Jeems 3:17 - EBƆRƐ BE KAWƆL

¹⁷ Kanyiasheŋ nɛ k shi ebɔrɛso na bre maŋ kɔ kulubi kikɛ kumo to. Kumo e naa bar kagbenewushi nsaa shin nɛ basa du boeŋ nsaa shuli a nu asheŋ nɛ basa pɔtɛ bee kaŋɛ. Kuwɔr nɛ alelasheŋ e bɔlɔ kumo to. Esa nɛ e kɔ loŋ be kanyiasheŋ maŋ la nfɛranyɔnyɔwura, mo alɛ maŋ kɔ kebirkɔnshi.

Jeems 3:17 ပူးပေါင်းရင်းမြစ်များ

1 Bewura 3:12

Meeŋ sa fo kusɔ nɛ fo kule na. Meeŋ sa fo kanyiasheŋ nɛ nfɛra a chɔ basa kama nɛ b juŋkpar fo m ba durnya ere to nɛ bumo nɛ baaŋ ba kumo to fo kaman kikɛ.

1 Bewura 3:28

Israɛl be basa ka nu kananɛ Ewura Sɔlɔmɔn ji asheŋ na nɛ b ta bunyaŋ gboŋgboŋi n sa mo ŋkpal b ka pin fanɛ Ebɔrɛ e sa mo loŋ be kanyiasheŋ nɛ e tiŋ n ji le be asheŋ kpakpaso ere nɛnɛ so.

1 Bewura 3:9

amoso jande sa ma kanyiasheŋ nɛ nfɛra nɛ meeŋ ta a pin kulubi nɛ kelela. Saŋɛ na so meeŋ tiŋ n ji bumo so kuwura nɛnɛ; nɛ mannɛ aloŋ, nuso nɛ meeŋ tiŋ n wora n ji fo basa damta ere kikɛ so kuwura?”

1 Kronikɛls 22:12

Enyɛnpe nɛ e la fo Ebɔrɛ na e sa fo kanyiasheŋ nɛ nfɛra nɛ fo baa wora asheŋ amo be ekpa so, nseŋ juŋkpar Israɛl ashi mbe mbra be ekpa so nɛnɛ.

1 Kronikɛls 22:9

Enyɛnpe na malɛ teŋ juŋkpar n nase le be kɔnɔ n sa ma: Fo pibi kaŋ ba ki ewura meeŋ shin nɛ kagbenewushi e baa wɔ mbe kasawule so. Kebia na be ketre e naŋ ba la Sɔlɔmɔn ŋkpal manɛ so mbe kuwurji be saŋɛ nɛ meeŋ kuŋ Israɛl nɛnɛ nɛ kagbenewushi e baa wɔ kumo to.

Job be kawɔl 28:12

Ama nnɛ nɛ esa beeŋ wu kanyiasheŋ? Nnɛ nɛ anyi beeŋ tiŋ ŋ koya asheŋ be kepinto?

Job be kawɔl 28:23

Ebɔrɛ nawule e nyi ekpa nɛ k bee yɔ kanyiasheŋ akpa. Mo nawule e nyi kakpa nɛ k wɔ.

Job be kawɔl 28:28

Kumo be kaman nɛ e kaŋɛ edimɛdi le: “Kanyiasheŋ e la keta bunyaŋ gboŋ n sa ma, Enyɛnpe Ebɔrɛ na. Nɛ kelar alubi to malɛ la asheŋ be kepin to.”

Ɛksodɔs 36:2

Kumo be kaman nɛ Mosis tre Besalɛl nɛ Oholiab nɛ benyiashempo kama nɛ Enyɛnpe Ebɔrɛ sa kasɔwora be kenyi nɛ basa nɛ baa sha kechɛto n shuŋ na kikɛ ŋ kaŋɛ bumo fanɛ b fara kushuŋ na.

Aŋasa 2:6

Ŋkpal manɛ so, Enyɛnpe Ebɔrɛ na e naa sa kanyiasheŋ. Mo kutɔ nɛ kenyi nɛ asheŋ be kepinto bee shi.

Aizaaya 2:4

Enyɛnpe Ebɔrɛ na beeŋ naŋ lɔŋɛ efuligboŋana nɛ kelantokɔ wɔ amo be basa to na nɛ b naaŋ nyalɛ abar so. Kumo be kaman nɛ b ta bumo be etokobi m bɛl ntekpa nseŋ ta bumo be akpa malɛ m bɛl eloji. Efuliana na maaŋ naa ŋini bumo be basa kena be kekɔ kikɛ, ŋko n naaŋ kɔ abar kena gba kuraa.

