Danɛl 3:28 - EBƆRƐ BE KAWƆL

²⁸ Ndoŋ nna nɛ ewura Nebukadneeza kaŋɛ le: “Kemaŋkura e baa la Shaadrak nɛ Mɛshaak nɛ Abedneego be Ebɔrɛ na peya! Mo e shuŋi mbe malaika nɛ e ba mɔlga mbe nyɛrbi nɛ b yirda mo na. B kini k nu n sa ma nseŋ ta bumo be amu ŋ kpa kelara ŋ kini kejɔŋɛ m bunyaŋ kegbir kikɛ, she bumo be Ebɔrɛ na nawule.

Danɛl 3:28 ပူးပေါင်းရင်းမြစ်များ

Jɛnesis 9:26

E ka sho Keenan kɔnɔ n loge na nɛ e kaŋɛ le: “Shɛm bre, nɛfa e baa wɔ Enyɛnpe nɛ e la Shɛm be Ebɔrɛ na so. Keenan beeŋ ba ki Shɛm be kenya.

1 Kronikɛls 5:20

B daŋ ta bumo be yirda nna n deŋi Ebɔrɛ so ŋ kule mo fanɛ e chɛ bumo to. Nɛ Ebɔrɛ nu bumo be kekule nseŋ chɛ bumo to nɛ b kɔ m pɔɔ Hagebi nɛ basa nɛ b chɛ bumo to a kɔ kena na kikɛ so.

2 Kronikɛls 20:20

Ŋklade kachipurdidi saŋɛ so nɛ ekama lar a yɔ keshishɛrsawule nɛ k mata Tekua na, nɛ ewura Jehoshafat niŋi to ŋ kaŋɛ jimaŋ na le: “Menyi Juda nɛ Jerusalɛm ebi! Men ta men be yirda n deŋi Enyɛnpe nɛ e la menyi be Ebɔrɛ na so nsaa yili to kpakpa. Men yirda kusɔ nɛ mbe anebiana na kaŋɛ menyi na saŋɛ na so asheŋ beeŋ nyalɛ n sa menyi.”

2 Kronikɛls 32:21

Nɛ Enyɛnpe Ebɔrɛ shuŋi malaika nɛ e ya mɔ Asiriya be benapo na nɛ bumo be benapo be benimuana na kikɛ. Nɛ ewurgboŋ na ta anishinyɔr m bɛta n yɔ epe. Kachako e ka wɔ mbe kegbir be lambu to nɛ mbe mbinyɛnsobi ko ta bumo be etokobi m ba mɔ mo.

Ɛzra 1:3

Bekama nɛ b la Enyɛnpe Ebɔrɛ na be basa beeŋ tiŋ n yɔ n ya lɔŋɛ Israɛl be Ebɔrɛ nɛ e wɔ Jerusalɛm to na be bɔrɛlambu na m pɔr.

Ɛzra 6:11

Ma, ewura, bee yili kumo nna fanɛ esa kama nɛ e chɛrga ma kamalga ere, meeŋ shin nɛ b pee mbe ebu be keyɔri nseŋ shɛl kumo n da mo n futi m bɔl. Kumo be kaman nɛ b bure mbe kowu na kikɛ nɛ k ki kelambure.

Nshɛ 103:20

Menyi emalaika lempoana, nɛ menyee nu Enyɛnpe Ebɔrɛ be kɔnɔ nsaa wora mo kasonu na kikɛ e kpaŋ mo!

Nshɛ 147:11

Basa nɛ baa bunyaŋ mo nɛ bumo nɛ bumo be yirda wɔ mbe kasha nɛ k maa chɛrga na so be asheŋ e naa par mo nsaa fuli mbe kagbene.

Nshɛ 33:18

Enyɛnpe Ebɔrɛ na bee keni bekama nɛ baa wora mo kasonu so nna; nɛ mbe kasha nɛ k maa loge na malɛ wɔ bekama nɛ b yirda mo na so.

