EFESIYA 5:2 - Bible Zulgo

² Wayum mburma kəla pat i təv dukw ana tserdze ki gwim a ya, kamala *Kiristi ana a waya kwa, dite ka, a mət agəra kwa asa ya. A vəl mesife ŋgar biy taf kamala dukw ana ta kəɗ a Mbulum, a dar a gər a.

EFESIYA 5:2 ပူးပေါင်းရင်းမြစ်များ

Mata 20:28

Aɗaba iye, *wur ana a dara i təv Mbulum a tekeɗe, i dara ka, aà mazlàkà mburma ya, tsəka, mburma na mà zlak iye ya tsa. Iye i dzeye a à mesife gà ka, aà mumbùruɗà dərra mburma i bakal a.»

Yuhana 13:34

Araha, i tsik a kurum a məpala ahəm awiya ŋa. Dukw ana i tsik a ya ka, wayum ba kurum ilik ilik tserdze. Ki weywim a ba ka, kamala ana i waya kurum a mbaŋa.

Yuhana 6:51

Iye ka, i ne dukw mezime ana a tarra i gər ŋa ya. Na wura aka zəm dukw mezime ata ka, a ndze a birek birek aà biybiy, à mìt a tsa. Dukw mezime ata i vile a a mburma, dite na ta ŋget a dər mesife ya ka, slu ba gà.»

RUMA 15:16

A giŋ ŋgwal ŋa ka, na a zla iye aà meɗè à zləm Yesuw Kiristi ika magər gà na tar gà Yahuda tsiye. Yàa vəl ba gà a ahər a Mbulum fit, aà meɗìfè à bazlam ŋgwal ŋa ana a dara i təv ŋgar a. I tsik a ka, a gà na gà Yahuda tsiye, na dite ta gis a ŋgat a. A sèsiŋ ti ne a kamala dukw taf ana ta vəlar, a tsahən ahər, dite Mezite Mesife ŋgar a palara iɗəm tar a.

RUMA 4:25

Yesuw ka, Mbulum a vəl ŋgat a ahər a mburma, na dite a mət aɗaba bakal kwa ya. I dəba ŋa ya ka, Mbulum a mbəlara à ŋgat i məməta ya, na dite ki nekwe a gà ŋgwal ŋa ika miɗ ŋgar a.

RUMA 8:3

Məpala ahəm Musa ka, a sle aà məvəla kwa mesife tsa, aɗaba ana kwa ka, gà mburma taf masakəŋa, ndzəɗa kwa a riŋ tsiye. Kwa ka, kà mbàkwa aà magəsa ahər ahəm tsa. Ama dukw ana məpala ahəm ata a sle aà mege ŋa tsiye ka, Mbulum nda ahər ŋgar ŋa aka ge. A ge taŋa ka, nda maslə̀rà Kəla ŋgar ana a slərra aka gər ahəɗ a, a ne mburma kamala kwa ya ya. Tàa dzik à ŋgat aà mege bakal kamala kwa mburma ya mbaŋa, ama ka, aka ge tsa. Dite i dəba ŋa ya ka, a mət aɗaba bakal kwa. Kamala taŋa ya na Mbulum a ge seriye bakal ana mburma a gewa ya.

RUMA 8:37

Ama ku mege kataya tekeɗe, ki sewlekwe a aà mesewere are ata kweleŋ fètìte, na nda ndzəɗa Yesuw Kiristi ana a waya dər kwa ya ya.

1 Kurintiya 16:14

Dukw ana ki gwim a tserdze ya ka, gwim nda mawàyà ba ana ki weywim a dər gà asiŋ gà mìsle ŋgiɗ a.

1 Kurintiya 5:7

Aɗaba taŋa, zlum iɗəm bakal ata à sìkèh a kamala giɗe ata a kwasawa à duwa ya ika magər kurum a. Kamala taŋa ya ka, ki ndzwim a tsəɗaŋŋa, kamala ɗaf ana giɗe ata ikəka tsəka, a kwese a tsiye. Taŋa i sər ndzer, Mbulum aka bara gəzləŋ kurum agəra Yesuw Kiristi ana a mət aɗaba kwa ya. Ŋgat a ne ka, kamala kəla təmaŋ ana ta kəɗ a Mbulum biy *megirive Paska ya.

