Ditɛronɔmi 10:12 - EBƆRƐ BE KAWƆL

¹² To, Israɛl be basa, men nu kusɔ nɛ Enyɛnpe menyi be Ebɔrɛ na bee fin menyi kutɔ. Kumo e la fanɛ men bunyaŋ mo nseŋ bɛ mbe mbra kikɛ so nseŋ ta menyi be ŋgbene kikɛ n sha mo nseŋ shuŋ mo,

Ditɛronɔmi 10:12 ပူးပေါင်းရင်းမြစ်များ

1 Bewura 3:3

Ewura Sɔlɔmɔn ka daa sha Enyɛnpe Ebɔrɛ ga so, e daŋ bɛ kusɔ nɛ mo tuto ewura Deevid kaŋɛ mo so nna. Mo alɛ gba daa ta asɔbɔya nna a lara sarga nsaa chɔɔ duwu ashi abee so be kakpa nɛ baa bunyaŋ Enyɛnpe Ebɔrɛ na.

2 Bewura 10:31

Ama Jehu daa maŋ ta mbe kagbene kikɛ m bɛ Enyɛnpe nɛ e la Israɛl be Ebɔrɛ na be mbra so. E daa wora alubi nɛ Jeroboam daŋ wora nseŋ shin nɛ Israɛl be efuli tɔr kulubi to na nna.

2 Bewura 18:3

E daŋ bɛ mo nananyɛn ewura Deevid be aya so nna nseŋ wora kusɔ nɛ keniŋi Enyɛnpe Ebɔrɛ na be anishito.

2 Bewura 18:6

E ji kashenteŋ nsaa wora kasonu a sa Enyɛnpe Ebɔrɛ na nseŋ naa bɛ mbra nɛ Enyɛnpe Ebɔrɛ ta n sa Mosis dra dra na fanɛ e ta n sa mbe basa na so nɛnɛ.

1 Kronikɛls 28:9

Ade kikɛ be kaman nɛ e kaŋɛ Sɔlɔmɔn malɛ le: “M pibinyɛn, ta fo kagbene nɛ fo nfɛra kikɛ a shuŋ fo tuto be Ebɔrɛ na. Mo e nyi anyi be nfɛra nɛ kusɔ nɛ anyee sha kikɛ. Nɛ fo ba mo kutɔ, e beeŋ sɔ fo, ama nɛ fo shile mo bre, mo alɛ beeŋ kplaŋ fo so mbaanaayɔ.

2 Kronikɛls 15:12

B daŋ nase nnɔ nna n sa abar a laŋɛ kananɛ baaŋ ta bumo be ŋgbene nɛ ayoyu kikɛ a bunyaŋ bumo nananyɛnana be Ebɔrɛ na.

Job be kawɔl 36:11

Nɛ b wora Ebɔrɛ kasonu nsaa shuŋ mo, asheŋ naa nite nɛnɛ nna a sa bumo nɛ b naŋ nya kayurwushi bumo be kebaawɔtɔ to.

Nshɛ 119:2

Kagbenefuli la bekama nɛ baa bɛ mbe atande so, nsaa wora mo kasonu ashi bumo be ŋgbene to na peya nna.

Nshɛ 128:1

Enyɛnpe Ebɔrɛ na beeŋ nɛfa ekama nɛ e bee nu a sa mo nsaa wora asheŋ a bɛ mbe mbra be ekpa so na.

Nshɛ 145:20

Enyɛnpe Ebɔrɛ na bee kuŋ bekama nɛ baa sha mo na nna, ama kumukpakpasowuraana bre, e bee mur bumo nna.

Nshɛ 18:1

Enyɛnpe Ebɔrɛ mee sha fo; fo kutɔ nɛ ma eleŋ bee shi.

Nshɛ 34:9

Bekama nɛ b la Enyɛnpe Ebɔrɛ be basa na e bunyaŋ mo. Ŋkpal manɛ so, e bee sa bumo nɛ b yirda mo na asɔ nɛ a tir bumo nna saŋkikɛ.

