1 PIYER 1:3 - Bible Zulgo

³ Zàmbaɗakwa à Mbulum tsir Yesuw Kiristi BATSAH kwa ŋa. Ka ndzekwar are tsehe hinne, na dite a vəl a kwa mesife awiya ŋa ya. Kə ŋgatakwa ka, aɗaba Yesuw Kiristi ana a mbəlara i məməta ya ya. Agəra taŋa na kà sərakwa i gəzləŋ kwa ka, ki ta mbilekwere a i məməta ya mbaŋa ya.

1 PIYER 1:3 ပူးပေါင်းရင်းမြစ်များ

Yuhana 1:13

Ti ne gà ɓəza Mbulum ka, a wa tar kamala ana mburma ti dzele a, ta we a ba ya tsa. Ti ne gà ɓəza Mbulum ka, agəra ana a vəl a tar mesife awiya ŋa ya.

RUMA 12:12

Ŋgayawum ba aɗaba madzala gà gər aka dukw ana Mbulum a gwa, i ta vile a kurum a i sida ya ya. I təv ana ki sèwèrwim a are ya ka, mərum aba sah lele, bàsumaraha. Hamum a Mbulum kəla pat, kà yum ba tsa.

RUMA 15:13

Kinehe ka, iye riŋ i heme a a Mbulum, mala metsìkè dukw ana a tsik a ka, dite gà mburma ti dzele a ya, mə vəl a kurum maŋgayaba, mà rah a gəzləŋ kurum tsìsl lele, nda matasla yam zayya, agəra megìse kurum ana kàa gəsum ŋgat nda gəzləŋ a. Kamala taŋa ya, madzala gà gər kurum tekeɗe, fit a de a a təv Mbulum, nda ndzəɗa Mezite Mesife ŋgar.

RUMA 4:25

Yesuw ka, Mbulum a vəl ŋgat a ahər a mburma, na dite a mət aɗaba bakal kwa ya. I dəba ŋa ya ka, Mbulum a mbəlara à ŋgat i məməta ya, na dite ki nekwe a gà ŋgwal ŋa ika miɗ ŋgar a.

RUMA 5:10

Akahər ana kwa gà ɓəzla mene are Mbulum mba ya ka, ŋgat nda gər ŋgar ŋa a yaha masəra ba nda gà kwa ka, nda məməta Kəla ŋgar ana a mət a. Aɗaba taŋa, kwa kinehe ka, gà masla Mbulum. Kà sərakwa, a ta mbil a à kwa ndzer kaɗəŋ ka, aɗaba Kəla ŋgar ata a mbəlara i məməta ya ya.

RUMA 8:11

Ama na Mezite Mesife Mbulum ana a mbəlara à Yesuw Kiristi i məməta ya, dite Mezite Mesife ata a riŋ mandza ŋa i gəzləŋ kurum ka, taŋa ka, Mbulum a ta mbilere a à ba kurum i məməta ya nda ndzer mbaŋa, pàrsa iɗəm tsa. A ta ge a taŋa ka, nda ndzəɗa Mezite Mesife ŋgar ata mandza ŋa i gəzləŋ kurum a.

RUMA 8:24

Mbulum aka mbəl à kwa, ama kàa ŋgatakwa gà dukw ata tserdze ya zukw tsa. Kwa ihər ki dzelekwe a ka, aà maŋgatar mba hiywe. Ama na mege kàa ŋgatakwa gà dukw ana zləmana ki ta ŋgetekewe a mba ya, nda are kwa ka, taŋa ka, dukw ata ki dzelekwe a aaka gà gər ndzer asa tsa. Kàa mbər meŋgetekewa na taŋa ya. Dite weke na a dzele a gà gər aka dukw ana aka mbər meŋgete ya ya? Wura a riŋ tsa.

1 Kurintiya 13:13

Aɗaba taŋa, kinehe ka, gà duwa a riŋ makər na tì ndìv a tsiye. Kamala megweɗe ya: magəsa Mbulum ana kə̀ gə̀sakwa nda gəzləŋ kwa ya, nda metìkè madzala gà gər kwa ana ki tikikwe a nda təv ŋgar a, na dite dukw tserdze a de a lele ya, nda mawàyà mburma. Ama kəla ka, mawàyà mburma na a za gà dukw ata tserdze ya.

