Mata 5:8 - Bible Zulgo

⁸ Maŋgayaba i təv gà na gəzləŋ tar tsəɗaŋŋa, bakal tar a riŋ tsiye, aɗaba tar ka, ti ta ŋget a a Mbulum nda are tar.

Mata 5:8 ပူးပေါင်းရင်းမြစ်များ

Gà Ɓəzla Meslire 15:9

Aka wala ikaba tar nda gà kwa ya tsa. A pə̀lara à tar i bakal a ka, aɗaba ana tàa gəs ŋgat nda gəzləŋ ilik a.

1 Kurintiya 13:12

Ama kinehe ka, are kwa a de a aba ya zukw tsa, ki ŋgetekewe a a gà duwa ka, zìyye kamala kwataramà ana ki fir a iɗəm a ka, kùlàhtàhha are a slala iɗəm a tsiye tə̀ma. Aləka a ndze a a tə̀vəməŋa mba ka, ki hitsekwe a aka miɗ Mbulum dzìrìk, ki ŋgetekewer a ndzùzlzlwa lele kuɗa. Kinehe ka, kà sərakwa ŋgat fit kweleŋ zukw tsa. Ama a pat ana aka ndzera ya ka, ki sirekwe a ŋgat lele kuɗa, kamala ana ŋgat a sər kwa kinehe ya mbaŋa.

2 Kurintiya 7:1

A kurum gà masla gà ana i waya kurum hinne ya. Mbulum aka tsik a kwa i sida ya, a gwa, a ta vile a kwe a gà dukw ata tserdze ya. Aɗaba taŋa, say barakwa dukw ana ŋgwala tsiye, aà ba kwa ya, dite ma ne tsəɗaŋŋa na i təv are Mbulum a. Kà barakwara dukw ana ŋgwala tsa i gəzləŋ kwa ya asa mbaŋa. Mede kwa ana ki tèkwe a ika vatwa Mbulum a, ma ge ka, kamala ana ŋgat a waya ya. Ka hənakwar à gər a bəɗ tiɓìzl lele.

TITUS 1:15

I təv gà na gəzləŋ tar tsəɗaŋŋa məbàrà ŋa lele ika miɗ Mbulum a ka, dukw ana ta ge a tserdze ya tekeɗe, tsəɗaŋŋa ŋgwal ŋa lele mbaŋa.*fa* Ama gà na gəzləŋ tar ga ŋgwal ŋa tsa, ta gəs ahəm aà Mbulum tsiye ka, duwa a riŋ tsəɗaŋŋa i təv tar tsidze. Dukw ana tə dzalawa ya ka, ŋgwal ŋa tsa. Dite ku mege a sàs a tar mege dukw ana ŋgwal ŋa tsiye tekeɗe ka, gəzləŋ tar a wir a tsa, aka ne ba tar.

IBƏRANIKWA 10:22

Aɗaba taŋa, gə̀sakwa Yesuw Kiristi nda gəzləŋ ilik lele. Madzala gà gər kwa ka, ma ge wàkit wàkit tsa. Dite sìrìkikwa a təv Mbulum ka, ndiɓ nda gəzləŋ ilik mbaŋa. Aɗaba Yesuw aka bara gəzləŋ kwa nda məmbəz ŋgar, dite aka bara kwa nda yam ŋgar ana tsəɗaŋŋa ya asa mbaŋa.

IBƏRANIKWA 12:14

Yahum vatwa nda ndzəɗa kurum fit, na dite ki ndzwim a zayya lele ika magər gà mburma tserdze ya. Ki yehwim a vatwa ka, dite mendze kurum ma ge tsəɗaŋŋa ika miɗ Mbulum lele mbaŋa. Aɗaba na wura a ndze a kataya tsəka, wura ilik a ŋget a a Mbulum tsa.

IBƏRANIKWA 9:14

Ama na məmbəz gà dukw ata aka sle aà məbàrà tar kamala taŋa ya ka, məmbəz Kiristi à zè a taŋa fit kweleŋ nda ndzəɗa. Ŋgat ana aka ge bakal duwa ilik tsidze ya, a vəl ba ŋgar a Mbulum nda ndzəɗa Mezite Mesife Mbulum ana a ndze a aà biybiy a. Məmbəz ŋgar ata ka, a bere a bakal i gəzləŋ kwa ya lele, na dite ki gekwe a dukw ana a dzeye a à kwa asa tsiye. Ama ki gekwe a ka, megemir Mbulum ana ŋgat mala məvəla mesife a mburma ya ivaɗ.

YAKUBA 3:17

Ama metsehe ana ndzer ŋa a dere a i təv Mbulum i gər ŋa ya ka, pam, tsəka, duwa a riŋ ihər manəsa ŋa tsa. A ndze a ka, tsəɗaŋŋa. Na wura a ndze a nda gà medzibe metsehe ata i gəzləŋ ŋgar ka, a zlere a mandza zayzay a, nda masə̀ràba ya, nda gà magəsa aba ahəm a. Dite ŋgat asa ka, mburma a ndzer a are tsehe hinne. A ge a ka, dukw ana ŋgwal ŋa ya kəla pat. A wele a ikaba mburma ya tsa. Melèvekè nda məbànà mburma i təv ŋgar tsa asa mbaŋa.

YAKUBA 4:8

Sìrìkwim a təv Mbulum. Ŋgat tekeɗe, à sìrìk a a təv kurum mbaŋa. A kurum gà ɓəzla bakal, dumara, barum bakal aà ahər kurum a. A kurum ana madzala gà gər i gəzləŋ kurum mandzalama sula ya, miyakum aba à madzala gà gər ata ŋgwal ŋa tsiye.

1 PIYER 1:22

Kinehe ka, kàa barum bakal i gəzləŋ kurum a, aɗaba kàa gəsum ahəm a təv dukw ana ndzer a, na dite ki slwim a aà mawàyà gà asiŋ gà damər kurum ana ti zezem a vatwa Mbulum mbaŋa ya. Aɗaba taŋa, wayum ba ka, nda gəzləŋ ilik ŋa, kəla pat. Wirwir ma ge iɗəm tsa.

Sunwa Yuhana 22:4

Tar ka, ti ta ŋget a a are ŋgar. Dite ka, ti ta wetse a zləm ŋgar aka yemere tar.