2 Kurintiya 2:14

Gekwa kəkaaha a Mbulum, aɗaba ana a dza mər a ahər a Yesuw Kiristi, dite ŋgat a ne Batsah mər ŋa, a de à mər a aka miɗ kəla pat. Kamala taŋa ya, a sàs a Mbulum ka, a ɗif a dər a mburma tserdze, dite ka, ku weke ma sər dər, Kiristi na a mba aà duwa tserdze ya. A slər mər, aà metsìkè bazlam ata aka gər Kiristi ya, dite ka, aà gà mburma tə sər ŋgat. Bazlam ata mìi tsik a ya ka, ar kamala wirdè ana a ze hwaŋŋà ya. A zehe a ka, aà gà mburma tserdze, ku mege a ŋga.

2 Kurintiya 2:15

Kaɗəŋ, maa ne ka, kamala wirdè ana a ze hwaŋŋà, a tsahən aà Mbulum a, aɗaba ana mər ihər mìi tsik a bazlam Kiristi a mburma ya. Mìi tsik a ka, a gà na Mbulum riŋ ihər a mbele a à ter a ya, nda gà na ti dzeye a ya mbaŋa.

2 Kurintiya 8:9

Kurum kà sərum ŋgwal ana Yesuw Kiristi BATSAH kwa ŋa a ge a kurum a. Ŋgat ka, Əbay ŋa hinne. Ama ku mege kataya tekeɗe, a ne à ba ŋgar mala matawak aɗaba kurum ivaɗ. A ge aba matawak kataya ka, dite na kurum ki nwim a gà Əbay ŋa i gəzləŋ kurum a.

GALATIYA 1:4

Yesuw Kiristi a mət ka, aɗaba kwa, na dite Mbulum a pəl a kwa dər à bakal gər ahəɗ aaha ŋgwala tsiye, dite mà fàr aka kwa ndzəɗa asa tsa. A ge dər kataya ka, kamala ana Mbulum Tsir kwa a waya ya.

GALATIYA 2:20

Iye ka, mesife ana i ndze a dər kinehe ya ka, biy gà asa tsa. Ama ka, Kiristi na a ndze a nda mesife ŋgar i gəzləŋ gà ya. Mendze ana i ndze a ɗa ika gər ahəɗ kinehe ya ka, say nda magàsà Kəla Mbulum ata nda gəzləŋ. Ŋgat na a waya iye, dite a dzeye à mesife ŋgar aɗaba iye ya.

EFESIYA 1:4

Aɗaba taŋa, Mbulum aka mbər mipìlè kwa ana mandza ŋa i təv ilik ŋa nda gà Yesuw Kiristi ya daga piŋŋe, aka ana aka ge gər ahəɗ zukw tsiye. A pala kwa ka, aà mene gà mburma ŋgar, dite bakal ma ge riŋ i təv kwa ana ika miɗ ŋgar a tsa.

EFESIYA 3:17

Iye ihər i hemer a asa ka, dite Yesuw Kiristi ma ndza i gəzləŋ kurum, aɗaba ana kàa gəsum ŋgat nda gəzləŋ a. Iye ihər i hemer a asa mbaŋa ka, dite ka wayum ba ilik ilik tserdze. Na kàa wayum ba ka, ki ŋgetwim a ndzəɗa ɓəŋɓəŋ lele kamala dizl ɗaf ana a ŋge zlile ya, nda gà kamala ga ana madzàha ŋa lele, a mbezle a tsiye.

EFESIYA 3:19

Iye ihər i hemer a ka, dite ka sərum mewèyè ŋgar ana a waya kwa ya, dite mege bəla ki slekwe a à masəra ŋa fit tsa tekeɗe ya. Dite gà dukw ana i təv Mbulum tserdze ya ka, mà rah a gəzləŋ kurum mbaŋa.

EFESIYA 4:15

Sə̀kàhakwa à metsehe kwa, dite ki simekwe a kamala ŋgat ana batsah ŋa ika gər kwa ya ivaɗ. Ka wayakwa ba ika magər kwa ilik ilik tserdze, ka mayakwa ba à dukw ana ndzer a ika magər kwa.

EFESIYA 4:2

Hənum à gər kurum a bəɗ kəla pat. Dzum akaba ahəm lìfèɗìɗe lele, dite gəsum gəzləŋ i təv gà dukw ana ŋgwal ŋa tsa ika magər kurum a. Ama ka, wayum ba kurum ilik ilik tserdze ivaɗ.

