1 Kurintiya 1:5 - Bible Zulgo

⁵ Kurum mandza ŋa i təv ilik ŋa nda gà Yesuw Kiristi ka, Mbulum aka pise a kurum ahəm, kàa ŋgatum gà ŋgwal gà dukw ana pampam tserdze ya, nda təv megìse kurum. Ki ndzwim a ka, barbararra ika vatwa ŋgar. Aɗaba taŋa na kà sərum ikaba à gà dukw ana ndzer ŋa ya lele, dite ka, kà sərum meɗìfè à bazlam Mbulum a mburma asa mbaŋa.

1 Kurintiya 1:5 ပူးပေါင်းရင်းမြစ်များ

Gà Ɓəzla Meslire 2:4

Gà mburma ata tserdze ya, Mezite Mesife Mbulum a rah a tar a gəzləŋ. Tə dza ba aà mifefile, ku weke ndaka ahəm ŋgiɗ pampam, kərga na Mezite Mesife Mbulum ata a gwaɗa a tar, tsikwim a.

RUMA 11:12

Akahər bakal tar ata ta ge ya ka, Mbulum a ge ŋgwal ŋa ka, a gà asiŋ gà mburma ana ika gər ahəɗ tserdze ya. Agəra medìɗè tar ata tə dəɗ ika vatwa ŋgar a ka, a pise ahəm a gà asiŋ gà mìsle ŋgiɗ hinne kuɗa. Dite na gà Yahuda tserdze ta mbəɗ gər a təv ŋgar ana, a pisakwe a ahəm ana, à zè a taŋa tsiye.

RUMA 15:14

Gà damər gà, iye nda gər gà ka, i sər ndzer, kurum riŋ ki gwim a dukw ana ŋgwal ŋa ya, ku mege Yàa tsik a kurum tsa tekeɗe ya. Kà sərum dukw ana Mbulum a waya ya lele. Ki slwim aà meɗebe a à metsehe ika magər kurum mbaŋa.

RUMA 15:4

Kinehe kà sərakwa, dukw ana ta wetse i wakita Mbulum akahər ata ya, ta wetse ka, aà meɗìfè a kwa à dukw ana a da ndaka vatwa ŋa ya. Dite ka, Mbulum a sasar na ki mirekwe a dər aba dzəŋdzəŋ, à mèkwe a dərraha à arəv lele ya. Kamala taŋa ya na tsavəvvà ki dzelekwe a dukw ana Mbulum a tsik i sida ya, a gwa, i ta ge a ya.

1 Kurintiya 12:10

A vəl a mìsle ŋgiɗ ka, ndzəɗa ana biy megeye dər gà dukw mene aà mburma ya. A biy ŋgiɗ ka, a vəlar ndzəɗa aà məma à guma ana Mbulum a tsikar a, a mburma tèrihhwè lele. Gà biy ŋgiɗ ibam, ta ŋgat ndzəɗa i tar ka, aà masəra ikaba à dukw ana a dara i təv Mezite Mesife Mbulum a, nda biy Əbay sitene ya. Gà mìsle ŋgiɗ asa ka, ta ŋgat ndzəɗa i tar ka, aà metsìkè gà ahəm ana tar tekeɗe, tə sər tsiye. Gà biy ŋgiɗ asa ibam, ta ŋgat ndzəɗa i tar ka, aà məma à gà ahəm ata a mburma parakkà lele.

1 Kurintiya 12:8

Kamala taŋa ya, mìsle ŋgiɗ ka, Mezite Mesife Mbulum a vəlar ndzəɗa aà metsìkè ŋgwal metsehe lele. Ama Mezite Mesife ata ilik pəra. A biy ŋgiɗ ka, a viler a ndzəɗa aà masəra vatwa Mbulum lele, aà dite a ɗif a dər a mburma parakkà ya.

1 Kurintiya 13:2

Na mege wura aka ŋgat ndzəɗa aà məma à bazlam Mbulum a mburma lele, nda gà bəla aka sər vatwa ŋgar, nda gà dukw ana makàhà ŋa i təv ŋgar a fit, kige tsa aka gəs bazlam Mbulum maràhà ŋa i gəzləŋ tsìsl, na dite a sle aà megweɗe a a kwite aaha: «Hitse i faha ya,« dite a de a kaɗəŋ tekeɗe ya ka, ama na a waya gà asiŋ gà mìsle ŋgiɗ tsəka, taŋa ka, a ne kamala dukw ana taf masakəŋa ya hiywe mba.

