Jɛremaya 31:34 - EBƆRƐ BE KAWƆL

³⁴ Bumo be ekama maaŋ naŋ ŋini mo barkasa kananɛ e beeŋ wora m pin Enyɛnpe Ebɔrɛ na, ŋkpal manɛ so, bumo be bewura nɛ bebɔlpo kikɛ beeŋ pin ma nsaa wora ma kasonu. Ma alɛ beeŋ ta bumo be alubi m paŋ bumo nsaa maaŋ naŋ nyiŋi amo kikɛ. Ma, Enyɛnpe Ebɔrɛ e kaŋɛ na.”

Jɛremaya 31:34 ပူးပေါင်းရင်းမြစ်များ

1 Kronikɛls 28:9

Ade kikɛ be kaman nɛ e kaŋɛ Sɔlɔmɔn malɛ le: “M pibinyɛn, ta fo kagbene nɛ fo nfɛra kikɛ a shuŋ fo tuto be Ebɔrɛ na. Mo e nyi anyi be nfɛra nɛ kusɔ nɛ anyee sha kikɛ. Nɛ fo ba mo kutɔ, e beeŋ sɔ fo, ama nɛ fo shile mo bre, mo alɛ beeŋ kplaŋ fo so mbaanaayɔ.

Nshɛ 25:7

Ta ma kebiato be alubi nɛ kusoe kpakpaso be asheŋ woraso m paŋ ma, nseŋ nyiŋi ma ŋkpal fo kasha nɛ fo alelasheŋ so.

Aizaaya 11:9

Kusɔ lubi kikɛ maaŋ naa wɔ Ebɔrɛ be kebee cheembi nɛ baa tre Zayɔn na so. Kananɛ nchu bɔlɔ teku to na, aloŋ nɛ basa nɛ b nyi nsaa bunyaŋ Enyɛnpe Ebɔrɛ na gba beeŋ baa kaa shi kasawule na so.

Aizaaya 29:24

Kumo be kaman nɛ basa nɛ b maa pin asheŋ to na e fara a pin asheŋ to, nɛ bumo nɛ baa munto a bile asheŋ malɛ e sɔ ma keŋini kagbenefuliso.”

Aizaaya 30:26

Kufɔl beeŋ fuli to parr fanɛ epeŋi nɛ epeŋi malɛ e fuli to ale ashunu so n ti so, a du fanɛ nchɛnshunu be kefulto na. Kachɛ nɛ Enyɛnpe Ebɔrɛ na beeŋ fɔr nseŋ kre mbe basa be achuu nseŋ chɛ bumo be alɔana na nɛ le beeŋ wora.

Aizaaya 33:24

Enyɛnpe Ebɔrɛ na beeŋ ta menyi be alubi m paŋ menyi, nɛ esa kama nɛ e wɔ anyi be kasawule so maaŋ naŋ fubel ŋ kaŋɛ le: “Mee lɔ nna!”

Aizaaya 33:6

Mo nɛ anyee fute a yige so, ŋkpal e kaa bee mɔlga mbe basa jemanɛ kikɛ nsaa sa bumo kanyiasheŋ nɛ kashennyi damta so. Kebaaŋana Enyɛnpe Ebɔrɛ nsaa nu a sa mo nɛ baaŋ baa sha kewora ga a chɔ kusɔ kikɛ.

Aizaaya 38:17

Ma nɛnɛ so nɛ fo shin nɛ asheŋ kpakpaso ere tu ma. Ama fo kasha kuŋ ma, nɛ m maŋ wu n yɔ bubuni to. Fo alɛ kpele fo anishi n lɛ ashi ma alubi so.

Aizaaya 43:25

Ma, e naa ta menyi be alubi a paŋ menyi, ŋkpal esa nɛ e la ma so. Ma alɛ maŋ naa nyiŋi alubi nɛ men wora ŋ gbiti ma na.

Aizaaya 44:22

Ma e fuge menyi be alubi fanɛ afu ka ber kuwɔlpa n ya lɛ na nna. Men bɛta m ba ma kutɔ. Ma e la esa nɛ e bee mɔlga menyi.”

Aizaaya 52:6

Jemanɛ ko bee ba nɛ men pin fanɛ ma e la Ebɔrɛ nɛ ŋ kaŋɛ menyi asheŋ ere kikɛ pɔɛŋ nɛ a wora.”

Aizaaya 54:13

Ma, Enyɛnpe Ebɔrɛ na gbagba e naŋ ŋini fo basa asheŋ, nseŋ sa bumo kedama nɛ kayurwushi damta.

