Ézai 57:1 - Kazambale lé Sebe Sauunu 1979

¹ Mi tegele éé gaan yé ’bɛ ’ka mi do yuɛgi bɔa lo. Woo mi zinnu sian yé é ’ka dɔ lɛ mi do kpen gi léé, wenaané zi lé wo mi zinnu sian lo.

Ézai 57:1 ပူးပေါင်းရင်းမြစ်များ

1 Minwiinzannu 14:13

Izraɛl munu faa é dan a wuvɔ lɛ yé wo dan a pa lɛ; Jéroboam lé munu va mi do kpen lé wo dan a pa lɛ mi pana, yee ɛ ke né ’ko nya, naa, Jéroboam lé munu faa va, yee do kpen gi lé Gakelebale Izraɛl lé Bale wezin ye, azama.

2 Minwiinzannu 22:20

Bɛwemalé, bé ye, i dan go lɛ drɔɔ i tranu zuo, yé we tɔntɔnnu faa lé maa dan wo bɔ lɛ fɛkona ma, i ’ka dan wo ye lɛ lo. Wo go yé wo we zi pa dére ’ko zuo fe minwiinzan blɛn lɛ.

2 Minwiinmunu lé Wezuofe Sɛbɛ 32:33

Ézékia yi gyɛ é tranu va, yé wa pa David benu pana faa ta loru. Judanu faa valé Jérusalɛm munu a gyɛ kɛlɛ blɛn. Yé a be Manasé pla munu nwiin a pa gi.

2 Minwiinmunu lé Wezuofe Sɛbɛ 34:28

Bé ye, i dan go lɛ drɔɔ i tranu zuo yé we tɔntɔnnu faa lé maa dan wo bɔ lɛ fɛkona valé ana munu ma, i ’ka dan wona ye lɛ lo. Wo go yé wo we zi pa dére ’ko zuo fe minwiinzan blɛn lɛ.

2 Minwiinmunu lé Wezuofe Sɛbɛ 35:24

A wuozannu a si goro gi, yé wa vɔ alé goro fiézan gi, yé wo goan Jérusalɛm. É ga, yé wa pa a tranu pana. Juda valé Jérusalɛm munu faa Jozias wuvɔ.

Lɛrɛvɔ Sɛbɛ 12:1

Lɛrɛ lé David a vɔle gɔɔn lɛrɛvɔmunu ’lɛzan lɛ. Kɔnɔ lé a bale ke sɔraa, ’wa gyɛ a va.

Lɛrɛvɔ Sɛbɛ 37:37

Mi lé alé we ke tegele, bé gini do; yé mi lé alé we ke é drɔle, bé ye do; Naa, mi drɔɔ kulu é dan kɛlɛ lɛ.

Ézai 42:25

Amalé a bli fli Izraɛl ma é baba, Yé é glawe bɔ wo ma yé guli wo gyɛ, Guli wo gyɛ bɛ faa ma, yé wo ’ka a gi ’ma lɛ lo; Guli wo ble yé wo ’ka ’bɛ pa lɛ wo ’wuo gi lo.

Ézai 47:11

We tɔntɔn é dan bɔ lɛ i ma, Yé i ’ka bɔa sole lɛ a lee lo, Dirikiniwe é dan bɔ lɛ i ma, Ilé yo kɛlɛle ’ka dan sɔ lɛ a nya lo, I guru é dan zana lɛ a gi fiaa I ma trɔnné va.

Ézai 47:7

Bé fe léé, ’é dan kɛlɛ lɛ yifaama munu nwiin le nya, I ’ka a pa lɛ i bli gi lo Yé é ’ka boenwo dɔ lɛ i gi léé, we ’ko é dan nyaa lɛ, lo.

Ézai 57:11

Ka a kanana de ɛ lee yé ka gɔné bɛ ginian an wuo yé an sele ’ka dɔa ka gi lo, yé ka ’ka ka gi bɔrɔan an ma loo? An tadɔna ka zi ’ka mɔn lɛ loo? Bɛwemalé ka ’ka kanaan an lee lo.

Jérémi 18:11

Bé fe sin Judamunu valé Jérusalɛm munu lɛ léma: Gakelebale léma: Ka ye, an we tɔntɔn ma’lɛrɛ léé, ’é bɔ ka ma. Maa a an bɔn‐in bɔrɔna ka mawe do nya. Ka faa do do, ’ka daan ka kɛlɛwe nyanénu ma. ’Ka ka kɛlɛwe naanénu valé ka panyanamanu vo, ’ka a dɛrɛ sia.

Jérémi 22:10

Té ka wuvɔ ka nwiinzan Jozias lé é ga, a ta lo, Té ka a gyɛ bo lo; A be lé é ke gona luu gi, ’ka wuvɔ ’bɛzan ta. Naa, é ’ka dan da lɛ é pa gi é dɛrɛ lo; É ’ka dan é yaatɛrɛ ye lɛ é dɛrɛ lo.

Ézékiɛl 21:3

Bé fe yirinwana bɛyilazia pɔrɔ lɛ léma: ’I tɔné dɔ Gakelebale dére lɛ. Mizan Gakelebale léma: Maa dan i kyɛ vɔ lɛ yé yili drɔɔdrɔɔnu faa valé yili galenu faa, yee kyɛ ’ko é dan wo ble lɛ. Kyɛnɛnɛ blɛn ’ko ’ka dan diri lɛ pelo, yé fɛnu faa lé wo ke tɛrɛ yuɛ la é dan wo ble lɛ, é sia yirinwana bɛyilazia fɔɔ yé é bɔ yirinwana bɛbolazia.

Misé 7:2

Mi zin ta saan tɛrɛ ’ko la, yé mi tegele do kpen ’ka blaminu va é dɛrɛ lo; wo faa a zi bɛnna mi nyɛ zanale we ma; wo faa do do éé san vɔa ’wo bwenu lee.

Malasi 2:2

Dé ka ’ka tɔné dɔ lɛ an lɛ lo, dé ka ’ka a pa lɛ ka bli gi léé, ka an tɔ bɔ lo, maa dan bale pa lɛ ka ma, yé fɛ lé ke ka drɔɔvofɛ nya é kyɛn, maa dan bale pa lɛ ’bɛ ma. Iin, maa dan bale pa lɛ wo ma; ka ’ka an dére pa lɛ ka bli gi lo, azama. A zo lé lai sunyanu lé Gakelebale a fe.

Mi Nɔnɔle 23:10

De ɛ bɔa Jakɔb lé nyéné nɔnɔle lɛɛ? Yé de ɛ bɔa Izraɛl palu do ’léé fele lɛɛ? ’An ga mi tegelenu gabɛ gi ma; Anzé ’wuo ’é pla bélé wozé zo ma.