EFESIYA 6:11 - Bible Zulgo

¹¹ Dùwaywim ba nda gà dukw ahər ana tserdze Mbulum a dza a kurum a, ka hitswim dər asləka asləka, lele aka miɗ Əbay sitene ana a waya a beze a kurum a za nda wirwir ŋgar zləmana ya, na dite ki ŋgetwim ndzəɗa, ki ŋgirzlwim a ya.

EFESIYA 6:11 ပူးပေါင်းရင်းမြစ်များ

Markus 13:22

Aɗaba taŋa ka, gà na ti ne aba Kiristi ya, nda gà na ti ne aba gà ɓəzla məma à guma Mbulum nda pàrsa ya, ta hitsiŋa. Ta geye a gà dukw mene aà mburma pampam hinne, aà məbàzà dər za a gà na Mbulum a pala tar zləmana, na mege ti sle a ya.

RUMA 13:12

Aɗaba ar ka, kamala həvəɗ ana wetititittè a de a iɗəm a, dzaydzay ŋa a dere a ya. Kinehe ka, məsakukwa à megemir luvuŋ. Ki ndzìkikwe a dukw ahər ana i təv dzaydzay ŋa ya, aà mege dər gùvəl aà luvuŋ, dite ka, ki mbèkwe ahəriŋa.

RUMA 13:14

Ama Yesuw Kiristi BATSAH kwa ŋa, ma ne ka, kamala dukw ahər kurum a. Ki ndzwim a ka, slìppè i ba ŋgar. Ka wiswim ba à gər nda dukw ana ŋgwala tsa, ba kurum a waya aà mege ya asa tsa.

1 Kurintiya 10:13

Dukw ana Əbay sitene a dzik a dər à kurum a ka, a riŋ a dzik a à mburma tserdze dukw ŋgar. Ama Mbulum ana ŋgat mala ndzer a ka, à zlèk a kurum kamala ana a tsik a. Na bəla Əbay sitene a sasar a dzik a à kurum nda dukw ana a za ndzəɗa kurum a ka, Mbulum a viler a vatwa tsidze. Seyiŋ tsa, medzike ana ti dzik a à kurum, a le aà kurum a ya ka, Mbulum a vile a kurum a ndzəɗa, dite na ki mirwim a aba ya. A zlèk a kurum, na dite ka, Əbay sitene a bene a kurum asa tsiye.

2 Kurintiya 10:4

Dukw ahər mər tekeɗe, kamala biy gà mburma gər ahəɗ a tsa asa mbaŋa. Gà dukw ahər ata ka, Mbulum ivaɗ na a vəl a mər a. Ar ka, ndzəɗa ŋa hinne. Nda taŋa na mìi mbezle a dər à təv màŋgwàɓà gà ɓəzla mene are Mbulum ana tə dzayawa aɗəm ba ya. Mìi gis a dər ahəm aà are a gà na ŋgəraw ti dzele a duwa nda pàrsa ŋa ya.

2 Kurintiya 11:3

Iye ihər i ge a magəɗa, aɗaba biytsà wura a riŋ a peze a kurum a za, metsehe kurum ana ki zezemwim a dər Kiristi nda gəzləŋ ilik a ka, a ge a riŋ asa tsa. Aɗaba kurum kà sərum, meme na mesiwiɗ ata a daha, a paza za a Hawa nda wirwir a mbaŋa ya.

2 Kurintiya 2:11

I ge dər kataya ka, aɗaba a sèsiŋ tsa na Əbay sitene a sewle aà kwe a ya. Aɗaba kwa ka, kàa mbər mesirekwa wirwir ŋgar ana a gewa ya lele, makàhà ŋa tsa.

2 Kurintiya 4:4

Tə tsaraka bazlam ŋgwal ŋa ata tsəka, aɗaba ana Əbay sitene, mala makwàrà gər ahəɗ aaha, aka ge à tar guluf i huɗ metsehe tar, dite ta gəs tsiye. Aɗaba a waya tsa na ta ŋget a a dzaydzay ana à div a i təv tar a ya. Dzaydzay ata a dara ka, i huɗ ŋgwal bazlam ata aka gər ndzəɗa Yesuw Kiristi ana tì zlibe a dər a. Aɗaba Mbulum nda gər ŋgar a pàt à ba ka, nda təv Kiristi.

2 Kurintiya 6:7

Mì ɗifewa à bazlam ndzer ŋana a mburma, Mbulum na a vəlawa a mər ndzəɗa ŋgar a. Nda gà dukw ata tserdze ya, na gà mburma tə sər ka, mər gà ɓəzla megemir Mbulum a. Mede mər ana ika miɗ Mbulum nda ndzer ŋa ya, a ne ka, dukw ahər mər ana mìi ge a gùvəl aà gà ɓəzla mene are mər a. Ama dukw ahər ata ka, a ne dukw ana mìi geye a dər ikaba ya nda təv tar a mbaŋa.

EFESIYA 4:14

Na kàa simekwa kataya ka, kwa gà ɓəza ndirkiz asa tsa. Gà ɓəzla pàrsa ana ta pasawa za a mburma nda wirwir a tekeɗe, ti sle a aà mendze a kwa a vatwa nda medzeŋge pàrsa tar asa tsa. Medzeŋge tar ata ka, à dzèdzeye a à mburma kamala himbiɗ ana kəzlah kəzlah à sìweye a à slə̀làh yam ika gər yam a. Ama kinehe ka, tsàhakwa, na dite a sle aà kwe a kataya asa tsiye.