Nshɛ 33:21

Anyi be ŋgbene fuli anyi nna; ŋkpal an ka yirda mbe ketre so.

Nshɛ 34:22

Enyɛnpe Ebɔrɛ na beeŋ mɔlga mbe basa. E beeŋ kuŋ bekama nɛ baa fin kekuŋ ashi mo kutɔ na.

Nshɛ 62:8

Basa, men yirda Enyɛnpe Ebɔrɛ na nsaa kaŋɛ mo men be asheŋ tirso saŋkama. Ŋkpal manɛ so, Ebɔrɛ na nawule e la anyi be ekumpo.

Ɛksodɔs 20:5

nsaa jɔŋɛ amo ase ŋko a shuŋ amo, ŋkpal manɛ so, ma e la Enyɛnpe Ebɔrɛ men be Ebɔrɛ na. Ma alɛ maa sha kechamana. Ma e naa kpal betuto nɛ benio be alubi so e gberge bumo be mbia kusoe hale n ya fo bumo be kenanafofo nɛ kenana gbiramuli na.

Aizaaya 12:2

Ebɔrɛ e la ma emɔlgapo. Meeŋ ta ma yirda n wɔtɔ mo to nsaa maa ŋana kufu. Enyɛnpe Ebɔrɛ na e naa sa ma eleŋ; mo e mɔlga ma.

Aizaaya 37:36

Ade kikɛ be kaman nɛ Enyɛnpe Ebɔrɛ na shin nɛ mbe malaika yɔ Asiriya be basa be keeyi to n ya mɔ benapo ŋgboŋ kalfa nɛ aduburwa nɛ anu. Kare ka chɛ kachipurdidi, nɛ bumo kikɛ wu a dese!

Aizaaya 50:10

Asheŋ beeŋ tiŋ ŋ ki kpakpa n sa menyi nɛ menyee bunyaŋ Enyɛnpe Ebɔrɛ nsaa wora mbe kenya kasonu na. Ama men yirda Enyɛnpe Ebɔrɛ n ta menyi be amu n to mo so.

Danɛl 2:47

Nseŋ kaŋɛ Danɛl le: “Fo Ebɔrɛ na e kɔ eleŋ a chɔ agbirana kikɛ. Mo e la bewuraana kikɛ be Enyɛnpe, Mo alɛ e naa tiŋ a lara alemaŋkarsheŋ be wulo efuli. M pin le be kesheŋ ere nna ŋkpal fo ka tiŋ m bugi alemaŋkarsheŋ be wulo ere be kifito so.”

Danɛl 3:25

Nɛ ewura naŋ kaŋɛ le: “Nɛ manɛ nna nɛ mee wu benyɛn ana ka na edɛ na to nɛ shɛŋ shɛŋ maŋ naŋ kre bumo be eyur, nɛ bumo be eyur malɛ maŋ chɔɔ, nɛ esa nasopo na du fanɛ Ebɔrɛ be malaika?”

Danɛl 4:34

Nɛ ewura Nebukadneeza kaŋɛ le: “Nfɛnshunu na ka choŋ, nɛ ŋ keni esoso nɛ ma nfɛra ba abar so. Ndoŋ nna nɛ n di Enyɛnpetale Ebɔrɛ na epaŋ nseŋ ta kemaŋkura nɛ bunyaŋ n sa emo nɛ e wɔtɔ mbaanaayɔ na. Mo e naa ji kuwura mbaanaayɔ nɛ mbe kuwurji wɔtɔ saŋkama na.

Danɛl 6:16

Amoso ewura na daŋ ponte ŋ kaŋɛ fanɛ b ya pɛ Danɛl nna n ya lɛ ebuluŋ be kemaŋ to, nɛ b wora loŋ. Ama le nɛ ewura na daŋ kaŋɛ Danɛl: “Fo Ebɔrɛ nɛ fee shuŋ kashenteŋto na beeŋ mɔlga fo.”