EFESIYA 5:15

Kamala taŋa ya, kurum ka, gwim metsehe a mede kurum. Mede kurum ma ta ge kamala biy gà mburma ana tə sər duwa tsiye tsa. Say ma ge ka, kamala biy gà ɓəzla metsehe ana tə sər duwa ya ivaɗ.

EFESIYA 5:25

Kurum gà zal tekeɗe, wayum gà məkəs kurum, kamala Kiristi ana a riŋ a weye a gà mburma Mbulum a, dite ka, a mət agəra tar a.

FILIPIYA 4:18

Yàa ŋgat dukw ana kà slirwimiŋara nda ahər Apafaruditus a, aka ndzera aà iye ya. I samata dukw ata ka, a za i gər a dukw ana a sle aà iye ya. I dəba dukw ata kà slirwimiŋara ya ka, duwa aka sle aà iye ilik asa tsa. I ndze a ka, barbararra lele kuɗa. Gà dukw ata ka, gà ŋgwal ŋa ndzer, kamala dukw taf masakəŋa ana ta vile a a Mbulum, a ze a hwaŋŋà lele ika miɗ ŋgar, a tsahən ahər hinne ya.

KULUSIYA 3:14

Ndeyndey ŋa ka, wayum ba ika magər kurum ilik ilik tserdze. Aɗaba na kàa wayum ba kataya ka, ki ndzwim a i təv ilik ŋa ndìɓèkke lele nda gəzləŋ ilik ŋa.

1 TESALUNIKE 4:9

Gà damər mər, a ge a ŋgulum tsa na i wetse a kurumaha aka gər mawàyà ba kurum ana, ki weywim a gà asiŋ gà damər kurum a. Aɗaba Mbulum nda gər ŋgar na a ɗif a kurum à mawàyà ba ata ya.

1 TIMUTE 2:6

A dara ka, a vəl mesife ŋgar aà məmbùrùɗà dərra mburma i bakal tar a tserdze. A ɗif dər a mburma, a sàs a Mbulum ka, mburma ta mbala fit dze. Mbulum nda gər ŋgar mbaŋa na a vəl pat ŋa, na dite a geba kataya ya.

1 TIMUTE 4:12

Aɗaba na kər gawla, gà ɓəza mba ya ka, wura ma ta fə̀r aà kər ka, kamala kəla ndirkiz a ndeyndey ɓav tsa. Ama say ki ɗif a à vatwa a gà ɓəzla mazazama Yesuw Kiristi ivaɗ. Tə dəɗ aka bazlam yak ana ki tsik a ya, mege nda gà dukw ana ki ge a ŋgwal ŋa ika miɗ tar tekeɗe ya, bəla nda təv mawàyà mburma ya, kige tsa nda təv guma ana kə̀ gəs nda gəzləŋ yak ika miɗ Mbulum a, ku mege nda təv gəzləŋ yak ana lele, aruwaŋ iɗəm tsiye tserdze mbaŋa. Na kàa ge kataya ka, mede yak a ɗe a ter a à vatwa, dite na ti zezem a vatwa ata ŋgwal ŋa ya.

TITUS 2:14

Ŋgat a dzeye à mesife ŋgar aɗaba kwa. Kamala taŋa ya na a pəl a kwa dər à bakal kwa tserdze ya. A bara aà kwa bakal kwa ya, na dite kà nekwa gà mburma ŋgar ana gà biy ŋgar, ta vile a ba aà mege gà megemir ana ŋgwal ŋa lele ya.

IBƏRANIKWA 8:3

Mbulum a dza aɗəm gà bàba gà ɓəzla mandəva kuɗa ŋgar tserdze ka, dite ta vəlawar dukw masakəŋana, ta batsawar gà duwa asa mbaŋa. Kamala taŋa ya, batsah mala mandəva kuɗa a Mbulum kwa ata tekeɗe, say a zle a duwa, a vile a a Mbulum mbaŋa.

