Malakai 3:3 - EBƆRƐ BE KAWƆL

³ Mbe demu be keji beeŋ baa du nna fanɛ b ka ŋalga gbiti a lara amo be eyurpi nna. Kananɛ bɔyɛpo bee ŋalga gbiti nɛ shuwa a lara amo be eyurpi na, nɛ Enyɛnpe gba beeŋ fɔr bɔrɛmatapoana na so, saŋɛ na so baaŋ ta esarga nɛ a daga m ba sa mo Enyɛnpe Ebɔrɛ na.

Malakai 3:3 ပူးပေါင်းရင်းမြစ်များ

Nshɛ 116:17

Meeŋ lara sarga n di fo epaŋ nseŋ shu n tre fo ashi ma kabɔrɛkule to.

Nshɛ 4:5

Men lara sarga nɛ k daga n sa Enyɛnpe Ebɔrɛ na, nseŋ yirda mo.

Nshɛ 4:6

Basa damta bee kule Ebɔrɛ nna a kaŋɛ le: “Enyɛnpe Ebɔrɛ nɛfa anyi, nseŋ wu anyi kuwɔr.”

Nshɛ 50:14

Ma e la Enyɛnpetale Ebɔrɛ na. Kechɔrɔ, nɛ k baa nase nnɔ nsaa bɛ amo so be esarga nɛ mee sha.

Nshɛ 50:23

Sarga nɛ k bee bar ma kemaŋkura e la kagbene nɛ k bee ji a chɔrɔ. Men wora ma kasonu nɛ ma, menyi be Ebɔrɛ na e ŋini menyi kumɔlga be ekpa.

Nshɛ 51:19

Saŋɛ na so baaŋ lara esarga cheembi nɛ esarga chɔɔso nɛ a bee par fo, nseŋ ta egbolu n lara sarga n sa fo.

Nshɛ 66:10

Anyi be Ebɔrɛ, fo wora anyi ŋ keni, fanɛ kananɛ baa wora gbiti a keni na.

Aŋasa 17:3

Edɛ nɛ baa ta a wora shuwa nɛ gbiti a keni a pin amo be kela; ama Enyɛnpe Ebɔrɛ na e naa wora dimɛdi be kagbene a keni.

Aŋasa 25:4

Baa lara gbiti be eyurpi nna pɔɛŋ nsaa ta kumo a lɔŋɛ asɔ lela.

Aizaaya 1:25

Meeŋ gberge menyi kusoe kenishipereso nɛ ebɔl e lar menyi. Meeŋ lara eyurpi menyi so fanɛ kananɛ baa ta edɛ a lara eyurpi ashi abɛlso to na.

Aizaaya 48:10

Awurfoŋ nɛ n ta n wora menyi ŋ keni, fanɛ kananɛ baa ta edɛ a lɔŋɛ gbiti so na.

Aizaaya 61:6

Ama Enyɛnpe Ebɔrɛ na be basa bre beeŋ baa la Ebɔrɛ be bɔrɛmatapoana nɛ mbe nyɛrbi nna. Efuli pɔtɛana na be kanya nɛ kedama beeŋ ki mbe basa peya nɛ bumo be ketre e dii nɛ b baa puchi amo so.

Jɛremaya 9:7

Ŋkpal loŋ so nɛ Enyɛnpetale Ebɔrɛ na kaŋɛ le; “Ma basa teŋ wora alubi n da ma so. Manɛ nɛ meeŋ wora bumo nɛ mannɛ kelɔŋɛ bumo so fanɛ kananɛ baa lɔŋɛ kebɛlso so na?

Ezikɛl 20:38

Meeŋ lara ŋgbene kpakpaso wuraana nɛ baa lar ma kaman na ashi menyi to. Hale nɛ n lara bumo ashi efuliana nɛ b pesaŋ to n yɔ na gba m ba, b maaŋ nya m bɛta n yɔ Israɛl be kasawule so. Ndoŋ nɛ menyeeŋ pin fanɛ ma e la Enyɛnpe Ebɔrɛ na.

