Aizaaya 41:14 - EBƆRƐ BE KAWƆL

¹⁴ Ade be kaman, nɛ Enyɛnpe Ebɔrɛ na kaŋɛ: “Israɛl be basa, men ka maŋ shi nsaa maa kɔ eleŋ ga ere gba, men sa maa lɔ kufu; meeŋ chɛ menyi to. Ma, nɛ n la Israɛl be Ebɔrɛ cheembi na e naa mɔlga menyi.

Aizaaya 41:14 ပူးပေါင်းရင်းမြစ်များ

Job be kawɔl 19:25

N nyi ma emɔlgapo Ebɔrɛ na ka wɔ ebɔrɛso, nɛ asheŋ ere kikɛ be lalaloge e beeŋ gbelge m ba durnya to m ba mɔlga ma.

Job be kawɔl 25:6

Nɛ nuso nɛ dimɛdi bomin, nɛ e du fanɛ kushushombi, bre du ga ashi Ebɔrɛ be anishito?”

Nshɛ 19:14

Enyɛnpe Ebɔrɛ nɛ fo la ma kefaltagboŋ nɛ ma emɔlgapo. Shin nɛ ma kɔnɔ to be mmalga nɛ ma kagbene to be nfɛra, e baa bɔlɔ fo kenishi.

Nshɛ 22:6

Ama m maŋ naa du fanɛ dimɛdi. Ŋ ki fanɛ kushushombi nna nɛ basa bee keni ma jiga nsaa wora ma eyurto.

Nshɛ 46:5

Ŋkpal Ebɔrɛ ka wɔ kadegboŋ na to so, shɛŋ shɛŋ maa gbuŋgbuŋ kumo. Kachipurdidi kikɛ e bee chɛ kumo to nna.

Nshɛ 78:35

B daŋ nyiŋi fanɛ Ebɔrɛ la bumo be ekumpo nna, nseŋ daŋ naŋ nyiŋi fanɛ Enyɛnpetale Ebɔrɛ e la bumo be emɔlgapo.

Aizaaya 35:10

Baaŋ ta kagbenefuli nɛ nshɛ n wora awɔr n ya luri Jerusalɛm to. Bumo alɛ be ŋgbene beeŋ fuli bumo mbaanaayɔ; ŋkpal manɛ so, kagbenejija nɛ kafɔŋ maaŋ naa wɔtɔ.

Aizaaya 37:4

Asiriya be ewurgboŋ shuŋi mbe benapo be ejuŋkparpo nna nɛ e ba tege Ebɔrɛ nɛ e bee sa ŋkpa na. Enyɛnpe fo Ebɔrɛ na e naaŋ nu katege ere kikɛ nseŋ gberge basa nɛ baa tege mo na kusoe. Amoso kule Ebɔrɛ n sa anyi be basa nɛ b kraa wɔ ŋkpa to na.”

Aizaaya 41:10

Amoso men sa maa lɔ kufu. Ma nɛ menyi e wɔtɔ! Ma e la menyi be Ebɔrɛ. Men sa maŋ shin nɛ kufu e pɛ menyi nɛ men baa chicha! Meeŋ sa menyi eleŋ nseŋ chɛ menyi to. Ma alɛ beeŋ kuŋ menyi nseŋ mɔlga menyi.

Aizaaya 43:14

Kusɔ nɛ Enyɛnpe, Israɛl be Ebɔrɛ cheembi nɛ e mɔlga bumo na kaŋɛ nde: “Meeŋ shuŋi benapo ko nɛ b ba kɔ Babilɔn be efuli so be basa kena nseŋ mɔlga menyi. Ma alɛ beeŋ buri kadegboŋ na be mbunagboŋ to, nseŋ shin nɛ benapo na e ta Babilɔn be basa n wɔtɔ bumo gbagba be ekuloŋgboŋ to n sulɔ bumo a yɔ nɛ b baa boŋ to a shu.

Aizaaya 43:3

Ŋkpal manɛ so, ma e la Enyɛnpe menyi be Ebɔrɛ na. Ma, Israɛl be Ebɔrɛ cheembi na, e la menyi be emɔlgapo. Meeŋ kplaŋ Ijipt nɛ Itiopia nɛ kebonfu nɛ baa tre Seba na be asheŋ so nseŋ sɔ menyi n yige.

Aizaaya 44:22

Ma e fuge menyi be alubi fanɛ afu ka ber kuwɔlpa n ya lɛ na nna. Men bɛta m ba ma kutɔ. Ma e la esa nɛ e bee mɔlga menyi.”