1 Kurintiya 15:20

Ama ka, kataya tsa. Kiristi aka mbəlara i məməta ya ndzer kaɗəŋ. Ŋgat na a lah mimbilera i məməta ya ya. Aɗaba taŋa, gà asiŋ gà mburma ana tserdze ta mata ya tekeɗe, ti ta mbilere a i məməta ya mbaŋa.

2 Kurintiya 1:3

Gekwa kəkaaha a Mbulum ana ŋgat Tsir Yesuw Kiristi BATSAH kwa ŋa ya. Ŋgat ka, a ge a ŋgwal a mburma, kamala tsir gà ɓəza ana a ge a dukw ŋgwal ŋa, a ge a gər a gà ɓəza ŋgar a. A mèkwehe a à arəv də̀ɗə̀ffa, a vile a kwe a ndzəɗa kəla pat.

GALATIYA 6:16

Gà mburma ana ti zezem a vatwa awiya ŋa ata ya ka, tar na ti ne gà mburma Mbulum gà Isərayel gà ndzer ŋana ya. Ti ndzer are tsehe, mə vəl a tar matasla yam a gəzləŋ zayya lele.

EFESIYA 1:17

I heme a ka, a Mbulum Tsir kwa Batsah ŋa ana tì zlibe a à ŋgat hinne, Yesuw Kiristi BATSAH kwa ŋa a ger a megemir a. I hemer a ka, dite ma ɗif a kurum à metsehe ŋgar. I dəba ŋa ya, mə̀ pàt a kurum aba, dite kà səkahum à masəra ŋgat lele.

EFESIYA 1:3

Zàmbaɗakwa à Mbulum Tsir Yesuw Kiristi BATSAH kwa ŋa, aɗaba aka pisakwara ahəm a nda gà ŋgwal gà dukw ana tserdze ti ndze a aà biybiy i gər ŋa ya. A vəl a kwa gà dukw ata ka, a kwa ana mandza ŋa i təv ilik ŋa nda gà Yesuw Kiristi ya.

EFESIYA 1:7

A mburuɗara kwa i ahər Əbay sitene ya. Nda məməta Kəla ŋgar ata, a pəl a kwa dər à bakal, dite na kə ŋgatakwa mezìwè gà gər kwa kuɗa ya. Kərga taŋa ya, aka ɗif a kwa dər ka, meme na ŋgat a riŋ ihər a ge a kwe a ŋgwal ŋa hinne ya.

EFESIYA 2:4

Ama kinehe ka, kataya asa tsa. Mbulum ka, ka ndzekwar are tsehe hinne. Aɗaba ŋgat ka, a waya kwa ivaɗ,

EFESIYA 3:20

Zlə̀bakwa à Mbulum, aɗaba ana a sle à mege duwa tserdze ya. Ama dukw ata ka, à zè a biy ana ki wizekwe a ya, ndəna kà dzalakwa i gà gər kwa ya mbaŋa. A ge a gà dukw ata ka, nda ndzəɗa ŋgar ana a riŋ a ge a dər megemir i gəzləŋ kwa ya.

KULUSIYA 1:23

Ama kə̀la ka, say na ki zezemwim a aka miɗ aka miɗ nda magəsa Mbulum nda gəzləŋ kurum kəla pat a. Ndzum ka, ɓəŋɓəŋ lele, madzala gà gər kurum ma ta ge wàkit wàkit tsa. Tikwim madzala gà gər kurum ka, aka dukw ana ka tsarakum i huɗ bazlam ŋgwal ŋana ya kəla pat. Bazlam ŋgwal ŋa ata ka, ti tsikeye a gà mburma ana ika gər ahəɗ a tserdze. Aɗaba Mbulum a slər iye, Pul, na dite i ɗif a dər a mburma mbaŋa ya.

KULUSIYA 1:27

A waya meɗìfè a tar dər ka, à dukw ana ŋgwal ŋa ndzer, a za dukw tserdze ya, dite ka, à zlèk a gà mburma tserdze, ku mege i ŋga tekeɗe ya. Na a ne dukw ata makàhà ŋa piŋŋe, dite araha, a pàt aba kinehe ya ka, Yesuw Kiristi na a riŋ mandza ŋa i gəzləŋ kurum a. Aɗaba taŋa, kàa tikwim madzala gà gər kurum a təv mezlibe ŋgar ana ti zlibe a à ŋgat a, ka sərum ka, ki ndzwim a a fata ndzer.