Danɛl 11:35

Ebɔrɛ beeŋ bɔla tɔrɔ nɛ benyiashempo juŋkparpoana na be beko beeŋ luri to na so n shin nɛ b fɔrso n nyalɛ so a jo lalaloge be saŋɛ nɛ k bee ba saŋɛ nɛ Ebɔrɛ yili na.

Danɛl 12:10

Basa damta beeŋ lara alubi ashi bumo be ŋgbene to. Basa lubi bre maa ba nɛ b pin asheŋ to kikɛ, b kraa beeŋ lubi gba n ti so. Ama bekama nɛ b nyi asheŋ bre, beeŋ nya asheŋ be kepinto.

Hoziya 14:2

Men bɛta m ba Enyɛnpe Ebɔrɛ na kutɔ nseŋ shin nɛ le be kabɔrɛkule ere e baa la sarga n sa mo. “Ta anyi be alubi m paŋ anyi nseŋ nu anyi be kabɔrɛkule saŋɛ na so anyeeŋ di fo epaŋ fanɛ kananɛ an nase kɔnɔ na gbagba.

Zakareya 13:9

Katuŋ koŋwule nɛ b ka na gba, meeŋ wora bumo ŋ keni nseŋ lɔŋɛ bumo so fanɛ kananɛ baa ta shuwa ŋko gbiti a wɔtɔ edɛ to a lɔŋɛ amo so na. Kumo be kaman pɔɛŋ nɛ baaŋ kule ma nɛ n nu n sa bumo nseŋ kaŋɛ bumo fanɛ b la ma basa nna, nɛ bumo alɛ e bugi to ŋ kaŋɛ fanɛ ma, Enyɛnpe Ebɔrɛ na, e la bumo be Ebɔrɛ.”

Malakai 4:1

Enyɛnpetale na yɛ: “Kachako bee ba nɛ basa nɛ b kpeŋ nɛ belubiworapoana kikɛ e chɔɔ fanɛ atuweklaŋ. Kumo be kachɛ na baaŋ chɔɔ m mur cheche nɛ bumo be kusɔ kama maaŋ ka.

Nɔmbɛs 8:6

“K daga fo ka lara Livaiebi na ashi Israɛlebi na to ŋ kɔr nseŋ shin nɛ b fɔr bumo be amu so daŋkare be ekpa so.

Luuk 3:16

Nɛ Jɔn kaŋɛ bumo kikɛ le: “Nchu nɛ ma ere kɔ a bɛr menyi kabɔrɛbɛr, ama emo nɛ e wɔ ma kaman a ba na beeŋ shin nɛ Kiyoyu Cheeŋ na nɛ edɛ e gbelge menyi so. E chɔ ma ga hale m maŋ fo mbe aya to be shishɛr gba so.

Romebi 12:1

To, ŋ kurgepoana, ŋkpal Ebɔrɛ be kuwɔr be kakɛ damta nɛ e wu anyi na so, mee kule menyi nna nɛ men ta menyi be amu n sa Ebɔrɛ fanɛ sarga nɛ k wɔ ŋkpa to a du cheembi a par Ebɔrɛ. Menyi be kabɔrɛshuŋ nɛ men kɔ a di Ebɔrɛ epaŋ nna na.

Romebi 15:16

Mee shuŋ nna fanɛ bɔrɛmatapo a wɔtɔ a bɔ baru lela nɛ a shi Ebɔrɛ kutɔ na nna a sa nnyamase, saŋɛ na so, baaŋ baa du fanɛ kakɛ nɛ k bee par mo ere Ebɔrɛ nɛ Kiyoyu Cheeŋ na lara m bɔɔ mo enɔ na.

Filipaiebi 2:17

Nɛ fanɛ b lara ma ŋklaŋ ere ma to n chulgi amo n wurge n ti men be yirda nɛ men kɔ a deŋi Ebɔrɛ so fanɛ sarga na so gba, k par ma. Ma alɛ beeŋ tu menyi a kɔ kagbenefuli.

