Nshɛ 93:1 - EBƆRƐ BE KAWƆL

¹ Enyɛnpe Ebɔrɛ na e la ewura. Kemaŋkuragboŋ nɛ eleŋ buu mo nna fanɛ kuwurpiŋi. Mo e tɔl durnya n yili kpakpa, nɛ shɛŋ shɛŋ maaŋ tiŋ n fifir kumo.

Nshɛ 93:1 ပူးပေါင်းရင်းမြစ်များ

1 Kronikɛls 16:30

Esa kama nɛ e wɔ durnya ere to beeŋ chicha ashi mbe anishito! Durnya na yil kiŋkiŋ nna nsaa maa gbuŋgbuŋ.

1 Kronikɛls 16:31

Esoso nɛ kasawule so ebi, men shin nɛ men be ŋgbene e baa fuli! Men kaŋɛ efuliana na fanɛ Enyɛnpe Ebɔrɛ na e la ewura.

1 Kronikɛls 29:12

Fo e naa sa basa kedamaya nɛ eleŋ nɛ kemaŋkura. Fo gbagba be eleŋ nɛ yuku so nɛ fee ji kusɔ kama so kuwura.

Job be kawɔl 40:10

Kumo ere shin nɛ ekama e wu kemaŋkura nɛ yukugboŋ nɛ fo kɔ na.

Nshɛ 103:19

Ebɔrɛ taŋɛ mbe kuwurji ebɔrɛso nna, mo alɛ nsaa ji kuwura asɔ toso kikɛ so.

Nshɛ 145:13

Fo kuwurji wɔtɔ nna mbaanaayɔ; k maŋ kɔ ekar, fo alɛ bee ji kuwura nna, yili kenana ko n ya fo kenana ko to ebi so nna. An Nyɛnpe Ebɔrɛ, fo e naa wora a bɔlɔ fo nnɔ naseso so nsaa wora kusɔ kama nɛ fo kaŋɛ feeŋ wora.

Nshɛ 18:32

Mo e naa sa ma eleŋ, nsaa shin nɛ mee wora asheŋ niŋiso.

Nshɛ 59:13

Nya agbo m mur bumo cheche. Saŋɛ na so efuli pɔtɛana na kikɛ beeŋ pin fanɛ fo e naa ji Israɛl so kuwura.

Nshɛ 65:6

Fo e kɔ eleŋ nɛ yuku n ta abeegboŋ n yili amo be eyilikpa.

Nshɛ 65:7

Fo e naa shin nɛ teku be awɔr bee lo. Fo e yɔɔ nchu be atili nɛ efuliana na be awɔr nɛ baa cha.

Nshɛ 75:3

Nɛ kasawule gbuŋgbuŋ nɛ basa bee chicha gba, ma e kraa kɔ kumo be gbaltɔlase to a yil dindiŋ.

Nshɛ 96:10

Men kaŋɛ efuliana na so ebi le: “Enyɛnpe Ebɔrɛ na e la Ewura! Mo e tɔl durnya na n yili dindiŋ nɛ k maa fifir; mo alɛ e naaŋ ji basa kikɛ demu nɛ e maŋ puni eko.”

Nshɛ 97:1

Enyɛnpe Ebɔrɛ na e la Ewura! Shin nɛ durnya kikɛ e ji eyur nɛ mplasawule kikɛ e wora awɔr.

Nshɛ 99:1

Enyɛnpe Ebɔrɛ na e la ewura! Efuliana kikɛ so be basa e baa chicha. E chena mbe kuwurputi nɛ emalaika nɛ b kɔ aba wɔ kumo be kaseto na so nna; nɛ kasawule bee gbuŋgbuŋ.

Aizaaya 11:5

Kashenteŋji nɛ keji asheŋ nɛ amo be ekpa so nɛ e beeŋ ta n ji kuwura mbe basa so.

Aizaaya 45:12

Ma e to durnya nseŋ to edimɛdi be yiri yiri n wɔtɔ kumo to. Ma eleŋgboŋ so nɛ awɔlpa parga to n sɔ kaplɛkama nɛ epeŋi nɛ kufɔl nɛ achɛkpabi kikɛ wɔ kumo so na.

Aizaaya 45:18

Enyɛnpe na nawule e la Ebɔrɛ, mo e to ebɔrɛso nɛ durnya nɛ basa wɔ kumo to na. E maŋ to durnya nna nɛ k baa dese fuloŋ fanɛ kiyi.” Mo e kaŋɛ le na: “Ma e la Enyɛnpe Ebɔrɛ, Ebɔrɛ kikɛ maŋ naa wɔtɔ n ti ma so.