EFESIYA 4:24

Mbəɗum ibam, à ba ŋgiɗ nda mede awiya ŋa ana Mbulum a vəl, a ndzikiɗ ba biy ŋgar a. Mede ata ka, ndzer ŋa kalkal lele, a da a gər a Mbulum.

EFESIYA 6:13

Aɗaba taŋa, gəsum gà dukw ahər ana tserdze Mbulum a dza a kurum a ɓəŋɓəŋ lele, na dite ki ŋgetwim a ndzəɗa, ki ŋgirzlwim a ika miɗ gà ɓəzla mene are kurum ata ya. A pat ana ta beze a kurum a za ya ka, ta mbè aà kurum a tsa, haa a pat mandəva dər ŋa.

KULUSIYA 3:10

Kàa ŋgatum mede ana awiya ŋa ya ivaɗ. A ne ka, kamala awiya petek ana ŋgulàɗə̀ɗɗa kà dzum akaba ya. Mbulum na a vəl a kurum madzala gà gər ata ya. A riŋ a ne a dər awiya ŋa kəla pat, na dite ki nwim a kamala ŋgat a ya. Dite ka, ki ti sirwim a ŋgat lele, à sìkèh a aka miɗ aka miɗ mbaŋa.

1 TESALUNIKE 5:8

Ama kwa kinehe ka, gà mburma ana mandza ŋa i təv dzaydzay ŋa ndaàpat a, tsəka, kwa gà na i luvuŋ a tsa. Aɗaba taŋa, ka ta kwayakwa tsa, say kwarakwa ba kwa lele, tàkwa aka miɗ aka miɗ nda magəsa Yesuw Kiristi nda gəzləŋ kwa, dite nda mawàyà ba ana ka wayakwa dər ba ika magər kwa ilik ilik tserdze ya asa mbaŋa. Aɗaba mege dukw ata ka, a ne kamala ana kà dùwayakwa ba nda *andiw sayaw, na dite duwa a ndzekwe a asa tsiye ya. Tikekwa madzala gà gər kwa ka, aka pat ana Yesuw Kiristi a ta mbil a à kwa fit kweleŋ a. Aɗaba ar ka, kamala *tazak ana ti tikewa a gər i təv mege gùvəl a.

IBƏRANIKWA 7:25

Aɗaba taŋa na ŋgat a riŋ nda gà ndzəɗa, a sle a aà məmbàlà à gà mburma ana kinehe ti dere a a təv Mbulum, nda ahər ŋgar a ya. Aɗaba ŋgat a ndze a ka, aà biybiy, dite ŋgat a riŋ a heme a a Mbulum agəra gà mburma ata kəla pat mbaŋa asa.

YAKUBA 4:7

Aɗaba taŋa, gəsum ahəm aà Mbulum. Məsakum à Əbay sitene, dite a vel a à kurum a.

1 PIYER 5:8

Kaslum ba kurum, ka ndzum nda metsehe lele asa. Aɗaba Əbay sitene, mala mene are kurum a riŋ à sìweye a ika magər kurum kamala azil ana à ŋgìrìz a, a yehe a dukw mezime ya.

Yuda 1:24

Gekwa kəkaaha a Mbulum, aɗaba ana ŋgat a sle aà makàslà kurum a, na dite ka, ki dzeywim a ika vatwa ŋgar a asa tsiye. Ŋgat a bere a aà kurum bakal kurum a tserdze tsəɗaŋŋa lele. Dite ki dwim a, ki ta hitswim a aka miɗ ŋgar i təv mezlibe ŋgar ana gà mburma tì zlibe a à ŋgat a ya. Ki ŋgeywim a ba hinne.

Sunwa Yuhana 12:9

Ti yàra iɗəm batsah kə̀rəm ata a bəra ya. Ŋgat ka, miviye mesiwiɗ ana akahər ata a banawa ɗa gà mburma ika gər ahəɗ a. Tə zalar ka, Əbay sitene, kige tsa *Sadan. Kùtsùkw ti yàra iɗəm ŋgat aka gər ahəɗ a, tə dzara à tar a ka, nda gà gawla ŋgar ata ya tserdze.

Sunwa Yuhana 19:20

I təv ana tar ihər ta ge a gùvəl ata ya ka, gà wele ata nda gà sliwdze ŋgar a, ta gasa gà dukw dala ata nda wele ana a gwa aà ba ŋgar ka, waytsà iye mala məma à guma Mbulum, tsaatsa pàrsa ya fit. Aɗaba ŋgat na a geye gà dukw mene aà mburma ika miɗ dukw dala ata ya. Kamala taŋa ya, a banawa gà na lambà dukw dala ata aà ba tar, dite bəla ku mege gà na tə dzawa gurmits a bəɗ a mendzikiɗe ba ŋgar a ya. Gà wele ata nda gà sliwdze ŋgar a, ta gasa gà dukw dala ata nda mala məma à guma ŋgar a ka, tə dza à tar a magər akwa kamala a duluv a, nda are kataya. Ama akwa ata ka, ar ka, kamala dukw ana a wene a wàfùfùffa ya.

Sunwa Yuhana 2:24

Ama kurum gà asiŋ ana i Tiyatira ya, kurum ka, kàa zazamum guma məkəs ata tə tsa. Kurum ka, kà sinikwim à dukw ata ta gwa ahər, makàhà ŋa i huɗ ŋa ka, biy Əbay sitene ya tsa. Aɗaba taŋa, duwa ŋgiɗ a riŋ na aà metsike a kurum, dite ki gwim a ya ka, a riŋ asa tsa, say dukw ata pəra.