ኢሳያሳ ቲንቢቴ 28:21 - Geeshsha Maxaafa

²¹ GODAY Paraaxime zuman ooththida mala, ba ooso, ba imaththa ooso, hessika ba ooraththa ooso ooththanaas dendana. Qasse Geba7oone zullen ooththida malakka ooththana.

ጋሞ ማጻፋ

²¹ ጎዳይ ፓራጺሜ ዙማን ኦዳ ማላ፥ ባ ኦሶ፥ ባ ኢማ ኦሶ፥ ሄሲካ ባ ኦራ ኦሶ ኦናስ ዴንዳና። ቃሴ ጌባኦኔ ዙሌን ኦዳ ማላካ ኦና።

ኢሳያሳ ቲንቢቴ 28:21 ပူးပေါင်းရင်းမြစ်များ

2ሳሜላ ማጻፋ 5:20

Hessa gishshas Dawiti Ba7aali-Paraaxime biidi Filisxeeme asaa oli xoonides; izikka, «Di7o haaththi dhuuqqi kezidi laalliza mala, GODAY ta morkketa ta sinththafe laallides» gides. Hessa gaason he sohoza sunththi Ba7aali-Paraaxime geetettides.

2ሳሜላ ማጻፋ 5:25

Hessa gishshas Dawiti GODAY iza azazida mala ooththides; Filisxeeme asaakka Geebappe biidi Gezeere gakkanaas gooddi gooddi shocides.

1ታሪኬ ማጻፋ 14:11

Histtiin Dawitinne izara diza asay Ba7aali-Paraaxime geetettizaso biidi heen istta oli xoonida; Dawiti, «Di7o haaththi shoddi efiza mala Xoossi ta morkketi ta kushen shodettana mala ooththides» gides; hessa gishshas he sohoza sunththi Ba7aali-Paraaxime geetettides.

1ታሪኬ ማጻፋ 14:16

Hessa gishshas Xoossay azazida mala Dawiti ooththides. Geba7ooneppe biidi Gezeere gakkanaas Isra7eele asay Filisxeeme olanchchata dippi histtides.

ዬ ማጻፋ 94:16

Makkallanchchata bolla ta gishshas eqettanay oonee? Iita ooththizaytarakka ta gishshas mootettanay oonee?

ኢሳያሳ ቲንቢቴ 10:12

GODAY Xiyoone zuma bollanne Yerusalaame bolla ba ooththana ooso ubbaa polidaappe guye, «Asoore kawo iza wozina otoreteththaa gishshassinne izi kadhe ayfen xeelliza gishshas ta iza qaxxayana» gees.

ኢሳያሳ ቲንቢቴ 28:19

Izi yida wode wode inttena ekki baana; maalado maalado, qammanne gallas inttena pitti efana; ha qaalaa intte akeekizaa gidikko shiro bolla shiro ehana.

ኢሳያሳ ቲንቢቴ 29:14

Hessa gishshas tani ha asaa bolla malalisiza miishsha bolla malalisiza miish ooththashe zaara zaara istta malalissana; aadho eranchchata erateththi dhayana; akeekanchchata akeekaykka pentti baana» gides.

ኢሳያሳ ቲንቢቴ 29:23

Bantta giddon ta kushe ooso gidida bantta nayta be7ishe ta sunththaa geeshshateththan naagana; istti Yaaqoobe Geeshshaza geeshshateth erana; Isra7eele Xoossaa sinththan yashshateththan eqqana.

ኢሳያሳ ቲንቢቴ 64:2

Qayxare tamay haath penttisiza mala, ne morkketa matan ne sunththi erettana mala wodhdha; kawoteththatakka ne sinththan kokkorssa.

ኢሳያሳ ቲንቢቴ 65:7

Intte nagara halonne intte aawata nagara halo ta kessana. Istti zumata bolla xuugettiza yarsho shiishshida gishshas, zumbullata bolla tana cayida gishshas, istti makkida miishshan isttas zaari makettana; istti kase ooththida ooso kushe zaari ekkana» gees.

ኤርማሳ ቲንቢቴ 30:14

Intte laggeti ubbay inttena dogida; istti intte gishshas wudettettenna; tani inttena morkke shociza mala shocadis; menxe iita asa mala ta inttena qaxxayadis. Gaasoykka intte qohoy gita; intte nagaraykka daro.

ኤርማሳ ዚላስ 2:15

Ne achchara aadhdhi biza ubbay ne bolla ba kushe baqqi kaa7ana; biitta ubbaan aadho lo7o geetettiza katamayanne dere ubbay ufayettiza katamaya hanii?» gaana; qidhishekka ba hu7e qaaththana.

ኤርማሳ ዚላስ 3:33

Izi odidi asa bolla meto woykko waaye ehi erenna.

ሂዚቄላ ቲንቢቴ 33:21

Nuni di7ettida tammanne nam7anththo layththan, tammanththo aginan, ichchashanththo gallassan, Yerusalaameppe kessi ekki yida issi asi katamay kundidayssa taas yootides.

ኢምባቆ ቲንቢቴ 1:5

«Inttes yootettiinkka ammanontta inttena ta intte paxa dishin issi miish ooththana gishshas ane ha7i asaa xeellite; be7idinne daro malalettite.

ኢያሶ ማጻፋ 10:10

GODAY Isra7eele asaa sinththan Amooreta bolla shiro yeddides; Isra7eele asay isttafe daro asaa Geba7oonen wodhides. Isra7eele asay istta Beeti-Horoone efiza oge pudunththan kaallides; Azeeqeppe biidi Maqeeda gakkanaas yedeththi wodhida.

ኢያሶ ማጻፋ 10:11

Beeti-Horooneppe duge Azeeqe efiza oge oykkidi istti Isra7eele asaa sinththafe baqatishin GODAY wolqqama shach saloppe istta bolla bukisides. Histtiin Isra7eele asay mashshan wodhida asaappe, shachchay wodhida asay keehippe daro.

ኢያሶ ማጻፋ 10:12

GODAY Amooreta Isra7eele asaa kushen aaththi immida gallas Isra7eele asaa sinththan Iyaasoy GODAAS, «Arshey Geba7oonen eqqo; Aginaykka Ayaaloone shoobban eqqu» gides.