1 Kurintiya 13:8

Mawàyà mburma ka, à ndìv a tsa, a ndze a aà biybiy. Ama gà bazlam Mbulum ana ta màwa dər a mburma ya ka, tì ndìv a mba. Dite ku mege tàa ŋgat ndzəɗa aà metsìkè gà ahəm ana tar tə sər tsiye tekeɗe, a ti ndìv a mba asa. Masəra gà dukw ana mburma tə səraya nda təv Mbulum a tekeɗe ibam, à ti ndìv a mbaŋa asa.

1 Kurintiya 14:26

Aɗaba taŋa, gà damər gà, na kataya dze ana, ki gekwe a ana, meme? Ama i təv ana ki yehwimebe a gər a ka, mìsle ŋgiɗ à lèh a i ŋgar dimis, mìsle ŋgiɗ a dzeŋge a bazlam Mbulum a mburma, dite mìsle ŋgiɗ ibam, a me a à dukw ana Mbulum a tsiker a, a mburma. Biy ŋgiɗ ka, à fèfil a i ŋgar ndaka ahəm ana ŋgat aka sər tsiye, dite naha ka, à me a dərra iɗəm a parakkà. Ama dukw ana ki gwim a tserdze ya kəla ka, say biy ana gà mburma Mbulum ta ŋget a ndzəɗa ɓəŋɓəŋ, ti de a dər aka miɗ aka miɗ lele ya.

1 Kurintiya 8:11

Kamala taŋa ya, dukw ana ki ge a ka, aɗaba ana kər kà səraba, dukw aaha ka, à lèh a duwa tsiye ka, a dzeye a à wele ana aka sime ika vatwa Mbulum tsiye. Ama sər dər ka, ge metsehe aɗaba damər yak ana Yesuw Kiristi a mət aɗaba ŋgat a.

2 Kurintiya 4:6

I təv ana Mbulum a ge gər ahəɗ akahər ata ya ka, a gwa: «Dzaydzay mà də̀v i luvuŋ.» Ama Mbulum ŋa ka, taŋa ilik hiywe na a vəl dzaydzay ŋgar ata à div a i gəzləŋ mər a mbaŋa. A ge dər kataya ka, aà məpàtà à ndzəɗa ŋgar ana tì zlibe a dər, à div a ika miɗ Kiristi ya. Aɗaba taŋa na mər ihər mìi tsik a bazlam ŋgwal ŋa ata a mburma ya.

2 Kurintiya 6:10

Ku mege ta vile a mər a matsəɓatsəɓ a gəzləŋ hinne tekeɗe ka, mìi de a aka miɗ aka miɗ nda maŋgayaba lele hiywe. Mər ka, mì ne kamala gà ɓəzla matawak a, ama mər ihər mìi ge a Əbay à gà mburma hinne ika vatwa Mbulum seyiŋ ivaɗ. Mi ne kamala ana duwa mər a riŋ tsidze ya. Ama nda ndzer kəla ka, dukw tserdze a riŋ aà mər dukw ŋgar.

2 Kurintiya 8:7

Kurum ka, gà Əbay ŋa, na ika vatwa Mbulum a, kà zùm dər gà mìsle ŋgiɗ kweleŋ. Megìse kurum ana kə̀ gəsum *Kiristi nda gəzləŋ a ka, ɓəŋɓəŋ lele. Kurum ihər ki tsikwim a bazlam ŋgwal ŋana a mburma parakkà. Kurum ka, kà sərum dukw ana ndzer a, kà vəlum ba kurum a megemir Mbulum ka, nda gəzləŋ ilik. Meweye kurum ana kà wayum mər a tekeɗe, hinne asa mbaŋa. Aɗaba taŋa, gwim megemir ŋgwal ŋa ata ka, nda gəzləŋ ilik mbaŋa, mà za biy gà mìsle ŋgiɗ.

2 Kurintiya 9:11

A ta pise a kurum a ahəm hinne, aà ka vəlum ahər a gà mìsle ŋgiɗ fə̀làh fə̀làh. Kamala taŋa ya, gà mburma hinne ti ta ge a kəkaaha a Mbulum, agəra dukw ana ki vilwim a ka, mìi de a ter a dərraha nda ahər mər a.

