Luka 11:13 - Bible Zulgo

¹³ Na kurum ana gà ŋgwal ŋa tsiye ka, ka sərum məvəla gà ŋgwal gà dukw a gà ɓəza kurum seyiŋ ana, sakwàn Tsir kwa ana i gər ŋa ya ivaɗ a. A vile a Mezite Mesife ŋgar a gà na ta wiz ahər a ya ana, à zè a taŋa tsiye?»

Luka 11:13 ပူးပေါင်းရင်းမြစ်များ

Mata 5:16

Aɗaba taŋa, mede kurum ana ŋgwal ŋa ya, mə̀ pàt aba ika miɗ mburma tserdze, kamala dzaydzay ata ya, dite ta fə̀r aà megemir kurum ana ki gwim a a Mbulum ŋgwal ŋa lele ya ka, tar ibam, tə̀ zàmbaɗa à Mbulum Tsir kurum ana i gər ŋa ya mbaŋa te.»

Mata 5:45

dite ka, nwim gà ɓəza Mbulum Tsir kurum ana i gər ŋa ya. Aɗaba Mbulum ka, a waya mburma hinne. Pat ŋgar a də̀vawa ka, aka gər gà mburma ana ta ge a dukw ana ŋgwala tsiye mbaŋa, dite aka gər gà mburma ana gà ŋgwal ŋa ya tserdze. A dzawa yam tekeɗe, kamala taŋa ya mbaŋa, tsəka, a wele a ikaba mburma ya tsa.

Mata 6:14

A gwaɗa a tar asa: «Na kàa pə̀lum à bakal a gà mburma ana ta gewa a kurum bakal a ka, Mbulum Tsir kurum ana i gər ŋa ya tekeɗe, à pìl a a kurum a dər mbaŋa.

Mata 6:30

Aɗaba taŋa, na Mbulum a riŋ ihər à dìweye a gà gər gà kwizir ana i dala ya lele, a biziŋa, ama ndidwe ŋana ka, ta wene a tsara dze seyiŋ ana, sakwàn kurum a. A dìweye a kurum ana, à zè a taŋa tsiye, na kurum ana kə̀ gəsum iye nda gəzləŋ kwizikw a.

Mata 6:32

Aɗaba gà dukw ata tserdze ya, tsəŋgawwa na a dzele a ka, gà na tə sər Mbulum tsiye. Ama kurum ka, Mbulum Tsir kurum ana i gər ŋa ya, a sər gà dukw ata a sle aà kurum, kà wayum a fit dze.

Mata 7:11

Na kurum ana gà ŋgwal ŋa tsiye ka, ka sərum məvəla gà ŋgwal gà dukw a gà ɓəza kurum seyiŋ ana, sakwàn Tsir kurum ana i gər ŋa ya ivaɗ a. A vile a gà ŋgwal gà dukw a gà na ta wiz ahər a ya ana, à zè a taŋa tsiye?

Luka 11:12

Kige tsa aka wiz ahər slèsle ana, a viler a hìrde ya?

Luka 11:2

Yesuw a tsaraka kataya ka, a dza ba aà meɗìfè a tar dər. A gwaɗa a tar: «I təv ana ki hemwim a ya ka, gwaɗum: Tsir mər, kər ka, tsəɗaŋŋa, bakal i təv yak tsa. Gà mburma tserdze tə̀ zlə̀b dər à kər. Mekwere yak ana ki kwere a ya ka, ma ge ba i təv mər mbaŋa.

Luka 18:7

Dite wànà Mbulum dze ana, a ti zlèk a gà mburma ana a pala tar, ti tiwer aaba a hawa mèkwède ya seyiŋ ivaɗ tsiye? Wànà a ge a mèhìnèkw aà mezleke tar a?

Yuhana 4:10

Yesuw a gwaɗar aaka: «Na mege kà sər dukw ana Mbulum a vile a a mburma ya, dite kà sər iye na i wiz aà kər yam a ka, kər ivaɗ na ki wiz aà iye a yam ana a vile a mesife a mburma ya, dite ka, i vilek a ya.»

Gà Ɓəzla Meslire 2:38

Piyer a gwaɗa a tar aakaha: «Mbəɗum à madzala gà gər kurum, dite ti tsilwiɓ à kurum a yam, nda zləm Yesuw Kiristi. I dəba ŋa ya, Mbulum à pìl a kurum a à bakal kurum, dite ka, ki ŋgetwim a Mezite Mesife Mbulum ana a vile a kurum a ya.

RUMA 5:17

Kaɗəŋ, mburma ilik a ge bakal, na dite mburma tserdze ta matawa ka, aɗaba bakal ŋgar a. Ama Yesuw Kiristi, ŋgat a ge a megemir ka, pam. Nda ahər ŋgar na Mbulum a ge a kwa ŋgwal ŋa lele hinne, a sər ba à kwa nda gà ŋgat a. Aɗaba taŋa na ki ŋgetekewe a mesife ana à ndìv a tsa aà biybiy a, dite ki ta kwerekwe akaba a nda gà ŋgat asa.

RUMA 7:18

Kà sərakwa lele, i təv kwa gà mburma taf masakəŋa aaha ka, duwa a riŋ ŋgwal ŋa ilik tsidze. Kà wayakwa mege dukw ana ŋgwal ŋa ya ndzer, ama ka, ndzəɗa kwa a sle tsa.

RUMA 8:32

Mbulum ŋgat ka, ku mege Kəla ŋgar aka niw dər tsa, ama a miyak à ŋgat, dite mə̀ mət aɗaba kwa tserdze. Na Mbulum aka vəl a kwa Kəla ŋgar seyiŋ ana, kà dzalum ana, a ta vilekwe a gà dukw ŋgiɗ tserdze mbaŋa tsiye?

TITUS 3:3

Aɗaba akahər ata ka, kwa tekeɗe, metsehe kwa a riŋ tsa mbaŋa, kə̀ gə̀sakwa ahəm tsa, kàa dzeyekwa ika vatwa ndzer ŋana ya. Kà nekwa ka, gà ɓele dukw ana ba kwa a waya ya ɗekɗek. Kwa mandza ŋa ka, gà ɓəzla swalwa. Ki gewakwa are aka dukw mburma. Gà mìsle ŋgiɗ tàa nekwa are ka, kwa tekeɗe, kàa nekwa a tar aɗəm are mbaŋa.