Aizaaya 32:6

Bewulpo bee malga kawuli be mmalga nna nsaa kre asheŋ lubi be kewora be nia. Kusɔ kama nɛ baa wora ŋko a kaŋɛ la katege nna n sa Enyɛnpe Ebɔrɛ na. Bumo alɛ maa sa basa nɛ akoŋ kɔ ajibi ŋko basa nɛ achukoŋ kɔ nchu.

Aizaaya 40:11

Enyɛnpe Ebɔrɛ na bee keni mbe efuli so nna, fanɛ kananɛ mbolpɔkpapo bee keni mbe mbolpɔ so na. E bee ta mbolpɔbi na nna a di ŋkɔŋ, nsaa juŋkpar mbolpɔ nioana na malɛ boeŋ boeŋ.

Danɛl 1:17

Ebɔrɛ daŋ sa mbrantiɛfɔlbi ana na nwɔl be kenyi nɛ asheŋ be kepinto nna, nseŋ ta kebaa tiŋ a kute bɔrɛdare nɛ edare gbagba be afito be kenyi n ti Danɛl bre so.

Malakai 2:9

“Amoso nɛ n shin nɛ Israɛl be basa kplaŋ menyi so ŋkpal men ka maa wora ma kasonu, nsaa kpɛa to a ŋini ma basa asheŋ so na.”

Malakai 3:3

Mbe demu be keji beeŋ baa du nna fanɛ b ka ŋalga gbiti a lara amo be eyurpi nna. Kananɛ bɔyɛpo bee ŋalga gbiti nɛ shuwa a lara amo be eyurpi na, nɛ Enyɛnpe gba beeŋ fɔr bɔrɛmatapoana na so, saŋɛ na so baaŋ ta esarga nɛ a daga m ba sa mo Enyɛnpe Ebɔrɛ na.

Matiu 23:28

To, loŋ nɛ men du basa be anishito. Basa baŋ wu menyi, baa tre menyi basa lela nna, ama men be ŋgbene to bre kebirkɔnshi nɛ alubisheŋ e bɔlɔ to.

Matiu 5:8

Kagbenefuli la bekama nɛ kulubi kama maŋ wɔ bumo be ŋgbene to na peya nna, ŋkpal manɛ so, baaŋ wu Ebɔrɛ.

Matiu 5:9

Kagbenefuli la bekama nɛ baa bar kagbenewushi basa so na peya nna, ŋkpal manɛ so, Ebɔrɛ beeŋ tre bumo mbe mbia.

Luuk 21:15

Ŋkpal manɛ so, meeŋ bugi menyi be nnɔ nɛ men doŋana e pɔɔ menyi so ŋ gben ŋko n ji m bri menyi ŋ gben.

Luuk 6:36

Amoso, men baa wu kuwɔr fanɛ kananɛ men Tuto bee wu kuwɔr na.

Baru lela nɛ Jɔn kute na 1:14

Esa nɛ baa tre Kamalga na daŋ ki dimɛdi nna m ba kaa wɔ anyi to. An wu mbe kemaŋkura nɛ kuwɔr be kakɛ nɛ kashenteŋ bɔlɔ kemaŋkura na to. Le be kemaŋkura ere la mo peya nna ŋkpal e ka la Ebɔrɛ Pibinyɛn koŋwule na so.

Baru lela nɛ Jɔn kute na 1:47

Yesu ka wu Nataniɛl ka bee ba mo kutɔ nɛ e kaŋɛ mo le: “Kashenteŋto, Israɛl be esa gbagba nde nɛ efɛsheŋ kikɛ maŋ wɔ mo to.”

Ashuŋ Shunso 11:24

Baanabas daa la esa ga a kɔ yirda nɛ Kiyoyu Cheeŋ na bɔlɔ mo to. Ŋkpal loŋ so, basa damta daŋ ba pin Ebɔrɛ bumo be ŋgbene to.

Ashuŋ Shunso 9:36

Kache ko daa la eyirdapo a wɔ Jɔpa nɛ baa tre mo Tabita. Mbe Griik tre e la Dɔɔkas. Kumo be kifito e la Chibir. Kelela nɛ e daa wɔtɔ a wora saŋkama nsaa chɛ betirpo to.

Romebi 12:18

Men baa wora ania kanaŋkamaso nɛ menyeeŋ tiŋ nɛ menyi nɛ basa kikɛ e baa wɔ kagbenewushi be kebaawɔtɔ to.

Romebi 12:9

Men shin nɛ menyi be kasha e baa la kashenteŋ be kasha. Men baa kishi alubisheŋ nsaa far a chɛ alelasheŋ.

Romebi 15:14

Ŋ kurgepoana, ma alɛ gba baa nyi geeŋ fanɛ alelasheŋ e baŋ bɔlɔ menyi alɛ gbagba to nseŋ naa nyi fanɛ men kɔ kanyiasheŋ kikɛ nɛ men gbagba e tiŋ ŋ ŋini abar asheŋ.

