Romebi 7:18 - EBƆRƐ BE KAWƆL

¹⁸ M baa nyi kelela kikɛ ka maŋ wɔ ma to, ma kagbene lubi ere to nɛ n de na. Ŋkpal manɛ so, kelela be kewora be kasha wɔ ma to, ama ma alɛ maaŋ tiŋ n wora kumo.

Romebi 7:18 ပူးပေါင်းရင်းမြစ်များ

Jɛnesis 6:5

Kumo be jemanɛ na so nɛ Enyɛnpetale Ebɔrɛ wu fanɛ basa be alubi bee wora keshi durnya to a ti so nɛ bumo be ŋgbene to be nfɛra fɛso kikɛ la asheŋ lubi.

Jɛnesis 8:21

Enyɛnpe na ka nu sarga na be efɛa belbelso na nɛ e kaŋɛ mbe kumu le: “N nyi fanɛ dimɛdi be kebia to kikɛ mbe nfɛra fɛso lubi, ama m maaŋ naŋ kpal dimɛdi so n sho kasawule ere kɔnɔ kikɛ. Ma alɛ maaŋ naŋ mur asɔ futeso fanɛ kananɛ n wora ere kikɛ.

Job be kawɔl 14:4

Dimɛdi kikɛ maŋ wɔtɔ nɛ kulubi maŋ wɔ mo to.

Job be kawɔl 25:4

Esa kikɛ maaŋ tiŋ ŋ kaŋɛ fanɛ mo ere maŋ wora n jija Ebɔrɛ be anishito.

Nshɛ 119:173

Wora shiriya n chɛ ma to, ŋkpal ŋ ka bee bɛ fo kusɔ nɛ fo yili so so.

Nshɛ 119:176

N la fo kayɛrbi nna nseŋ foe n luri to fanɛ kubolpɔ. Amoso jande fin ma, ŋkpal manɛ so, m maaŋ teŋ fo mbraana so kikɛ.

Nshɛ 119:32

N wora shiriya kenishipereso nna nɛ ŋ wora fo mbraana kasonu, ŋkpal manɛ so, feeŋ chɛ ma to nɛ n nya kepinto n ti so.

Nshɛ 119:40

Mee sha kebaawora fo mbraana kasonu ga; Sa ma ŋkpa popɔr, ŋkpal fo ka la esa niŋiso so.

Nshɛ 119:5

Ekpa kikɛ so, n daa sha ketiŋ m bɛ fo mbraana so kashenteŋto nna!

Nshɛ 51:5

Kachɛ nɛ b kurge ma na kikɛ nɛ n la alubiworapo.

Aizaaya 64:6

Anyi kikɛ wora alubi ŋ ku so. Hale anyi be asheŋ lela gba du fanɛ achɛbi krenso ashi fo kutɔ nna. Anyi be alubi so, an du fanɛ afantaŋ wɔlso nɛ afu ber amo n ya lɛ nna.

Matiu 15:19

Ŋkpal manɛ so, esa be kagbene to nɛ nfɛra lubi nɛ a bee shin nɛ e bee mɔ, a ji kubojua nsaa wora kusɔ jigayaso be kanyɛnsha nɛ kachesha bee shi a lar. Ndoŋ nɛ kayu nɛ kafule nɛ basa be atre be kejija bee shi.

Luuk 11:13

Nɛ menyi ere ka la basa lubi le nsaa nyi asɔ lela be kebaata a sa menyi be mbia, nɛ Etuto nɛ e wɔ ebɔrɛso na a? Mo ere maaŋ shuli n sa bekama nɛ b kule mo Kiyoyu Cheeŋ na a?”

Baru lela nɛ Jɔn kute na 3:6

Dimɛdi e naa kurge dimɛdi nɛ Kiyoyu na malɛ bee bar kiyoyu na be kakurge.