Nshɛ 81:13

Ma basa, Israɛlebi, daa beeŋ nu n sa ma nseŋ bɛ ma ekpaana so nna,

Nshɛ 81:14

ndafanɛ ma, Enyɛnpe Ebɔrɛ na daa beeŋ nya manaŋ n ta ma eleŋgboŋ na m pɔɔ bumo doŋana kikɛ so n sa bumo.

Ɛksodɔs 23:25

Nɛ men baa shuŋ ma, Enyɛnpe Ebɔrɛ, men be Ebɔrɛ na, ma alɛ beeŋ nɛfa men be ajibi nɛ men be nchu nseŋ lara alɔana kikɛ ashi menyi to.

Kaŋinichiŋgeliŋ 12:13

Ade kikɛ be kaman, kusɔ koŋwule e ka nɛ ŋ kaŋɛ. Baa ŋana Ebɔrɛ nsaa bɛ mbe mbraana so. Ŋkpal manɛ so, loŋ so nɛ Ebɔrɛ to dimɛdi bomin.

Ezikɛl 11:20

Ndoŋ nɛ baaŋ bɛ ma mbraana so nsaa wora asɔ nɛ mee ŋini bumo na. Baaŋ baa la ma basa nɛ ma alɛ e baa la bumo be Ebɔrɛ.

Maika 6:8

Ayai, Enyɛnpe Ebɔrɛ na teŋ kaŋɛ anyi kusɔ nɛ k walɛ. Kusɔ nɛ e bee fin anyi kutɔ e la, kebaawora asheŋ nɛ amo be ekpa so nɛ kebaa ŋini kasha nsaa kɔ kamubrase a nu a sa mo.

Zefanaiya 3:9

Kumo be kaman nɛ n chɛrga basa nɛ b wɔ efuliana na so be ŋgbene nɛ b naa bunyaŋ ma, Enyɛnpe Ebɔrɛ na nawule.

Matiu 22:37

Nɛ Yesu kaŋɛ mo: “Kede e la amo to be kegboŋi: Baa ta fo kagbene kikɛ nɛ fo kiyoyu kikɛ nɛ fo nfɛra kikɛ a sha Enyɛnpe fo Ebɔrɛ na.

Luuk 10:27

Nɛ kanyɛn na kaŋɛ: “A bee kaŋɛ fanɛ fo baa ta fo kagbene kikɛ nɛ fo kiyoyu kikɛ nɛ fo eleŋ kikɛ nɛ fo nfɛra kikɛ a sha Enyɛnpe fo Ebɔrɛ na, nsaa sha fo barkasa fanɛ fo kumu.”

Luuk 11:42

Farisiebi, asheŋ maaŋ nyalɛ n sa menyi, ŋkpal manɛ so, menyee kaa lara menyi be eposɔ fanɛ ashiibi nɛ egabu nɛ amo nɛ a ka na kikɛ gba so be asɔ kudukudusopo a sa Ebɔrɛ, ama men kini keji asheŋ nɛ amo be ekpa so, menyi alɛ maa sha Ebɔrɛ. Le be asɔ ere e daga fanɛ men baa wora nsaa maa gal amo nɛ a ka na gba a lɛ.

Ashuŋ Shunso 9:31

Kumo be kaman nɛ asɔriebi nɛ b daa wɔ Judiya na nɛ Galili nɛ Samɛria na lar bumo be etɔrɔ na to n nya kagbenewushi gbrɛ. Kiyoyu Cheeŋ na e daŋ shin nɛ b daŋ yɔ anishito nseŋ wora keshi n ti so a wɔ Enyɛnpe be kebunyaŋ be kebaawɔtɔ to.