1 TESALUNIKE 1:3

Kəla pat a màwa a mərra a gər a, meme na kurum ihər ki gwim a megemir ŋgwal ŋa lele, aɗaba megìse kurum ana kə̀ gəsum Yesuw Kiristi nda gəzləŋ a ya. Dite asa ka, kurum ihər ki mirwim a aba sah hinne, aɗaba ana kà wayum ŋgat a, dite ki ndzwim a ɓəŋɓəŋ lele, nda metìkè madzala gà gər kurum a təv ŋgar a.

1 TESALUNIKE 4:13

Gà damər mər, a sàs a mər ka, sərum duwa aka gər gà məməta. Aɗaba arəv ma ta da aà kurum a kamala gà na ta veve a Yesuw tsiye tsa.

2 TESALUNIKE 2:16

Aɗaba Mbulum Tsir kwa a waya kwa. A ge a kwa ŋgwal ŋa. A vəl a kwa madzala gà gər aka ŋgwal dukw ana ka sərakwa, ki ta ŋgetekewe a aka miɗ mba ndzer a. Kamala taŋa ya, a riŋ à me a kwe a dərraha à arəv hiywe. Mìi hemer a ka, a tar nda Yesuw Kiristi BATSAH kwa ŋa,

1 TIMUTE 1:14

Taŋa ŋgat BATSAH kwa ŋa aka pisiŋ ahəm hinne. Dite na kinehe a viliŋ ndzəɗa aà magəsa ŋgat nda gəzləŋ gà ilik, nda mawàyà ba ana a riŋ ika magər kwa mburma nda gà ŋgat a.

TITUS 2:13

Ndzakwa ka, nda mandza zləm, vavakwa pat ŋgwal ŋa ata Yesuw Kiristi, mala məmbə̀là à kwa à mère a ya. A mère a ka, nda mezlibe ŋgar ana tì zlibe a à ŋgat a. Ŋgat ka, Mbulum kwa batsah ŋa ana a za gà dukw tserdze ya.

IBƏRANIKWA 3:6

Ama *Kiristi ka, kəla mala ga, kamala megweɗe ya ka, Kəla Mbulum. Dukw ana i ma ŋgar tserdze ya ka, i ahər ŋgar. A gewer megemir ndaka vatwa ŋa lele. Kwa tekeɗe, gà mburma ana i ma ŋgar a mbaŋa. Ama kə̀la ka, na ki tèkwe a dər aka miɗ aka miɗ tsikw a təv mendìsle, nda magəsa gəzləŋ, nda maŋgayaba nda təv dukw ana kà tikekwa aaka madzala gà gər a dzekwiŋ.

YAKUBA 1:18

Ŋgat na a waya, a vəl a kwa mesife awiya ŋa na i təv guma ŋgar ndzer ŋana a tsik a. A sasar na ka nekwa gà malahalah ŋana i liwiŋ gà dukw ana a ge tserdze ya.

1 PIYER 1:13

Aɗaba taŋa, hadzalum madzala gà gər kurum aà megemir Mbulum. Kaslum ba kurum lele, dite ka tikwim madzala gà gər kurum tserdze aka ŋgwal dukw ata Yesuw Kiristi a ta vile a kurum a, a pat ana à mère a ya.

1 PIYER 1:21

Kə̀ gəsum Mbulum nda gəzləŋ kurum ka, aɗaba ŋgat, ŋgat ana Mbulum a mbəl dərra i məməta ya, dite a vəlar mezlibe ana gà mburma tì zlibe a à ŋgat hinne ya. Aɗaba taŋa ki slwim a aà məvəla gəzləŋ kurum a Mbulum ilik, na dite ki sirwim a dər ka, a ta mbil a kurum mbaŋa ya.

1 PIYER 1:23

Aɗaba kà sərum, Mbulum a vəl a kurum mesife awiya ŋa, nda ndzəɗa bazlam ŋgar ana a vile a mesife a mburma, diydiy à ndìv a tsiye. Kurum ka, kàa nwim gà ɓəza Mbulum ana ŋgat à mìt a tsidze ya. Ŋgat ka, kamala kwa ana ki metekwa a ya tsa.