1 Kɔrintebi 12:8

Kiyoyu na bee kaa sa esa ko kanyiasheŋ be kamalga be kakɛ nna ŋkaa sa eko malɛ nfɛra mo nɛ a shi mo gbagba kutɔ nɛ e malga be kakɛ.

2 Kɔrintebi 10:1

Ma, Pɔɔl gbagba nɛ b yɛ: “E baa wɔ men kutɔ e la bawala nna, ama nɛ e baa wɔ kufɔ e bee ŋini mbe kenyɛn nna”, mee kule menyi nna ŋkpal Kristo be kebaala esa nɛ bawala so fanɛ:

2 Kɔrintebi 6:6

An bɔla an be kebaawɔtɔ nɛ k maŋ kɔ eyurpi so nɛ anyi be kanyiasheŋ so nɛ anyi be kanyitiso nɛ anyi be kebaala basa so ŋ ŋini fanɛ an la Ebɔrɛ be beshumpo nna ashi Kiyoyu Cheeŋ nɛ kashenteŋ be kasha to.

2 Kɔrintebi 7:11

Men keni kusɔ nɛ le be kagbenejija nɛ k bee par Ebɔrɛ ere bar menyi, kananɛ k ta menyi ŋ ki kenishiperewuraana. Men keni kananɛ k bar menyi men be amu be kekɔnsɔ be eleŋ loŋ nseŋ keni kananɛ k shin nɛ men be ŋgbene kaa nɛ kananɛ k bar menyi kufu nɛ kasha nɛ ŋgbene mo nɛ a maa lar esa kaman. Men naŋ keni kananɛ k shin nɛ menyee sha kewu asheŋ nɛ amo be kashenteŋ be ekpa so loŋ. Kashenteŋto, men ŋini fanɛ ekpa kama so, men maŋ wora n da so ashi le be asheŋ ere to.

2 Kɔrintebi 9:10

Ebɔrɛ nɛ e bee sa bedɔpo asɔ duuso nɛ baa duu nseŋ naa sa menyi kusɔ jiso koŋwule na e naaŋ sa menyi asɔ duuso kikɛ n shin nɛ a wora keshi n ti so nseŋ shin nɛ men nya kasɔteŋi damta ashi men be kelela to.

Ɛfesesebi 5:9

Ŋkpal manɛ so, esa baa wɔ kefulto na to, alelasheŋ be yiri kikɛ nɛ asheŋ niŋiso nɛ kashenteŋ e naa lar mo to.

Filipaiebi 1:11

Nɛ menyi alɛ baa wɔ loŋ be kebaawɔtɔ to, kashenteŋ be edalelasheŋ nɛ a shi Yesu Kristo nawule kutɔ e naaŋ bɔlɔ menyi to nɛ basa e ta kemaŋkura nɛ epaŋ be kedi n sa Ebɔrɛ.

Filipaiebi 4:8

Ŋ kurgepoana, ma kamalga be ekar nde fanɛ men shin nɛ asɔ lela nɛ a daga kapandi e bɔlɔ men be nfɛra to. Loŋ be asɔ na e la kashenteŋ be asɔ nɛ asɔ nɛ a maŋ kɔ eyurpi amo to nɛ asɔ nɛ amo be asheŋ bee bɔla ekpa nɛ asɔ nɛ a bee par basa nɛ asɔ nɛ a walɛ kenya nɛ asɔ nɛ a daga kesa bunyaŋ. Loŋ be asɔ ere kikɛ e daga fanɛ men baa fɛ amo be asheŋ.

Kɔlɔsiebi 1:10

Loŋ nɛ menyeeŋ baa kɔ kebaawɔtɔ nɛ k daga Enyɛnpe na be basa ka kɔ nɛ men be asheŋ e baa par mo nɛnɛ nɛ men baa wora kelela be yiri kikɛ m baa pin Ebɔrɛ nɛnɛ a ti so.

1 Tɛsalɔnikaebi 2:7

Ama saŋɛ nɛ an daa wɔ menyi kutɔ na, an daa du boeŋ nna fanɛ kananɛ ebinio bee keni mbe mbia so a lɔlɔ bumo na.

1 Timoti 5:21

Ebɔrɛ nɛ Kristo Yesu nɛ emalaika nɛ b lara n yili na be anishito nɛ n yil a kaŋɛ fanɛ fo nu n sa le be keŋiniana ere nsaa maŋ kpal fo ka nyi esa ko be kebaawɔtɔ so a ji mo ŋkpɛatoso be demu.