Romebi 1:9

Ebɔrɛ nɛ n ta ma kagbene kikɛ nyam a bɔ mo Pibinyɛn be baru lela na gbagba e la ma shɛdajipo a nyi menyi be asheŋ ka baa wɔ ma kagbene to ashi ma kabɔrɛkule to saŋkikɛ.

Romebi 8:28

Anyi alɛ nyi fanɛ asɔ kikɛ to, Ebɔrɛ bee wora asheŋ nna nɛ a bee ba abar so m ba kaa ki asɔ lela a sa mbe beshapo nɛ e tre m ba mo kutɔ fanɛ b ba kaa wora mbe aparsheŋ na.

Ditɛronɔmi 10:11

Kumo be kaman nɛ e kaŋɛ ma fanɛ m ba juŋkpar menyi, saŋɛ na so menyeeŋ tiŋ n ya kɔ n sɔ kasawule nɛ e nase kumo be kɔnɔ n sa men nananyɛnana na nɛ k baa la menyeya.

Ditɛronɔmi 10:13

nseŋ naŋ wora mbe mbraana nɛ mee ta a sa menyi kabre ere kikɛ kasonu. Nɛ men wora loŋ, asheŋ beeŋ nyalɛ n sa menyi.

Ditɛronɔmi 11:1

Men baa sha Enyɛnpe menyi be Ebɔrɛ na nsaa wora mbe mbraana kikɛ kasonu.

Ditɛronɔmi 11:13

Amoso men baa wora mbraana nɛ n ta a sa menyi kabre ere kasonu. Men baa sha Enyɛnpe menyi be Ebɔrɛ na nsaa ta menyi be ŋgbene kikɛ a shuŋ mo.

Ditɛronɔmi 26:16

“Enyɛnpe menyi be Ebɔrɛ na bee kaŋɛ menyi kabre nna fanɛ men wora mbe mbraana ere kikɛ kasonu nseŋ ta menyi be ŋgbene kikɛ m bɛ amo so kashenteŋto.

Ditɛronɔmi 27:10

amoso men baa wora mo kasonu nsaa bɛ mbe mbraana nɛ n ta a sa menyi kabre ere kikɛ so.”

Ditɛronɔmi 30:16

Nɛ menyeeŋ wora Enyɛnpe, menyi be Ebɔrɛ na be mbraana kasonu nseŋ sha mo bre, menyeeŋ dii dama nsaa la efuli nɛ kumo be basa shi. Enyɛnpe menyi be Ebɔrɛ na malɛ beeŋ nɛfa menyi ashi kasawule nɛ menyee yɔ nɛ men ya sɔ n chena so na so.

Ditɛronɔmi 30:20

Men baa sha Enyɛnpe menyi be Ebɔrɛ na a wora mo kasonu nsaa ji kashenteŋ a sa mo nɛ menyi nɛ men be kaman to ebi e chena kasawule nɛ e nase kumo be kɔnɔ n sa men nananyɛnana, Eebraham nɛ Aizek nɛ Jeekɔb, na so n chɛr.”

Ditɛronɔmi 4:29

Ashi menyi be etɔrɔ na kikɛ to, menyeeŋ ba chɛrga a sha kenaŋ n shuŋ Enyɛnpe Ebɔrɛ na nawule. Nɛ menyi alɛ kaŋ bɛta m ba mo kutɔ nseŋ wora mo kasonu kashenteŋto, e beeŋ naa la menyi be Ebɔrɛ.

Ditɛronɔmi 5:29

Nɛ fanɛ baaŋ baa kɔ le be nfɛra nsaa bunyaŋ ma jemanɛ kikɛ nseŋ naa wora ma mbraana kasonu, kumo ere asheŋ beeŋ nyalɛ n sa bumo nɛ bumo be kamanebi hale mbaanaayɔ.

Ditɛronɔmi 5:33

Men baa bɛ amo kikɛ so, saŋɛ na so, asheŋ beeŋ nyalɛ n sa menyi nɛ men tiŋ n chena kasawule nɛ Enyɛnpe, menyi be Ebɔrɛ na bee ta a sa menyi na so n chɛr.