Aizaaya 49:8

Ade be kaman nɛ Enyɛnpe Ebɔrɛ na naŋ kaŋɛ mbe basa le: “Menyi be kumɔlga be jemanɛ kaŋ fo, meeŋ wu menyi kuwɔr nseŋ nu menyi be kabɔrɛkule. Meeŋ kuŋ menyi nseŋ mɔlga menyi. Meeŋ shin nɛ men ta kɔnɔ nɛ n nase nɛ k kɔ tama na n ya sa efuli pɔtɛana so ebi. Ma alɛ beeŋ naŋ shin nɛ men bɛta m ba chena menyi be kasawule nɛ k dese jiga na so.”

Aizaaya 51:16

Ma e ŋini menyi kamalga nseŋ ta ma enɔana a kuŋ menyi. Ma nɛ n to esoso nɛ kasawule na e kaŋɛ basa nɛ b wɔ Jerusalɛm to fanɛ b la ma basa nna!”

Aizaaya 51:9

Enyɛnpe Ebɔrɛ, koso n chɛ anyi to! Bɔla fo eleŋgboŋ na so m mɔlga anyi, fanɛ kananɛ fo daŋ mɔlga anyi be basa dra dra na. Fo e daŋ ku teku to be kusɔbɔya lubi gboŋgboŋi nɛ baa tre Rehab, nɛ e yili n sa kebagato nɛ kulubi be eleŋana na to. Rehab yili n sa Ijipt be efuli jemanɛ nɛ Israɛlebi lar ndoŋ a yɔ na nna.

Aizaaya 52:7

K la mamachi be kesheŋ nna fanɛ esa ka beeŋ wu kabɔ ka ta kagbenewushi be baru n shi abee so a gbelge to a ba nɛ e ba sa basa. Kekɔmpɔɔso be kebomboŋ nɛ e bee ber a sa Jerusalɛm to ebi a kaŋɛ le: “Menyi be Ebɔrɛ e la Ewura!”

Aizaaya 59:17

E beeŋ ta keji asheŋ nɛ amo be ekpa so m buu fanɛ enapo be kebɛlso be kekpaŋkale nɛ kumɔlga malɛ gba m buu fanɛ enapo be kebɛlso be kekpaŋwuro. Mo alɛ beeŋ naŋ ta kewora asheŋ ekpa nɛ k daga so kenishipereso fanɛ kusɔbuuso m buu nseŋ sɔ basa nɛ baa ji awurfoŋ be kɔnɔ so ŋ ka kulubi kukɔ.

Aizaaya 63:1

Wanɛ e shi Edɔm be efuli so be kadegboŋ nɛ baa tre Bozra na ŋ kre to nɛnɛ m buu epiŋi peper a tia aya eleŋ so a ba ere? Enyɛnpe Ebɔrɛ nɛ e kɔ eleŋ ga nɛ e tiŋ m mɔlga basa na e naa ba nɛ e ba bɔ mbe kekɔmpɔɔso be kubɔya.

Matiu 6:13

Sa maŋ shin nɛ an luri kechɔŋkeni to, ama pete anyi ashi alubipo na kutɔ. [Ŋkpal manɛ so, Kuwurgboŋ nɛ eleŋ nɛ kemaŋkura la feya nna hale mbaanaayɔ. Amɛn.]’

Hibruwebi 1:8

Ama Ebinyɛn na bre be asheŋ, le nɛ Ebɔrɛ kaŋɛ: “O Ebɔrɛ, fo kuwura beeŋ baa wɔtɔ mbaanaayɔ. Kashenteŋ malɛ nɛ feeŋ baa kɔ a ji kuwura fo basa so ashi fo kuwura na to.

Kelaraŋŋini 19:6

Mmalga ere be kaman nɛ n nu kusɔ ko ka gbri fanɛ jimaŋ damta ka wora awɔr na. Awɔr na daŋ naa gbri fanɛ nchu damta ka bee shile nna nseŋ daŋ naa gbri fanɛ bɔrɛ ka bee ponte to a boŋ to a kaŋɛ le: “Halleluya. Ŋkpal manɛ so, an Nyɛnpetale Enyɛnpe Ebɔrɛ na e wɔ kuwura a ji.