Aizaaya 48:12 - EBƆRƐ BE KAWƆL

¹² Kede be kaman nɛ Enyɛnpe Ebɔrɛ naŋ kaŋɛ le: “Men nu nfe, menyi Israɛlebi nɛ men la ma basa nɛ n tre! N nawule e la Enyɛnpe Ebɔrɛ. Ma e la sososo nɛ lalaloge.

Aizaaya 48:12 ပူးပေါင်းရင်းမြစ်များ

Aŋasa 7:24

Amoso, naniere, ma mbinyɛnsobi, men nu nfe. Men kaŋ kusoe n nu kusɔ nɛ mee kaŋɛ ere.

Aŋasa 8:32

Naniere, mbifɔlbi, men kaŋ kusoe n nu, Men wora asɔ nɛ ŋ kaŋɛ ere nɛ a shin nɛ men be ŋgbene e fuli menyi.

Aizaaya 34:1

Menyi efuli kama so be basa e ba abar so nseŋ nu nfe! Durnya kikɛ nɛ kusɔ kama nɛ k wɔ kumo to e ba nfe m ba nu.

Aizaaya 40:26

Maŋ anishi so ŋ keni awɔlpa so! Wanɛ e to achɛkpabi nɛ fee wu ere? Mo ere Ebɔrɛ nɛ e bee juŋkpar amo fanɛ benapo be ejuŋkparpo na, e nyi kananɛ amo kikɛ sa nɛ amo be kekama be ketre! Enyɛnpe Ebɔrɛ na be yuku shi ga, nɛ achɛkpabi na be kekama maa foe mo so.

Aizaaya 41:4

Wanɛ e daŋ shin nɛ le wora? Wanɛ e yili edimɛdi be adrasheŋ n sa bumo? Ma Enyɛnpe Ebɔrɛ nɛ n wɔtɔ sososo na kikɛ na e wora loŋ! Ma, alɛ e naaŋ baa wɔtɔ hale mbaanaayɔ.

Aizaaya 43:10

Menyi Israɛl be basa e la ma eshɛdajipoana; ma e lara menyi nɛ men baa la ma nyɛrbi, saŋɛ na so menyeeŋ pin ma nseŋ yirda ma nseŋ naŋ pin to fanɛ n nawule e la Ebɔrɛ. Ebɔrɛ kikɛ maŋ naa wɔtɔ n ti ma so. Ekama malɛ maaŋ naa wɔtɔ n ti ma so.

Aizaaya 43:11

N nawule kpeŋ e la Enyɛnpe Ebɔrɛ na. Ma alɛ nawule e naaŋ tiŋ m mɔlga menyi.

Aizaaya 44:1

Ade be kaman nɛ Enyɛnpe Ebɔrɛ na kaŋɛ le: “Israɛl be basa, ma e lara menyi fanɛ ma nyɛrbi.

Aizaaya 44:6

Enyɛnpe Ebɔrɛ nɛ e bee ji kuwura Israɛl so nsaa kuŋ kumo na e kaŋɛ le: “Ma e la sososo nɛ lalaloge; n nawule e la Ebɔrɛ. Ma kaman, Ebɔrɛ kikɛ maŋ wɔtɔ.

Aizaaya 46:3

Israɛl be basa, nɛ men la ma basa nɛ b ka a wɔ ŋkpa to, men nu nfe! Jemanɛ nɛ b kurge menyi m ba fo mbre na kikɛ nɛ mee keni menyi so.

Aizaaya 46:4

Ma e la menyi be Ebɔrɛ nsaa beeŋ keni menyi so n ya fo fanɛ menyi ka beeŋ ya bel n fuli amu. Ma e to menyi nsaa keni menyi so; meeŋ chɛ menyi to nseŋ kuŋ menyi nɛ shɛŋ shɛŋ maaŋ wora menyi.”

Aizaaya 49:1

Ekama e nu nfe! Menyi nɛ men wɔ efuli pɔtɛana nɛ a wɔ teku be kaba ndoŋ na gba, e nu nfe. Enyɛnpe Ebɔrɛ na e lara ma nɛ m baa la mbe kenya, nseŋ nase ma ketre pɔɛŋ nɛ b kurge ma.

Aizaaya 51:1

Enyɛnpe Ebɔrɛ na yɛ: “Nɛ menyee sha kebaawora kusɔ nɛ k niŋi nsaa wora Enyɛnpe Ebɔrɛ na kasonu, kumo ere men baa keni menyi nananyɛn Eebraham so a wora asheŋ. Mo e du fanɛ kefalta nɛ men shi kumo to n lar na.

Aizaaya 51:4

Kumo be kaman nɛ Enyɛnpe Ebɔrɛ na naŋ kaŋɛ le: “Ma basa, men nu nfe! Men nu kusɔ nɛ mee kaŋɛ ere! Ma e naa ta ma keŋini a sa efuli pɔtɛana na; nɛ ma mbraana malɛ bee shin nɛ baa pin ma.