Aizaaya 44:24

“Ma e la, Enyɛnpe Ebɔrɛ, menyi be emɔlgapo na; Ma e la esa nɛ n to menyi. Ma e la Enyɛnpe Ebɔrɛ nɛ e to kusɔ kikɛ na. N nawule e parga kuwɔlpa to n sɔ esoso kikɛ. Ekama malɛ maŋ chɛ ma to n to durnya.

Aizaaya 44:6

Enyɛnpe Ebɔrɛ nɛ e bee ji kuwura Israɛl so nsaa kuŋ kumo na e kaŋɛ le: “Ma e la sososo nɛ lalaloge; n nawule e la Ebɔrɛ. Ma kaman, Ebɔrɛ kikɛ maŋ wɔtɔ.

Aizaaya 47:4

“Ma e la Enyɛnpetale, Israɛl be Ebɔrɛ cheembi na; Ma e la bumo be Emɔlgapo.”

Aizaaya 48:17

Kusɔ nɛ Enyɛnpe, Israɛl be Ebɔrɛ cheembi, nɛ e mɔlga menyi na kaŋɛ nde: “Ma e la Enyɛnpe menyi be Ebɔrɛ, nɛ mee sha keŋini menyi asheŋ ŋkpal menyi be nɛnɛ so, nseŋ juŋkpar menyi ekpa nɛ menyeeŋ baa bɔla so a wora asheŋ.

Aizaaya 49:26

Mo alɛ beeŋ shin nɛ bumo nɛ baa mɛaŋ menyi na gbagba e mɔ abar nsaa wora asheŋ fanɛ b ka boo na. Saŋɛ na so ekama beeŋ pin fanɛ Enyɛnpe Ebɔrɛ na e la anyi be emɔlgapo. Bumo alɛ beeŋ naŋ pin fanɛ Israɛl be Ebɔrɛ lempo na e kɔ n sɔ mbe basa n yige.”

Aizaaya 49:7

Israɛl be basa, ma e la Enyɛnpe menyi be Ebɔrɛ cheembi na. Ma alɛ e la menyi be emɔlgapo! Men daa la anya nna n sa efuli pɔtɛana be bewura nɛ baa keni menyi jiga. Naniere kɔnɔ nɛ mee nase a sa menyi nde: “Bewurjipo nɛ kenimujiana beeŋ gbir m bunyaŋ menyi. Menyeeŋ tiŋ n yirda ma! Ŋkpal manɛ so, ma e la Enyɛnpe menyi be Ebɔrɛ nɛ menyi alɛ la ma basa laraso.”

Aizaaya 54:5

Ŋkpal manɛ so menyi be etopo na beeŋ baa la fanɛ ekul n sa menyi. Mo e la Enyɛnpetale, Israɛl be Ebɔrɛ cheembi na. E beeŋ mɔlga menyi. Mo e naa ji kuwura durnya kikɛ so na.

Aizaaya 54:8

N daŋ nya agbo nna m pal kaman n sa menyi jemanɛ gbrɛbi ko, ama meeŋ naaŋ wu menyi kuwɔr nseŋ sha menyi mbaanaayɔ. Kusɔ nɛ ma, Enyɛnpe Ebɔrɛ, nɛ n la menyi be emɔlgapo na bee kaŋɛ menyi nna na.”

Aizaaya 59:20

Ade kikɛ be kaman nɛ Enyɛnpe Ebɔrɛ naŋ kaŋɛ mbe basa le: “Meeŋ ba Jerusalɛm to m ba kɔ n sɔ menyi, Jeekɔb be kaman to ebi nɛ men lar menyi be alubi kikɛ to.

Aizaaya 60:16

Efuli pɔtɛana be bewura nɛ bumo be basa beeŋ ta bumo be asɔ lela ŋ keni menyi be kadegboŋ na so, fanɛ kananɛ ebinio bee bela mbe mbia na. Saŋɛ na so nɛ men pin fanɛ ma, Enyɛnpetale Israɛl be Ebɔrɛ na e mɔlga menyi nseŋ sɔ menyi n yige.

Aizaaya 63:16

Fo e la an tuto. K wora fanɛ Eebraham nɛ Jeekɔb nɛ b la an nananyɛnana na maŋ naa nyiŋi anyi be asheŋ. Ama fo, Enyɛnpe Ebɔrɛ nɛ fo la an tuto na e naa kuŋ anyi dra kikɛ hale m ba fo kabre.

