Hibruwebi 12:2 - EBƆRƐ BE KAWƆL

² Men shin nɛ an ta anyi be anishi n yuu Yesu nɛ e la anyi be yirda ere be ejuŋkparpo nɛ esa nɛ e bee shin nɛ yirda bee yili to nɛnɛ a fo kumo be ekar na so. Mo e daŋ kpal kachako so be kagbenefuli mo nɛ k jo mo na so a maŋ ta kewu kedibi largato so be luwu na n tre shɛŋ nseŋ ji kumo nseŋ ya kaa tase Ebɔrɛ be kuwurputi be jisoso na.

Hibruwebi 12:2 ပူးပေါင်းရင်းမြစ်များ

Nshɛ 110:1

Nɛ Enyɛnpe Ebɔrɛ na kaŋɛ n nyɛnpe, ewura na le: “Chena ma jisa so hale nɛ n ya shin nɛ fo ji eleŋ fo doŋana so.”

Nshɛ 138:8

Fo, Enyɛnpe Ebɔrɛ na beeŋ wora m bɔlɔ kusɔ kama nɛ fo nase kumo be kɔnɔ so. Fo kasha nɛ k maa chɛrga na wɔtɔ nna mbaanaayɔ; amoso, jande sa maŋ kini anyi, fo basa n lɛ.

Aizaaya 31:1

Asheŋ maaŋ nyalɛ n sa bekama nɛ baa yɔ Ijipt be efuli so n ya kaa fin kechɛto na! Baa ta bumo be amu nna a deŋi Ijipt be benapo be egbaŋɛ nɛ egbaŋɛturko be keshi nɛ benapo lempo so. Ama b maa ta bumo be amu a deŋi Enyɛnpe, Israɛl be Ebɔrɛ cheembi na so ŋko a fin mbe kechɛto.

Aizaaya 45:22

Mee pla enɔ a tre durnya kikɛ to be basa nna, nɛ b kilgi m ba ma kutɔ nseŋ nya kumɔlga. N nawule kpeŋ e la Ebɔrɛ a wɔtɔ.

Aizaaya 53:3

Ekama daŋ keni mo jiga nna nseŋ kini mo n lɛ. Kagbenejija nɛ ebesa damta e daŋ bɔlɔ mo to, nɛ mo alɛ ji kanyiti nseŋ sɔ amo kikɛ n deŋi mbe kumu so. Ekama daa maa sha kewu mo kenishiso gba. B daŋ wu mo nna fanɛ esa jiga.

Aizaaya 8:17

Enyɛnpe Ebɔrɛ na ta mbe kumu nna ŋ ŋana mbe basa so, ama amo nɛ amo kikɛ ma ere kraŋ yirda mo nseŋ ta ma tama n wɔtɔ mo to nna.

Maika 7:7

Ama ma ere bee keni Enyɛnpe Ebɔrɛ na be anishito nna nseŋ ta tama a jo mo nɛ e mɔlga ma. Ma Ebɔrɛ na malɛ beeŋ nu ma kekule.

Zakareya 12:10

Ma, Enyɛnpe Ebɔrɛ na beeŋ shin nɛ kuwɔrwu nɛ kabɔrɛkule be kiyoyu e gbelge m ba ewura Deevid be kamanebi nɛ basa nɛ b wɔ Jerusalɛm to na kikɛ so. Baaŋ to kenishi n wu esa nɛ b da mo kekpa m mɔ na nseŋ shu mbe keeli fanɛ kananɛ baa shu ebi koŋwule be keeli na, nseŋ wora kuwɔr be asheŋ fanɛ esa nɛ e paŋ mbe wurkoŋnyɛn na.

Nɔmbɛs 21:9

Ndoŋ nna nɛ Mosis ta danyaŋ n lɔŋɛ kuwɔ n shiga kedibi tenteŋ so. Ekama malɛ nɛ kuwɔ baŋ duŋ nɛ e maŋ kumu so ŋ keni kumo, bee nya alenfia nna.

Matiu 16:21

Yili kumo be kamɔnchɛ na a yɔ nɛ Yesu fara a ŋini mbe bebɛsopo na le: “A daga ŋ ka yɔ Jerusalɛm n ya ji awurfoŋ ga benimuana nɛ bɔrɛmatapowuraana nɛ mbraŋinipoana na be enɔ to. Baaŋ mɔ ma nɛ n tiŋi luwu na to kumo be kachɛ sasopo to.”

Matiu 20:28

fanɛ kananɛ ma, Nyiŋgbasa Pibinyɛn gba maŋ ba nɛ b ba shuŋ ma na. M ba nna nɛ m ba shuŋ nseŋ ta ma ŋkpa n sɔ basa damta n yige.”

