းရင်းမြစ်များ

ԵԶՐ 3:8

Եւ յերկրորդ ամի ելանելոյ նոցա՝ յորժամ եկին ի տաճարն Տեառն յԵրուսաղէմ յամսեանն երկրորդի, սկսաւ Զորաբաբէլ Սաղաթիելեանց եւ Յեսու Յովսեդեկեանց, եւ եղբարք նոցա, եւ քահանայքն եւ Ղեւտացիքն եւ ամենայն եկեալքն ի գերութենէն յԵրուսաղէմ. եւ կացուցին զՂեւտացիսն ի քսանամենից եւ ի վեր՝ վերակացուս ի վերայ գործոց տանն Տեառն։

ԵԶՐ 4:24

Յայնժամ խափանեալ դատարկացաւ գործ տաճարին Տեառն Աստուծոյ յԵրուսաղէմ, եւ էր դատարկացեալ մինչեւ յերկրորդ ամն Դարեհի արքայի Պարսից։

ԵԶՐ 4:3

Եւ ասեն ցնոսա Զորաբաբէլ եւ Յեսու Յովսեդեկեանց եւ մնացորդք իշխանաց հայրապետացն Իսրայելի. Ոչ է արժան մեզ եւ ձեզ հասարակ շինել զտուն Տեառն Աստուծոյ մերոյ. մեք մեզէն իսկ շինեսցուք զտուն Տեառն Աստուծոյ Իսրայելի, որպէս հրամայեաց մեզ Կիւրոս թագաւոր Պարսից։

ԵԶՐ 5:1

Եւ մարգարէանային Անգեաս եւ Զաքարիաս Ադդովայ, մարգարէանային ի վերայ Հրէաստանի եւ Երուսաղեմի՝՝ յանուն Տեառն Աստուծոյ Իսրայելի։

ԵԶՐ 5:13

Եւ յառաջնում ամի Կիւրոսի թագաւորի Բաբելացւոց, Կիւրոս թագաւոր հրամայեաց շինել զտունս զայս Տեառն Աստուծոյ։

ԵԶՐ 5:2

Յայնժամ յարեան Զորաբաբէլ Սաղաթիելեանց եւ Յեսու Յովսեդեկեանց՝ եւ սկսան շինել զտուն Տեառն Աստուծոյ Իսրայելի՝՝, եւ միաբանեալ ընդ նոսա մարգարէքն Աստուծոյ օգնէին նոցա։

ԵԶՐ 6:3

Յամին առաջնում Կիւրոսի, Կիւրոս թագաւոր հրաման ետ վասն տանն Տեառն որ յԵրուսաղէմ. ասէ. Շինեսցի տաճարն Տեառն, տեղին ուր զոհեն զզոհսն Տեառն։ Եւ ետ զչափ՝՝ բարձրութեանն կանգունս վաթսուն, եւ լայնութեանն կանգունս վաթսուն.

ԵԶՐ 6:8

Եւ իմ հրամայեալ՝ մի՛ ոք արգելցէ զծերսն Իսրայելի՝՝ ի շինել զտուն Տեառն Աստուծոյ իւրեանց. եւ յիշխանութենէ թագաւորութեան իմոյ որ են հարկահանք կողմանց Գետոյն՝՝ ամենայն զգուշութեամբ տացեն զծախս արանցն այնոցիկ եւ մի՛ խափանեսցեն։

ԵԶՐ 7:1

Եւ յետ բանիցս այսոցիկ ի թագաւորութեանն Արտաշիսի արքայի Պարսից ել Եզրա որդի Սարուայ, որդւոյ Ազարեայ, որդւոյ Քեղկեայ,

ԵԶՐ 9:9

Վասն զի ծառայ եղաք, եւ ի ծառայութեանն մերում ոչ թողեր զմեզ, Տէր Աստուած մեր. եւ խոնարհեցան առ մեզ ողորմութիւնք քո առաջի թագաւորին Պարսից՝ տալ զմեզ ի կենդանութիւն, եւ բարձրացուցանել զտուն Աստուծոյ մերոյ, կանգնել եւ շինել զանապատս զայս, եւ արկանել ցանգ եւ պարիսպ ամրութեան Յուդայ եւ Երուսաղեմի։

ԳԻՐՔ ՆԷԵՄԵԱՅ 6:15

Եւ կատարեցաւ պարիսպն ի քսաներորդ հինգերորդ ամսոյն Իլուլ ի յիսուն եւ երկու աւուրս։

ՄԱՐԳԱՐԷՈՒԹԻՒՆ ԵՍԱՅԵԱՅ 44:28

որ ասեմ ցԿիւրոս թէ՝ Իմաստնասջիր, եւ զամենայն կամս իմ արասցես. որ ասեմ ցԵրուսաղէմ թէ՝ Շինեսջիր, եւ զտաճարն իմ սուրբ հաստատեցից՝՝։

ՄԱՐԳԱՐԷՈՒԹԻՒՆ ԱՆԳԵԱՅ 1:1

Յամին երկրորդի Դարեհի արքայի, յամսեանն վեցերորդի, որ օր մի էր ամսոյն, եղեւ բան Տեառն ի ձեռն Անգէի մարգարէի եւ ասէ. Խօսեաց ընդ Զորաբաբելի որդւոյ Սաղաթիելի յազգէ Յուդայ, եւ ընդ Յեսուայ որդւոյ Յովսեդեկեայ քահանայի մեծի, եւ ասասցես.

ՄԱՐԳԱՐԷՈՒԹԻՒՆ ԱՆԳԵԱՅ 1:8

Ելէք ի լեառն, հարէք փայտ եւ շինեցէք զտունդ. եւ հաճեցայց դովաւ եւ փառաւորեցայց, ասէ Տէր։

ՄԱՐԳԱՐԷՈՒԹԻՒՆ ԶԱՔԱՐԵԱՅ 1:1

Յամսեանն ութերորդի՝ յամի երկրորդի Դարեհի արքայի, եղեւ բան Տեառն առ Զաքարիա մարգարէ որդի Բարաքեայ, որդւոյ Ադդովայ եւ ասէ.

ՄԱՐԳԱՐԷՈՒԹԻՒՆ ԶԱՔԱՐԵԱՅ 1:16

Վասն այնորիկ այսպէս ասէ Տէր. Դարձայց առ Երուսաղէմ գթութեամբ, եւ տունն իմ վերստին շինեսցի, ասէ Տէր ամենակալ. եւ չափ ձգեսցի միւսանգամ ի վերայ Երուսաղեմի։

ՄԱՐԳԱՐԷՈՒԹԻՒՆ ԶԱՔԱՐԵԱՅ 4:9

Ձեռք Զորաբաբելի հիմն արկին տանդ այդմիկ, եւ ձեռք նորա կանգնեսցեն զդա. եւ ծանիցես՝ թէ Տէր ամենակալ առաքեաց զիս առ քեզ։

ՄԱՐԳԱՐԷՈՒԹԻՒՆ ԶԱՔԱՐԵԱՅ 8:9

Այսպէս ասէ Տէր ամենակալ. Զօրասցին ձեռք ձեր որ լսէքդ յաւուրս յայսոսիկ զբանս զայս ի բերանոյ մարգարէիցն, յօրէ յորմէ արկէք հիմն տան Տեառն ամենակալի, եւ տաճարս յորմէ հետէ շինեցաւ։