Filipaiebi 4:18

Men teŋ sa ma kusɔ kama nɛ k daga hale a chɔ kananɛ mee sha gba. Ŋ ka wu men be kakɛ nɛ Epafrodaites bar na, a bɔlɔ ma kenishi tain. K du fanɛ sarga lela nna, nɛ k bee par Ebɔrɛ nɛ kumo be efɛa wɔ ebel ga.

2 Timoti 4:6

Ma ere, jemanɛ nɛ baaŋ ta ma n lara sarga na fo nɛ jemanɛ nɛ meeŋ lar durnya ere to na fo n loge.

Taites 2:14

E ta mo gbagba be kumu n sa anyi nɛ e tiŋ m mɔlga anyi ashi alubisheŋ kikɛ to nseŋ ta anyi ŋ ki basa cheembi nɛ an baa la mo nawule peya m bugi kagbene a wɔtɔ a sha kebaawora alelasheŋ.

Hibruwebi 12:10

An tuto kurgesoana daŋ niŋi n niŋi anyi ekpaana kananɛ b daa fɛ fanɛ k walɛ nɛnɛ n sa bumo nchɛnnyɔ ko nna, ama Ebɔrɛ bre bee niŋi anyi ekpa nna ŋkpal anyi gbagba be kechɛto so, saŋɛ na so nɛ an tiŋ n tu mo n nya mbe kebaawɔtɔ cheembi na.

1 Pita 1:7

Le be kechɔŋkeni ere bee ba menyi so nna nɛ a ba keni ŋko menyi be yirda na kɔ eleŋ a. Men baa nyi fanɛ hale shuwa nɛ k bee jija ere gba, baa kaa ta edɛ a wora kumo a keni. To, loŋ koŋwule na e daga fanɛ men be yirda mo nɛ k chɔ shuwa na gba, b ka chɔ kumo ŋ keni ŋko k beeŋ tiŋ n yili a. Saŋɛ na so baaŋ di menyi epaŋ nseŋ sa menyi kemaŋkura nɛ bunyaŋ kacha nɛ Ebɔrɛ beeŋ lara Yesu Kristo ŋ ŋini na.

1 Pita 2:5

Men shin nɛ b ta menyi alɛ gba fanɛ ajembu nɛ a kɔ ŋkpa nɛ b ta m pɔr na nɛ men ki Ebɔrɛ be ebu a la bɔrɛmatapo cheembiana a bɔla Yesu Kristo so a lara kiyoyu to be esarga nɛ a bee par Ebɔrɛ.

1 Pita 2:9

Ama menyi ere la kanaŋ mo nɛ Ebɔrɛ lara nna nɛ men baa la bɔrɛmatapoana nɛ b shi kuwurji be kanaŋ to nseŋ naa la kanaŋ cheembi to ebi nɛ b la Ebɔrɛ be basa gbagba nɛ men ba kute esa nɛ e tre menyi ashi tentembiri to a yɔ mo gbagba be mamachi be kefulto to na be asheŋgboŋ be asheŋ n sa basa.

Kelaraŋŋini 1:6

nseŋ ta anyi ŋ ki mbe kuwura to ebi nɛ bɔrɛmatapoana nɛ an baa shuŋ mbe Ebɔrɛ nɛ Etuto na. Kemaŋkura nɛ eleŋ e baa la Yesu Kristo peya saŋkikɛ mbaanaayɔ. Amɛn.

Kelaraŋŋini 3:18

Amoso, mee sa menyi nfɛra nna fanɛ men tɔ shuwa mo nɛ a maŋ kɔ saŋgre kikɛ amo to ŋ kutɔ, saŋɛ na so menyeeŋ dii dama. Men tɔ asɔbuuso fuful gba ashi ŋ kutɔ m buu men be anishinyɔr be eyurkpaŋ na so nseŋ tɔ kudur malɛ gba n fɔr men be anishiana so n tiŋ a wu.

Kelaraŋŋini 5:10

Fo ta bumo ŋ ki an be Ebɔrɛ be kuwura to ebi nɛ bɔrɛmatapoana nɛ b baa shuŋ mo nɛ b ba ji kuwura kasawule so.”