Maak 14:36

E yɛ: “Etuto, n Tuto, feeŋ tiŋ n wora kusɔ kama, ta awurfoŋ ere ashi ma so. Ama mannɛ ma keparso, shin nɛ k baa la feya.”

Maak 15:28

Kumo be loŋ e daŋ shin nɛ abɔrɛsibɛ na bɔla ekpa fanɛ, b ta mo n ti alubiworapoana so.

Maak 16:19

Enyɛnpe Yesu ka malga bumo kutɔ n loge nɛ e yɔ ebɔrɛso n ya chena Ebɔrɛ be jisoso, ebunyampo be kakpa.

Maak 9:12

Nɛ e kaŋɛ bumo le: “Kashenteŋ, Elaija bee juŋkpar a ba nna nɛ e ba lɔŋɛ kusɔ kama n yili. Ŋkeshin nɛ manɛ e ba nɛ abɔrɛsibɛ na bee kaŋɛ fanɛ ma, Nyiŋgbasa Pibinyɛn beeŋ ji etɔrɔ damta nɛ b keni ma jiga?

Maak 9:24

Epul na to nɛ kebia na mo tuto kaŋɛ awɔrso: “Ŋ kɔ yirda, ama k maŋ shi nna. Chɛ ma to!”

Luuk 17:5

Kachako Enyɛnpe Yesu be beshuŋipo na kaŋɛ mo le: “Ti anyi so yirda.”

Luuk 23:11

Nɛ Hɛrɔd nɛ mbe benapo wora mo nfɛlsheŋ nseŋ wora mo eyurto ga. Ade be kaman nɛ Hɛrɔd shin nɛ b ta asɔbuuso lela m buu Yesu shiaso nseŋ shin nɛ b naŋ bɛta mo n ya sa Pailat.

Luuk 24:26

Men maŋ nyi fanɛ asheŋ nɛ a wora ere kikɛ daga kewora Kristo na nna pɔɛŋ nɛ e luri mbe kemaŋkura na to a?”

Baru lela nɛ Jɔn kute na 1:29

Asheŋ ere ka wora ŋ klade nɛ Jɔn wu Yesu ka bee ba mo kutɔ nɛ e kaŋɛ basa le: “Men keni, Ebɔrɛ be Kpakpafɔlbi nɛ k bee lara durnyaebi be alubi ashi bumo to a lɛ na.

Baru lela nɛ Jɔn kute na 12:24

Ma e kaŋɛ menyi kashenteŋto na fanɛ kuyubi baa maŋ tɔr shishɛr to n wu, k beeŋ baa la keduusobi koŋwule nna saŋkikɛ. Ama nɛ fanɛ k baŋ tɔr shishɛr to ŋ kɔr pɔɛŋ nseŋ wu, k bee bar asɔrso damta nna.

Baru lela nɛ Jɔn kute na 12:32

Ama nɛ b kaŋ maŋ ma so ashi kasawule ere so bre, meeŋ bar basa kikɛ ŋ kutɔ.”

Baru lela nɛ Jɔn kute na 13:3

Yesu daa nyi Etuto na ka daŋ ta eleŋ kikɛ m bɔɔ mo ere Yesu na enɔ nseŋ naa nyi e ka shi Ebɔrɛ kutɔ m ba nseŋ naa bɛta a yɔ mo kutɔ.

Baru lela nɛ Jɔn kute na 6:40

Ŋkpal manɛ so, n Tuto be aparsheŋ e la fanɛ esa kama nɛ e wu ma, Nyiŋgbasa Pibinyɛn na nseŋ yirda, amodoŋwura beeŋ nya ŋkpa nɛ k maŋ kɔ ekar na nɛ n tiŋi mo ashi luwu to lalaloge be kachɛ na.”

Baru lela nɛ Jɔn kute na 8:56

Men tuto Eebraham be kagbene daŋ fuli mo ga ŋkpal e ka daa shin nɛ e nya ma saŋɛ n wu so. Kashenteŋto malɛ, e wu kumo nɛ mbe kagbene fuli mo.”

Ashuŋ Shunso 2:36

To, menyi, Israɛlebi kikɛ men baa nyi geeŋ fanɛ Yesu koŋwule nɛ men gbir m mata kedibi largato so na nɛ Ebɔrɛ shin nɛ e ki Enyɛnpe nɛ Kristo na.”

Ashuŋ Shunso 3:15

Amoso, men mɔ esa nɛ e bee sa basa Ebɔrɛ be ŋkpa. Ama Ebɔrɛ shin nɛ e tiŋi luwu na to nɛ anyi gbagba ji kumo be loŋ be shɛda.

Ashuŋ Shunso 5:31

Ebɔrɛ shin nɛ e tiŋi luwu to n yɔ mbe jisoso, ebunyampo be kakpa fanɛ Ejuŋkparpo nɛ Emɔlgapo nɛ Israɛlebi e tiŋ n nya ekpa n lar bumo be alubi to nɛ Ebɔrɛ e ta m paŋ bumo.

Ashuŋ Shunso 5:41

Nɛ beshuŋipo na lar nshɛrwuraana na kutɔ nɛ kagbenefuli ŋkpal Ebɔrɛ ka shin nɛ bumo alɛ tiŋ n ji awurfoŋ ŋkpal Yesu be ketre na so so.

1 Kɔrintebi 1:18

Ŋkpal manɛ so, luwu mo nɛ Kristo wu kedibi largato so be kubɔya na la kawulisheŋ nna n sa basa nɛ b wɔ kemur be ekpa to na. Ama anyi nɛ an wɔ kumɔlga be ekpa to ere bre, loŋ be kubɔya na la Ebɔrɛ be eleŋ nna.

1 Kɔrintebi 1:23

Ama anyi ere, Kristo mo nɛ b daŋ gbir m mata kedibi largato so na be asheŋ be kubɔya nɛ anyee bɔ a sa basa. Loŋ be kubɔya na malɛ la kusɔ nɛ k bee kagle Juwebi ekpa nna nsaa la kawulisheŋ a sa Nnyamase malɛ.

Ɛfesesebi 2:16

Loŋ na basa anyɔ na beeŋ ki basa koŋwule nɛ bumo nɛ Ebɔrɛ malɛ e nyalɛ ŋkpal kedibi largato na so, saŋɛ na so malɛ e beeŋ shin nɛ kebarga to na e loge.

Ɛfesesebi 5:2

A daga fanɛ kasha e baa juŋkpar menyi kebaawɔtɔ ere to fanɛ kananɛ Kristo sha anyi nseŋ ta mbe kumu n sa anyi nɛ loŋ be kakɛ na walɛ a la sarga nɛ kumo be efɛa bee dufɛ viim a par Ebɔrɛ na.

Filipaiebi 1:6

Amoso, m baa nyi fanɛ Ebɔrɛ nɛ e baŋ fara le be kushuŋ lela menyi to ere beeŋ shin nɛ k baa wɔ menyi to loŋ n ya loge nɛnɛ kachɛ nɛ Kristo Yesu beeŋ naŋ ba na.

Filipaiebi 3:20

Ama anyi ere, ebɔrɛso be basa e la anyi nɛ an baa jɔŋ anyi be aya so a jo anyi be Emɔlgapo, Enyɛnpe Yesu Kristo nɛ e shi ebɔrɛso m ba.

2 Timoti 4:8

Naniere bre ma kejinlar be kakɛ e ka a jo ma nɛ n sɔ. Kumo be kamɔnchɛ Enyɛnpe nɛ e maa ji demu a puni na beeŋ ta kumo ŋ kɛ ma. Mannɛ n nawule, ama e beeŋ ta kumo ŋ kɛ bekama nɛ b kɔ kasha a jo mbe kelar m ba na gba n ti so.

Hibruwebi 1:13

To, nɛ malaika mo malɛ nɛ Ebɔrɛ daŋ kaŋɛ le: “Ba chena ma jisoso nfe hale nɛ n ya ta fo doŋana nɛ b ba gbir fo kumuli”?

Hibruwebi 1:3

Ebi na nɛ Ebɔrɛ be kemaŋkura bɔla mo so n nyaŋɛ n dii efuli fanɛ kefulto na. Mo e la Ebɔrɛ be da be kaduli gbagba chap nsaa ta mbe kamalga nɛ k kɔ eleŋ ga na a kɔ durnya ere to. Mo alɛ ka daŋ kpra basa be alubi ashi bumo to n loge na, e ya chena ebɔrɛso Enyɛnpetale be jisoso nna, ebunyampo be kakpa.

Hibruwebi 10:14

Amoso, sarga koŋwule nɛ e baŋ ta n shin nɛ basa nɛ baa ki cheembi na bee ki basa cheembi na mbaanaayɔ.

Hibruwebi 10:33

Men nyiŋi saŋko b ka daa bugi to a tege menyi nseŋ daa tɔrɔ menyi nɛ saŋko malɛ b daa wora basa nɛ men daa maŋ lar bumo kaman na loŋ ŋko?

Hibruwebi 11:36

Ŋkpal yirda so b daŋ wora beko eyurto nna nseŋ kuya bumo so nseŋ daŋ pɛ bede malɛ ŋ kre n ta bumo n ti ebuana.

Hibruwebi 12:3

Men fɛ kananɛ e maŋ ta kekishi damta mo nɛ alubiworapoana daŋ ta n tu mo na kikɛ n tre shɛŋ na be asheŋ ŋ keni, saŋɛ na so men maaŋ pɔ aba n shin nɛ menyi be ŋgbene e baa jija menyi.