Jɛremaya 24:7

Meeŋ naŋ sa bumo ŋgbene nɛ e beeŋ baa sha kebaanyi ma, Enyɛnpe Ebɔrɛ na. Kumo be kaman nɛ b pin fanɛ b la ma basa nna nɛ ma alɛ la bumo be Ebɔrɛ. Ŋkpal manɛ so, baaŋ laŋɛ bumo be ŋgbene kikɛ m bɛ ma so.

Jɛremaya 32:40

Ma nɛ bumo malɛ beeŋ wora kɔnɔkoŋwule be ŋkre nɛ k beeŋ baa wɔtɔ mbaanaayɔ. Ma alɛ maaŋ yige kebaawora asheŋ lela a sa bumo nseŋ shin nɛ b baa ŋana ma ashi bumo be ŋgbene to, a maaŋ naaŋ shile ma.

Jɛremaya 33:8

B daŋ wora alubi n da ma so nseŋ kini ma n lar ma kaman, ama ma alɛ beeŋ ta bumo be alubi nɛ bumo be kekini ma na m paŋ bumo.

Jɛremaya 50:20

Loŋ be jemanɛ na kaŋ fo, kulubi kikɛ maaŋ naa wɔ Israɛl be efuli so, nɛ kumu kpakpaso kikɛ malɛ maaŋ naa wɔ Juda be efuli so. Ŋkpal manɛ so, meeŋ ta basa nɛ n yige bumo nɛ b ji efute na be alubi m paŋ bumo. Ma, Enyɛnpe Ebɔrɛ e kaŋɛ na.”

Jɛremaya 9:23

Kumo be kaman nɛ Enyɛnpe Ebɔrɛ na naŋ kaŋɛ le: “Benyiashempo e sa maa puchi bumo be kanyiasheŋ so, ŋko belempo e sa maa puchi bumo be eleŋ so, ŋko damawuraana e sa maa puchi bumo be kedama so.

Hoziya 2:20

Meeŋ bɛ kɔnɔ nɛ n nase na so n ta fo ŋ ki meya, saŋɛ na so, feeŋ pin fanɛ ma e la Enyɛnpe Ebɔrɛ na kashenteŋto.

Maika 7:18

O Enyɛnpetale Ebɔrɛ, Ebɔrɛ kikɛ maŋ naa wɔtɔ a du fanɛ fo. Fo e naa ta fo basa be alubi a paŋ bumo. Fo alɛ be agbo maa wɔtɔ a yɔ. Kuwɔrwu e naa fuli fo kagbene.

Maika 7:19

Fo e naa wu anyi kuwɔr fanɛ kananɛ fo daa wora na. Fee chichi anyi be alubi so nna a ta amo a lɛ teku be kechimbi to.

Habakuk 2:14

Ama kananɛ teku baŋ bɔlɔ nchu n sɔ kaplɛkama a dese na, aloŋ nɛ basa be kebaanyi Enyɛnpe Ebɔrɛ na be kemaŋkura be asheŋ beeŋ ba sɔ kasawule ere kikɛ so.

Matiu 11:27

Kede be kaman nɛ Yesu naŋ kaŋɛ le: “N Tuto ta kusɔ kama nna m bɔɔ ma enɔ. Esa kama maŋ nyi esa nɛ e la Ebinyɛn na she Etuto na, esa kikɛ malɛ maŋ naa nyi Etuto na she Ebinyɛn na nɛ bumo nɛ Ebinyɛn na bee sha keta Etuto na ŋ ŋini na nawule.

Luuk 1:77

ŋ ŋini mbe basa kananɛ baaŋ nya bumo be alubi be ketampaŋ bumo. Baaŋ nya kumɔlga.

Baru lela nɛ Jɔn kute na 17:3

Nɛ basa malɛ baa nyi fo, Ebɔrɛ nɛ fo nawule la kashenteŋ be Ebɔrɛ na nseŋ naa nyi ma, Yesu Kristo nɛ fo shuŋi na, kumo ere baaŋ baa kɔ ŋkpa nɛ k maŋ kɔ ekar na.

Baru lela nɛ Jɔn kute na 17:6

N ta fo asheŋ ŋ ŋini basa nɛ fo lara durnya ere to m bɔɔ ma enɔ na. B daa la feya nna nɛ fo ta bumo m bɔɔ ma enɔ nɛ b ta fo kamalga na n wɔtɔ bumo be ŋgbene to.

Baru lela nɛ Jɔn kute na 6:45

Anebiana na be nsibɛ na to bee kaŋɛ fanɛ: ‘Ebɔrɛ beeŋ ŋini basa kikɛ asheŋ.’ Ekama nɛ e bee nu kusɔ nɛ Etuto na bee kaŋɛ nseŋ naa koya asheŋ ashi mo kutɔ bee ba ŋ kutɔ nna.