EFESIYA 1:17

I heme a ka, a Mbulum Tsir kwa Batsah ŋa ana tì zlibe a à ŋgat hinne, Yesuw Kiristi BATSAH kwa ŋa a ger a megemir a. I hemer a ka, dite ma ɗif a kurum à metsehe ŋgar. I dəba ŋa ya, mə̀ pàt a kurum aba, dite kà səkahum à masəra ŋgat lele.

EFESIYA 2:7

Kərga taŋa ya, aka ge a kwa dukw ŋgwal ŋa hinne nda ahər Yesuw Kiristi. A ge dər kamala taŋa ya ka, aɗaba a sasar məpàtà dər a gà mburma ana ti dere a a təv ŋgar ika miɗ a, dite na ti sir a dər ka, meme na ŋgwal ŋgar ana a vəl biy taf ka, batsah ŋa hinne, a za gà dukw ana tserdze ya.

EFESIYA 3:8

Iye ka, wele na kə̀la ŋa ika magər gà mburma Mbulum kwizikw a. Ama kə̀la ka, aka viliŋ vatwa aà metsìkè bazlam mipìsè ahəm ana a dere a ndàra i təv Yesuw Kiristi ya, a gà mburma ana gà Yahuda tsiye. Mipìsè ahəm ata batsah ŋa ya ka, gà mburma ti sle a aà masəra ŋa fit tsa, aɗaba ana a za ndzəɗa tar a.

EFESIYA 6:19

Hamumar agəra iye mbaŋa, dite ma ɗifiŋ à dukw ana i tsik a ya. Hamumar ka, magəɗa ma giŋ aà meɗìfè à bazlam ŋgwal ŋa ata a pàt dər parakkà ya tsa.

FILIPIYA 1:9

I hamawa a Mbulum aɗaba kurum ka, dite mawàyà ba ana ki weywim a ba ika magər kurum ilik ilik tserdze ya, mà səkah aaka aka miɗ aka miɗ. Kamala taŋa ya ka, ki sirwim a ndzer ŋa lele, dite ki slwim a aà masəra ikaba à gà dukw ana naha ka, a da ndaka vatwa Mbulum, kige tsa, naha ka, a da dər tsiye.

KULUSIYA 2:3

Ŋgat na a vile a kwa a vatwa, na dite ki nekwe a gà ɓəzla metsehe, ki slekwe a aà masəra duwa aka gər Mbulum a. Metsehe ata ka, ŋgwal dukw ana lele, à sìkim a ba nda siŋgwe tsiye.

KULUSIYA 3:10

Kàa ŋgatum mede ana awiya ŋa ya ivaɗ. A ne ka, kamala awiya petek ana ŋgulàɗə̀ɗɗa kà dzum akaba ya. Mbulum na a vəl a kurum madzala gà gər ata ya. A riŋ a ne a dər awiya ŋa kəla pat, na dite ki nwim a kamala ŋgat a ya. Dite ka, ki ti sirwim a ŋgat lele, à sìkèh a aka miɗ aka miɗ mbaŋa.

YAKUBA 3:13

Wura a riŋ ika magər kurum metsehe ŋgar a riŋ, a sər duwa hinne ya? Na aka ge riŋ ka, mə̀ pàt à megemir ana lele, i təv mendze ŋgar ana a ndze a ya, dite ma həna à gər a bəɗ asa mbaŋa. Aɗaba aka həna à gər a bəɗ ka, gà mburma ti sir a dər, metsehe ŋgar a riŋ kaɗəŋ.

2 Piyer 3:18

Ama kurum ivaɗ ka, dum aka miɗ nda mazazama Yesuw Kiristi BATSAH kwa ŋana ŋgat mala məmbə̀là à kwa ya, na dite a ge a kurum a ŋgwal ŋa nda mesire kurum ana ki sirwim a ŋgat a ka, à sìkèh a aka miɗ aka miɗ bə̀ba ŋa. Mezlibe ŋgar ana gà mburma tì zlibe a à ŋgat a ka, tə̀ zlə̀b dər daga aà kinehe ya, haa aà biybiy. *Amin.