Ditɛronɔmi 6:13

Amoso men baa bunyaŋ Enyɛnpe menyi be Ebɔrɛ na nsaa shuŋ mo nawule nseŋ naa nase nnɔ mo nawule be ketre to.

Ditɛronɔmi 6:2

A daga fanɛ menyi nɛ menyi be kamanebi kikɛ ka bee bunyaŋ Enyɛnpe menyi be Ebɔrɛ na nsaa wora mbe mbraana nɛ n ta a sa menyi ere kasonu menyi be kebaawɔtɔ kikɛ to, saŋɛ na so menyeeŋ chena kasawule na so n chɛr.

Ditɛronɔmi 6:24

Kumo be kaman nɛ Enyɛnpe anyi be Ebɔrɛ na kaŋɛ anyi kenishipere so fanɛ an baa wora mbraana ere kikɛ kasonu nsaa bunyaŋ mo. Nɛ anyee wora loŋ, e beeŋ baa kuŋ anyi nsaa chɛ anyi to nɛ asheŋ e baa nyalɛ a sa anyi.

Ditɛronɔmi 6:5

Men baa ta menyi be ŋgbene kikɛ nɛ menyi be ayoyu kikɛ nɛ menyi be eleŋ kikɛ a sha Enyɛnpe menyi be Ebɔrɛ na.

1 Timoti 1:5

Anyi ere be keŋini ere be kumu e la kasha nɛ k shi kagbene cheembi nɛ nfɛra lela nɛ yirda kpakpaso to na nna.

Hibruwebi 12:28

Amoso, men shin nɛ an baa chɔrɔ Ebɔrɛ ŋkpal an ka beeŋ nya kuwura mo nɛ k maaŋ tiŋ ŋ gbuŋgbuŋ to na n luri to so. Men shin nɛ an baa bɔla ekpa mo nɛ k bee par Ebɔrɛ so a ta kabɔrɛŋana nɛ kufu a bunyaŋ mo.

Joshuwa 22:5

Ama men baa da so nsaa bɛ mbra nɛ Mosis sa menyi, fanɛ: ‘Men baa sha men Nyɛnpe Ebɔrɛ na, nsaa wora mbe aparsheŋ. Men baa bɛ mbe mbra so, a ji kashenteŋ a sa mo, nsaa shuŋ mo nɛ men be ŋgbene nɛ ayoyu kikɛ.’ ”

Joshuwa 24:14

Kumo be kaman nɛ Joshuwa naŋ kaŋɛ: “Amoso, men baa ŋana Enyɛnpe Ebɔrɛ na nsaa shuŋ mo nɛnɛ kashenteŋto. Men ta men nananyɛnana be agbir nɛ b daa shuŋ saŋɛ nɛ b daa wɔ Yufreetes be lɔr be kaba ndoŋ nɛ Ijipt be kasawule so na kikɛ n lɛ nsaa shuŋ Enyɛnpe Ebɔrɛ na nawule.

1 Jɔn 2:15

Men sa maa sha durnya ere ŋko kusɔ kama nɛ k la durnya ere peya. Esa kama nɛ e bee sha durnya ere maŋ kɔ kasha a sa Etuto Ebɔrɛ na.

1 Jɔn 5:5

Wanɛ e naaŋ tiŋ m pɔɔ durnya ere so nɛ mannɛ esa nɛ e yirda fanɛ Yesu e la Ebɔrɛ Pibinyɛn na?

1 Samuɛl 12:20

Ndoŋ nna nɛ Samuɛl kaŋɛ le: “Men sa maa lɔ kufu. Kashenteŋ nna fanɛ men wora kulubi, ama amo na amo kikɛ, men sa maŋ lar Enyɛnpe Ebɔrɛ na kaman ama men ta menyi be ŋgbene kikɛ a shuŋ mo.