Aizaaya 51:7

Menyi nɛ men nyi kusɔ nɛ k daga kewora na e nu nfe! Menyi nɛ men kɔ ma keŋini menyi be ŋgbene to na gba e nu nfe! Men sa maa ŋana basa nɛ baa tege menyi nsaa kaŋɛ menyi asheŋbesaso na.

Aizaaya 55:3

Ma basa, men nu n sa ma nseŋ ba ma kutɔ. Men ba ma kutɔ nseŋ nya ŋkpa! Ma nɛ menyi beeŋ kre kɔnɔkoŋwule be ŋkre nɛ k wɔtɔ mbaanaayɔ, saŋɛ na so meeŋ sa menyi enɛfa nɛ n nase amo be kɔnɔ n sa Ewura Deevid na.

Matiu 20:16

Keŋasa ere be kaman nɛ Yesu kaŋɛ le: “To, amoso, bumo nɛ b shir kaman naniere beeŋ ba ki bejuŋkparpo nɛ bumo nɛ b juŋkpar naniere e ba ki bemantopo.”

Romebi 1:6

Menyi, bumo nɛ men wɔ Rom be kade to ere gba ti efuliana nɛ Ebɔrɛ tre fanɛ men ba kaa la Yesu Kristo peya na so.

Romebi 8:28

Anyi alɛ nyi fanɛ asɔ kikɛ to, Ebɔrɛ bee wora asheŋ nna nɛ a bee ba abar so m ba kaa ki asɔ lela a sa mbe beshapo nɛ e tre m ba mo kutɔ fanɛ b ba kaa wora mbe aparsheŋ na.

1 Kɔrintebi 1:24

Ama bumo, Juwebi nɛ Griikebi nɛ Ebɔrɛ tre na bre kikɛ, kubɔya na la Kristo mo nɛ e la Ebɔrɛ be eleŋ nɛ mbe kanyiasheŋ na nna.

Ditɛronɔmi 32:39

N nawule kpeŋ e la Ebɔrɛ. Ebɔrɛ kikɛ maŋ naa wɔtɔ n ti ma so. Ma e naa shin nɛ luwu bee ba, ma koŋwule na e naa sa ŋkpa. Ma e naa bar doro, ma alɛ e naa chɛ edoro. Esa maaŋ tiŋ ŋ kuŋ kusɔ kama nɛ mee wora akpa.

1 Pita 2:9

Ama menyi ere la kanaŋ mo nɛ Ebɔrɛ lara nna nɛ men baa la bɔrɛmatapoana nɛ b shi kuwurji be kanaŋ to nseŋ naa la kanaŋ cheembi to ebi nɛ b la Ebɔrɛ be basa gbagba nɛ men ba kute esa nɛ e tre menyi ashi tentembiri to a yɔ mo gbagba be mamachi be kefulto to na be asheŋgboŋ be asheŋ n sa basa.

Kelaraŋŋini 1:11

Ebɔl na yɛ: “Sibɛ asɔ nɛ feeŋ wu ere n wɔtɔ kawɔl to nseŋ ta kawɔl na n sa nɛ b ya sa asɔri ashunu na. Asɔriana nɛ a wɔ Ɛfeses nɛ Smɛɛna nɛ Pɛɛgamem nɛ Tayataira nɛ Saadis nɛ Filadɛlfia nɛ Laodisiya na.”

Kelaraŋŋini 1:8

Enyɛnpe Ebɔrɛ na yɛ: “Ma e la Alfa nɛ Omega, Enyɛnpetale mo nɛ e daa wɔtɔ nseŋ kraa wɔtɔ nseŋ naa ba na.”

Kelaraŋŋini 17:14

Baaŋ kɔ Kpakpafɔlbi na kena, ama Kpakpafɔlbi na beeŋ pɔɔ bumo so, mo e la benyɛnpe to be Enyɛnpe nɛ bewura to be Ewura na. Saŋɛ na so, mo nɛ mbe basa treso nɛ bumo koŋwule na la basa laraso nseŋ naa la mbe bebɛsopo mo nɛ b maa lar mo kaman na beeŋ baa wɔtɔ.”

Kelaraŋŋini 2:8

Kede be kaman nɛ e naŋ kaŋɛ: “Sibɛ kawɔl ere n sa Smɛɛna be kade to be asɔri be malaika na ŋ kaŋɛ mo le: ‘Mmalga ere shi emo nɛ e la sososo nɛ lalaloge nseŋ daŋ wu n naŋ tiŋi a wɔ ŋkpa to na kutɔ nna.

Kelaraŋŋini 22:13

Ma e la Alfa nɛ Omega, Faraŋko nɛ Lalaloge nɛ Ejuŋkparpo nɛ Emantopo na.