ՄՆԱՑՈՐԴԱՑ ԱՌԱՋԻՆ 29:25 - Գրաբար Աստվածաշունչ (1895)

²⁵ Եւ մեծացոյց Տէր զՍողոմոն ի վերուստ առաջի ամենայն Իսրայելի, եւ ետ նմա փառս թագաւորութեան, որ ոչ ումեք եղեւ ամենեցուն թագաւորացն որք յառաջ քան զնա։

ՄՆԱՑՈՐԴԱՑ ԱՌԱՋԻՆ 29:25 ပူးပေါင်းရင်းမြစ်များ

ԹԱԳԱՒՈՐՈՒԹԵԱՆՑ ԵՐՐՈՐԴ 1:37

Եւ որպէս էր Տէր ընդ տեառն իմում արքայի, եղիցի եւ ընդ Սողոմոնի. եւ մեծացուսցէ զաթոռ նորա քան զաթոռ տեառն իմոյ արքայի Դաւթի։

ԹԱԳԱՒՈՐՈՒԹԵԱՆՑ ԵՐՐՈՐԴ 3:12

ահա արարի ըստ բանիդ քում, ահա ետու քեզ սիրտ իմաստուն եւ հանճարեղ. իբրեւ զքեզ ոչ ոք եղեւ յառաջ քան զքեզ, եւ յետ քո ոչ ոք յարիցէ նմանօղ քեզ։

ԹԱԳԱՒՈՐՈՒԹԵԱՆՑ ԵՐՐՈՐԴ 3:13

Եւ զոր ոչ եւս խնդրեցեր՝ ետու քեզ, զմեծութիւն եւ զփառս, որպէս ոչ ոք եղեւ նման քեզ ի թագաւորս զամենայն աւուրս քո։

ՄՆԱՑՈՐԴԱՑ ԱՌԱՋԻՆ 29:24

Իշխանք եւ զօրաւորք եւ ամենայն որդիք արքայի Դաւթի հօրն նորա հնազանդեցան նմա՝՝։

ՄՆԱՑՈՐԴԱՑ ԵՐԿՐՈՐԴ 1:1

Եւ զօրացաւ Սողոմոն որդի Դաւթի ի թագաւորութեանն իւրում, եւ Տէր Աստուած իւր ընդ նմա էր, եւ մեծացոյց զնա ի բարձրութիւն։

ՄՆԱՑՈՐԴԱՑ ԵՐԿՐՈՐԴ 1:12

զիմաստութիւն եւ զհանճար տամ քեզ, եւ զմեծութիւն եւ զինչս եւ զփառս տաց քեզ. որպէս զի ոչ եղեւ նման քեզ ի թագաւորս յառաջագոյն քան զքեզ, եւ զկնի քո ոչ լինիցի այդպէս։

ԳԻՐՔ ՅՈԲԱՅ 7:17

Զի զի՞նչ է մարդ՝ զի մեծացուցեր զնա, կամ զի հայիցիս ի նա մտօք,

ԺՈՂՈՎՕՂ 2:9

Եւ մեծացայ առաւել քան զամենեսին որ յառաջ էին քան զիս յԵրուսաղէմ. նա եւ իմաստութիւն յաւելաւ ինձ։

ԳՈՐԾՔ ԱՌԱՔԵԼՈՑ 19:17

Եւ այս յայտնի եղեւ ամենայն Հրէից եւ հեթանոսաց որ բնակեալ էին յԵփեսոս. եւ անկաւ երկեւղ յամենեսեան ի նոսա, եւ մեծանայր անուն Տեառն Յիսուսի։

ԱՌ ԵԲՐԱՅԵՑԻՍ ԹՈՒՂԹ 2:9

Այլ զփոքր մի խոնարհեալ քան զհրեշտակս տեսանեմք զՅիսուս վասն չարչարանաց մահուն, փառօք եւ պատուով պսակեալ, զի շնորհօքն Աստուծոյ վասն ամենեցուն զմահ ճաշակեսցէ։

ԳԻՐՔ ՅԵՍՈՒԱՅ ՈՐԴՒՈՅ ՆԱՒԵԱՅ 3:7

Եւ ասէ Տէր ցՅեսու. Յաւուր յայսմիկ սկիզբն արարից բարձրացուցանել զքեզ առաջի ամենայն որդւոցն Իսրայելի, զի ծանիցեն թէ որպէս էի ընդ Մովսիսի, նոյնպէս եղէց եւ ընդ քեզ։

ԳԻՐՔ ՅԵՍՈՒԱՅ ՈՐԴՒՈՅ ՆԱՒԵԱՅ 4:14

Յաւուր յայնմիկ աճեցոյց Տէր զՅեսու առաջի ամենայն ազգին Իսրայելի, եւ երկնչէին ի նմանէ որպէս երկնչէին ի Մովսիսէ որչափ ժամանակս եւ եկաց։