Nshɛ 52:8 - EBƆRƐ BE KAWƆL

⁸ Ama ma ere du fanɛ ɔlif be kedibi nna, a daŋ nsaa walɛ saŋkama ashi Ebɔrɛ be laŋ to. Ma alɛ be yirda deŋ mbe kasha nɛ k maŋ kɔ ekar na so saŋkikɛ nna.

Nshɛ 52:8 ပူးပေါင်းရင်းမြစ်များ

Nshɛ 1:3

Loŋ be basa du fanɛ boŋkarase be ndibi nɛ a bee sɔr asɔrso saŋɛ nɛ k daga na nna. Amo be afantaŋ maa gbaŋgbaŋ kikɛ. Kusɔ kama nɛ baa wora bee nite nɛnɛ nna a sa bumo.

Nshɛ 128:3

Mbe eche beeŋ baa du fanɛ kedibisɔrso nɛ k bee sɔr ga ashi mbe laŋ to. Mbe mbia malɛ beeŋ baa du fanɛ ɔlif be ndibi popɔrbi m bɔlɔ laŋ.

Nshɛ 13:5

Ama ma tama deŋ fo kasha nɛ k maa loge na so nna. Ma kagbene beeŋ fuli ma ŋkpal fo ka beeŋ mɔlga ma so.

Nshɛ 147:11

Basa nɛ baa bunyaŋ mo nɛ bumo nɛ bumo be yirda wɔ mbe kasha nɛ k maa chɛrga na so be asheŋ e naa par mo nsaa fuli mbe kagbene.

Nshɛ 33:18

Enyɛnpe Ebɔrɛ na bee keni bekama nɛ baa wora mo kasonu so nna; nɛ mbe kasha nɛ k maa loge na malɛ wɔ bekama nɛ b yirda mo na so.

Nshɛ 58:11

Nɛ basa e kaŋɛ: “Kashenteŋ, basa cheembi kraa nya bumo be kakɔka. Kashenteŋ, Ebɔrɛ kraa ji asheŋ nɛ amo be ekpa so ashi durnya to.”

Jɛremaya 11:16

Jemanɛ ko n daŋ ta bumo nna fanɛ kedibi nɛ baa tre ɔlif nɛ k kɔ asɔrso lela ga na, ama naniere meeŋ shin nɛ kakpa a gbri fanɛ bɔrɛ ka ponte na nɛ afantaŋ na e suse so nɛ ayabi na malɛ e buri n tɔr.

Romebi 11:24

Ŋkpal manɛ so, nɛ Ebɔrɛ baŋ tiŋ ŋ ku fo ashi ɔlifs be kekɔrbuadibi be kapɔr to nseŋ ta fo n yuu n wɔtɔ ɔlifs be kedibi nɛ k nya kebela a maŋ daga fo nɛ kumo ka luri abar to na, kumo ere ayabi dra nɛ Ebɔrɛ daŋ ku n lɛ na maaŋ baa du mo so kpakpa hale gbrɛbi kama kuraa fanɛ ayabi na ka beeŋ naŋ tiŋ m ba chuge amo be kedibi gbagba so ŋko?