2 Timoti 2:24

A maŋ daga Enyɛnpe malɛ be kenya ka bee kɔ nlu. A daga fanɛ e baa la esa basa kikɛ kutɔ nseŋ naa la eŋinipo lela nɛ e kɔ kanyiti

Taites 1:15

Basa nɛ b du cheembi, kusɔ kama malɛ du cheembi nna bumo kutɔ, ama bekama nɛ b maŋ du cheembi bumo alɛ nsaa maŋ kɔ yirda na, shɛŋ shɛŋ maŋ du cheembi bumo kutɔ. Bumo be ŋgbene nɛ bumo be nfɛra fɛso kikɛ maŋ lar so.

Taites 3:2

Kaŋɛ bumo fanɛ b sa maa malga alubi a gbiti esa kikɛ, bumo alɛ e sa maŋ la basa nɛ baa bar kebagato, ama b baa sha basa keteri nsaa ta da nɛ k du boeŋ a ŋini basa kikɛ.

Hibruwebi 12:11

Ama kashenteŋ bre, saŋɛ nɛ b baa niŋi esa ekpa, mbe kagbene bee jija mo nna. Ama keniŋi na be kaman ekama nɛ e bii keniŋi na be kifito daŋ nya alelasheŋ be kebaawɔtɔ be kagbenefuli be tɔnɔ nna.

Hibruwebi 12:14

Men wora ania nɛ menyi nɛ basa kikɛ e baa wɔ ebel nɛ men baa kɔ kebaawɔtɔ cheembiana, ŋkpal manɛ so, esa kama maaŋ wu Ebɔrɛ na ama amodoŋwura baa kɔ kebaawɔtɔ cheembi nna.

Jeems 1:17

Kelela be yiri kikɛ nɛ kakɛ lela kikɛ bee shi ebɔrɛso nna a ba. Ebɔrɛ nɛ e to kefulto na kutɔ nɛ asɔ na kikɛ bee shi a ba. Ebɔrɛso be kefulto bee kaa chɛrga a bar tentembiri, ama Ebɔrɛ bre maa chɛrga kikɛ.

Jeems 1:5

Ama menyi to be ekama nɛ e maŋ kɔ kanyiasheŋ nsaa pin kusɔ nɛ e beeŋ wora a gben, amodoŋwura e kule Ebɔrɛ nɛ e chɛ mo to, ŋkpal manɛ so, Ebɔrɛ e naa bugi kagbene a sa basa asɔ nsaa maa bishi bumo nnɔ. Amoso, fo kama nɛ fo kule mo kanyiasheŋ, fo maaŋ paŋ kumo.

Jeems 2:13

Esa nɛ e maa wu mo braana kuwɔr, kachɛ nɛ Ebɔrɛ bee ji amodoŋwura demu e maaŋ wu mo alɛ gba kuwɔr. Ama esa nɛ e bee wu basa kuwɔr, Ebɔrɛ beeŋ wu amodoŋwura kuwɔr a chɔ loŋ.

Jeems 2:4

Le be mmalga ere maŋ walɛ, ŋkpal manɛ so, nfɛra lubi so nɛ men yil a kpɛa to na.

Jeems 3:15

Mannɛ ebɔrɛso nɛ loŋ be kanyiasheŋ shi, durnya ere to nɛ k shi a la basa be nfɛra lubiana be asheŋ nɛ a shi ayoyu lubi kutɔ.

Jeems 4:8

Men firgi n taga to Ebɔrɛ nɛ e firgi n taga to menyi. Alubiworapoana nɛ nfɛraanyɔnyɔwuraana ere, men lara men be enɔana nɛ ŋgbene ashi alubi be kewora to.

1 Pita 1:22

Naniere bre men ka nu n sa kashenteŋ na nɛ b fɔr men be ŋgbeneana to nɛ men nyalɛ so a kɔ kashenteŋ be kasha a sha men kurgepoana ere, men baa ta men be ŋgbene kikɛ a sha abar kagbene koŋwuleso.

1 Pita 2:1

Amoso, men lara alubi kikɛ ashi menyi to. Men sa maŋ naa ku efɛ ŋko a kɔ kebirkɔnshi ŋko yurkishi ŋko katege be mmalga.

1 Pita 2:18

Anya, men baa nu a sa men nyɛnpeana nsaa sa bumo bunyaŋ kikɛ nɛ k daga, mannɛ bumo nɛ b la benyɛnpe lela nsaa shu basa so na nawule, bumo nɛ b du nyaŋnyaŋ na gba ti so.

1 Jɔn 3:18

Ma mbi shasoana, men sa maŋ shin nɛ an baa kɔ mmalga ŋko nnɔ nawule a sha basa, men shin nɛ an baa kɔ aworbi nɛ kashenteŋ a sha basa.

1 Jɔn 3:3

Esa kama nɛ e kɔ le be tama ere ashi Kristo to bee keni mbe kumu so nna a du cheembi fanɛ kananɛ Kristo du cheembi na.