1 PIYER 2:2

Nwim ka, kamala gà ɓəza ndirkiz ana ta wa tar kinkin, ta waya masà awah kəla pat a. Kurum tekeɗe ka, wayum bazlam Mbulum ndzer ŋana kəla pat kataya mbaŋa, dite ka, ki gilwim a dər ba, Mbulum a ta mbil a à kurum fit.

1 PIYER 3:15

Ama zàmbaɗum à Yesuw Kiristi i gəzləŋ kurum. Ŋgat ma ne Batsah kurum ŋa.*fb* Hadzalum ba kurum kəla pat, na dite ki slwim aà mifefile a ter aaka a, a gà na ta wiz aà kurum a gà bazlam pampam tserdze, ta gweɗe a kurum a: «Aàmala na kà tikwim madzala gà gər ka, a təv Yesuw Kiristi ya?»

1 PIYER 3:21

Yam ata a ɗif ka, à mendzikiɗe ba metsìlwìɓè à mburma ana ti tsilwiɓ dər a yam a. Metsìlwìɓè à mburma ata na a mbele a à kurum a i bakal a ya. Ti tsilwiɓ aɗəm à kurum ka, kamala ana ki berwim a dər aba aruwaŋ a tsa. Ama ki wizekwe a aà Mbulum ka, mə bara dərra à kwa bakal i gəzləŋ kwa ya te. Metsìlwìɓè à kwa ata ti tsilwiɓ à kwa a yam, a mbil à kwa a ka, aɗaba ana Yesuw Kiristi a mbəlara i məməta ya ya.

1 PIYER 3:5

Kamala taŋa ya, gà məkəs gà mburma Mbulum ana akahər ata ya, tar tə làmbaɗa ba tar ka, nda madzala gà gər tar ana i təv Mbulum a. Tar ka, ta hənawa à gər a bəɗ a gà zal tar.

1 Yuhana 2:29

Kurum kà sərum, Yesuw Kiristi ka, ŋgat mala ndzer ŋa. Aka ge bakal ilik tsidze. Aɗaba taŋa sərum dər, wur ana a ge a dukw ana ŋgwal ŋa ya ka, ŋgat ka, aka ne kəla Mbulum mbaŋa.

1 Yuhana 3:3

Ku weke na aka tike madzala gà gər ŋgar a təv Yesuw Kiristi ana a ge a duwa kamala taŋa ya ka, a kesle a ba ŋgar i təv gà bakal a tserdze, kamala Kiristi ana aka ge bakal tsiye mbaŋa.

1 Yuhana 3:9

Na wura aka ne kəla Mbulum ka, a gewe a bakal asa tsa. Aɗaba mesife ana Mbulum a vəlar a ka, a riŋ mandza ŋa i gəzləŋ ŋgar. A sle aà megewe a bakal asa tsəka, aɗaba ana Mbulum aka ne Tsir ŋgar a.

1 Yuhana 4:7

A kurum gà masla gà, wayakwa ba ika magər kwa ilik ilik tserdze, aɗaba mawàyà ba kwa ana ki weyekwe a ba ya ka, a dara ka, i təv Mbulum a. Wur ana a wayawa mburma ya ka, ŋgat aka ne ka, kəla Mbulum. Ŋgat ka, a sər Mbulum mbaŋa.

1 Yuhana 5:1

Ku weke na aka gəs Yesuw Kiristi, a sər, ŋgat mala məmbə̀là à mburma ana Mbulum a gwa, i slir a kurumehe a ya ka, ŋgat aka ne ka, kəla Mbulum. Wur ana a waya tsir gà ɓəza ya ka, a weye a gà ɓəza ŋgar ŋa mbaŋa.

1 Yuhana 5:18

Kà sərakwa dər, gà na ti ne gà ɓəza Mbulum a ka, ku mege weke, a gewe a bakal asa tsa, aɗaba Kəla Mbulum a riŋ a kesle a ŋgat. Kamala taŋa ya, Əbay sitene a sle aà melime aà ŋget a asa tsa.

1 Yuhana 5:4

Aɗaba gà na ti ne gà ɓəza Mbulum a tserdze, ku mege weke tekeɗe ka, a sle a aà məmbà aà dukw bakal gər ahəɗ. Dite meme na ki mbèkwe ahər a ya? Ama ki mbèkwe ahər a ka, nda megìse kwa ana kə̀ gə̀sakwa Yesuw Kiristi ya.