Nehemaya 8:17 - EBƆRƐ BE KAWƆL

¹⁷ Bekama nɛ b shi Babilɔn be kadegboŋ na to m bɛta m ba daŋ yuu abuu nna a wɔ amo to a ji Abuu to be Kachɛgboŋ na kagbenefuliso nna. Ŋkpal manɛ so, yili Nun pibinyɛn Joshuwa, nɛ e fara n juŋkpar Israɛlebi na ŋ kɔ n sɔ kasawule na be jemanɛ na kikɛ b maŋ daŋ naŋ ji kachɛgboŋ na kikɛ ama loŋ be kachɛ na.

Nehemaya 8:17 ပူးပေါင်းရင်းမြစ်များ

1 Kronikɛls 29:22

Kumo be kamɔnchɛ ekama be kagbene daŋ fuli mo ga nɛ b ji nseŋ nuu ashi Enyɛnpe Ebɔrɛ be anishito. Ndoŋ nɛ b lara Sɔlɔmɔn kelɛ nyɔsopo fanɛ ewura nseŋ yili Enyɛnpe Ebɔrɛ be ketre to n ta ŋku n do mo so n lara mo ŋ ki bumo be ewura nseŋ ta ŋku n do Zadɔk malɛ so n lara mo ŋ ki bumo be bɔrɛmatapo.

2 Kronikɛls 30:26

Kagbenefuli daŋ baa wɔ Jerusalɛm kikɛ to nna, ŋkpal manɛ so yili ewura Deevid pibinyɛn, ewura Sɔlɔmɔn be jemanɛ so kikɛ, loŋ be asheŋ maŋ naŋ wora kikɛ.

2 Kronikɛls 35:18

Baŋ yili anebi Samuɛl be jemanɛ so kikɛ, basa daŋ maŋ naŋ shɛr alegaiso n ji kebansonchoŋ be kejigboŋ loŋ kikɛ. Bewura nɛ b ji n choŋ na be ekama daŋ maŋ ji kebansonchoŋ be kejigboŋ fanɛ kananɛ ewura Josaya nɛ bɔrɛmatapoana nɛ Livaiebi nɛ Juda nɛ Israɛl nɛ Jerusalɛm be basa kikɛ chala n ji kumo na.

2 Kronikɛls 8:13

E daŋ bɛ kananɛ Mosis ŋini fanɛ b baa lara esarga kewushiachɛ na, nɛ kufɔl popɔr kikɛ be kachɛ sososo nɛ bodobodo nɛ a maŋ kɔ yiisi be kachɛgboŋ nɛ kasɔteŋi be kachɛgboŋ nɛ abuu to be kebaawɔ be kachɛgboŋ so nna.

Ɛzra 3:4

B daŋ ji Abuu to be kachɛgboŋ na nna fanɛ kananɛ mbra na bee ŋini na gbagba chap. Esarga nɛ a daga b lara karechɛ kama be kachipurso nɛ kaaseso kikɛ na nɛ b daŋ lara.

Baru lela nɛ Jɔn kute na 1:14

Esa nɛ baa tre Kamalga na daŋ ki dimɛdi nna m ba kaa wɔ anyi to. An wu mbe kemaŋkura nɛ kuwɔr be kakɛ nɛ kashenteŋ bɔlɔ kemaŋkura na to. Le be kemaŋkura ere la mo peya nna ŋkpal e ka la Ebɔrɛ Pibinyɛn koŋwule na so.

Ditɛronɔmi 16:15

Menyeeŋ ji kachɛgboŋ na m bɛ abar so nchɛnshunu ashi kakpa nɛ menyeeŋ baa shuŋ Ebɔrɛ na n ta kemaŋkura n sa Enyɛnpe menyi be Ebɔrɛ na. Menyi alɛ e shin nɛ menyi be ŋgbene e fuli menyi ŋkpal Enyɛnpe Ebɔrɛ na ka nɛfa menyi be adɔ nɛ ashuŋ so.

Hibruwebi 11:13

Yirda to nɛ basa ere kikɛ daa wɔ nseŋ wu nɛ b maŋ naŋ nya asɔ nɛ Ebɔrɛ nase kɔnɔ fanɛ e beeŋ sa na. B daŋ to kenishi nna n yɔ kufɔ n wu amo n sɔ amo a nyi fanɛ b shi efuli pɔtɛ so nna a la befɔ kasawule ere so.

Hibruwebi 11:9

Yirda so nɛ e daŋ ya kaa wɔ efuli mo nɛ Ebɔrɛ daŋ nase kɔnɔ fanɛ e beeŋ sa mo na so fanɛ efɔ na. Mo nɛ Aizek nɛ Jeekɔb nɛ Ebɔrɛ daŋ sa bumo alɛ gba kɔnɔ naseso koŋwule na, e daŋ ya kaa wɔ wajɛbu to fanɛ befɔ na.

Hibruwebi 4:8

Kede e naa ŋini fanɛ nɛ Joshuwa daŋ shin nɛ b luri kewushi na to nna, Ebɔrɛ daa maaŋ naŋ malga kachako malɛ be asheŋ.

Joshuwa 1:1

Enyɛnpe Ebɔrɛ be kayɛrbi Mosis ka wu be kaman, nɛ Enyɛnpe Ebɔrɛ na kaŋɛ Nun pibi Joshuwa nɛ b daa bela mo ase nɛ e sɔ Mosis so na le: