Ɛfesesebi 4:30 - EBƆRƐ BE KAWƆL

³⁰ Menyi alɛ e sa maa jija Ebɔrɛ be Kiyoyu Cheeŋ nɛ Ebɔrɛ ta n dulgi menyi n yili kesɔnyigeachɛ na.

Ɛfesesebi 4:30 ပူးပေါင်းရင်းမြစ်များ

Jɛnesis 6:3

Kachako nɛ Enyɛnpetale kaŋɛ: “M maaŋ shin nɛ kiyoyu nɛ n ta n wɔtɔ dimɛdi to na e baa wɔ mo to mbaanaayɔ, ŋkpal manɛ so, e la eyur nɛ ŋklaŋ nna, amoso e beeŋ ji nfɛ kalfa nɛ adunyɔ nawule nna durnya ere to.”

Jɛnesis 6:6

Nɛ kumo be loŋ besa Enyɛnpe Ebɔrɛ na ga nseŋ jija mbe kagbene ŋkpal e ka to dimɛdi kasawule ere so so.

Nshɛ 78:40

Jemanɛ nɛ b daa wɔ keshishɛrsawule na so na, ale damta nɛ b daŋ lar Ebɔrɛ kaman n jija mbe kagbene!

Nshɛ 95:10

Nfɛ adena nɛ bumo be asheŋ daa nu Ebɔrɛ agbo, nɛ e kaŋɛ le: “Saŋkikɛ basa ere bee wora a foe ekpa nna; bumo alɛ maa pin ma asheŋ woraso to.”

Aizaaya 43:24

Menyi maŋ tɔ efɛa belbelso be eduwu n sa ma ŋko n sa ma menyi be asɔbɔya be nfɔ gba. Ama menyi be alubi nɛ men bela n deŋi ma so; nseŋ shin nɛ menyi be aworandeso lar ma ebɔl.

Aizaaya 63:10

Ade be kaman nɛ Enyɛnpe Ebɔrɛ be basa na lar mo kaman ŋ kilgi a kɔ mo nɛ mbe Kiyoyu Cheeŋ na be kagbene jija mo ga. Amoso Enyɛnpe Ebɔrɛ ki bumo doŋ nna nseŋ kɔ bumo.

Aizaaya 7:13

Nɛ Aizaaya malɛ kaŋɛ le: “Ewura Deevid be kamanebi, men kaŋ asoe n nu nfe. Menyee kaa wora edimɛdi a keni. Menyee sha kewora Ebɔrɛ gba nna ŋ keni a?

Ezikɛl 16:43

Fo teŋ so kananɛ ŋ keta fo jemanɛ nɛ fo daa la kebia fɔlbi na nna nseŋ wora ekishisheŋ nɛ agbo pɛ ma ga. Fo daŋ wora amo nɛ a chɔ loŋ gba nseŋ ki sakaleche gba kuraa. Fo daga kasogberge!” Ma, Enyɛnpe Ebɔrɛ e kaŋɛ na.

Hoziya 13:14

M maaŋ lara bumo ashi bubuni to ŋko m mɔlga bumo ashi luwu to. Luwu nɛ nchaŋ kikɛ bee ŋmɛa bumo be kabuna. M maaŋ naŋ wu bumo kuwɔr kikɛ.

Maak 3:5

Kumo be kaman nɛ Yesu keni bumo agbo nɛ kagbenejijaso ŋkpal b ka kɔ amu kpakpaso so nseŋ kaŋɛ kanyɛn na: “Teŋi fo enɔ to.” E ka teŋi kumo to nɛ mbe enɔ na nya eleŋ.

Luuk 21:28

To, nɛ asheŋ ere kaŋ ba fara a wora, men maŋ menyi be amuana so n saŋɛ menyi be eyurana to, ŋkpal manɛ so, menyi be kumɔlga be jemanɛ taga to.”

Baru lela nɛ Jɔn kute na 3:33

Esa kama malɛ nɛ e sɔ loŋ be shɛda na gbagba bee ji shɛda nna fanɛ Ebɔrɛ ka la kashenteŋ be Ebɔrɛ.

