2 Piyer 1:3 - Bible Zulgo

³ Kà sərakwa Mbulum ana a zal a kwa ya ka, aɗaba Yesuw Kiristi. A zal a kwa ka, na dite kə̀ ŋgatakwa magàwà akaba a təv mezlibe ŋgar ana tì zlibe a à ŋgat, ki zezemekwe a mendze ŋgar ana ŋgwal ŋa, a za gà dukw tserdze ya mbaŋa. Kamala taŋa ya, ŋgat nda ndzəɗa ŋgar ana hinne ya, a vəl a kwa dukw ana a sle aà kwe a tserdze ya, na dite araha, kə̀ ŋgatakwa mesife ana awiya ŋa ya, ki zezemekwe a ŋgat lele kamala ana a tsahən ahər mbaŋa ya.

2 Piyer 1:3 ပူးပေါင်းရင်းမြစ်များ

Mata 28:18

Dite Yesuw a sìrìkaha a təv tar kuɗa. A daha, a gwaɗa a tar: «Mbulum aka viliŋ mekwere ŋgar ana i gər ŋa ya, ndəna ɗa ika gər ahəɗ a tserdze ka, a ahər gà.

RUMA 8:32

Mbulum ŋgat ka, ku mege Kəla ŋgar aka niw dər tsa, ama a miyak à ŋgat, dite mə̀ mət aɗaba kwa tserdze. Na Mbulum aka vəl a kwa Kəla ŋgar seyiŋ ana, kà dzalum ana, a ta vilekwe a gà dukw ŋgiɗ tserdze mbaŋa tsiye?

RUMA 9:24

Kwa kinehe tekeɗe ka, i liwiŋ tar mbaŋa. A pala ka, gà mburma ana ika magər gà Yahuda ya ɗekɗek tsa. A zal a kwa dər ka, i liwiŋ gà asiŋ gà mburma ŋgiɗ a mbaŋa.

1 Kurintiya 1:9

Mbulum nda ahər ŋgar ŋa, na a zal a kurum, dite na ki ndzwim a i təv ilik ŋa nda gà Yesuw Kiristi Kəla ŋgar hiywe ya. Ŋgat na a ne BATSAH kwa ŋa ya. Ama Mbulum ka, dukw ana aka mbər metsike ya ka, a ge a ndzer kaɗəŋ, pàrsa iɗəm tsa.

2 Kurintiya 12:9

Ama ka, a gweɗiŋ aakara: «Ŋgwal gà ana i gik a ana, a slek a tsiye na ki bis a dər a. Aɗaba akahər ana kər mbile ŋa ya ka, ndzəɗa gà a ge a megemir i təv yak hinne.» I tsaraka taŋa ka, i gəs gəzləŋ nda maŋgayaba lele kuɗa, i ge a zlapa ka, aɗaba ana iye mbile ŋa ika miɗ Mbulum a, dite gà mburma tə sər dər ka, ndzəɗa *Kiristi na a ndze a i təv ga ya.

EFESIYA 4:1

Kərga taŋa ya, iye ka, iye i daŋgay, aɗaba ana iye mala meslire Yesuw Kiristi BATSAH kwa ŋa ya. Iye ihər i ge kurum a kamkam: Ama mede kurum ma ge ka, kamala biy ana Mbulum a waya, a zal a kurum dər a.

EFESIYA 4:4

Aɗaba gà mburma ti ne ka, ba Yesuw Kiristi ilik pəra. Mezite Mesife Mbulum tekeɗe, ilik, nda dukw ana Mbulum a zal a kurum dər, a vile a kurum a ya ka, ilik mbaŋa, tsəka, sula tsa.

FILIPIYA 3:8

Ama kəla ka, ndzer kaɗəŋ, gà dukw ata ɗekɗek tsa, i fə̀r aà gà dukw ana tserdze ya ka, kamala dukw taf masakəŋa ya, aɗaba ana i sər Yesuw Kiristi Batsah ga ŋa ka, taŋa a zè a gà dukw ŋgiɗ tserdze. Aɗaba ŋgat ka, i miyek a à gà duwa tserdze. I fə̀r ahər ka, safar safar kamala gwastak ana masakəŋa ya, na dite i ta ŋget a Kiristi ya.

FILIPIYA 4:8

Gà damər gà, araha na dukw ana a zeha aà metsike a kurum a: Dzalum aka dukw ana ŋgwal ŋa, mburma tə zləbawa dər a, nda gà aka dukw ana ndzer, ki dzèkwer a gurmits a bəɗ a asa, dite aka dukw ana pàrsa iɗəm tsa, tsəɗaŋŋa lele, gà dukw ana a tsahən aà mburma, tə zàmbaɗawa dər a asa mbaŋa. Gwim metsehe a mege gà dukw ata.