Ashuŋ Shunso 10:43

Anebiana kikɛ daŋ malga mbe asheŋ ŋ kaŋɛ fanɛ ekama nɛ e yirda mo, e beeŋ nya mbe alubi be ketampaŋ ashi mbe ketre na be eleŋ to.”

2 Kɔrintebi 2:10

Nɛ esa baŋ wora kulubi nɛ men ta m paŋ mo, ma alɛ gba ta m paŋ amodoŋwura na. Nɛ kusɔ nɛ ma alɛ baŋ ta m paŋ, nɛ ketampaŋ be kesheŋ ko malɛ baa wɔtɔ nna na, n ta nna m paŋ ashi Kristo be anishito ŋkpal menyi so.

2 Kɔrintebi 4:6

Ebɔrɛ mo nɛ e kaŋɛ fanɛ: “Men shin nɛ kefulto e shi tentembiri to n lar n nyaŋɛ,” koŋwule na e naa shin nɛ mbe kefulto bee nyaŋɛ anyi be ŋgbeneana to a bar anyi Ebɔrɛ be kemaŋkura be kanyiasheŋ be kefulto nɛ k bee nyaŋɛ Kristo be anishito na.

Ɛfesesebi 1:7

Ŋkpal manɛ so, Kristo be luwu na so e shin nɛ an nya an be amu na. Ebɔrɛ ta anyi be alubi m paŋ anyi. Kashenteŋto malɛ Ebɔrɛ be kuwɔr be kakɛ nɛ e bugi kagbene kikɛ n sa anyi na shi pasaa.

1 Tɛsalɔnikaebi 4:9

Kananɛ menyeeŋ baa sha men braana beyirdapo bre maŋ naŋ daga an ka naŋ sibɛ ŋ kaŋɛ menyi kumo be asheŋ. Ebɔrɛ teŋ ŋ ŋini menyi gbagba kananɛ menyeeŋ baa sha abar.

Hibruwebi 5:12

A daŋ daga fanɛ men baa la beŋinipo naniere, ama hale mbre she esa e naaŋ laŋɛ ŋ ŋini menyi kashenteŋ be abɔrɛsheŋ be sososo na, men maa pin to. A daŋ daga fanɛ men baa tiŋ a ji ajibi gbɛgbɛso naniere, ama kenyipo nɛ menyi alɛ kraa nuu na.

Hibruwebi 8:11

Saŋɛ na baŋ fo, bumo be ekama maaŋ kaŋɛ mo barkasa ŋko ŋ kaŋɛ mbe efuli so be esa kama fanɛ: ‘Pin Enyɛnpe na.’ Ŋkpal manɛ so, baŋ yili bumo be ebibiso n ya fo bumo be ejuŋkparpo, ekama nyam beeŋ baa nyi ma.

Hibruwebi 8:12

Meeŋ ta bumo be alubisheŋ m paŋ bumo ŋkaa maaŋ naŋ nyiŋi bumo be alubi na kikɛ.”

1 Jɔn 2:20

Ama menyi ere, Yesu Kristo ta Kiyoyu Cheeŋ na nna n wɔtɔ menyi to nɛ menyi kikɛ e pin kashenteŋ na.

1 Jɔn 2:27

Ama menyi ere, Yesu Kristo ta Kiyoyu Cheeŋ na nna n wɔtɔ menyi to nɛ e shir a wɔ menyi to. A maŋ daga fanɛ men naŋ nya esa ko nɛ e ŋini menyi, ŋkpal manɛ so, mbe Kiyoyu na e naa ŋini menyi asɔ kikɛ. Kusɔ kama malɛ nɛ e bee ŋini la kashenteŋ nna, mannɛ efɛ. Amoso, men baa bɛ Kiyoyu na be keŋini so nseŋ shir a wɔ Kristo na to.

1 Jɔn 5:20

Anyi alɛ nseŋ naa nyi Ebɔrɛ Pibinyɛn na ka ba m ba sa anyi nfɛra nɛ an pin kashenteŋ be Ebɔrɛ na, anyi alɛ wɔ mo kashenteŋ be Ebɔrɛ na to nna, hale mo Pibinyɛn Yesu Kristo na to. Mo e la kashenteŋ be Ebɔrɛ na, nɛ ŋkpa nɛ k maŋ kɔ ekar na.

1 Samuɛl 2:12

Eli be mbinyɛnsobi na daa la basa lubi nna nsaa maa nu a sa Ebɔrɛ,