Ashuŋ Shunso 7:51

Men kɔ amu kpakpaso ga. Menyi be ŋgbene du fanɛ nnyamase peya nna, men maŋ kɔ Ebɔrɛ be kubɔya na be asoe. Menyi nɛ men nanaana baa la kukoŋwule nna. Menyi alɛ gba maa nu a sa Kiyoyu Cheeŋ na.

Romebi 8:11

Nɛ Ebɔrɛ nɛ e tiŋi Yesu ashi luwu to na be Kiyoyu baa wɔ menyi to bre, kumo ere mo koŋwule nɛ e tiŋi Kristo ashi luwu to na gbagba beeŋ naŋ bɔla mbe Kiyoyu nɛ e wɔ menyi to na so n sa menyi be eyurana nɛ a beeŋ kaŋ wu kachako ere ŋkpa.

Romebi 8:23

Mannɛ asɔtoso na gba nawule, anyi nɛ an nya Kiyoyu nɛ e la Ebɔrɛ be kakɛ juŋkparso na gba bee shu to nna nsaa jo saŋɛ nɛ Ebɔrɛ na beeŋ ta anyi ŋ ki mbe mbia n shin nɛ an nya anyi be amu kikɛ nyam na.

1 Kɔrintebi 1:30

Mo nawule e shin nɛ menyi nɛ Kristo Yesu ba ki kukoŋwule, mo alɛ e shin nɛ Kristo shin nɛ an pin kanyiasheŋ gbagba. Kristo na malɛ gba so e shin nɛ Ebɔrɛ bee ta anyi fanɛ basa niŋiso nɛ basa cheembi, basa nɛ b fɔr so n nyalɛ so nɛ b nya kumɔlga.

1 Kɔrintebi 15:54

Amoso, nɛ eyur nɛ k bee mur ere baŋ ki eyur mo nɛ k maa mur na nɛ eyur nɛ k bee wu ere malɛ ki eyur nɛ k maa wu na, kumo ere kusɔ nɛ abɔrɛsibɛ na bee kaŋɛ na bee bɔla ekpa nna na fanɛ: “Naniere luwu mur. Kekɔmpɔɔso e ka.

1 Tɛsalɔnikaebi 5:19

Men sa maŋ kuŋ Kiyoyu Cheeŋ na ekpa.

Hibruwebi 10:29

To, nɛ kananɛ k du le ere nɛ esa bee keni Ebɔrɛ Pibinyɛn na jiga ŋko a ta Ebɔrɛ be kɔnɔkoŋwule na be ŋkre be ŋklaŋ nɛ baa ta amo a fɔr basa so nɛ baa ki cheembi na fanɛ kusɔ nɛ k maŋ la shɛŋ ŋko a tege kuwɔr be kakɛ be Kiyoyu na bre, amodoŋwura be kasogberge beeŋ baa shi ga a chɔ Mosis be mbra na peya.

Hibruwebi 3:10

Amoso nɛ n daŋ nya agbo n wɔtɔ bumo saŋɛ na ebi nseŋ kaŋɛ le na fanɛ: ‘Saŋɛ na kikɛ bumo be ŋgbene bee foe ekpa nna nɛ b maa pin ma ekpaana be asheŋ.’

Hibruwebi 3:17

Nɛ basa mo nɛ e daŋ nya agbo n wɔtɔ nfɛ adena kikɛ na? Mannɛ bumo nɛ b daŋ wora alubi kiyi to nɛ bumo be eyurana daŋ shir ndoŋ na a?

Demujipoana 10:16

Kumo be kaman nɛ b kini efuli pɔtɛ be agbir na kikɛ nseŋ fara a shuŋ Enyɛnpe Ebɔrɛ na. Nɛ Israɛlebi be awurfoŋ nɛ b daa ji na be asheŋ naŋ ba ka tɔrɔ Enyɛnpe Ebɔrɛ na.