Sɔlɔmɔn 5:16 - EBƆRƐ BE KAWƆL

¹⁶ Mbe kɔnɔ be kepipe wɔ ebel nna, nɛ mbe kusɔ kama malɛ bee par ma. To, Jerusalɛm be beche, kananɛ n jipo nɛ ma eshapo na du nna na.

Sɔlɔmɔn 5:16 ပူးပေါင်းရင်းမြစ်များ

2 Samuɛl 1:23

Kemaŋkura nɛ kasha nɛ basa daa kɔ n sa Sɔɔl nɛ Jonatan na daa shi ga. Bumo alɛ be ŋkpa nɛ luwu kikɛ malɛ to, b maŋ yige abar. B daa du manaŋ manaŋ a chɔ kajɔnɔkoso, nsaa kɔ eleŋ malɛ a chɔ ebuluŋ.

Nshɛ 119:103

Fo mbraana bee wora ma ebel a chɔ mushoŋchu gba.

Nshɛ 148:13

Asɔ to so kikɛ e baa kpaŋ Enyɛnpe Ebɔrɛ na be ketre. Men baa kpaŋ mbe ketre na nawule. Ebɔrɛ be kemaŋkura shi ga a chɔ esoso nɛ kasawule so kikɛ peya.

Nshɛ 19:10

A walɛ a chɔ shuwa lela kikɛ, hale shuwa nɛ k maŋ kɔ eyurpi gba. Enyɛnpe be mbra wɔ ebel a chɔ mushoŋchu, hale mushoŋchu nɛ a maŋ kɔ eyurpi gba.

Nshɛ 45:2

Enyɛn kikɛ maŋ walɛ keyɛrbi fanɛ fo. Mmalga belbelso nawule e naa shi fo kɔnɔ to. Amoso nɛ Ebɔrɛ bee nɛfa fo.

Nshɛ 89:6

Ekama maŋ du fanɛ fo, Enyɛnpe Ebɔrɛ na ashi ebɔrɛso; Ekama malɛ maaŋ tiŋ n ta mbe kumu m ber fo ashi ndoŋ.

Sɔlɔmɔn 1:16

N jipo fo walɛ keyɛrbi, m baŋ maŋ wu fo maaŋ teŋ n chena. Anyeeŋ dese afitiri bumbuŋ so kasha so fanɛ gedo nɛ an wora kejafɔ n dese so na;

Sɔlɔmɔn 1:2

Pipe ma kɔnɔ kasha so; fo kasha bɔ nsa;

Sɔlɔmɔn 1:5

Jerusalɛm be beche, ma kayurwule biri nna, ama ma alɛ walɛ kebita. N nyɔ gbitigbiti nna fanɛ Keeda be ewajɛbu nɛ a wɔ keshishɛrsawule so na, ama ma kebita du nna fanɛ Sɔlɔmɔn be lambu to be epatisa

Sɔlɔmɔn 2:1

N du fanɛ ketoto nɛ baa tre rosi na nna ashi kakpa nɛ baa tre Sharɔn na ŋko ketoto nɛ baa tre lili nɛ k wɔ ketaŋɛ to na.

Sɔlɔmɔn 2:16

Ma eshapo la meya nna, nɛ ma alɛ gba la mo peya; Atoto nɛ baa tre lili na be kakpa nɛ e bee yɛr mbe asɔbɔya kejito.

Sɔlɔmɔn 2:3

Kananɛ mangodibi bee wea ndibi pɔtɛ to ashi kupo to na nɛ n jipo du ashi mbrantiɛbia to. Kumo be kiyoyul to be kechena wɔ ebel nna nɛ kumo kusɔrso bee wora ma kɔnɔ to ebel ga

Sɔlɔmɔn 4:3

Fo kɔnɔpurbi nyɔ nna m pere kpeŋ fanɛ kechɛbi peper na; fo kɔnɔ be kapɔr walɛ. Fo ŋgbuŋ du kulkulbi nna a walɛ nsaa nyɛkpɛ fo shata to.

Sɔlɔmɔn 6:3

N la n jipo peya nna nɛ n jipo malɛ gba la meya. E bee sa mbe mbolpɔ ajibi ashi atoto nɛ baa tre lili na be kudɔbi na to nna.

Sɔlɔmɔn 7:9

Kepipe fo kɔnɔ bee wora ma ebel a chɔ nsa belbelso nɛ baa tre wain na. Amo be kenuu e wɔ ebel ga na.

Jɛremaya 15:16

Fo daŋ malga ma kutɔ nɛ n nu fo kamalga na kikɛ. Enyɛnpetale Ebɔrɛ, n la fo kenya nna nɛ fo mmalga malɛ shin nɛ ma kagbene fuli n wushi ma ga.

Jɛremaya 3:20

Ama men maŋ ji kashenteŋ n sa ma, fanɛ eche nɛ e maŋ kɔ kashenteŋji n sa mo kul na. Ma, Enyɛnpe Ebɔrɛ e kaŋɛ na”

Hoziya 3:1

Ndoŋ nna nɛ Enyɛnpe Ebɔrɛ naŋ kaŋɛ ma Hoziya le: “Naŋ laŋɛ n ya kaa sha fo eche nɛ e la sakaleche a kɔ bejipo na. Baa sha mo fanɛ kananɛ ma alɛ gba bee sha Israɛlebi nɛ b shile ma n yaa ka shuŋ agbir, hale a lara asɔrso nɛ baa tre greep na be awɔlso be esarga a sa amo na.”

Galeeshaebi 2:20

Ma nɛ Kristo nɛ b daŋ gbir m mata kedibi largato so, amoso, mannɛ ŋ gbagba e naa wɔtɔ, Kristo e wɔ ma to. Kebaawɔtɔ nɛ ŋ kɔ a wɔtɔ ere, keyirda Ebɔrɛ Pibinyɛn nɛ e sha ma n ta mbe kumu n sa ma na to nɛ n wɔ.

Filipaiebi 3:8

Kashenteŋto, naniere shɛŋ maŋ naa kɔ tɔnɔ ma anishito ŋkpal kebaanyi Kristo Yesu n Nyɛnpe na ka chɔ kusɔ kikɛ na so. Mo so nɛ m paŋ asɔ kikɛ nseŋ naa ta kusɔ kama fanɛ asɔ fuloŋ ŋkpal kananɛ meeŋ wora n nya Kristo na so nɛ n tiŋ n nya a wɔ mo to.

Jeems 2:23

Loŋ malɛ e naa shin nɛ abɔrɛsibɛ na be kɔnɔ bee bɔlɔ fanɛ Eebraham yirda Ebɔrɛ nɛ Ebɔrɛ yili kumo fanɛ e maŋ kɔ kulubi mo to na. Amoso nɛ Ebɔrɛ daŋ tre mo mo teri na.

Jeems 4:4

Basa nɛ esa maaŋ tiŋ n yirda ere! Men maŋ nyi fanɛ nɛ esa baa la Ebɔrɛ mo teri, amodoŋwura malɛ nɛ durnya ere to be asɔ maa ji a kra abar ŋko? To, esa kama nɛ e bee ta mbe kasha a wɔtɔ durnya ere be asɔ to, bee ta mbe kumu nna a ki Ebɔrɛ mo doŋ na.