IBƏRANIKWA 9:14

Ama na məmbəz gà dukw ata aka sle aà məbàrà tar kamala taŋa ya ka, məmbəz Kiristi à zè a taŋa fit kweleŋ nda ndzəɗa. Ŋgat ana aka ge bakal duwa ilik tsidze ya, a vəl ba ŋgar a Mbulum nda ndzəɗa Mezite Mesife Mbulum ana a ndze a aà biybiy a. Məmbəz ŋgar ata ka, a bere a bakal i gəzləŋ kwa ya lele, na dite ki gekwe a dukw ana a dzeye a à kwa asa tsiye. Ama ki gekwe a ka, megemir Mbulum ana ŋgat mala məvəla mesife a mburma ya ivaɗ.

IBƏRANIKWA 9:23

Kà sərakwa, gà dukw ata tə zàmbaɗawa dər à Mbulum akahər ata ya, a ne ka, mendzikiɗe ba dukw ana ndzer ŋa i mbulum a ɗekɗek pəra. Ta barawa gà dukw ata tserdze ya ka, nda məmbəz gà dukw ata ta batsawa a Mbulum a. Ama gà dukw ana ndzer ŋa i mbulum a ka, məbatsa gà dukw ata ta batsawa ya, a ge a ŋgulum tsa. Say ta viler a ka, dukw ana à zè a taŋa ya, kamala megweɗe ya: Yesuw Kiristi ana a vəlar ba ŋgar a.

IBƏRANIKWA 9:26

Na mege kataya tsəka, ana ka, a ŋgetewe a mesewere are hinne daga aà gər ana Mbulum a ge gər ahəɗ a. Ama ka, kataya tsa, aɗaba a dara kinehe ka, sik ilik pəra, aka mandəvandəv gər ahəɗ aaha kinehe ya. A vəl ba ŋgar ka, na dite sifek à pìl a dər à bakal gà mburma ana ta gewa ya, aà biybiy.

1 PIYER 4:8

Kə̀la ka, duwa a riŋ ilik na a za gà dukw tserdze ya: Wayum ba kurum nda gəzləŋ ilik kəla pat aka miɗ aka miɗ. Aɗaba na kàa wayum mburma lele ka, matsəɓatsəɓ dukw bakal a ge a ika magər kurum asa tsa, à kèhe a ba fit kweleŋ.*fa*

1 Yuhana 3:16

Aɗaba Yesuw Kiristi ka, a waya kwa. A dara, a dzeye à mesife ŋgar aɗaba kwa. Taŋa na a ɗif a kwa dər ka, meme na ki ta weyekwe a gà damər kwa ana ika vatwa Mbulum a ya. Kwa tekeɗe ka, say vəlakwa mesife kwa aɗaba gà damər kwa mbaŋa.

1 Yuhana 3:23

Məpala ahəm ŋgar ana a tsik a kwa ya ka, araha. A gwa ka: Gə̀sakwa Yesuw Kiristi ana Kəla ŋgar a nda gəzləŋ kwa, dite ka wayakwa ba ika magər kwa ilik ilik tserdze kamala na Kiristi a tsik a kwa ya mbaŋa asa.

Sunwa Yuhana 1:5

Dite Yesuw Kiristi ana ŋgat mala sida nda ndzer ŋa ya tekeɗe ibam, mi pise a kurum ahəm, mə vəl a kurum matasla yam ata a gəzləŋ mbaŋa asa. Ŋgat ka, wele ana a lah məmbə̀lara i məməta ya. Ŋgat ka, Əbay ana ika gər gà Əbay gər ahəɗ tserdze ya. Ŋgat ka, a waya kwa, a dzeye à mesife ŋgar aɗaba kwa. Agəra ana a dza à məmbəz ŋgar ata ya ka, a beye dər à kwa i ahər bakal kwa ya.

Sunwa Yuhana 5:9

Tə lah dimis awiya ŋana. I huɗ malàhà dimis tar ata tì lèh a ya ka, ta gwa: «Kər na ŋgwal ŋa ika miɗ Mbulum, ka sle aà mazla wakita ata, dite ki ŋgeheke a ihər dukw ata magàsà ŋa ya. Aɗaba kər ka, tàa kəɗ kər kamala dukw ana ta kəɗ a Mbulum taf masakəŋa ya. Məmbəz yak ana kà dza dər a ka, kà mbùrùɗar dərra mburma a Mbulum a. Ku mege tə dara ika gà ahəɗ ana pampam ika gər ahəɗ tserdze ya, gà na slala tar pam, nda gà təv gà mendze tar pampam, kige tsa gà ahəm tar tekeɗe, pampam a. Kàa ndzəkara tar a, kàa dzàɗa a Mbulum.