KULUSIYA 1:16

Aɗaba Mbulum a ge dukw tserdze ka, nda ahər ŋgar: Gà dukw ana i gər ŋa ya, nda gà dukw ana ika gər ahəɗ a mbaŋa. A ge ka, gà dukw ana a ŋgeter a ba nda are ya ɗekɗek tsa. Ama a ge ka, gà dukw ana a ŋgatar ba tsiye mbaŋa. Kamala megweɗe ya ka, gà dukw ana gà ndzəɗa tar riŋ hinne i gər ŋa ya, gà gawla Mbulum, nda gà Əbay tar ŋana tserdze. Gà dukw ata Mbulum a geye tar tserdze ya ka, nda ahər Kiristi, Kəla ŋgar, dite a dza tar a ahər ka, a Kəla ŋgar ata mbaŋa asa.

1 TESALUNIKE 2:12

Mì màwa a kurumaha à arəv, mì vəlawa a kurum ndzəɗa, dite mì hamawa a kurum ka, hinne asa mbaŋa, na dite mede kurum ana ki dwim a ya, mà tsahən aà Mbulum a. Ŋgat a zal a kurum ka, na dite ki dwim a a mekwere ŋgar, ki ti ndzwim a nda gà ŋgat i təv mezlibe ŋgar ana tì zlibe a dər a ya.

1 TESALUNIKE 4:7

Aɗaba Mbulum a zal a kwa ka, aà mege mezelme tsa. A zal a kwa ka, na dite ki nekwe a gà tsəɗaŋŋa ika miɗ ŋgar a ivaɗ.

2 TESALUNIKE 2:14

Mbulum a zal a kurum ka, i təv ana mì ɗif a kurum à bazlam ŋgwal ŋa ana aka gər Yesuw Kiristi ya ya. A sasar ka, ki ŋgeywim a ba agəra ndzəɗa Yesuw Kiristi BATSAH kwa ŋana ika gər gà duwa tserdze ya mbaŋa.

1 TIMUTE 4:8

Na wura a ge a màhaw ika dàɓa, à tètìɗ a à mile ŋgar ka, taŋa ka, a ge a ŋgulum a slu ba ŋgar zaakwa. Ama wur ana à tètìɗ a à magəsa ahəm aà Mbulum ika vatwa Mbulum kəla pat a ka, taŋa ka, a ger a ŋgulum hinne dze. Aɗaba a ge a ŋgulum ka, a mesife ŋgar ana kinehe ika gər ahəɗ a, dite a ta ge a ŋgulum a mesife ana ika miɗ à ndìv a tsa aà biybiy a asa mbaŋa.

2 TIMUTE 1:9

Ŋgat ka, aka mbala à kwa. A zal a kwa ka, a ne à kwa gà mburma ŋgar. A ge dər kataya ka, agəra ana ki gewakwar ŋgwal ŋa ya tsa. A ge taŋa ka, aɗaba ana a waya mege kataya ya pəra. Ŋgwal ŋgar ata a ge a kwa nda ahər Yesuw Kiristi ya ka, daga piŋŋe, akahər ana gər ahəɗ a riŋ zukw tsiye.

IBƏRANIKWA 1:3

Ŋgat a riŋ à pèt a à mezlibe Mbulum ana tì zlibe a dər a, nda təv dzaydzay ŋana i təv ŋgar a. Aɗaba ŋgat na a zla ba kalkal kamala Mbulum a, dite ŋgat na a riŋ à gis a gà dukw ana tserdze ya, nda bazlam ŋgar ana ndzəɗa ŋa ya. A làmbaɗa vatwa ana Mbulum à pìl a dər à bakal a mburma ya, na dite ti ne a gà tsəɗaŋŋa lele ika miɗ ŋgar a. I dəba ŋa ya ka, a da a mbulum kuɗa. A daha, a ndza aka tsèke ahər mezime Mbulum, mala ndzəɗa batsah ŋana a kwere a gà dukw tserdze ya.

1 PIYER 1:15

Kamala ana ŋgat tsəɗaŋŋa, a zal a kurum, dite kà nwim gà mburma ŋgar a ka, kurum tekeɗe, nwim gà tsəɗaŋŋa i təv gà dukw ana ki gwim a ya tserdze mbaŋa.

1 PIYER 1:5

Mbulum a riŋ a kesle a kurum dzèŋŋe lele, aɗaba na kàa gəsum ŋgat nda gəzləŋ ilik a. Dite ku weke a sir a dər, i təv ana gər ahəɗ à ndìv a ya ka, Mbulum a ta mbele a à kurum ndzer a.

1 PIYER 2:21

Aɗaba aà medzibe megemir ata na Mbulum a zal a kurum a, na mege kàa gwim dukw ana ŋgwal ŋa ya ya. Aɗaba Yesuw Kiristi nda gər ŋgar tekeɗe ka, aka sèwèr are hinne, agəra kurum mbaŋa. Taŋa ka, a ɗif a kurum a à vatwa mesewere are, dite ka, ki gwim kamala ana ŋgat a ge ya.