Hibruwebi 13:13

Amoso, men shin nɛ an lar keeyi na to n yɔ mo kutɔ n ya tu mo n ji mbe ŋaba nɛ b ŋaba mo na.

Hibruwebi 5:9

Ebɔrɛ malɛ ka baŋ shin nɛ e ki cheembi n loge so, mo so nɛ ekama nɛ e bee nu a sa mo beeŋ bɔla n nya kumɔlga nɛ k maŋ kɔ ekar na.

Hibruwebi 7:19

Ŋkpal manɛ so, Mosis be mbra na daa maŋ tiŋ n ta shɛŋ ŋ ki cheembi. Ama naniere tama popɔr naŋ ba nɛ an bɔla kumo so n firgi n taga Ebɔrɛ to.

Hibruwebi 8:1

Kusɔ nɛ anyee malga ere kikɛ nde fanɛ an kɔ bɔrɛmatapo nimuso mo nɛ e chena Ebɔrɛ be jisoso ashi mbe kemaŋkuragboŋ be kuwurputi ase ebɔrɛso.

Hibruwebi 9:28

To, loŋ koŋwule na nɛ b daŋ ta Kristo gba n lara sarga kela koŋwule pati nɛ e kpra basa damta be alubi ashi bumo so. Mo alɛ beeŋ naŋ bɛta kela nyɔsopo n lar m ba, ama kede bre, mannɛ alubi be kekpara so nɛ e bee ba, e kɔ kumɔlga nna a ba nɛ e ba sa bumo nɛ baa jo mo na kikɛ.

Jeems 2:1

Ŋ kurgepoana, ŋkpal men ka yirda an Nyɛnpe Yesu Kristo nɛ kemaŋkuragboŋ wɔ mo so na so, men sa maa kɔ ŋkpɛato.

1 Pita 1:11

Kristo be Kiyoyu mo nɛ e daa wɔ bumo to na daŋ wu Kristo be etɔrɔ nɛ kemaŋkura mo nɛ k beeŋ lar etɔrɔ na be kaman na nna ŋ kaŋɛ bumo nɛ b wora ania a fin saŋɛ nɛ asheŋ na kikɛ beeŋ wora.

1 Pita 3:18

Ŋkpal manɛ so, Kristo gba wu kela koŋwule nna pati, ŋkpal basa be alubi so, esa nɛ e maŋ kɔ kulubi e wu n sa basa lubi na, saŋɛ na so e beeŋ yɛra menyi Ebɔrɛ kutɔ. B daŋ mɔ mbe eyur, ama Ebɔrɛ shin nɛ e nya ŋkpa ashi mbe Kiyoyu na to.

1 Pita 3:22

Mo, Yesu Kristo koŋwule na e yɔ ebɔrɛso n ya kaa tase Ebɔrɛ be jisoso, kakpa nɛ ebunyampo bee chena, a ji emalaika kikɛ nɛ bejuŋkparpoana kikɛ nɛ eleŋana kikɛ so kuwura na.

Juud 1:21

Men baa kɔ men be amu a wɔ Ebɔrɛ be kasha to a jo saŋɛ nɛ an Nyɛnpe Yesu Kristo beeŋ wu anyi kuwɔr n shin nɛ anyi nɛ mo e baa wɔtɔ mbaanaayɔ na.

Kelaraŋŋini 1:11

Ebɔl na yɛ: “Sibɛ asɔ nɛ feeŋ wu ere n wɔtɔ kawɔl to nseŋ ta kawɔl na n sa nɛ b ya sa asɔri ashunu na. Asɔriana nɛ a wɔ Ɛfeses nɛ Smɛɛna nɛ Pɛɛgamem nɛ Tayataira nɛ Saadis nɛ Filadɛlfia nɛ Laodisiya na.”

Kelaraŋŋini 1:17

Ŋ ka wu mo na nɛ n tɔr mbe anishito fanɛ ŋ ka wu na. Ndoŋ nna nɛ e ta mbe enɔjiso n deŋi ma so nseŋ kaŋɛ: “Sa maa lɔ kufu, ma e la Faraŋko nɛ Lalaloge,

Kelaraŋŋini 1:8

Enyɛnpe Ebɔrɛ na yɛ: “Ma e la Alfa nɛ Omega, Enyɛnpetale mo nɛ e daa wɔtɔ nseŋ kraa wɔtɔ nseŋ naa ba na.”

Kelaraŋŋini 2:8

Kede be kaman nɛ e naŋ kaŋɛ: “Sibɛ kawɔl ere n sa Smɛɛna be kade to be asɔri be malaika na ŋ kaŋɛ mo le: ‘Mmalga ere shi emo nɛ e la sososo nɛ lalaloge nseŋ daŋ wu n naŋ tiŋi a wɔ ŋkpa to na kutɔ nna.