Romebi 13:14

Ama men ta Enyɛnpe Yesu Kristo be akɔsɔ na a kuŋ menyi be amu fanɛ asɔbuuso na nseŋ yige kebaade menyi be kapɔr lubiana ere be aparsheŋ so nɛ a sa maŋ kaŋ shin nɛ menyi be ayɛlgasɔ e ka menyi to.

Romebi 7:15

Amoso, ma ere gbagba maa pin ma asheŋ woraso to, ŋkpal manɛ so, asɔ nɛ mee sha kewora, amo nɛ m maa wora nsaa wora asɔ nɛ ŋ kishi.

Romebi 7:19

Kelela nɛ mee sha fanɛ m baa wora na, m maa wora. Ama kulubi nɛ m maa sha fanɛ n wora na nɛ mee wora.

Romebi 7:25

Mee chɔrɔ Ebɔrɛ ga fanɛ mo e naaŋ bɔla an Nyɛnpe Yesu Kristo so m mɔlga ma. Kusɔ nɛ k baa wɔtɔ kikɛ nde fanɛ ma ere gbagba be nfɛra to n la Ebɔrɛ be mbra na be kenya nna, ama ma kagbene lubi ere bre to n la kulubi be mbra be kenya nna.

Romebi 7:5

Ŋkpal manɛ so, saŋɛ nɛ anyi be kebaawɔtɔ dra nɛ k daa wɔ anyi nɛ mbra na daa shin nɛ eyur to be ayɛlgasɔ daa kɔ anyi to a shuŋ na, luwu nɛ an daa kɔ tɔnɔ a sa.

Galeeshaebi 5:17

Ŋkpal manɛ so, kapɔr lubi ere be ayɛlgasɔ maa kukwe Kiyoyu na be ayɛlgasɔ nɛ Kiyoyu na malɛ be ayɛlgasɔ maa kukwe kapɔr lubi ere be ayɛlgasɔ. Loŋ be asɔ anyɔ na la bedoŋ nna nɛ kumo alɛ bee ŋini fanɛ men maaŋ tiŋ n wora kusɔ kama nɛ menyee sha.

Galeeshaebi 5:24

Basa nɛ b la Kristo peya na maŋ naa shin nɛ bumo be kapɔr lubiana ere bee wɔ bumo, naniere a du fanɛ b ka ta kapɔr lubiana ere nɛ amo be asɔ sha so nɛ ayɛlgasɔ nna ŋ gbir m mata kedibi so m mɔ.

Filipaiebi 2:13

Ŋkpal manɛ so, Ebɔrɛ e wɔ menyi to a shuŋ saŋkikɛ a shin nɛ menyee sha Ebɔrɛ nsaa tiŋ a nu a sa mo gbagba be aparsheŋ.

Filipaiebi 3:12

M maa ŋini fanɛ n teŋ nya asɔ nɛ ma anishi yuu so ere nna ŋko fanɛ n teŋ ki esa cheembi nna, ama m baa pere kenishi nna a kɔ to a yɔ anishito a fin kenya ma tɔnɔ, kumo alɛ so nɛ Kristo Yesu teŋ sɔ ma n sa mbe kumu na.

Taites 3:3

Ŋkpal manɛ so, saŋko anyi alɛ gba daŋ wuli nna a kɔ kumuleŋ nɛ ashuŋ lubi. An daa la anyi be eyurana be ayɛlgasɔ nɛ ebel be yiri kikɛ be anya nna. An daa wɔ kayurbesa be nfɛra lubi to nna a kishi beko nɛ beko malɛ daŋ kishi anyi.

1 Pita 4:2

Nɛ loŋ malɛ baŋ wora, loŋ be esa na maŋ naa kɔ mbe durnya ere to be kebaawɔtɔ a wɔ edimɛdi be ayɛlgasɔ lubiana to, ama Ebɔrɛ be aparsheŋ to nɛ e kɔ mbe kebaawɔtɔ a wɔ.