1 PIYER 2:9

Ama kurum ka, gà gwala Mbulum ana a pala kurum a. Dite kurum gà ɓəzla mandəva kuɗa ŋgar ana ki gwim a meslire a batsah Əbay a. Kurum ka, gà tsəɗaŋŋa, kurum gà mburma ŋgar ana a ndzəkara kurum i luvuŋ a, a da à kurum a təv dzaydzay ŋgar ana a də̀v hinne kamala dukw mene aà mburma ya.*fd* Dite a pala kurum ka, aà ka nwim gà mburma ana ki tsikwim a dukw ana a ge ŋgwal ŋa, a za gà dukw tserdze ya, a mburma.

1 PIYER 3:9

Na wura aka ge a kurum dukw ana ŋgwala tsiye ka, ka ta mumar aɗəm à bakal ŋa tsa. Kige tsa bəla wura aka tsik aà kurum dukw ana ŋgwala tsiye ka, ka tə ndavayumar aɗəm ɓav tsa asa mbaŋa. Ŋgulum ki gweɗwimer a ka: Mbulum mi pisak ahəm ivaɗ. Aɗaba akahər ana Mbulum a zal a kurum a ka, aka mbər metsike i sida ya, a gwa: «I ta pise a kurum a ahəm.»

1 PIYER 5:10

Ama i dəba mesewere are kurum ana ki sèwèrwim a kinehe ya ka, Mbulum ana ŋgat mala mege ŋgwal a mburma tserdze ya, à lèmbeɗe a kurum à gər ŋgar, a vile a kurum a ndzəɗa ana dite, ki hitswim a dər lele, ki ta mirwim a aba a nda təv gà dukw ana tserdze ya ya. Aɗaba a zal a kurum ka, dite ka dumara, ka ndzum nda gà Yesuw Kiristi i təv mezlibe ŋgar ana tì zlibe a à ŋgat aà biybiy, à ndìv a tsiye.

2 Piyer 1:10

Aɗaba taŋa, gà damər gà, mərum aba, ka miyakum à mege gà dukw ata tsidze, aɗaba mezele ana Mbulum a zal a kurum, a pala kurum a ka, ki gwim kataya. Na kàa gwim gà dukw ata ka, ki dzeywim a ika vatwa Mbulum a tsidze.

2 Piyer 1:2

I heme a a Mbulum, dite mà səkah a kurum à masəra ba kurum nda gà Yesuw Kiristi BATSAH kwa ŋa aka miɗ aka miɗ. Kamala taŋa ya, a pise a kurum a ahəm, à sìkèh a kurum a dər, a vile a kurum a matasla yam a gəzləŋ kurum mbaŋa.

2 Piyer 1:5

Aɗaba taŋa, iye ihər i gweɗe a kurum a ka: Yahum vatwa nda ndzəɗa kurum fit, dite magəsa Yesuw Kiristi ana kə̀ gəsum a ka, mà səkah a gəzləŋ kurum, mə̀ pàt à mede kurum ana ŋgwal ŋa ya mbaŋa. Na kàa zazamum aka miɗ aka miɗ kataya ka, yahum vatwa aà mene gà ɓəzla metsehe mbaŋa asa.

2 Piyer 1:6

Ama ka, metsehe ɗekɗek tsa. Gəsum gəzləŋ i təv duwa ya tserdze mbaŋa. I təv ana kurum ihər ki kwerwim a ba kurum kamala taŋa ya ka, mərum aba. I təv məmərà aba kurum ata ya tekeɗe ka, gəsum ahəm aà Mbulum lele.

2 Piyer 1:8

Na kàa gwim gà dukw ata aka miɗ aka miɗ kataya ka, mesire kurum ana ki sirwim a Yesuw Kiristi BATSAH kwa ŋa ya ka, à sìkèh a a gəzləŋ kurum, dite mendze kurum ana ki ndzwim a ya ka, à pèt a à dukw ana ŋgwal ŋa ya mbaŋa.

2 Piyer 2:20

Na wura a sər Yesuw Kiristi BATSAH kwa ŋana a mbil a à kwa ya ka, aka be aà gà dukw ana ŋgwal ŋa tsa ika gər ahəɗ, à nis a à mburma ya. Ama zàkwayiya ka, à mbìɗ a gər aka mege dukw ata ŋgwal ŋa tsiye, dite gà dukw ata ta kwere a ŋgat asa ana, meme? Kamala taŋa ya, mandəvandəv mendze ŋgar ana i dəba taŋa ya ka, ŋgwal ŋa tsa ndeyndey, à zè a dukw ana ŋgwal ŋa tsa, a ge akahər ana a sər Yesuw Kiristi zukw tsiye ivaɗ.

2 Piyer 3:18

Ama kurum ivaɗ ka, dum aka miɗ nda mazazama Yesuw Kiristi BATSAH kwa ŋana ŋgat mala məmbə̀là à kwa ya, na dite a ge a kurum a ŋgwal ŋa nda mesire kurum ana ki sirwim a ŋgat a ka, à sìkèh a aka miɗ aka miɗ bə̀ba ŋa. Mezlibe ŋgar ana gà mburma tì zlibe a à ŋgat a ka, tə̀ zlə̀b dər daga aà kinehe ya, haa aà biybiy. *Amin.