Danɛl 6:26

N yili mbra ashi ma efuli so kikɛ nna fanɛ ekama e baa ŋana Danɛl be Ebɔrɛ na nsaa sa mo bunyaŋ. Mo e la Ebɔrɛ nɛ e wɔ ŋkpa to na. Mo alɛ bee ji kuwura nna hale mbaanaayɔ. Mbe kuwurji maa ba nɛ kemur kikɛ. Mo alɛ be eleŋ maa loge kikɛ.

Matiu 4:10

Ndoŋ nna nɛ Yesu kaŋɛ mo: “Shile ma anishito Setani! Abɔrɛsibɛ na bee kaŋɛ fanɛ: ‘Bunyaŋ Enyɛnpe fo Ebɔrɛ na nseŋ shuŋ mo nawule.’ ”

Ashuŋ Shunso 4:19

Nɛ Pita nɛ Jɔn bishi bumo: “Menyi ere kutɔ, kenu n sa menyi nɛ kenu n sa Ebɔrɛ, kumo e bɔla ekpa?

Ashuŋ Shunso 5:19

Ama kumo be kanyɛso nɛ Enyɛnpe be malaika ba bugi kabuti na be mbuna nseŋ bar bumo kowu m ba kaŋɛ bumo:

Romebi 12:1

To, ŋ kurgepoana, ŋkpal Ebɔrɛ be kuwɔr be kakɛ damta nɛ e wu anyi na so, mee kule menyi nna nɛ men ta menyi be amu n sa Ebɔrɛ fanɛ sarga nɛ k wɔ ŋkpa to a du cheembi a par Ebɔrɛ. Menyi be kabɔrɛshuŋ nɛ men kɔ a di Ebɔrɛ epaŋ nna na.

1 Kɔrintebi 13:3

Nɛ m baa tiŋ a ta kusɔ nɛ ŋ kɔ a kɛ basa ŋkaa beeŋ naŋ tiŋ n ta ma eyur n sa fanɛ b chɔɔ edɛ ŋkpal ma yirda so, ma alɛ ŋkaa maa kɔ kasha bre, kumo ere m maŋ nya tɔnɔ kikɛ.

Filipaiebi 1:20

Kusɔ nɛ m baa sha ga nsaa tama e la fanɛ m maaŋ pɔ aba ashi ma kushuŋ to, ama saŋkama, fɔnfɔŋ naniere meeŋ baa kɔ kenyɛn nɛnɛ, saŋɛ na so nɛ n wu nna ŋko n wɔ ŋkpa to nna meeŋ ta ma eyur ere kikɛ m bar Yesu Kristo bunyaŋ.

Hibruwebi 1:14

To, kananɛ emalaika be asheŋ du Ebɔrɛ be anishito nna na. Bumo kikɛ la ayoyu nna a shuŋ Ebɔrɛ nɛ e bee shuŋi bumo nɛ baa chɛ bumo nɛ baaŋ nya kumɔlga na to.

Hibruwebi 11:37

Ŋkpal yirda so, b daŋ kpa beko ajembu m mɔ nseŋ daŋ chaŋɛ bede to ntuŋnyɔso nseŋ ta tokobi m mɔ bede malɛ. Ŋkpal yirda koŋwule na so beko daŋ dela mbolpɔ be nwɔl nɛ mboe be nwɔl nna a wɔ ketir to nɛ tɔrɔ nɛ nfɛlso be kekɔrfɛ to.

1 Pita 1:21

Mo so nɛ men ta men be yirda n wɔtɔ Ebɔrɛ mo nɛ e tiŋi mo ashi luwu to nseŋ maŋkura mo na, amoso, men be yirda nɛ tama wɔ Ebɔrɛ na to nna.

Kelaraŋŋini 12:11

Kpakpafɔlbi na be ŋklaŋ na nɛ bumo be shɛda be kamalga na nɛ b ta m pɔɔ mo so, ŋkpal manɛ so, b daa maŋ sha bumo be amu ga hale saŋɛ nɛ b daa shin nɛ b luri luwu to gba na.