Jɛremaya 46:27

“Ma basa, men sa maa lɔ kufu. Israɛl be basa, men sa maa chicha kufuso. Kachako meeŋ lara menyi ashi efuli pɔtɛana so m bar menyi epe. Menyi nɛ menyi be kaman to ebi kikɛ beeŋ ba kaa wɔ kayurwushi to nɛ esa kikɛ maaŋ naŋ ta kufu n da menyi.

Jɛremaya 50:34

Ama esa nɛ e beeŋ sɔ bumo n yige na kɔ eleŋ. Mbe ketre e la Enyɛnpetale Ebɔrɛ na. Mo gbagba e naaŋ sɔ bumo be kɔnɔ so n shin nɛ kayurwushi e ba bumo be kasawule so nseŋ bar etɔrɔ Babilɔn be basa so.”

Nfabel 3:57

Nseŋ kaŋɛ ma fanɛ n sa maa lɔ kufu.

Danɛl 10:12

Ndoŋ nna nɛ e kaŋɛ le: “Danɛl sa maa lɔ kufu, baŋ yili saŋɛ nɛ fo fara m bar fo kumu ase a fin kepin asheŋ to na, nɛ Ebɔrɛ nu fo kabɔrɛkule nseŋ shuŋi ma fo kutɔ

Hoziya 11:9

M maaŋ naŋ kaa agbo m mur Israɛlebi kikɛ; ŋkpal manɛ so, n la Ebɔrɛ nna, mannɛ dimɛdi. N la Ebɔrɛ nɛ n du cheembi nna a wɔ bumo to. M maaŋ kaa agbo m ba bumo so kikɛ.

Matiu 7:14

Ama ekpa nɛ k bee yɔ ŋkpa to na maŋ kpalga to nɛ kumo be kabuna malɛ maŋ shi. Basa nɛ baa nya kumo a nite to na malɛ maŋ shi.

Luuk 12:32

Ma basa, men maŋ shi, ama men sa maa lɔ kufu. Ŋkpal manɛ so, men Tuto be keparso nna nɛ e yili kumo fanɛ e beeŋ ta mbe kuwura na n sa menyi.

Romebi 9:27

Le nɛ anebi Aizaaya bee kaŋɛ Israɛlebi be asheŋ awɔrso: “Nɛ Israɛlebi baa shi fanɛ teku ase be ajembubi gba, bumo to be gbrɛbi e naaŋ nya kumɔlga.

Galeeshaebi 3:13

Ama Kristo sɔ anyi ashi kɔnɔso nɛ mbra na bee bar na to nna n yige. E yili anyi be katelamu to nna n shin nɛ b so mo gbagba kɔnɔ n sa anyi, ŋkpal manɛ so, le nɛ abɔrɛsibɛ na bee kaŋɛ: “Ebɔrɛ be kɔnɔso wɔ esa kama nɛ baa ta a shiga kedibi so nna.”

Ditɛronɔmi 7:7

Enyɛnpe Ebɔrɛ na daŋ maŋ sha menyi nseŋ lara menyi nna ŋkpal men ka shi a chɔ basa kikɛ so. Menyi e daa la efuli nɛ k maŋ shibi n fo efuli kama so ashi durnya ere kikɛ to.

Taites 2:14

E ta mo gbagba be kumu n sa anyi nɛ e tiŋ m mɔlga anyi ashi alubisheŋ kikɛ to nseŋ ta anyi ŋ ki basa cheembi nɛ an baa la mo nawule peya m bugi kagbene a wɔtɔ a sha kebaawora alelasheŋ.

Joshuwa 17:18

Abee so be kasawule na be kaba so beeŋ baa la menyeya. K la kupo nna bre ama men ya lɔŋɛ ndoŋ n chena. Kashenteŋ nna fanɛ Keenanebi na kɔ anyembi be egbaŋɛturko nsaa kɔ eleŋ, ama menyeeŋ tiŋ n ju bumo kasawule na so.”

Kelaraŋŋini 5:9

Nɛ b boŋ kashɛ popɔr ko a kaŋɛ: “Fo e daga nɛ fo ta kawɔl sibɛso na nseŋ tiŋ m bu m bu kumo be tɔɔnɛ be abersobi na, ŋkpal manɛ so, fo nɛ b daŋ mɔ nɛ fo ta fo ŋklaŋ n tɔ basa n sa Ebɔrɛ ashi yiri kama to ebi to nɛ ŋgbar kikɛ to ebi to nɛ basa kama to ebi to nɛ efuli kama so ebi to na.